1 ପ୍ରବୁନ୍‌ ମସାନ୍‍ଆଡଙ୍‍ ବରେନ୍‌, ଞେନ୍‌ ପାରୋନ୍‍ ଡ ମିସର୍‌ଲୋଙ୍‌ ଆରି ଅବୟ୍‌ ପନବ୍‌ରଡନ୍‌ ପାଙ୍‌ତାୟ୍‍; ସିଲତ୍ତେ ଆନିନ୍‌ ଆମ୍ୱେଞ୍ଜିଆଡଙ୍‌ କେନ୍‍ ଆଡ୍ରକୋନେ ସିଲଡ୍‌ ଉମ୍‌ରେଙ୍‌ତବେନ୍‌; ଆରି ଜନିରନ୍‌ ଆତରିୟ୍‌ତବେନ୍‌ ଆଡିଡ୍‌ ଆନିନ୍‌ ଏଙ୍ଗାଲ୍‌ଜାୟ୍‌ ଗଙ୍‌ତୁଡ୍‌ତବେନ୍‌ । 2 ତିଆସନ୍‍ ନମିଞେନ୍‌ ମନ୍‌ରାଞ୍ଜି ଅବ୍‍ଗନ୍‌ଲୁଡ୍‌ଲେ ବର୍ବାଜି, ଡିଲେ ଓବ୍ବାମରନ୍‌ ରମ୍ମଙ୍‌ ରମଙ୍‍ ତୟଲିସିଙ୍‌ମରନ୍‍ ସିଲଡ୍‌ ଡ ଡିଲେ ଆଇବଜନ୍‌ ରମ୍ମଙ୍‌ ରମ୍ମଙ୍‌ ତୟଲିସିଙ୍‌ବଜଞ୍ଜି ଆମଙ୍‌ସିଲଡ୍‌ ରୁପ୍ପାନ୍‍ ଡ ସୁନ୍ନାନ୍‌ ଆତନଲ୍‌ତଲ୍‌ ବେଡ୍‌ଲେ ପାଙେତଜି । 3 ଆରି ପ୍ରବୁନ୍‌ ମିସ୍ରିୟଞ୍ଜି ଆଗନିୟ୍‌ଗିୟ୍‌ଲୋଙ୍‌ ମନ୍‌ରାଞ୍ଜିଆଡଙ୍‌ ସାୟୁମେଞ୍ଜି । ଆରି ମିସର୍‌ ଡେସାଲୋଙ୍‌ ପାରୋନ୍‍ ଆ କମ୍ୱାରିଜି ଡ ମନ୍‌ରାଜି ଆଗନିୟ୍‌ଗିୟ୍‌ଲୋଙ୍‌ ମସାନ୍‍ ସୋଡ଼ା ମ୍ମନାନେମର୍‍ ଡେଲୋ । 4 ସିଲତ୍ତେ ମୋସାନ୍‍ ବର୍ନେ, ପ୍ରବୁନ୍‌ କେନ୍‍ ଆବର୍ନେ ବର୍ତନେ, ଞେନ୍‌ ମଡ୍ଡିତଗଲନ୍‌ ଆଡିଡ୍‌ ମିସରନ୍‍ ଆ ମଡ୍ଡିଗଡ୍‌ ତଙିୟ୍‌ଲନ୍‌ ଏଜିର୍ବା । 5 ସିଲତ୍ତେ ପାରୋନ୍‌ ଆ ତରଙ୍କୁମ୍‌କୁର୍ସି ଆପର୍ତମ୍ମୁକୋଡ୍‌ ସିଲଡ୍‌ ରିଡ୍‌ଗୋର୍ନା କମ୍ୱାରିବୟ୍‌ ଆପର୍ତମ୍ମୁକୋଡ୍‌ ଜାୟ୍‌ ମିସର୍‌ ଡେସାନ୍‌ ଅଡ଼୍‌କୋନ୍‌, ଆପର୍ତମ୍ମୁକୋଡ୍‌ ଡ ଜନ୍ତୁଜି ଆପର୍ତମ୍ମୁକୋଡ୍‌ ରବୁତଜି । 6 ତିଆସନ୍‍ ସମ୍ପରା ମିସର୍‌ ଡେସାଲୋଙ୍‌, ଏଙ୍ଗାଲେ ଆଙ୍ଗିୟ୍‌ ଅନ୍‌ରଙ୍‌ ଡେଏ ଆରି ଅଃଡେଏ କେନ୍‌ ଏନ୍ନେଲେ ସୋଡ଼ା ୟେୟେଡାନ୍‍ ଡେତେ । 7 ବନ୍‌ଡ ପ୍ରବୁନ୍‌ ମିସ୍ରିୟବାୟ୍‌ଜି ସିଲଡ୍‌ ଇସ୍ରାଏଲନ୍ ଆମନ୍‍ରାଜିଆଡଙ୍‌ ଆଙ୍‌ସାତଜି, କେନ୍‌ଆତେ ଏଙ୍ଗାଲେ ଆମ୍ୱେଞ୍ଜି ଜନାତବେନ୍‌, ତିଆସନ୍‍ ଇସ୍ରାଏଲନ୍‌ ଆଅନଞ୍ଜି ଆମଙ୍‌ସିଲଡ୍‍ ମନ୍‌ରାନ୍‌ ଅଡ଼େ ଜନ୍ତୁନ୍‍ଆଡଙ୍‌ ଅବୟ୍‌ କିନ୍‌ସଡନ୍‌ ଜାୟ୍‌ ଅଃବାବ୍‌ବାବେ । 8 ସିଲତ୍ତେ କେନ୍‌ ଅଡ଼୍‌କୋନ୍‌ କମ୍ୱାରିବେଞ୍ଜି ବରୁମ୍‌ଲେ ଅମଙ୍‌ଞେନ୍‍ ଜିର୍ତାଜି ଆରି ଡଅଙ୍‌ଞେନ୍‌ ଲୋମ୍‌ଲେ ବର୍ତଞ୍ଜି, ଆମ୍ୱେନ୍‌ ଡ ସନଣ୍ତୋଙ୍‌ମର୍‌ବେଞ୍ଜି ଅଡ଼୍‌କୋନ୍‌ ଡୁଙ୍‌ଲନ୍‌ ଜିର୍ବା; ସିଲତ୍ତେ ଞେନ୍‌ ଡୁଙ୍‌ଲନ୍‌ ଜିର୍ତେ । ସିଲତ୍ତେ ଆନିନ୍‌ ବନ୍‌ରାବନ୍ ବାତ୍ତେ ପାରୋନ୍‍ ଆମଙ୍‍ସିଲଡ୍‍ ଡୁଙ୍‌ଲନ୍‍ ଜିରେନ୍‍ । 9 ପ୍ରବୁନ୍‌ ମସାନ୍‍ଆଡଙ୍‌ ବରେନ୍‌, ଞେନ୍‌ ଏଙ୍ଗାଲେ ମିସର୍‌ ଡେସାଲୋଙ୍‌ ସାନ୍ନିକାବ୍ବାଡ଼ାଞେନ୍‌ ଅବ୍‌ଗୋଗୋୟ୍‍ତାୟ୍‌, ତିଆସନ୍‌ ପାରୋନ୍‍ ବର୍ନେବେଞ୍ଜି ଅଃଡାଲୁଡେ । 10 ଆରି ମୋସାନ୍‌ ଡ ଆରୋଣନ୍‌ ପାରୋନ୍‍ ଆମୁକ୍କାଲୋଙ୍‍ କେନ୍‍ ଅଡ଼୍‌କୋନ୍ ସାନ୍ନି କାବ୍ବାଡ଼ାନ୍‌ ଲୁମେଞ୍ଜି; ବନ୍‌ଡ ପ୍ରବୁନ୍‌ ପାରୋନ୍‍ ଆଉଗ୍ଗର୍‍ ରବ୍‍ଡୋଏନ୍‌, ଆଡେସାନ୍‍ ସିଲଡ୍‌ ଆନିନ୍‌ ଇସ୍ରାଏଲନ୍‌ ଆଅନଞ୍ଜିଆଡଙ୍‌ ଅଃନୁମ୍‌ରେଙ୍‌ଲଜି ।