1 yuwa lliy diyma yella y muwsa:

2 «mmel y aṯ israyil aḏulen we amlaymen tman n fnaheḥiruwṯ, jar mejdel aḏ iylel, aḏ g leqbeleṯ n beƹl ṣefuwn aggen lmuxeyyem af cceṭ n iylel. 3 bac adyas g lbal n ferƹuwn lliy kennim treḥḥem aḏ witquddemc fγem seg ṣṣeḥreṯ. 4 aḏ aseqeṣḥeγ iγef n ferƹuwn bac ayeγ ljurtuwem. we asensiḵneγ mammeḵ niči d meqqar feleḥsabis aḏ feleḥsab n ljiycis. we asennen imiṣriyen lliy neči d lliy diyma yella.» aḏ amyuh reḥḥen israyiliyen al cceṭ n iylel.

5 mniyn uwan y lmelek n miṣr: «qa ayuh aṯ israyil rwellen lkul.» nnaḍḍen ferƹuwn aḏ lliy yiḏes g dwiysen, aḏ uwan: «cbineγ zeγ, nsiyeb ičiwenneγ aṯ israyil.» 6 yaxy yejra tekerrit yuwya middenis yiḏes. 7 iḥerrej set 100 d tikerriṭin n lḥerb aḏ lebqiyeṯ n tkerriṭin n miṣr aḏ yserkeb fellesneṯ lliy tḥereben. 8 aḏ yseqṣeḥ lliy diyma yella iγef n ferƹuwn lmelek n miṣr, yeḏbeƹ aṯ israyil lliy ffaγen seg miṣr zzaṯ midden aḏ ixfewnesen al nnaj. 9 aḏ yyuren imiṣriyen defferesen s tγallin n ferƹuwn lkul aḏ tikerriṭinis aḏ iterresnis aḏ lejyucis. yaxy iweḍḍenten aḏ nihnin mlaymen tman iylel, leqrebeṯ n fnaheḥiruwṯ g leqbeleṯ n beƹl ṣefuwn.

10 lemmi yeqrebbed ferƹuwn, smuqlen aṯ israyil yaxy zren imiṣriyen ttezelen defferesen, rjijen s tiwdi aḏ ṣeyḥen ḍlebben g lliy diyma yella atenisemneƹ. 11 uwan y muwsa: «yaxy miṣr widdic ljebbeneṯ? maγer tseffeγdaneγ bac anemmuṯ g ṣṣeḥreṯ? imetta tseffeγdaneγ seg miṣr? 12 neccin nusi nemmelaḵ g miṣr: < djenneγ d ičiwen y imiṣriyen. > weƹla tedjidaneγ am idin xiyr n tmettent g ṣṣeḥreṯ.» 13 yaxy yuwa muwsa y cceƹb: witegeḏec, jreṯ imanuwem, ḥekreṯ mammeḵ tafennisemneƹ lliy diyma yella as uh afelxaḍert imiṣriyen lliy tzarrem disen ṭuruh maƹadc atenezrem xlaṣ. 14 rahiy lliy diyma yella tayḥereb g umkanuwem, amma kennim susmeṯ ṭuruh.

15 yuwa lliy diyma yella y muwsa: «cbiḵ tesugumeḏ g uƹawniw akehaw? yella, mmel y aṯ israyil ayuren. 16 qam tereṭṭeḵ tezleḏ fusiḵ siyes al iylel bac atmireḏ we ayuren aṯ israyil g amas n iylel af tammurt. 17 qa neči taseqṣeḥeγ ixfewen n imiṣriyen we afenḏebƹen we amγereγ afelḥsab n ferƹuwn we ahelkeγ tikerriṭinis aḏ iterresnis. 18 we asennen imiṣriyen lliy neči d lliy diyma yella almiy ameγreγ afelḥsab n ferƹuwn we ahelkeγ tikerriṭinis aḏ iterresnis.»

19 mniyn yeḏwel lmleyka n rebbiy lliy yusi yeggur zzaṯ aṯ israyil defferesen, iḥewel ageṭṭum n sḥab defferesen zada. 20 aḏ yused ageṭṭum n sḥab jar ljiyc n imiṣriyen aḏ ljiyc n israyiliyen. aḏ netta yusi d tellest af imiṣriyen, d ddu af israyiliyen. aḏ wiyeqrib ḥetta d yjen sisen al ttani yiḍ kamel.

21 yezzel muwsa fusis af iylel. aḏ s aḍu d cerqi qewi iduz rebbiy aman al deffer aḏ ysenzeḥ iylel. yeggi abriyḏ g amas n aman. 22 yaxy ƹeddan israyiliyen g amas n iylel af tammurt teqṣeḥ aḏ wsiyn aman am ssuwr af limin aḏ uzelmaḍ.

23 yaxy iweḍḍenten imiṣriyen aḏ uγen ljurtesen al amas n iylel s tγallin n ferƹuwn aḏ tkerriṭinis aḏ iterresnis. 24 qebbel lefjer yesmuqel lliy diyma yella s nnaj ugeṭṭum n sḥab aḏ timsi al imiṣriyen. yaxy uḏeffen beƹeḍhum s tiwdi. 25 yerra leƹjali n tkerriṭin wigurnec aḏ imiṣriyen nezγen disneṯ b siyef, almiy uwan: «yya anerwel seg israyiliyen. rahiy lliy diyma yella yetḥarab yiḏesen.»

26 yuwa lliy diyma yella y muwsa: «zzel fusiḵ af aman, adj aƹamen af imiṣriyen aḏ tkerriṭinesen aḏ iteresnesen.» 27 yaxy yezzel muwsa fusis nnaj aman. tajji bekri yeḏwel iylel al umkanis af imiṣriyen lliy wsiyn ruglen bac afγen. lekenti rebbiy ilewḥin g aman. 28 ḏwellen aman al mkanesen. seγreqen tikerriṭin aḏ iteresen aḏ ljiyc lkul n ferƹuwn lliy uγen ljurreṯ n aṯ israyil g iylel. aḏ wiyemniƹc sisen ḥetta d yjen. 29 amma israyiliyen yyuren af tammurt teqṣeḥ g amas n iylel aḏ wsiyn aman am ssuwr af liminesen aḏ uzelmeḍesen.

30 am idin ysemneƹ lliy diyma yella israyiliyen as diyn seg ifesn n imiṣriyen. aḏ zren tisqiḏin n imiṣriyen mluweḥneṯ af cceṭ n iylel. 31 lemmi zren israyiliyen mennit nettaṯ temeqqart lquweṯ lliy iḥareb siyes lliy diyma yella imiṣriyen, ugeḏḏen midden seg lliy diyma yella aḏ umennen siyes aḏ s muwsa lƹebdis.