1 aḏ ggen seg ulman d izizewen aḏ d iḥberiyen aḏ d izuggaγen leḥweyej n lkuhhan bac atenirden g umeqdus. aḏ ggen leḥweyej imeqdusen n haruwn mammeḵ yuwa lliy diyma yella y muwsa.

2 aḏ ggen lufud seg tnelwin n wureγ aḏ ulman d izizewen aḏ d iḥberiyen aḏ d izuggaγen aḏ ustu n tefduxt. 3 aḏ ggen tiḥdidin n wureγ aḏ kessen sisneṯ tinelwin bac atentezdden jar ulman izizewen aḏ iḥberiyen aḏ izuggaγen aḏ ustu n tefduxt mammeḵ yercem yjen d lfeleḥ. 4 aḏ ggen y lufud sen tγerdin lṣeqneṯ bac adyas yeqƹeḏ af tγerdin n lliy tatyireḍ. 5 aḏ leḥzamis lliy siyes ggent yeqƹeḏ seg aydin n ulman d izizewen aḏ d iḥberiyen aḏ d izuggaγen aḏ ustu n tefduxt aḏ tnelwin n wureγ mammeḵ yuwa lliy diyma yella y muwsa.

6 aḏ ggen sent tγuγa n ljizƹ g sent leḥweci n wureγ. aḏ aγezzen fellesneṯ ismawen n aṯ israyil mammeḵ tteγzen af txaṯemt n uṣeḥḥeḥ. 7 aḏ ggentent af tγerdin n lufud mammeḵ yuwa lliy diyma yella y muwsa d tγuγa n usmiti y aṯ israyil.

8 aḏ ggen tmeṣdurt mammeḵ yercem yjen d lfeleḥ am lufud seg tnelwin n wureγ aḏ ulman d izizewen aḏ d iḥberiyen aḏ d izuggaγen aḏ ustu n tefduxt. 9 aḏ tusi tmeṣdurt timrebbeƹt ṭṭulis aḏ lƹerḍis cebber aḏ tuḍi. 10 aḏ tesri s 4 n ḏuren n tγuγa tiṣbiḥin; ḏur mezwar seg leƹqiq zuggaγ aḏ lyequt awreγ aḏ zmurruḏ. 11 ḏur wissen d lbehreman aḏ lyaquwt zizew aḏ leƹqiq mellal. 12 ḏur wi 3 seg ƹin lhir aḏ lyecmu aḏ lejemectu. 13 ḏur wis 4 seg zberjeḏ aḏ ljizƹ aḏ lyecb. we aggentent lkul g leḥweci n wureγ. 14 aḏ yeγez af kul tγuγa sisneṯ ysem n yjen seg aṯ israyil lliy nihnin 12 mammeḵ aγzenten af txaṯemt n uṣeḥḥeḥ.

15 aḏ ggen af tmeṣdurt sen n tseleslin seg wureγ ṣbiḥ ḏreneṯ am tezra. 16 aḏ ggen sent leḥluq atṭefneṯ g leḍraf n tmeṣdurt s leḥwaci n wureγ. 17 aḏ qqennen aydin n sen tseleslin n wureγ lliy ḏreneṯ g aydin sen tḥelqeṯin af ṭṭerf n tmeṣdurt. 18 aḏ qqennen tiseleslin diyn g leḥwaci aḏ g tγerdin n lufud s zzaṯ. 19 aḏ am idin ggen sen tḥelqeṯin n wureγ af ṭṭerf n tmeṣdurt s jjaj mani telṣeq af lufud. 20 aḏ ggen sen tḥelqeṯin iḍen adug ṣder nnaj mkan lliy inetged diyes leḥzam lliy ggent yeqƹeḏ. 21 aḏ qqennen tiḥelqeṯin n tmeṣdurt g tḥelqeṯin lliy nnaj leḥzam s ulman d izizewen ḏren bac ateqqim temeṣdurt nnaj leḥzam aḏ witetmukusc seg lufud. aḏ amyuh ggen temeṣdurt mammeḵ yuwa lliy diyma yella y muwsa.

22 aḏ ggen tḏellukt d tezizewt mammeḵ iteg nessaz d lfeleḥ. 23 aḏ yusi diyes imi n iγef g amas aḏ lburcman yeṣḥiḥ ggeṯ bac witetkeṣṣic. 24 aḏ derjeḥneṯ g ṭṭerfis s dday tirummanin lliy ggentent seg ulman d izizewen aḏ d iḥberiyen aḏ d izuggaγen aḏ ustu n tefduxt. 25 aḏ ggen jareseneṯ dnaden n wureγ ṣbiḥ. 26 aḏ yusi jar kul sen tirummanin dendan af ddureṯ n tḏellukt s dday lliy reḍenteṯ almiy teggen lwajeb. amyuh ggen tḏellukt mammeḵ yuwa lliy diyma yella y muwsa.

27 aḏ ggen tisuriyin n haruwn aḏ ṭarwas seg zeṭṭi n ustu n tefduxt. 28 aḏ tezmelt aḏ tiƹeṣṣabin n lekbabes aḏ yserwalen ggenten lkul seg ustu n tefduxt. 29 aḏ cemleṯ ggenteṯ seg ustu n tefduxt aḏ ulman d izizewen aḏ d iḥberiyen aḏ d izuggaγen mammeḵ iteg ṭerraz d lfeleḥ. amyuh ggenten mammeḵ yuwa lliy diyma yella y muwsa. 30 aḏ ggen teḥdit n tezmelt seg wureγ ṣbiḥ aḏ aγezzen fellas mammeḵ af txaṯemt n uṣeḥḥeḥ: «iqeddes y lliy diyma yella.» 31 aḏ qnenteṯ s tenelli tezizewt af tezmelt n haruwn s zzaṯ. amyuh ggenteṯ mammeḵ yuwa lliy diyma yella y muwsa.

32 amyuh yentem igga n lƹecceṯ n umlaqi lkul. ggenteṯ aṯ israyil mammeḵ yuwa lliy diyma yella y muwsa. 33 aḏ uγend lƹecceṯ al muwsa s reγeltis lkul; lemxeṭfis aḏ tqafeṣis aḏ lwesṭis aḏ tireslinis aḏ tiqeƹeṯinis. 34 aḏ seqfis lliy seg ilimen n iberkas ṣbeγγen s uzuggaγ aḏ sqeffis lliy seg ilimen n trebit temeqqart lliy man γiyr tqecra, aḏ star lliy jar meqdus aḏ lquds n leqdas. 35 aḏ ttebuwt n luwṣayaṯ aḏ igeṭṭumnis aḏ ddanis lliy d lƹerc n rreḥmeṯ. 36 aḏ ṭṭewleṯ s reγeltis lkul aḏ tqurset n ṣṣedqeṯ. 37 aḏ nnir n wureγ ṣbiḥ aḏ lkisanis aḏ reγeltis lkul aḏ uḏi n useγi. 38 aḏ mkan n ubexxer lliy d wureγ aḏ uḏi meqdus aḏ lebxuwr lliy faweḥ aḏ star n imi n lƹecceṯ. 39 aḏ mkan n teγrest lliy d nḥas s rredjis lliy d nḥas aḏ igeṭṭumnis aḏ reγeltis lkul aḏ ufedja n uzizdi aḏ tqeƹetis. 40 aḏ stareṯ n amas lḥuc aḏ tireslinis aḏ tiqeƹeṯinis, aḏ star n imi n amas lḥuc aḏ tzarwinis aḏ ṭweleṯis aḏ reγleṯ n lxeḏmeṯ g lƹecceṯ n umlaqi. 41 aḏ leḥweyej lliy arqemmen y lxeḏmeṯ g umeqdus; leḥwayej imeqdusen n haruwn lkahen, aḏ leḥwayej n ṭarwas lkuhhan.

42 amyuh ggen aṯ israyil lxeḏmeṯ lkul mammeḵ yuwa lliy diyma yella y muwsa. 43 aḏ yesmuqel muwsa al lliy ggent lkul, yufa lliy nihnin ggent mammeḵ yuwa rebbiy, yaxy inumrin.