1 yuwa lliy diyma yella y muwsa aḏ haruwn g tammurt n miṣr:

2 «seg as uh taydel γarwem ayuh n cehher d mezwar n isuggasen aḏ d iγef n lechur. 3 g as lƹacer n ayuh n cehher yexs aywiy kul yjen sisen izmer y lƹiltis af leḥsab n tzaγwin n ibaben, izmer y kul lƹeyleṯ. 4 kan izmer ggeṯ af lƹilt ḏḏin, yexs atzun izmer nettaṯ yid lƹileṯ lliy tmas af leḥsab n mennit tquddun ačan middenis. 5 aḏ yexs aydel izmer d ḏker aḏ d ssenwi. aḏ widdis ḥetta d lula atextarem seg tulli naγ seg teγaṭin.

6 we ayeqqim γarwem al as n 4ṭac seg ayuh n cehher. kennim ya aṯ israyil yexs aγersem izmaren as diyn temeddiṯ. 7 aḏ aqemem iḏamen ateneggem af limin aḏ uzelmaḍ aḏ nnaj imi n tzaqqa lliy tačam diyes. 8 yiḍ diyn, yexs ačam yessum d lmecwa netta yid tqurset lliy widdic lexmireṯ yid lexḍar lliy izeyen. 9 witetemc siyes yedder naγ ydab lekenti d lmecwa; ixfis aḏ idernis aḏ teddewertis. 10 yexs ačam siyes yiḍ diyn. aḏ lliy yefdelled al ača atḥerqem tajji. 11 yexs ajrim imanuwem y iffeγ, we ačam fiseƹ aḏ kennim tḥezmem, tireḍḍem ṣbebtwem, aḏ teṭṭefem iγeḏmenuwem. amyuh tajrim imanuwem y uƹeddiw.

12 aḏ g ayuh n yiḍ taƹeddiγ g amas n miṣr we anγeγ ibedriyen lliy diyes lkul n midden naγ n zwayel. we asezwiγ leƹqabiw af irebbiyen n imiṣriyen. rahiy neči d lliy diyma yella.

13 lemmi azreγ iḏamen aƹeddiγ af imaniw aḏ witzuggic fellawem lmuṣiybeṯ n tmettent lliy tatezwa af tammurt n miṣr. rahiy s lemereṯ n iḏamen lliy af tzaγwinuwem tamenƹem.

14 smitaṯ ayuh n as. tferḥem diyes. rahiy d tfeṣka y lliy diyma yella. aḏ d lwajeb n diyma, ateggem kennim aḏ ṭarwiwiṯuwem lliy tadesen beƹduwem lkul.

15 7 d ussan aggem tfeṣka. ačam disen tqurset. aḏ yexs asefγem lexmireṯ seg tzaγwinuwem g as mezwar. aḏ kul yjen ayeč ḥaja s lexmireṯ g ljumƹa diyn aymukes seg aṯ israyil. 16 g as mezwar aḏ as wi 7, amleqim we aẓellem. aḏ yexs witetteggem disen ḥaja kan jerru n učuwem.

17 aḏ aggem tfeṣka n tqurset bac adesmitim ayuh n as lliy sefγeγ diyes leƹceyeruwem seg tammurt n miṣr. ggeṯ as wuh d tfeṣka kul suggas af tmeddurt n lejyaluwem lliy tadesen. 18 aḏ seg tmeddiṯ n as 14 n cehher mezwar al tmeddiṯ n as 21 siyes, ačam tqurset. 19 7 d ussan yexs aydel widdic lexmireṯ g tizeγwinuwem. iḏa yjen ayeč uču s lexmireṯ aymukes seg aṯ israyil, israyiliyen aḏ lliy ḏbeƹenten kifkif. 20 ljmuƹ tuwh witetteṯc ḥaja s lexmireṯ mani treḥḥem.»

21 wembeƹd yesγuy muwsa

«ya iwessaren n aṯ israyil, sseγdeṯ man mleγ, beƹd ussan tanefeγ, xtareṯ izmaren af leḥsab n leƹyeluwem teγersem izmer n tfeṣka. 22 wembeƹd qameṯ timeṣleḥṭ n zufa teneqƹemteṯ g iḏamen lliy g lmaƹuwn. teḏehnem siyes limin aḏ uzelmaḍ aḏ nnaj n imi n tzaqqa. aḏ witeffeγ ḥetta d yjen siwem seg tzaqqas al tajji,

23 afelxaḍert lliy diyma yella tayƹedda g yiḍ bac ayenγ imiṣriyen. weqt lliy ayzer iḏamen af imi n tzaqqa ayƹedda af imanis aḏ witedjic lmeleyka n temettent aḏeḏfen al tizeγwinuwem bac afennineγ.

24 aḏ ayuh d lwajeb fellawem aḏ af ṭarwiwiṯuwem y diyma. 25 lemmi aḏeḏfem al tammurt lliy yuƹeḏ siyes lliy diyma yella bac afentedyuc, aggem ayuh n lwajeb. 26 aḏ lemmi afensestenen ṭarwiwiṯuwem matta lmeƹnas ayuh n lferḍ 27 atenjewbem lweqt ḏḏin: < ayuh d teγrest n tfeṣka n iffeγ y lliy diyma yella lliy iƹedda af imewen n tzaγwin n aṯ israyil g miṣr mniyn yenγa imiṣriyen. aḏ ysemneƹ tizeγwinneγ. > » yaxy rkeƹen midden, ḥmeḏḏen rebbiy. 28 yaxy reḥḥen aṯ israyil ggen mammeḵ yuwa lliy diyma yella y muwsa aḏ haruwn gedged.

29 zgen yeḍ, yenγa lliy diyma yella ibedriyen n imiṣriyen lkul; seg ubedri n ferƹuwn lliy iḥekkem, al ubedri n lliy yella g lḥebs aḏ ibedriyen n zwayel lkul zada. 30 yaxy sfeqqend ferƹuwn aḏ midden lliy nnaḍḍen siyes aḏ imiṣriyen lkul. aḏ yuḏel ṣyaḥ d meqqar g tammurt n miṣr afelxaḍert wiyeqqimc diyes ḥetta d lḥuc widdic mam yemmuṯ. 31 yiḍ diyn, yesγuy ferƹuwn y muwsa aḏ haruwn, yuwa: «kkreṯ afγeṯ seg miṣr kennim yid aṯ israyil, treḥḥem tezzalem y lliy diyma yella mammeḵ tuwim. 32 awyeṯ iḏuwem tulliwem aḏ tifunasinuwem mammeḵ tuwim. aḏ ḍelbeṯ rebbiy bac ayerla fella.» 33 yaxy uwan imiṣriyen y israyiliyen: «luffeṯ imanuwem, fγeṯ s yeh naγ anemmuṯ lkul.»

34 yaxy ggen midden leƹjinesen g timeƹejnin man γiyr lexmireṯ aḏ ggenten d ikemmusen, qamenten af ixrumensen, nihnin aḏ leḥeyweyjisen. 35 aḏ ḍlebben s imiṣriyen lfejreṯ aḏ wureγ aḏ leḥwayej mammeḵ yuwa muwsa. 36 aḏ yeggi rebbiy mammeḵ rlan imiṣriyen af aṯ israyil, aḏ ucnasen lliy ḍlebben lkul. aḏ amyuh sleben imiṣriyen. 37 reḥḥen aṯ israyil seg reƹmesis al sekkuwt aḏ wsiyn ḥeḍerbac set 100 d lalafaṯ n irgazen lliy gguren bexlaf tiseḏnan aḏ imeckenen. 38 reḥḥen yiḏesen ggeṯ d midden iḍen aḏ izmeren aḏ tifwunesin aḏ zwayel. 39 ggen leƹjin lliy awyent yiḏesen seg miṣr d tqurset afelxaḍert yusi wiyulic mniyn ttuzeƹezqen seg miṣr fiseƹ aḏ wiquddenc aseḥedren učunesen.

40-51 aḏ g as diyn lliy wiyetmuttuc, ffaγen midden lkul n aṯ israyil seg tammurt n miṣr. aḏ mammeḵ iƹedda rebbiy yiḍ diyn kamel yesufuγ disen seg miṣr, yexs nihnin aszellen we adesmitan yiḍ kamel matta yeggisen kul suggas. yuwayasen lliy diyma yella,

«ayuh d lesbar n tfeṣka n teγrest; witet ḥetta d yjen siyes kan israyiliyen.

aḏ kul ačiw tesγimt s lfejreṯ ayeč siyes beƹd man addehrem. lliy ysekken iḏuwem naγ ixeddem γarwem witeč siyes.

yexs atečem al jaj. aḏ witsufuγemc al barra, aḏ witrezzemc siyes ḥetta d gerguj. aḏ yexs midden n aṯ israyil ateggen d tfeṣka jemiƹ.

kan yexs yjen muc d israyiliy ysekken jarwem, ayeg tfeṣka n teγrest y lliy diyma yella, yexs aydehher leḏkur lkul lliy g lḥucis wembeƹd ayeg tfeṣka, we aydel am israyiliyen. aḏ witet siyes ḥetta d yjen widehherc. ayuh d cceriyƹeṯ y israyiliyen aḏ iberraniyen lliy jarwem.» yaxy ggen israyiliyen lkul mammeḵ yuwa lliy diyma yella y muwsa aḏ haruwn. as diyn, yseffeγ lliy diyma yella aṯ israyil seg tammurt n miṣr. ḥekreṯ mammeḵ ysefγin rebbiy af leḥsab n leƹceyresen beƹd mag qqimen g miṣr 430 d isuggasen.