1 yuwa lliy diyma yella y muwsa

«neči uciγeḵ lquweṯ af dwiy s ismiw zzaṯ ferƹuwn. aḏ yexs aḏuceḏ y haruwn lḥeq bac ayufley g umkaniḵ. 2 aḏ yexs astemleḏ lliy tafemleγ lkul. aḏ netta ayuflay y ferƹuwn we aysiyeb aṯ israyil seg tammurtis. 3 lekinti kul man ayseqṣeḥ ferƹuwn ixfis, asiḵenneγ lmuƹjizaṯiw g tammurt uh. 4 γiyr ferƹuwn wifenyeseγdic, lweqt ḏḏin tawetteγ miṣr we asefγeγ middeniw, israyiliyen s lquweṯ n leḥkam d imeqqaren 5 bac asennen imiṣriyen lliy d neči d lliy diyma yella aḏ lliy ddunyeṯ nnuw.» 6 yaxy ggen muwsa aḏ haruwn mammeḵ yuwayasen lliy diyma yella. 7 yusi muwsa γares ṯmaniyn d isuggasen aḏ haruwn γares 3 we ṯmaniyn d isuggasen weqt lliy uflayen y ferƹuwn.

8 yuwa lliy diyma yella y muwsa aḏ haruwn. 9 «weqt lliy ayeḍleb ferƹuwn s γarwem we afennimel siḵentid lγribtwem, mleḏ y haruwn: < qam tereṭṭa n lmuƹjizaṯ tluwḥeteṯ zzaṯ ferƹuwn. > ateḏwel d telefsa.» 10 yaxy bbedden muwsa aḏ haruwn zzaṯ ferƹuwn aḏ ggen mammeḵ yuwa lliy diyma yella, yluweḥ haruwn tereṭṭes zzaṯ ferƹuwn aḏ midden lliy nnaḍḍen siyes, teḏwel d telefsa. 11 yaxy yesγuy ferƹuwn af lƹulema nnas aḏ yseḥernis, ggen yseḥḥeren n miṣr mammeḵ yeggi haruwn. 12 yluweḥ kul yjen tereṭṭas teḏwel d telefsa, lekinti tereṭṭa n muwsa tebleƹ tireḍwinesen. 13 aḏ iγef n ferƹuwn yerniy yeqṣeḥ, wiyeqqil ayseγd dwiysen mammeḵ yuwa lliy diyma yella.

14 wembeƹd yuwa lliy diyma yella y muwsa,

«rahiy iγef n ferƹuwn yeqṣeḥ aḏ wiyteqelc aysiyeb midden. 15 bbed zzaṯ ferƹuwn ača almiy tayeffeγ al aman, bbed bac atleqiḏ af lḥacit n lwaḏ. aḏ qam g fusiḵ tereṭṭa lliy teḏwel d telefsa, 16 mles, <rahiy lliy diyma yella, rebbiy n iƹebraniyen yenkiyiḏ al γareḵ, yuwayeḵ: «siyyeb middeniw bac alzellen g ṣṣeḥreṯ.» aḏ qa cek al ṭuruh witteqqileḏc aggeḏ s dwiys.

17 mala sseγd mag yemmal lliy diyma yella: «lemmi tezreḏ matta ggiγ diyeḵ, tasneḏ lliy neči d lliy diyma yella, qa tawetteγ s ayuh n tereṭṭa aman n lwaḏ aḏuwelen d iḏemmen. 18 we atemmuṯ trabit we ayenten lwaḏ we aƹefen imiṣriyen tissi n amanis.»> » 19 aḏ yuwa lliy diyma yella y muwsa

«mmel y haruwn: < qam tereṭṭa n lmuƹjizaṯ, tezleḏ fusiḵ al aman n imiṣriyen aḏ lwiḏanesen aḏ tijennesen aḏ iγlanensen aḏ tixubey n amanesen. > aḏulen lkul d iḏemmen we adlen d iḏemmen g tammurt n miṣr lkul ḥetta g reγleṯ n lluwḥ aḏ reγleṯ n iḍγaγen.»

20 amyuh ggen muwsa aḏ haruwn mammeḵ yuwa lliy diyma yella; iqam haruwn tereṭṭa iwet siyes aman n lwaḏ zzaṯ ferƹuwn aḏ midden lliy nnaḍḍen siyes, ḏwellen aman n lwaḏ lkul d iḏemmen. 21 aḏ temmuṯ trabitis lkul. yenten lwaḏ aḏ wiquddenc imiṣriyen aswen siyes. aḏ teḏwel tammurt n miṣr lkul d iḏemmen. 22 amyuh ggen yseḥḥeren n miṣr zada, yerniy yeqṣeḥ iγef n ferƹuwn aḏ wiyeqqil ayseγd dwiysen, mammeḵ yuwa lliy diyma yella.

23 wembeƹd iruweḥ ferƹuwn al lḥucis am laḵ wiṣar ḥaja. 24 aγezzen imiṣriyen lkul iburriƹen tman lwaḏ ruzzun af aman n tissi afelxaḍert wilquddenc aswen aman n lwaḏ. 25 aḏ ƹeddan 7 d ussan s manis iwet lliy diyma yella aman n lwaḏ.