1 yusi muwsa yesefraḏ s tulli n nsibis yeṯruwn lkahen n midyan. ijuwas yures tullis al ṭṭerf n ṣṣeḥreṯ almiy yuṣel al ḥuwrib lliy d jbel n rebbiy. 2 aḏ dinet g uleblub n timsi g amas n teceƹƹelt yeḍherresd lemleyka n lliy diyma yella. yesmuqel muwsa yufa teceƹƹelt teseγa man γiyr man ateḥreq. 3 yuwa g ulis: «maγer zƹema witḥereqc ayuh n tceƹƹelt? tareḥeγ aḥekreγ ayuh n leγribeṯ.»

4 mniyn yezra lliy diyma yella muwsa yeqrebbed, yesγuyas lliy diyma yella seg amas n teceƹelt: «muwsa, muwsa.» yerras: «yinƹem.»

5 yuwayas: «witicefc al dehnit. kkes lbeleγt. mkan lliy tebbedded diyes d tammurt temeqdust.» 6 yaxy yuwayas: «neči d rebbiy n ibabniḵ, rebbiy n ibrahiym aḏ rebbiy n isḥaq aḏ rebbiy n yeƹquwb.» lweqt ḏḏin yeḥrez muwsa uḏmis afelxaḍert yugeḏ ayesmuqel al rebbiy.

7 yuwayas lliy diyma yella:

«rahiy neči zriγ ḏḏul n middeniw g miṣr aḏ sliyγ zwiksen afelxaḍert lliy ssexdemen disen d iweƹƹeren aḏ senneγ s leƹḏebesen. 8 aḏ zwiγd bac atensemenƹeγ seg ifesn n imiṣriyen.

we atensefγeγ seg aydin n tammurt al tammurt teṣbiḥt aḏ tuseƹ aḏ tečur d aγi aḏ tamemt, mani dderen ikenƹaniyen aḏ lḥeyṯiyin aḏ lemuwriyin aḏ lferiziyin aḏ lḥwiyin aḏ lyebuwsyin. 9 al ṭuruh yetteṣliḏ zwik n aṯ israyil aḏ zerreγ mammeḵ imiṣriyen merjen disen. 10 ureḥ al ferƹuwn bac asefγeḏ middeniw aṯ israyil seg miṣr.»

11 yaxy yuwa muwsa: «d mam neči bac areḥeγ al ferƹuwn? mammeḵ tasefγeγ aṯ israyil seg miṣr?»

12 yerras rebbiy: «neči tadleγ iḏeḵ. we aydel ayuh d lemereṯ lliy neči nkiyγaḵ. almiy tasefγeḏ aṯ israyil talteƹebdem af ayuh n jbel.»

13 yuwa muwsa: «iḏa reḥḥeγ al aṯ israyil we asenemleγ: < rahiy rebbiy n ibabenneγ yenkiḏ al γarwem. > talsesetnen: < d matta ismis?> matta tasenemleγ?»

14 yerras rebbiy. «neči lliy lliγ.»

aḏ yerniy: «amyuh asentemleḏ: < weddin lliy yesemma imanis: «neči lliγ» d netta yenkiyiḏ al γarwem. > »

15 yerniy yuwa y muwsa: «amyuh amleḏ y aṯ israyil: < yenkiyiḏ al γarwem lliy diyma yella, rebbiy n ibabnuwem, rebbiy n ibrahiym aḏ rebbiy n isḥaq aḏ rebbiy n yeƹquwb. > ayuh d ismiw diyma. ayuh d ism lliy yexs alsγuyen siyes lliy tadasen beƹduwem.

16 ureḥ laym iwessaren n israyil temeldasen: < lliy diyma yella, rebbiy n ibabnuwem, rebbiy n ibrahiym aḏ isḥaq aḏ yeƹquwb yeḍherrid, yuwa: «rahiy nembelḥeq neči rriγ lbaliw mag iṣerewem g miṣr 17 afelxaḍert n ayuh smuḏeγ tafensefγeγ seg ḏḏul n miṣr al tammurt n ikenƹaniyen aḏ lḥeyṯiyin aḏ lemuwriyin aḏ lferiziyin aḏ lḥwiyin aḏ lyebuwsyin, al tammurt lliy tečur d aγi aḏ tamemt.»>

18 taseγden iwessaren dwiḵ we abeddeḏ cek yiḏesen zzaṯ lmelek n miṣr we astemlem: < rahiy lliy diyma yella, rebbiy n iƹebraniyen yuseneγd. mala djenneγ anreḥ tiḵli n 3 yyam g ṣṣeḥreṯ bac aneγres y lliy diyma yella rebbiynaγ. > 19 lekenti sseneγ lliy lmelek n miṣr wifenyetedjic areḥem ḥetta kan iwettiy ffus d meqqar. 20 s fusiw tawetteγ miṣr s lwiliw lkul. wembeƹd afenyedj areḥem.

21 we aserliγ imiṣriyen fellewem aḏ witetriḥemc s ifesnuwem d lferγi almiy tarezfem. 22 yexs ateḍleb kul ijeṯ siwem seg tmiṣrit lliy tseken γares naγ deljertis ṣiγeṯ n lfejreṯ aḏ wureγ aḏ leḥweyej bac atenirden ṭarwiwiṯuwem. amyuh taselbem imiṣriyen.»