1 aḏ yuwa lliy diyma yella y muwsa:

2 «qa neči waziγ beṣleyil memmis n uwriy aḏ memmis n memmis n ḥuwr seg lƹerc n yehuwḏa, aḏ sγuyγas s ismis. 3 rahiy čurext seg rruwḥiw aḏ uciγas lefker aḏ temesniwt aḏ uquddu n ṣnayeƹ lkul, 4 bac ayxeṭṭeṭ iḥejeyen lliy tatenyeg seg wureγ aḏ lfejreṯ aḏ nḥas, 5 aḏ bac ayeṣqel ljuher we atyesry, aḏ bac ayeqdeƹ isγaren we ayeg kul ciy.

6 aḏ waziγ ahuwlyab memmis n xiysamak seg lƹerc n dan bac atiƹawen. aḏ uciγ y sṭaweṯ lkul quddu widdic am netta bac aggen lliy uwiγaḵ fellas lkul; 7 lƹecceṯ n umlaqi, aḏ ttebuwt n luwṣayaṯ s ddan lliy anjis, aḏ reγleṯ n lƹecceṯ lkul, 8 aḏ ṭṭewleṯ aḏ reγeltis, aḏ nnir meqdus n wureγ aḏ reγeltis, aḏ mkan n ubexxer, 9 aḏ mkan n teγrest aḏ reγeltis. aḏ ufedja n uzizdi aḏ tqeƹetis. 10 aḏ leḥweyej lliy zden yeqƹeḏ; leḥweyej imeqdusen n haruwn aḏ ṭarwas lkuhhan lliy reḍenten almiy taggen lwajeb g umeqdus. 11 aḏ uḏi meqdus. aḏ lebxuwr lliy faweḥ. yexs aggen ayuh lkul mammeḵ siḵenγaḵ.»

12 yuwa lliy diyma yella y muwsa:

13 «mmel y aṯ israyil: steḥefdeṯ af ussaniw, ussan n sebbeṯ afelxaḍert nihnin d lemerṯ n lƹehd lliy jarenneγ y diyma, bac asnem lliy neči d rebbiy lliy yetqeddes diwem.

14 steḥefdeṯ af as n sebbeṯ. rahiy d meqdus γarwem. kul yjen ayeṯƹedda af as n sebbeṯ naγ ayexdem diyes ayemmuṯ we ayemmuxdef seg middenis. 15 axedmem 6 d ussanaṯ amma as n sebbeṯ rahiy d rreḥeṯ temeqdust y neči. aḏ kul yjen ayexdem diyes ayemmunγ.

16 rahiy aṯ israyil yexs asteḥefden af sebbeṯ we aferḥen siyes g lejyelesen lkul, aḏ ayuh d lƹehd y diyma. 17 rahiy ayuh d lemereṯ n lƹehd jariḏd iḏuwem y diyma, afelxaḍert g 6 d ussanaṯ ggiγ tammurt aḏ ujenna aḏ g as wi 7 kemleγ.»

18 aḏ lemmi ykemmel rebbiy dwiys y muwsa g jbel n siynay, yucas sen tγuγa n luwṣayaṯ. aḏ nihintin d lelwaḥ seg tiḍγaγin urineṯ s ffus n rebbiy.