ନିମିଆ 2

ନିଇମିୟାନ୍‌ ଜିରୁସାଲମନ୍‌ ଆଜନିର୍‌

1 ଅର୍ତକସ୍ତର ରାଜାନ୍‌ ଆରାଜାଗଡ୍‌ ବକୁଡ଼ି ବର୍ସେଙ୍‌ଲୋଙ୍‌ ନିସନ୍‌*2:1 ନୀସନ୍‌ ଏବ୍ରି କେଲେଣ୍ତରନ୍‌ ଅନ୍ତମ୍‌ କେନ୍‌ଆତେ ବର୍ସେଙନ୍‌ ଆପର୍ତମ୍ମୁ ଆଙ୍ଗାୟ୍‌ ବନ୍‌ଡ ନମି ଆ କେଲେଣ୍ତର୍‌ ଅନ୍ତମ୍‌ କେନ୍‌ଆତେ ସୟତିନ୍‌ ୧୫ ତାରିକନ୍‌ ସିଲଡ୍‌ ବଇସାକନ୍‌ ଆଙ୍ଗାୟ୍‌ ୧୫ ତାରିକନ୍‌ ଜାୟ୍‌ ଆଙ୍‌ଗାୟ୍‌ଲୋଙ୍‌ କେନ୍‌ଅନ୍ତମ୍‌ ଗନ୍‌ଟେନ୍‌ ଡେଏନ୍‌ ଡ, ରାଜାନ୍‌ ଆମୁକ୍କାବାନ୍‌ ଦ୍ରାକ୍ୟାଡାନ୍‌ ଡକୋନ୍‌ ଆଡିଡ୍‌ ଞେନ୍‌ ତି ଆ ଡ୍ରାକିଆଡା ପାଙ୍‌ଲେ ରାଜାନ୍‌ଆଡଙ୍‌ ତିୟ୍‌ଲାୟ୍‌ । କେନ୍‌ ଞେନ୍‌ ଆତେମଡ୍‌ଲୋଙନ୍‌ ଆଙ୍‌ଗିୟ୍‌ଜା ଡୁକ୍କ ଅଡ୍‌କୋଲିୟ୍‌ । 2 ସିଲତ୍ତେ ରାଜାନ୍‌ ଞେନ୍‌ଆଡଙ୍‌ ଅପ୍ପୁଙ୍‌ଲିୟ୍‌, "ଆମନ୍‌ ତ ଅଃନସୁଅମ୍‌, ଇନିଆସନ୍‌ ମୁକାନମ୍‌ ଆମୁସୁକା ଗିୟ୍‌ତାତେ ? କେନ୍‌ଆତେ ମନନ୍‌ ଆ ଡୁକ ସାଡ୍‌ଲେ ଆରି ଇନ୍ନିଙ୍‌ ତଡ୍‌ ।" ସିଲତ୍ତେ ଞେନ୍‌ ଗୋଗୋୟ୍‌ ବତଙ୍‌ଲିୟ୍‌ । 3 ଆରି ଞେନ୍‌ ରାଜାନ୍‌ଆଡଙ୍‌ ଅପ୍ପୁଙ୍‌ଲାୟ୍‌, "ସୋଡ଼ାରାଜା ଗୋଗୋୟ୍‌ ବର୍ସେଙ୍‌ ଅମେଙ୍‌ଙ୍ଗମ୍‌ତୋ; ଅଙ୍ଗା ଆଗଡ଼ା ପୁର୍ବାଃ ଜୋଜୋଞେଞ୍ଜି ଆତରିଲ୍‌ନେ ମସାନି, ତିଆତେ ଆରୁଡ଼ାଙ୍ଗାୟ୍‌ ଆରି ତି ଆସନଙ୍‌ଞ୍ଜି ଅଡ଼୍‌କୋନ୍‌ ଆଜୋମ୍‌ତୋଡାୟ୍‌, ତିଆଡିଡ୍‌ ଇନିବା ମ୍ମୁକାଞେନ୍‌ ଅରଡ୍ ମୁସୁକ୍କାଏନ୍‌ ?" 4 ସିଲତ୍ତେ ରାଜାନ୍‌ ଞେନ୍‌ଆଡଙ୍‌ ଅପ୍ପୁଙ୍‌ଲିୟ୍‌, "ତିଡେନ୍‌ ଆମନ୍‌ ଇନି ଆବର୍ନେଲୋଙ୍‌ କାକୁର୍ତ୍ତିତନ୍‌ ?" ସିଲତ୍ତେ ଞେନ୍‌ ରୁଆଙନ୍‌ ଆ ଇସ୍ୱର ଆମଙ୍‌ବା ପାର୍ତନାଲନାୟ୍‌ । 5 ଆରି ଞେନ୍‌ ରାଜାନ୍‌ଆଡଙ୍‌ ଅପ୍ପୁଙ୍‌ଲାୟ୍‌, "ଆଙ୍ଗା ସୋଡ଼ା ରାଜାନ୍‌ ଲଡୟ୍‌ତେ ଆରି କମ୍ୱାରିନମ୍‌ ଆଙ୍ଗା ଗନିୟ୍‌ଗିୟ୍‌ଲୋଙ୍‌ନମ୍‌ ସନାୟୁମନ୍‌ ଞାଙ୍‌ତାୟ୍‌, ତଡେନ୍‌ ଜିଉଦା ଡେସାନ୍‌, ପୁର୍ବାଃ ଜୋଜୋଞେଞ୍ଜି ଆମସାନି ଆଗଡ଼ା ଆନାପ୍ପାୟ୍‌ ଆସନ୍‌ ଞେନ୍‌ଆଡଙ୍‌ ଅନଡ଼େନ୍‌ ତିୟିଞ୍‌, ସିଲତ୍ତେ ଞେନ୍‌ ତିଆତେ ତୁବ୍‌ତାୟ୍‌ ।" 6 ସିଲତ୍ତେ ରାଜାନ୍‌ ଞେନ୍‌ଆଡଙ୍‌ ଅପ୍ପୁଙ୍‌ଲିୟ୍‌, "ଆରି ରାଣିନ୍‌ ଆମଙନ୍‌ ଆତଙ୍କୁମ୍‌ ଡକୋଏନ୍‌, ଆମନ୍‌ ଜନିର୍‌ନମ୍‌ ଡିଅଙ୍ଗାଡିନ୍ନା ଡେତମ୍‌ ? ଆରି ଆମନ୍‌ ଆଙ୍ଗା ୟର୍ତନାୟ୍‌ ?" କେନ୍‌ଅନ୍ତମ୍‌ ଞେନ୍‌ ରାଜାନ୍‌ ଆମଙ୍‌ବା ଡିଅଙ୍‌ଡିନ୍ନା ଡେତିଁୟ୍ ଡିଡିଲେ ଆବର୍ରାଞନ୍‌ ସିଲଡ୍‌ ରାଜାନ୍‌ ଞେନ୍‌ଆଡଙ୍‌ ଆନାପ୍ପାୟ୍‌ ଆସନ୍‌ ଲଡଜେନ୍‌ । 7 ଆରି ଞେନ୍‌ ରାଜାନ୍‌ଆଡଙ୍‌ ବର୍ରାୟ୍‌, "ଆଙ୍ଗା ସୋଡ଼ା ରାଜାନ୍‌ ଲଡୟ୍‌ତେ, ତିଡେନ୍‌ ମିୟ୍‌ତାଲ୍‌ ଅଲନ୍‌ ଡେସାନ୍‌ ଆସୋଡ଼ାମର୍‌ଜି ଏଙ୍ଗାଲେ ଜିଉଦା ଡେସାଲୋଙ୍‌ ଅନ୍‌ରଙ୍‌ ଅଡ଼ୋଏନ୍‌ ଜାୟ୍‌ ଜନିର୍‌ ଞେନ୍‌ ଆସନ୍‌ ଡଅଙ୍‌ଞେନ୍‌ ଅମ୍‌ରେଙ୍‌ତିଞ୍‌ଞ୍ଜି, ତିଆସନ୍‌ ଆମଙ୍‌ବାଞ୍ଜି ଞେନ୍‌ଆଡଙ୍‌ ସିଟିନ୍‌ ତନିୟନ୍‌ ଡେଏତୋ; 8 ଆରିସରେବାସିଙନ୍‌ ଆସନଙ୍‌ଜି ଡ ଗଡ଼ାନ୍‌ ଆକିନ୍ତାଲ୍‌ ଡ ଗରନ୍ନେ ଅସିଙ୍‌ଞେନ୍‌ ଆସନ୍‌ ଅଡ଼ଙ୍ଗଞ୍ଜି ଆତନୁବ୍‌ ଆସନ୍‌ ଞେନ୍‌ଆଡଙ୍‌ ଅରାନ୍‌ ଆତନିୟ୍‌ ସୋଡ଼ା ରାଜାନ୍‌ କିନ୍‌ରେଙ୍‌ ଜନଗେମର୍‌ ଆସପନ୍‌ ଆମଙ୍‌ବା ଅବୟ୍‌ ସିଟିନ୍‌ ତନିୟନ୍‌ ଡେଏତୋ ।" ସିଲତ୍ତେ ଞେନ୍‌ଆଡଙ୍‌ ଇସ୍ୱର ଞେନ୍‌ ଆ ସୁକ୍କା ଅସିନ୍‌ ଆସନାଜ ଆତେ ରାଜାନ୍‌ ତିଆତେ ଞେନ୍‌ଆଡଙ୍‌ ତିୟ୍‌ଲିଁୟ୍‌ ।

ଜିରୁସାଲମ୍‌ ଆ କିନ୍ତାଲ୍‌ ଆଗିନିୟ୍‌ଗିୟ୍‌

9 କେନ୍‌ ସିଲଡ୍‌ ଞେନ୍‌ ମିୟ୍‌ତାଲ୍‌ ଅଲନ୍‌ ଡେସାନ୍‌ ଆ ସୋଡ଼ାମର୍‌ଜି ଆମଙ୍‌ବା ତୁଙ୍‌ଲେ ଆନିଞ୍ଜିଆଡଙ୍‌ ରାଜାନ୍‌ ଆ ସିଟି ତିୟ୍‌ଲାଜି । ଆରି, ରାଜାନ୍‌ ଞେନ୍‌ ସରିନ୍‌ ସେନାପତିନ୍‌ ଡ କୁର୍ତାନ୍‌ ଆତନଙ୍କୁମ୍‌ମର୍‌ଜିଆଡଙ୍‌ ପତାଏଞ୍ଜି । 10 ବନ୍‌ଡ ଇସ୍ରାଏଲନ୍‌ ଆଅଞ୍ଜି ଆସନୁକ୍କା ଆସେସ୍ଟାନେ ଆସନ୍‌ ଅବୟ୍‌ ମନ୍‌ରାନ୍‌ ଜିର୍ରାୟ୍‌ ଗାମ୍‌ଲେ ଅମ୍‌ଡଙ୍‌ଲେ ଓରୋଣିଅନ ସନ୍‌ବଲ୍ଲଟ୍‌ ଡ ଅମ୍ମୋନିୟନ୍‌ ଆ କମ୍ୱାରି ଟୋବିଅନ୍‌ ଗୋଗୋୟ୍‌ ବରାବେଞ୍ଜି ।

11 କେନ୍‌ଅନ୍ତମ୍‌ ଞେନ୍‌ ଜିରୁସାଲମଲୋଙ୍‌ ଅଡ଼ୋଡାଲେ ତେତ୍ତେ ୟାଗି ଡିନ୍ନା ଜାୟ୍ ଡକୋଲନାୟ୍‌ । 12 ତି ଆତଗଲ୍‌ ଞେନ୍‌ ଡ ଞେନ୍‌ ସରିନ୍‌ ଅସୋୟ୍‌ ମନ୍‌ରା ଏଡୋଲନାୟ୍‌; ଆରି ଇସ୍ୱର ଞେନ୍‌ ଜିରୁସାଲମନ୍‌ ଆସନ୍‌ ଇନି ଆଲନୁମ୍‌ ମନ୍ନଲୋଙ୍‌ ଞେନ୍‌ ତିୟେନ୍‌, ତିଆତେ ଞେନ୍‌ ଆନିଙ୍‌ଆଡଙ୍‌ ଅନବ୍‌ଜନାଲାୟ୍‌; ଆରି ଞେନ୍‌ ଅଙ୍ଗା ଆଜନ୍ତୁ ଆଡଅଙ୍‌ଲୋଙ୍‌ ଡାୟ୍‌ଲାୟ୍‌, ଆନିନ୍‌ଆଡଙ୍‌ ଉମ୍‌ରେଙ୍‌ଲ ଆନା ଜନ୍ତୁଜି ଞେନ୍‌ ସରିନ୍‌ ଆରି ଆନ୍ନିଙ୍ ଅଃଡକୋଲନ୍‌ । 13 ଆରି, ଞେନ୍‌ ତଗଲନ୍‌ ଡୁଙ୍‌ଲନ୍‌ ଗର୍ଡ-ଡୁଆରା ଗଡ୍‌ ନାଗକୁଆନ୍‌ ଡ କତ ସନଙନ୍‌ ଜାୟ୍‌ ଇୟେନ୍‌ ଆରି ଜିରୁସାଲମନ୍‌ ଆରିଡ଼ାଙନ୍‌ ଆକିନ୍ତାଲ୍‌ ଡ ତଗୋନ୍‌ଲୋଙନ୍‌ ଆଜରୋମ୍‌ତୋଡେନ୍‌ ଆସନଙ୍‌ ଅଡ଼୍‌କୋନ୍‌ ଗିୟ୍‌ଲାୟ୍‌ । 14 ସିଲତ୍ତେ ଞେନ୍‌ ଡୁଙ୍‌ଡମ୍‌ନେଡାନ୍‌ ଆଡୁଆରା ଡ ରାଜାନ୍‌ ଆବଣ୍ତା ଜାୟ୍‌ ଇୟେନ୍‌; ବନ୍‌ଡ ତିତେତ୍ତେ ଜନ୍ତୁଞେନ୍‌ ଆଜନିର୍‌ ଆସନ୍ ତଙର୍‌ ଅଃଡକୋଲୋ । 15 ଞେନ୍‌ ତଗଲନ୍‌ ଆଡିଡ୍‌ ଅଲନ୍‌ ଆତୋଣ୍ତୋଗଡ୍‌ ଜିର୍ରେ କିନ୍ତାଲନ୍‌ ଗିୟ୍‌ଲାୟ୍‌; ସିଲତ୍ତେ ଞେନ୍‌ ବୁଲେଲେ ଗର୍ଡନ୍‌-ଆସନଙ୍‌ଗଡ୍‌ ଗନ୍‌ଲେ ୟର୍ରନାୟ୍‌ ।

16 ବନ୍‌ଡ ଞେନ୍‌ ଅଡ଼େଙ୍ଗାସେଙ୍‌ ଇୟେନ୍‌ ଆରି ଇନି ଲୁମ୍‌ଲାୟ୍‌, କେନ୍‌ଆତେ ଡନେମରଞ୍ଜି ଅଜ୍ଜନାଲୋଜି; ଆରି, ତିଆଡିନ୍ନା ଜାୟ୍‌ ଞେନ୍‌ ଜିଉଦିଞ୍ଜିଆଡଙ୍‌ କି ରାଓଡ଼ାଞ୍ଜିଆଡଙ୍‌ କି ସୋଡ଼ା ଆମ୍ମୁଙ୍‌ଗଡ୍‌ମର୍ରଞ୍ଜି କି ଆନ୍ନା କାବ୍ବାଡ଼ାମରଞ୍ଜିଆଡଙ୍‌ ତିଆତେ ଅନବ୍‌ଜନାଲାୟ୍‌ଜି । 17 ସିଲଡ୍‌ଲ୍ଲନ୍‌ ଞେନ୍‌ ଆନିଞ୍ଜିଆଡଙ୍‌ ବର୍ରାଜି, "ଇନ୍‌ଲେଞ୍ଜି ଏଙ୍ଗାଲେ ପରାନ୍‌ସାତ୍ତିନ୍‌ ଅନ୍ତମ୍‌ ଡକୋଜି, ଜିରୁସାଲମନ୍‌ ଆରୁଡ଼ାଙ୍‌ ଆସନେଡ୍‌ସେଡନ୍‌ ଅନ୍ତମ୍‌ ଡକୋ ଆରି ସନଙଞ୍ଜି ଅଡ଼୍‌କୋନ୍‌ ଆଜୋମ୍‌ତୋଡାୟ୍‌, କେନ୍‌ଆତେ ଆମ୍ୱେଞ୍ଜି ଏଗିୟ୍‌ତେ; ଜିରାୟ୍‌ବା, ଇନ୍‌ଲେଞ୍ଜି ଏଙ୍ଗାଲେ ଆରି ନିଣ୍ତୟନ୍‌ ଅଡ୍‌ଞାଙ୍‌ବୋ, ତିଆସନ୍‌ ଜିରୁସାଲମନ୍‌ ଆ କିନ୍ତାଲ୍‌ ଏବାର୍‌ତୁବ୍‌ବା ।" 18 ସିଲତ୍ତେ ଞେନ୍‌ଆଡଙ୍‌ ଇସ୍ୱରଞେନ୍‌ ଆସନୁକ୍କାସି ଆ ବର୍ନେ, ଆରି ଞେନ୍‌ଆଡଙ୍‌ ତି ଆରାଜା ଆବର୍ନେ ଆ ବିସୟ ଞେନ୍‌ ଆନିଞ୍ଜିଆଡଙ୍‌ ଅବ୍‌ଜନାଲାଜି । ସିଲତ୍ତେ ଆନିଞ୍ଜି ବର୍ରଞ୍ଜି, "ଜିରାୟ୍‌ବା, ଇନ୍‌ଲେଞ୍ଜି ଡୋଲନ୍‌ ଏତୁବ୍‌ବା ।" କେନ୍‌ ଅନ୍ତମ୍‌ ଆନିଞ୍ଜି ତି ଆ ମନଙ୍‌ ଆ କାବ୍ବାଡ଼ା ଆସନ୍‌ ଆସିଞ୍ଜି ରବ୍‌ଡୋଏଞ୍ଜି ।

19 ବନ୍‌ଡ ଓରୋଣିଅନ ସନ୍‌ବଲଟ୍‌ ଡ ଆମ୍ମୋନିୟନ୍‌ ଆ କମ୍ୱାରି ଟୋବିଅନ୍‌ ଡ ଆରବିୟ ଗେସମ୍‌ ଅମ୍‌ଡଙ୍‌ଲେ ଇନ୍‌ଲେଞ୍ଜିଆଡଙ୍‌ ସୟ୍‌ସୟ୍‌ମୁଲେ କାରିୟ୍‌ଲେ ବର୍ରଞ୍ଜି, "ଆମ୍ୱେଞ୍ଜି ଇନିଅକେନ୍‌ ଆକାବ୍ବାଡ଼ା ଏଲୁମ୍‌ତେ ? ଆମ୍ୱେଞ୍ଜି ରାଜାନ୍‌ ଏସଙ୍ଗତାତେ ପଙ୍‌ ?"

20 ସିଲତ୍ତେ ଞେନ୍‌ ଆନିଞ୍ଜିଆଡଙ୍‌ ଜାଲଙ୍‌ଲେ ବର୍‌ରାଜି, "ରୁଆଙନ୍‌ ଆ ଇସ୍ୱର, କାବ୍ବାଡ଼ାଲେନ୍‌ ଆନିନ୍‌ ଗବ୍‌ଡେଲ୍‌ତେ; ଇନ୍‌ଲେଞ୍ଜି ଆକମ୍ୱାରିଞ୍ଜି ତିଆସନ୍‌ ଡୋଲନ୍‌ ଏତୁବ୍‌ତାୟ୍‌; ବନ୍‌ଡ ଜିରୁସାଲମଲୋଙ୍‌ ଆମ୍ୱେଞ୍ଜି ଆସନ୍‌ ଇନ୍ନିଙ୍‌ ଆବନନ୍ତା କି ଅଞୁମ୍‌ଲୋଙ୍‌ବେନ୍‌ ଇନ୍ନିଙ୍‌ ଆ ଇତିଆସ ଅଃଡକୋଏ ।"