1 aḏ yuwa lliy diyma yella y muwsa: «qdeƹ sen tiḍγaγin am tmezwerin bac aḏeryeγ fellaseneṯ lliy yusi yuri af tmezwerin lliy terzitent. 2 jra imaniḵ bac aḏelyeḏ al jbel n siynay tajji bekri we abeddeḏ zzaṯiw anjis. 3 yexs witaly iḏeḵ ḥetta d yjen, aḏ wiyetγimi ḥetta d yjen af jbel. aḏ wiferdenc izmeren naγ tifwunesin tman jbel.»

4 yeggi muwsa sen tilweḥin s iḍγaγen am tmezwerin. aḏ al ača tajji, ybekker yuli af jbel n siynay aḏ tiḍγaγin g ufusis, mammeḵ yuwayas rebbiy.

5 yaxy yezwad lliy diyma yella g sḥab, yebbed muwsa zzaṯis, aḏ yenṭaqed s ysem n lliy diyma yella. 6 iƹedda lliy diyma yella zzaṯ muwsa yemmal: «neči d lliy diyma yella, rebbiy ḥniyn aḏ rḥiym, witetγeccecec fiseƹ γari ggeṯ lḥeq aḏ nnaƹmeṯ. 7 ttuceγ nnaƹemtiw y luluf n lejyal. aḏ γefreγ y lliy tteggen bekkeḍu aḏ lliy widebƹenc dwiyw aḏ lliy aγelḍen, amma witedjixc lliy yeggi bekkeḍu man γiyr ƹaqeb. aḏ debƹeγ bekkeḍu n ibaben g imeckenesen al ljiyl wi 3 aḏ wis 4.»

8 yaxy yesjeḏ muwsa ƹlewleh. 9 aḏ yuwa: «kan terḥemdiḏ aḏ terliḏ fella ay rebbiy, yyur iḏenneγ. nembelḥeq ayuh n midden ixfewnesen qṣeḥḥen. amma ggeḏ lemruweṯ aγfer bekkeḍunneγ aḏ aγleḍeneγ tegdeneγ d cceƹbiḵ diyma.»

10 aḏ yuwa rebbiy y muwsa:

«qa neči taggeγ lƹehd, we asiḵneγ zzaṯ middeniḵ lkul lmuƹjizaṯ wizrinc am nihintin g tammurt, bac azren midden iḍen lliy taflaqen matta taggeγ iḏeḵ igga n lliy diyma yella. 11 amma yexs aggeḏ lliy uwiγaḵ fellas as wuh. qa neči tazeƹezqeγ seg zzaṯiḵ lemuwriyin aḏ ikenƹaniyen aḏ lḥeyṯiyin aḏ lferiziyin aḏ lḥwiyin aḏ lyebuwsyin.

12 rreṯ lbaluwem aggem lƹehd yid midden n tammurt lliy tasteḏfem naγ afenseḥeslen. 13 amma yexs ahedmem mkan n teγrestesen, we arzem leṣnemesen, we aqedƹem tireslinesen lliy d leṣnam n ƹecira. 14 rreṯ lbaluwem azellem y rebbiy xlefiw afelxaḍert neči d lliy diyma yella d ḥezzar, wiγisc mam yiḏes.

15 rreṯ lbaluwem aggem lƹehd yid lliy seknen g tammurt ḏḏin, afelxaḍert almiy taggen bekkeḍu n tẓalliṯ y rebbiysen we asγersen, tafenesγuyen bac ačam seg teγrestesen, 16 we asenejfem imeckenuwem seg yessiṯesen, we atensunden bac azellen y rebbiysneṯ.

17 arr lbaliḵ aggeḏ ṣembaṯ d irebbiyen ḥetta lukan tenγelletent d nγal g lqaleb.

18 ggeṯ tfeṣka n tqurset, ačam diyes tqurset man γiyr lexmireṯ 7 d ussanaṯ g cehher n abiyb mammeḵ uwiγawem, afelxaḍert g ayuh n cehher teffeγem seg miṣr.

19 ibedriyen lkul y neči, aḏ ijerren imezweren n zwayeliḵ aḏ tifwunesniḵ aḏ izmerniḵ.

20 ijerren imezweren n iγyal atenefdiḏ s iƹelwac naγ atenenγeḏ. aḏ bedriḵ atefdiḏ s uƹelluc zada.

witbeddeṯc zzaṯiw aḏ ifesnuwem d lferγiyn man γiyr ṣṣedqeṯ.

21 yexs axedmeḏ 6 d ussanaṯ we ariḥeḏ as wi 7 ḥetta lukan d ussan n uṯfelleḥ aḏ mjar.

22 we aggem tfeṣka n ljumƹeyaṯ g ussan imezweren n mjar aḏ cicel n irden, aḏ tfeṣka n xzan beƹd leyem n lγelleṯ lkul g laxer n usuggas.

23 irgazen lkul yexs abedden g diyn 3 merrat zzaṯ rebbiy n aṯ israyil. 24 qa tazeƹezqeγ midden ttenyaṯ seg zzaṯuwem we asewesƹeγ tammurtuwem aḏ widemmeƹ ḥetta d yjen diyes almiy tadesem abeddem zzaṯiw 3 merrat g usuggas.

25 wiltuc ḥetta ciy diyes lexmireṯ yid teγrest. aḏ witedjeṯec al ača tajji seg teγrest n usmiti n uƹeddi n rebbiy.

26 yexs adeγeḏ al tzaqqa n rebbiy lfal n lγelleṯ n tammurtiḵ.

aḏ wiserγac iγid g aγi n yedjis.»

27 aḏ yerniy rebbiy yuwa: «ri ayuh n dwiy afelxaḍert diyes lecruḍ n lƹehd lliy ggixt iḏeḵ aḏ yid aṯ israyil.»

28 aḏ yeqqim muwsa zzaṯ rebbiy 40 d ussanaṯ s iḍenesen, wiyečic, wiyeswic. aḏ yuri lƹehd lliy netta d luwṣayaṯ lƹecra af aydin n tiḍγaγin. 29 aḏ mniyn yezwa muwsa seg jbel g ifesnis tiḍγaγin n lƹehd. wiyerric lbalis al uḏmis lliy yetreq afelxaḍert yusi ydugga yid rebbiy. 30 aḏ lemmi yezra haruwn aḏ aṯ israyil uḏem n muwsa yetreq am idin ugeḏḏen aseqerben. 31 yaxy yesγuyasen muwsa, yeḏwellas haruwn yid iwessaren n aṯ israyil, yufleyasen. 32 wembeƹd qrebnas aṯ israyil lkul, yuwayasen af luwṣayaṯ lkul lliy yuwa fellesneṯ rebbiy af jbel n siynay.

33 mniyn ykemmel muwsa dwiys yiḏesen, yeggi af uḏmis lburqeƹ. 34 yusi itekkes almiy ydugga yid rebbiy. wembeƹd yetreḥ bac aymel y aṯ israyil af matta yuwa rebbiy. 35 aḏ afelxaḍert zerren midden n aṯ israyil uḏem n muwsa yetreq, yusi netta iterra lburqeƹ af uḏmis al lweqt lliy tayeḏef diyes al lƹecceṯ bac ayuflay yid rebbiy.