1 ଗିଆନବଜନ୍‌ ଆସିଙ୍‌ଡମନ୍‌ ତୁବ୍‌ତେ; ବନ୍‌ଡ ଏର୍‌ଗିଆନବଜନ୍‌ ଆସିଡମନ୍‌ ବାତ୍ତେ ପୁଡ୍‌ତେ ।

2 ଆନା ଆ ଲନଗଡନ୍‌ ବାତ୍ତେ ଞଣ୍ତ୍ରମ୍‌ତନ୍‌, ଆନିନ୍‌ ପ୍ରବୁନ୍‌ଆଡଙ୍‌ ବତଙ୍‌ତେ; ବନ୍‌ଡ ଆନ୍ନାଗଡ୍‌ ଆତ୍ରଙିୟ୍‌ତନ୍‌ ଆମନ୍‌ରା ପ୍ରବୁନ୍‌ଆଡଙ୍‌ ଏଡ଼ୁର୍‌ମଡ୍‌ତେ ।

3 ଏର୍‌ଗିଆନମରନ୍‌ ଆତଅଡ୍‌ କଙ୍କ୍ରିନ୍‌ ଆ ତେଙ୍ଗା ଡକୋ; ବନ୍‌ଡ ଗିଆନମରନ୍‌ ଆ ଉସାଲ୍‌ତମ୍‌ ଆନିଞ୍ଜିଆଡଙ୍‌ ଡୋବ୍‌ତେ ।

4 ଅଙ୍ଗାଲୋଙ୍‌ ତାଙ୍‌ଲେୟନ୍‌ ଅବୟ୍‌ତଡ୍‌, ତେତ୍ତେ ଜନ୍‌ରୋମନ୍‌ ଅବୟ୍‌ତଡ୍‌; ଆରି ତାଙ୍‌ଲେୟନ୍‌ ଆ ବପ୍ପୁ ବାତ୍ତେ ରନ୍ନାନ୍‌ ଗୋଗୋୟ୍‌ତେ ।

5 ଡର୍ନେଡମ୍‌ ସାକ୍କିନ୍‌ ପାତ୍ୟାନ୍‌ ଅବର୍ନେ, ବନ୍‌ଡ ଏର୍‌ଡର୍ନେଡମ୍‌ ସାକ୍କିନ୍‌ ପାତ୍ୟାନ୍‌ ବର୍ତନେ ।

6 ନିଣ୍ତୟ୍‌ମରନ୍‌ ଗିଆନନ୍‌ ସାଜେଣ୍ଡେନ୍‌ ଅଃଞାଙେ, ବନ୍‌ଡ ବୁଡ୍ଡିମରନ୍‌ ଆସନ୍‌ ପଡ଼େନେନ୍‌ ଲଗଡ଼ ।

7 ଉଲ୍ଲୁମରନ୍‌ ଆମଙ୍‌ବା ଇୟେଣ୍ଡେନ୍‌; ଆମନ୍‌ ଆ ଗିଆନବରନ୍‌ ଆ ଉସାଲ୍‌ତମ୍‌ଲୋଙନ୍‌ ଏଗିଜେ ।

8 ସାଲ୍ଲାକିମରନ୍‌ ଗିଆନନ୍‌ ବାତ୍ତେ ଆ ତଙରନ୍‌ ଆସନ୍‌ ଇୟମ୍‌ତେ ବନ୍‌ଡ ପେଲ୍ଲାମରଞ୍ଜି ଏର୍‌ବନୁଡ୍ଡିନ୍‌ ବାତ୍ତେ ବୁର୍ଡତଜି ।

9 ଏର୍‌ଗିଆନମରଞ୍ଜି ଡୋସାନ୍‌ ପଣ୍ଡିଆ ଅବ୍‌ଡିସୟ୍‌ତଜି, ବନ୍‌ଡ ଲଗଡ୍‌ମରଞ୍ଜି ଆମଙ୍‌ଲୋଙ୍‌ ସନାୟୁମନ୍‌ ଡକୋତେ ।

10 ଉଗ୍ଗରନ୍‌ ଆନିନ୍‌ଡମନ୍‌ ଆ ଅସାଙ୍‌ୟମନ୍‌ ଜନାତେ; ଆରି ଏର୍‌ନମ୍ମଡନ୍‌ ଆମନ୍‌ରା ଆ ସର୍ଡାଲୋଙନ୍‌ ଅଃମାୟ୍‌ନେ ।

11 ପେଲ୍ଲାମରଞ୍ଜି ଆସିଙ୍‌ ରିଡ଼ାଙ୍‌ତେ; ବନ୍‌ଡ ଲଗଡ୍‌ମରଞ୍ଜି ଆ ତମ୍ୱୁସିଙ୍‌ ମରଙ୍‌ତେ ।

12 ମନ୍‌ରାନ୍‌ ଆଗନିୟ୍‌ଗିୟ୍‌ଲୋଙ୍‌ ଲାଙ୍‌ଲେଡ୍‌ ଆ ତଙର୍‌ ବିଙୟ୍‌ ଗିୟ୍‌ତାତେ; ବନ୍‌ଡ ତିଆତେ ତିକ୍କି ରନବୁନ୍‌ ଆତଙର୍‌ ଡକୋତେ ।

13 କନିୟ୍‌ବେଡ଼ାନ୍‌ ନିୟ୍‌ ମନ୍ନନ୍‌ ଡୁକ୍କତନେ; ଆରି ସର୍ଡାନ୍‌ ଆତିକ୍କି ୟେୟେଡାନ୍‌ ।

14 ଉଗ୍ଗର୍‌ଲୋଙନ୍‌ ଆନ୍ନାଗଡ୍‌ ଆତ୍ରଙିୟ୍‌ତଞ୍ଜି ଆମନ୍‌ରା ଆ ଞଣ୍ତ୍ରମ୍‌ ଜଅ ବାତ୍ତେ ବରିୟ୍‌ତେ । ଆରି ମନଙ୍‌ମରନ୍‌ ଆନିନ୍‌ଡମନ୍‌ ସିଲଡ୍‌ ବୋଓତେ ।

15 ଏର୍‌ବୁଡ୍ଡିମରନ୍‌ ଅଡ଼୍‌କୋନ୍‌ ଆବର୍ନେ ଡର୍ତନେ; ବନ୍‌ଡ ସାଲ୍ଲାକିମରନ୍‌ ଆଜନିର୍‌ ଅଡ଼୍‌କୋନ୍‌ ମନଙ୍‌ ଜନାତେ ।

16 ଗିଆନମରନ୍‌ ବତଙ୍‌ତେ ଆରି ପରାନ୍‌ସାତ୍ତିନ୍‌ ଅମ୍‌ରେଙ୍‌ତେ, ବନ୍‌ଡ ଉଲ୍ଲୁମରନ୍‌ ଅବ୍‌ସୋଡ଼ାଡମ୍‌ନେନ୍‌ ଆନିୟମ୍‌ ଅଃବତଙେ ।

17 ଅଙ୍ଗା ଆମନ୍‌ରା ଲବରାବ୍‌ତେ ଆନିନ୍‌ ଏର୍‌ଗିଆନ ଲନୁମନ୍‌ ଲୁମ୍‌ତେ; ଆରି ପରାନ୍‌ସାତ୍ତି ଆନିୟମ୍‌ମର୍‌ ଏର୍‌ବୁଡ୍ଡିମରନ୍‌ ଏଡ଼ୁର୍‌ମଡ୍‌ଡାଗୋ ।

18 ଜାଗର୍ତତଡନ୍‌ ଆମନ୍‌ରାଜି ଏର୍‌ଗିଆନନ୍‌ ଅନ୍ତମ୍‌ ଆଡନେ ଞାଙ୍‌ତଜି, ବନ୍‌ଡ ସାଲ୍ଲାକିମରନ୍‌ ଗିଆନନ୍‌ ଅନ୍ତମ୍‌ ଆ ରନୁବ୍ବବ୍‌ଲୋଙ୍‌ ରୁବ୍ବବ୍‌ତଞ୍ଜି ।

19 ପରାନ୍‌ସାତ୍ତିନ୍‌ ଆମନ୍‌ରା ମନଙ୍‌ମରଞ୍ଜି ଆମୁକ୍କାଲୋଙ୍‌ ଡ ପେଲ୍ଲାମରଞ୍ଜି ଡରମ୍ମମରଞ୍ଜି ଆ ଡୁଆରାଲୋଙ୍‌ ତୁଡ଼ୁମ୍‌ତଜି ।

20 ଡୋଲେୟ୍‌ମରନ୍‌ ଆ ତୟ୍‌ଲିସିଙ୍‌ମରନ୍‌ ବାତ୍ତେ ନିୟ୍‌ ଏଡ଼ୁର୍‌ମଡ୍‌ତେ, ବନ୍‌ଡ ଗମାଙ୍‌ମରନ୍‌ ଆ କୁଲମ୍‌ ଗୋଗୋୟ୍‌ ଡକୋତେ ।

21 ଅଙ୍ଗା ଆମନ୍‌ରା ତୟ୍‌ଲିସିଙ୍‌ମରନ୍‌ଆଡଙ୍‌ ଏଡ଼ୁର୍‌ମଡ୍‌ତେ, ଆନିନ୍‌ ଇର୍ସେନ୍‌ ଲୁମ୍‌ତେ; ବନ୍‌ଡ ଅଙ୍ଗା ଆମନ୍‌ରା ଡୋଲେୟ୍‌ମରନ୍‌ଆଡଙ୍‌ ସାୟୁମ୍‌ତେ ଆନିନ୍‌ ସନେନ୍‌ସେନ୍‌ଡମ୍‌ ।

22 ଅନବ୍‌ସେଡନ୍‌ ଆନିୟମ୍‌ମର୍‌ଜି ଇନି ଅଃନାଡ଼ଏଜି ପଙ୍‌ ? ବନ୍‌ଡ ସୁକ୍କାନ୍‌ ଆନିୟମ୍‌ମର୍‌ଜି ଆଡଅଙ୍‌ ସନାୟୁମନ୍‌ ଡ ଆଜାଡ଼ିନ୍‌ ଞାଙ୍‌ତଜି ।

23 ଏର୍ଜାଡ଼ିକାନ୍‌ ଆ କାବ୍ବାଡ଼ା ଆସନ୍‌ ଓଞୋଲ୍‌କୁଜନ୍‌ ଡକୋ; ଆରି ଏର୍‌କାବ୍ବାଡ଼ାଲନ୍‌ ବର୍ନେନ୍‌ତୁମ୍‌ଡେନ୍‌ ଡୋଲେଜନ୍‌ ଆସନ୍‌ ସୁସ୍‌କାୟ୍‌ତେ ।

24 ରନ୍ନାନ୍‌ ଗିଆନମରଞ୍ଜି ଆ ରନୁବ୍ବବ୍‌, ଆରି ଉଲ୍ଲୁମରଞ୍ଜି ଆସନ୍‌ ଏର୍‌ବନୁଡ୍ଡିନ୍‌ ଡକୋ ।

25 ଆଜାଡ଼ି ସାକ୍କିମରନ୍‌ ଆନ୍ନାମରନ୍‌ ଆପରାନ୍ନା ତାଣ୍ତେତେ; ବନ୍‌ଡ ପାତ୍ୟାନ୍‌ ଆବର୍ତନ୍‌ ଆମନ୍‌ରା ବୁର୍ଡନ୍‌ ଆବରିୟ୍‌ ।

26 ପ୍ରବୁନ୍‌ ଆବିସୟ ଆବନ୍ତଙ୍‌ଲୋଙ୍‌ ଡର୍ନେଲୋଙନ୍‌ ରବ୍‌ଡୋଲନ୍‌ ଡକୋତନ୍‌ ଆରି ଆଅନଞ୍ଜି ଡରକୋନେନ୍‌ ଞାଙ୍‌ତଜି ।

27 ରନବୁନ୍‌ ଅନୋଡ଼େଙନ୍‌ ସିଲଡ୍‌ ଅନାବ୍‌ୟର୍‌ ଆସନ୍‌ ପ୍ରବୁନ୍‌ ଆବର୍ନେ ଆବନ୍ତଙ୍‌ ଅନମେଙନ୍‌ ଆ ଡୁଙ୍‌ଡମ୍‌ନେଡାନ୍‌ ଅନ୍ତମ୍‌ ।

28 ମନ୍‌ରାନ୍‌ ଆ ଗନୋଗୋୟ୍‌ଲୋଙ୍‌ ରାଜାନ୍‌ ପେମେଙ୍‌ତେ; ଆରି ମନ୍‌ରାନ୍‌ ଆନସୋୟ୍‌ଲୋଙ୍‌ ରାଜାନ୍‌ ଅସେଡ୍‌ତେ ।

29 ଅଙ୍ଗା ଆମନ୍‌ରା ଅଃଲବରାବେ, ଆନିନ୍‌ ମାଡ୍ଡ ବୁଡ୍ଡି; ବନ୍‌ଡ ଅଙ୍ଗା ଆମନ୍‌ରା ଲବରାବ୍‌ତେ ଏର୍‌ବୁଡ୍ଡି ପତକା ଅବ୍‌ଡୋତେ ।

30 ସୟୁ ଉଗ୍ଗରନ୍‌ ଡଅଙନ୍‌ ଅନମେଙନ୍‌ ଅନ୍ତମ୍‌, ଆରି ଇସ୍କତ୍ତାନ୍‌ ଅଜାଙନ୍‌ ଆନବ୍‌ମୋସ୍ସା ଅନ୍ତମ୍‌ ।

31 ଅଙ୍ଗା ଆମନ୍‌ରା ଅରିର୍ସୋୟମ୍‌ଡାନ୍‌ ଆମନ୍‌ରା ଆଡଅଙ୍‌ ଜୁରୁତେ, ଆନିନ୍‌ ଆ ଗନଡ଼େମରନ୍‌ଆଡଙ୍‌ ନିଣ୍ତୟ୍‌ତେ; ଆରି ଆନା ଡୋଲେୟ୍‌ମରନ୍‌ଆଡଙ୍‌ ସାୟୁମ୍‌ତେ, ଆନିନ୍‌ ପ୍ରବୁନ୍‌ଆଡଙ୍‌ ଗନୁଗୁନ୍‌ ତିୟ୍‌ତେ ।

32 ପେଲ୍ଲାମରନ୍‌ ଆ ପରାନ୍‌ସାତ୍ତିନ୍‌ ଆଲନୁମ୍‌ ଆସନ୍‌ ଗନଙ୍‌ତିଡନ୍‌ ଡେତେ, ବନ୍‌ଡ ରନବୁବେଡ଼ାଇଙନ୍‌ ଡରମ୍ମମରନ୍‌ ଡରକୋନେନ୍‌ ଞାଙ୍‌ତେ ।

33 ଗିଆନନ୍‌ ବୁଡ୍ଡିମରନ୍‌ ଆ ଉଗର୍‌ଲୋଙ୍‌ ଡକୋତେ; ଆରି ଉଲ୍ଲୁମରନ୍‌ ଆନିୟମ୍‌ ଗିୟ୍‌ତାତେ ।

34 ଡରମ୍ମମରନ୍‌ ରାଜ୍ୟନ୍‌ ମବ୍‌ରଙ୍‌ତେ; ବନ୍‌ଡ ଇର୍ସେମରନ୍‌ ମନ୍‌ରାଞ୍ଜିଆଡଙ୍‌ ଗବ୍‌ରୟ୍‌ତେ ।

35 ବୁଡ୍ଡିଡମନ୍‌ ଆକମ୍ୱାରି ରାଜାନ୍‌ ଆ ସନାୟୁମ୍‌ ଞାଙ୍‌ତେ; ଆରି ଆନା ଗନ୍‌ଡ୍ରୟ୍‌ଜନ୍‌ ଅବ୍‌ତୁୟ୍‌ତେ, ଆନିନ୍‌ଆଡଙ୍‌ ଆନିନ୍‌ ବରାବ୍‌ତେ ।