1 aḏ yuwa lliy diyma yella y muwsa:

«ffeγ seg ayuh n mkan cek aḏ midden lliy tsefγetten seg miṣr. treḥḥeḏ al tammurt lliy djuleγ y ibrahiym aḏ isḥaq aḏ yeƹquwb bac atettuceγ y ṭarwiwiṯesen. 2 aḏ tanekyeγ lemleykaw zzaṯiḵ, we azeƹezqeγ ikenƹaniyen aḏ lemuwriyen aḏ lḥeyṯiyin aḏ lferiziyyin aḏ lḥwiyin aḏ lyebuwsyin. 3 kennim ureḥeṯ al aydin n tammurt lliy tečur s aγi aḏ tamemt. amma neči wiggurexc iḏuwem naγ afenenγeγ g ubriḏ afelxaḍert ixfewnuwem qṣeḥḥen.»

4 aḏ mniyn slen midden ayuh n dwiy aweƹƹar, uḏellen sgujduren aḏ wiyesri ḥetta d yjen sisen, 5 afelxaḍert qebbel man aḥeznen yuwa lliy diyma yella y muwsa: «mmel y aṯ israyil; rahiy kennim d midden ixfewnesen qṣeḥḥen. kan aqimeγ jarewem ḥetta fercu afenenγeγ. amma ṭuruh mukseṯ sreyuwem almiy aḥekreγ man aggeγ iḏuwem.» 6 yaxy beṭlen midden sray mniyn ffeγen seg jbel n ḥuwrib.

7 aḏ yusi muwsa yettaγed lƹecceṯ yessersayiṯ yebƹeḏ s barra y lmuxeyyem. aḏ ysemmeyiṯ d lƹecceṯ n umlaqi. aḏ kul yjen yexs ayeẓẓal y rebbiy ayreḥ al lƹecceṯ n umlaqi s barra y lmuxeyyem. 8 aḏ kul man ayreḥ muwsa al lƹecceṯ n umlaqi, wsiyn midden tbeddan af imawen n leƹecceṯesen smuqulnas almiy asyeḏef. 9 aḏ kul man asyeḏef muwsa, adyezwa ageṭṭum n sḥab zzaṯ imis, we ayuflay rebbiy y muwsa. 10 aḏ kul man azren midden ageṭṭum n sḥab af imi n lƹecceṯ n umlaqi, aysejḏ kul yjen sisen y rebbiy zzaṯ lƹectis.

11 aḏ yusi rebbiy ydugga y muwsa aḏ netta iqably mammeḵ duggan midden y beƹeḍhum. aḏ almiy ayreḥ muwsa al lmuxeyyem, ayeqqim g lƹecceṯ mezyen yecuwƹ memmis n nuwn lliy yetƹawen diyes.

12 yuwa muwsa y rebbiy: «qa cek tewidiḏ: < res ayuh n cceƹb. > lekenti wiltuwic mam tanekyeḏ iḏiy. aḏ tuwidiḏ: < rahiy ssenγaḵ s ismiḵ aḏ rliγ fellaḵ. > 13 mala kan terliḏ fella mammeḵ tewiḏ, siḵniḏ abriyḏiḵ bac afsenneγ iṭer we afserliγ. aḏ smitad zada lliy ayuh n midden d middeniḵ.»

14 yaxy yerras rebbiy: «rahiy taywureγ neči iḏeḵ, we afriḥeγ.»

15 yerras muwsa: «kan witteggurec cek iḏenneγ, wiγenseffeγc s yeh, 16 zeγ mammeḵ tassenen midden ttaniyeṯ lliy cekkin terḥemdeneγ aḏ terliḏ? rahiy tiḵliḵ iḏenneγ d lemerṯ lliy cek twezideneγ seg midden n tammurt.»

17 yaxy yerra rebbiy y muwsa: «taggeγ lliy teḍlebbet, afelxaḍert rliγ fellaḵ aḏ ssenγaḵ s ismiḵ.»

18 yuwa muwsa: «siḵniḏ ay rebbiy lmejdiḵ.»

19 yaxy yuwa rebbiy:

«tazreḏ nnaƹemtiw, we asleḏ ismiw; neči d lliy diyma yella. rahiy sxafiw aḏ reḥemtiw y mam xseγ.» 20 aḏ yerniy yuwa: «lekenti witzerrec uḏmiw afelxaḍert bnaḏem lliy ayzer uḏmiw witedderc.»

21 wembeƹd yuwa rebbiy: «qa yella mkan tmaw, bbed af aydin n teḍγeγt temeqqart, 22 aḏ lemmi tayƹedda lmejdiw afeggeγ g tḥufret n teḍγeγt, we afḥerzeγ s fusiw almiy aƹeddiγ, 23 wembeƹd akseγ fusiw, we azreḏ leqfew, amma witzerrec uḏmiw.»