1 yerra lliy diyma yella y muwsa.

«qa tazreḏ mammeḵ taƹeqbeγ ferƹuwn. rahiy tateluzeγ s ffus quwiy bac ateniseyyeb we atenizeƹzeq.»

2 aḏ yuwa rebbiy y muwsa.

«neči d lliy diyma yella, 3 ḍhereγd y ibrahiym aḏ isḥaq aḏ yeƹquwb d rebbiy yetqud kul cey. amma witsinenc ismiw d lliy diyma yella. 4 aḏ ggiγ yiḏesen lƹehd bac asennuceγ tammurt n kenƹan mani sekenen diyes am ibariyen. 5 aḏ qqimeγ seγdiγ g kuttu n aṯ israyil lliy ḏwellen d ičiwen n imiṣriyn. aḏ teggeγ ṭuruh lliy uƹeḏḏeγ siyes ibabenwem.

6 mala mlasen: < neči d lliy diyma yella aḏ d neči takseγ fellawem ḏḏulem n imiṣriyen we afensemenƹeγ seg lƹubuditesen, we azleγ fusiw afensefγeγ s lḥukem qwi. 7 smiteṯ lliy kennim d middeniw, aḏ neči d rebbiywem. tafensemneƹeγ seg imiṣriyen we asnem lliy neči d lliy diyma yella, rebbiywem. 8 we afenuwyeγ al tammurt lliy djuleγ tatettuceγ, y ibrahiym aḏ isḥaq aḏ yeƹquwb, we afentedduceγ d lmemelkeṯ, neči d lliy diyma yella. > » 9 slen aṯ israyil ayuh n dwiy af imi n muwsa, lekinti wiquddenc rren lbalesen afelxaḍert wsiyn tƹanen seg ḏḏul lliy irenni.

10 wembeƹd yuwa lliy diyma yella y muwsa, 11 «ureḥ abbed zzaṯ ferƹuwn lmelek n miṣr temldas aysiyb aṯ israyil seg tammurtis.» 12 yaxy yerras muwsa: «qa, ḥetta aṯ israyil wiqqilen alseγden, mammeḵ zeγ texseḏ ferƹuwn alyesseγd. aḏ neči ilsiw yeḏqel.»

13 rahiy yuflay lliy diyma yella am idin y muwsa aḏ haruwn. yuwayasen aḏulen al aṯ israyil aḏ ferƹuwn lmelek n miṣr bac aysiyb aṯ israyil seg tammurt n miṣr. 14 inuh d nihnin d imeqqaren n lƹcayer seg aṯ israyil lemmi fγented.

ṭarwa n rewbiyn bedri n israyil nihnin ḥenuk aḏ feluw aḏ ḥeṣruwn aḏ kermiy, tinuh d lƹcayer n rewbiyn.

15 ṭarwa n cemƹuwn, nihnin yemuwyl aḏ yamin aḏ uhed aḏ yekiyn aḏ ṣuwḥer aḏ cawel lliy netta d memmis n tkenƹanit, tinuh d lƹcayer n cemƹuwn.

16 inuh d ismawen n ṭarwa n lawiy feleḥsab n lƹcayresen, jercuwn aḏ qehat aḏ merary. aḏ yedder lawiy 100 we 7 we 30 d isuggesen.

17 amma ṭarwa n jercuwn feleḥsab n lƹcayresen nihnin libniy aḏ cemƹiy.

18 aḏ ṭarwa n qehat nihnin ƹemram aḏ yeṣhar aḏ ḥebruwn aḏ ƹuzyel. aḏ qehat yedder 100 we 3 we 30 d isuggasen.

19 aḏ ṭarwa n merary nihnin meḥliy aḏ muwciy. tinuh d lƹcayer n ilawiyyen mammeḵ luwlend.

20 yenjef ƹemram ƹemtis yuwkabed tuγesd haruwn aḏ muwsa aḏ ƹemram yedder 100 we 7 we 30 d isuggasen.

21 aḏ ṭarwa n yeṣhar nihnin quwreḥ aḏ nafaju aḏ ḏikri.

22 aḏ ṭarwa n ƹuzyel nihnin d micayil aḏ lṣafan aḏ sitriy.

23 yenjef haruwn licabeƹ yellis n ƹemminedab aḏ nettaṯ d weltmas n neḥcuwn tuγesd nadab aḏ abiyhuw aḏ liƹazer aḏ iṯamer.

24 aḏ ṭarwa n quwreḥ nihnin d ciru aḏ lqanet aḏ abiyasaf aḏ tinuh d lƹcayer n lquwreḥiyen.

25 liƹazer memmis n haruwn yenjef ijeṯ seg yessis n fuwṭiyel tuγesd finḥas.

26 inuh d haruwn aḏ muwsa lliy yuwayasen lliy diyma yella: < sefγeṯ aṯ israyil seg tammurt n miṣr af lḥsab n lfireqsen. > 27 rahiy muwsa aḏ haruwn d nihnin lliy uwan y ferƹuwn lmelik n miṣr bac aysiyeb aṯ israyil seg miṣr.

28 mniyn yuflay lliy diyma yella y muwsa g tammurt n miṣr, 29 yuwa «neči d lliy diyma yella, mmel y ferƹuwn lliy tafemleγ lkul.» 30 aḏ yusi yerras muwsa: «neči ilsiw yeḏqel, mammeḵ talyeseγd ferƹuwn.»