1 wembeƹd uḏellen atinyen muwsa aḏ aṯ israyil s ayuh n sebbeḥ y lliy diyma yella aḏ nihnin mmalen:

«ttiniyeγ y lliy diyma yella

afelxaḍert netta nnaj kul ciy.

terras aḏ tγaliṯ yluweḥ g iylel.

2 lliy diyma yella d lquwtiw.

y netta diyma taḏinyeγ.

y rebbiy lliy ysemenƹiḏ tasebḥeγ.

netta d rebbiyw

aḏ rebbiy n baba tatƹeḍmeγ.

3 lliy diyma yella d lmuḥareb d mqqar;

lliy diyma yella ismis.

4 yluweḥ tikerriṭin n ferƹuwn aḏ ljeycis g iylel.

yseγreq ṣbiḥen n lguyyadis g iylel zuggaγ.

5 hjemen fellasen aman ggeṯ,

zwan al dday am iḍγaγen.

6 mennit qwi fusiḵ n limin,

ay lliy diyma yella.

siyes tenγiḏ leƹdu.

7 aḏ s lquweṯ n lhibtiḵ

tṣudiḏ lliy tḥaraben diyeḵ.

tenkiyeḏ aγeccecciḵ

tečiten am uču n timsi g sfaf.

8 s ḍuḵ meqqar tlayemeḏ aman

tsebbedeḏ lemwaj g amas n iylel

d lmudaf y imiṣriyen.

9 yeḏbeƹneγ lƹdu bac aγenyeṭef

we aγennimukes lliy γarneγ

we ayebreḏ lγidis

we aycerƹ ssiyfis.

10 tenkiyeḏ aḍuḵ.

ƹamen fellasen aman.

aγreqqen am rṣaṣ g tebḥirt.

11 ay rebbiy, mam am cek jar irebbiyen?

mam d meqqar am cek?

mam yestahel ckar am cek?

mam yetquddu ayeg lmuƹjizaṯ am cek?

12 tezzeleḏ liminiḵ, yaxy tebleƹin tammurt.

13 tureseḏ s nnaƹemtiḵ cceƹb lliy tesγit,

s lqudertiḵ tsiḵendas

abriyḏ n mkaniḵ temeqdust.

14 we aslen midden ttaniyeṯ we aḏegḏen.

we aterny tiwdi n lliy sekenen g tammurt n felesṭiyn.

15 asteγerben imeqqaren n aduwm.

aḏegḏen lquyyad n muwab,

we ammuṯen midden n kenƹan lkul s tiwdi.

16 tƹam fellesen tiwdi

jmeḏḏen am iḍγaγen s lqudreṯ n fusiḵ,

almiy iƹedda cceƹbiḵ

lliy teṣγit ay lliy diyma yella.

17 tatenuwyeḏ, we atenezzuḏ

g ljbel lliy tuƹeḏḏeḏ siyes

twezit d mkaniḵ meqdus.

18 lliy diyma yella iḥekm g tduniyeṯ y diyma.»

19 mniyn uḏefneṯ tγallin n ferƹuwn aḏ tikerriṭinis aḏ iterresnis al iylel, ƹamen fellesen aman. amma aṯ israyil yyuren af tammurt g amasis. 20 ḥetta tiseḏnan am irgazen sebḥeneṯ. tqam meryem nnabiyya aḏ nettaṯ d weltmas n haruwn lbendir g fusis, yaxy ḏbeƹenteṯ tiseḏnan lkul s lbnader reqqeṣneṯ aḏ tinineṯ. 21 aḏ tusi meryem tetterra fellesneṯ:

«inimeṯ y rebbiy afelxaḍert netta nnaj kul ciy,

tγelliṯ aḏ uterras yluweḥ g iylel.»

22 wembeƹd yerzef muwsa s aṯ israyil seg iylel zuggaγ aḏ reḥḥen al ṣṣeḥreṯ n cuwr. qqimen gguren diyes 3 d ussanaṯ lekinti wiḏufinc aman. 23 lemmi uṣellen al mara wiquddenc aswen amanis afelxaḍert izeyen. aḏ semmenteṯ mara. 24 yaxy xernennen midden af muwsa uwan «matta tansu?»

25 yeḍleb muwsa lliy diyma yella. yaxy isiḵnas ccejreṯ. yluweḥ muwsa sγer siyes g aman, ḏwellen d leḥlu. aḏ dinet yeggi rebbiy y midden cceriyƹeṯ aḏ lesbar aḏ limtiḥan. 26 yuwa: «kan teslim dwiyw neči lliy d rebbiywem, aḏ teggim lliy netta d lḥeq zzaṯiw, aḏ teḏbeƹem luwṣayaṯiw, aḏ testeḥefdem af lefreyḍiw lkul, tafensemenƹeγ seg ṭṭan lliy wetteγ siyes imiṣriyen. rahiy neči d rebbiy lliy afeniseḥla.» 27 wembeƹd uṣellen al iyliym mani diyes 12 d ṭiṭawin aḏ 70 d tiγliwin. ggen lmuxeyyem tman ṭiṭawin n aman.