1 «ayuh d lesbar lliy yexs aggen aṯ israyil sisen. 2 kan γareḵ ačiw d ƹebreni, yexs ayeqqim γareḵ 6 d isuggasen ixeddem. aḏ g suggas wi 7 atedjeḏ ayreḥ af imanis man γiyr man alqiḏ ḥeqqis. 3 kan tesγit d ƹezri, atsibeḏ weḥdes, amma kan teṣγit s lehlis, yexs asiybeḏ lehlis yiḏes. 4 kan ysenejfi amis aḏ tuγesd lehlis ifrex aḏ tifrex. rahiy aydin n tmeṭṭuṯ aḏ aydin n imeckenen aqimen y amis we atiseyyeb weḥdes.

5 lekenti kan ayuh n ačiw yuwa: «xseγ amiw aḏ lehliw aḏ ṭarwaw, aḏ wiγisexc aḏuleγ ḥur weḥdi aḏ xseγ aqimeγ iḏsen amyuh.» 6 yexs atiwiy amis al lmejles n lḥukem bac acehden fellas. aḏ dinet atisebbed al lbab naγ al lxeddis we asyesnuqeb temezuγtis s tsubla, we ayeḏwel seg lweqt ḏḏin d ačiwis y diyma.

7 kan yezenz yjen yellis d tečiwt, witetsibenc ḥurra mammeḵ teggen y ačiw. 8 ḥetta kan yeṣγiṯ amis bac atetyerni y tseḏnanis. aḏ wembeƹd wisteƹjibc. rahiy wiγrec lḥeq atetyezzenz y iγriben naγ ayerla bac babis atetiṣeγ afelxaḍert ixaniṯ aḏ witetyenjifc. 9 kan yeṣγiṯ bac atetisenjef y memmis, yexs atetyeg am yellis. 10 kan yerniy yenjef fellas ijeṯ iḍen, yexs wisenkizc y tmezwert g uču naγ g uṣireḍ naγ g iḍeṣ. 11 rahiy kan ysenkzas g yjen seg ayuh n 3, yexs atetyedja atreḥ af imanis man γiyr man ayelqa lḥeqqis.

12 lliy ayenγ yjen iḍen yexs ayemmunγ. 13 kan wisyeƹni aḏ yenγi afelxaḍert yetweriyas. rahiy neči tasixeneγ al mani tayerwel. 14 amma lliy yesmuḏ af udurru n yjen iḍen aḏ yenγi belƹani, yexs ateṭfeḏ bac atenγeḏ ḥetta lukan yerwel al imkaniw imeqdusen.

15 kul yjen aywet babis naγ yedjis ayemmunγ. 16,17 kul yjen ayeḏƹu y babis naγ y yedjis ayemmunγ. aḏ kul yjen ayexdef yjen iḍen bac atyezzenz naγ bac atyeg d ačiwis ayemmunγ.

18 kan nnuγen sen irgazen, yaxy iwet yjen sisen ttani s aḍγaγ naγ s lbunyeṯ idurry, 19 aḏ yekker lliy yemdur yeggur af tluggeḥit, witeggen ḥaja y lliy idurry amma yexs atixelleṣ g ussan lliy wiyexdimc disen we atidewa af leḥsebis.

20 kan iwet yjen ačiwis naγ tečiwtis s ugeṭṭum almiy yemmuṯ ayemƹaqeb. 21 amma kan yedder aydin n ačiw beƹd iwat as naγ sen rahiy witƹaqibenc amis afelxaḍert ačiw nnas.

22 kan nnuγen irgazen aḏ duzzen temeṭṭuṯ, yaxy temezda tekker lebas, ayeḏfeƹ lliy iduzziṯ leγremeṯ lliy yeḍlebbiṯ argazis beƹd man ayeḥkem lqaḍi. 23 amma kan temdur temeṭṭuṯ nyeƹdel, aggen y lliy iduzziṯ mammeḵ yeggas: kan yenγiṯ atenγen, 24 kan yeƹwerras ṭiṭ aseƹman ṭiṭis netta zada. kan imuksas ssin naγ ffus naγ dder aseggen mammeḵ yeggas. 25 aḏ am idin aseggen: tiqqaḍ s tiqqaḍ, ljerḥ s ljerḥ, rdex s rdex.

26 kan iwet yjen ačiwis naγ tečiwtis yeƹmeyas ṭiṭis, yexs atiseyyeb d leγremeṯ n ṭiṭis lliy yeƹmeyested. 27 aḏ kan iwet yjen ačiwis naγ tečiwtis yerzas ssinis, yexs atiseyyeb d leγremeṯ n lliy yerzas.

28 kan yengez fwunes argaz naγ temeṭṭuṯ yenγi, yexs ayemuḥedef s iḍγaγen almiy ayemmuṯ, we ayemluweḥ yessumis, amma lmulatis wisteteggem ḥaja. 29 amma kan ayuh n ufwunes d aweƹƹer aḏ ineggez diyma, aḏ lmulatis lliy yessen siyes wityeṭṭifc, kan yengez argaz naγ temeṭṭuṯ yenγi, yexs atḥedfen we anγen lmulatis zada. 30 amma kan lmulatis yetquddu ayefda imanis, yexs ayeḏfeƹ lliy ḍlebbent fellas. 31 kan fwunes yengez afrux naγ tefruxt, yexs aggen diyes ayuh n leḥkam. 32 kan yengez fwunes ačiw naγ tečiwt yenγi, yexs lmulatis ayuc y bab n ačiw 30 seg umeḥbub n lfejreṯ, we ayemuḥdef fwunes almiy ayemmuṯ.

33 kan yella mam yeγez anu naγ imir anus yedjiy man γiyr ddan, yaxy yuda diyes aγyul naγ fwunes, yemmuṯ, 34 yexs ayeḏfeƹ lmulatis y bab n zeyleṯ ssumis, we aywiy netta zeyelteḏin.

35 kan yengez fwunes n yjen fwunes n yjen iḍen yenγi, yexs azenzen fwunes lliy yedder we azunen lḥeqqis we azunen fwunes lliy yemmuṯ. 36 amma kan fwunes ineggez s luwel aḏ lmulatis yessen siyes aḏ wityeqqinc. rahiy yexs ayuc fwunesis lliy d ṣbiḥ we aywiy fwunes lliy yemmuṯ.