1 ଆମନ୍‌ ଦସ୍‌ଟା ଡରଙ୍‌କାବନ୍ ବାତ୍ତେ ଅବୟ୍ ସରେବା ତମ୍ବୁସିଙନ୍ ତୁବା, ଆରି ଅମ୍ମଗଡ୍ ନିଡ଼ି, କରୋମାବ୍ ଡ ଲୁଲୁତାଡ଼େରନ୍ ବାତ୍ତେ ତନୁବନ୍ ଡେତେ, ଆରି କିରୁବଞ୍ଜି ଆମୁକା ଆତୁବ୍‌ତୁବ୍ ଡକୋତନ୍ । 2 ଅଡ଼୍‌କୋନ୍ ଆଡରଙ୍‌କାବ୍ ଡନେଙ୍ଗାନ୍ ବକୁଡ଼ି ଆଟସନ୍ତି ଆରି ଲନାଆଙନ୍ ଉଞ୍ଜି ସନ୍ତି, ଅଡ଼୍‌କୋନ୍ ଆଡରଙ୍‌କାବ୍‌ ଆବସମାନନ୍ ଡକୋତନ୍ । 3 ଆରି ମନ୍‌ଲୟନ୍ ଆଡରଙ୍‌କାବ୍ ବୟ୍‌ଲେ ଆବୟନ୍‌ ଏମ୍ମେଆ, ଆରି ମନ୍‌ଲୟ୍ ଡରଙ୍‌କାବନ୍ ଡକୋନ୍ଆତେ ଏତ୍ତେଲେମା ବନଜନ୍ ଡେତେ । 4 ଅଡ଼୍‌କୋନ୍ ଆଲୁଆଡ୍‌ ଡରଙ୍‌କାବ୍‌ଲୋଙନ୍ ନିଡ଼ିକାବନ୍ ବାତ୍ତେ ଆଜନୁଲନ୍‌ ତୁବା ଡ ଆମାୟଙ୍‌ଲୋଙନ୍‌ ବାଗୁ ଡରଙ୍‌କାବ୍‌ଲୋଙନ୍‌ ଆଲୁଆଡ୍‌ ତିଅନ୍ତମ୍‌ ତୁବା। 5 ଆପର୍ତମ୍ମୁ ଆଲୁଆଡ୍‌ ଡରଙ୍‌କାବ୍‌ଲୋଙନ୍ ପଚାସଟା ଜରିବାଡନ୍ ଆରି ଅବୟ୍‌ ଆଲୁଡ୍ ଡରଙ୍‌କାବ୍‌ଲୋଙନ୍ ପଚାସଟା ଆଜନୁଲନ୍‌ ତୁବା । 6 ଆରି ଅଡ଼୍‌କୋନ୍ ଆଲୁଆଡ୍‌ ଡରଙ୍‌କାବନ୍ ଆଜନୁଡ଼େ ଆସନ୍‌ ସୁନ୍ନାନ୍ ବାତ୍ତେ ଆରାକୟଁନ୍ ତୁବା ଆରି ଆଜନୁଲ୍‌ଲୋଙନ୍ ଆରାକୟଁନ୍ ବାତ୍ତେ ଆକଁୟ୍‌ଲେ ବାଗୁନ୍ ଆ ଡରଙ୍‌କାବନ୍ ମାୟ୍‌ତନେ ।

7 ସରେବା ତମ୍ବୁସିଙନ୍ ଆତୋଣ୍ଡୋ ୟନୁମନ୍ ଆସନ୍‌ ଓବ୍ବାମେଡନ୍ ଆଉପ୍ପୁର୍ ବାତ୍ତେ ଏଗାର୍‌ଟା ଡରଙ୍‌କାବନ୍ ତୁବା । 8 ଅଡ଼୍‌କୋନ୍ ଆଡରଙ୍‌କାବ୍ ଆଡନେଙ୍ଗା ତିରିସି ସନ୍ତି ଆରି ଲନାଆଙନ୍ ଉଞ୍ଜି ସନ୍ତି ଡେତେ । ଏଗାର୍‌ଟା ଆ ଡରଙ୍‌କାବ୍ ଆବସରିନ୍ ଡେତେ । 9 ମନ୍‌ଲୟନ୍ ଆ ଡରଙ୍‌କାବ୍ ଜୁଡ଼େଲେ ଆବୟନ୍‌ ଏମ୍ମେଆ ଆରି ତୁଡ୍ରୁ ଡକୋନ୍ ଆ ଡରଙ୍‌କାବନ୍ ନିୟ୍ ଜୁଡ଼େଲେ ଡକ୍କୋଆ । ତୁଡ୍ରୁ ଡକୋନ୍ ଆ ଡରଙ୍‌କାବନ୍ ରବ୍‌ଲେ ତମ୍ବୁସିଙନ୍ ଆମୁକ୍କାଲୋଙ୍ ଡଙା । 10 ଆରି ଆରବ୍‌ରବନ୍ ଡ ଅଡିଅତାନ୍ ଆଡରଙ୍‌କାବ୍‌ଲୋଙନ୍ ନିୟ୍ ପଚାସଟା ଆଜନୁଲନ୍‌ ତୁବା 11 ଆରି ଡରଙ୍‌କାବନ୍ ଆଜନୁଲନ୍‌ ଆସନ୍‌ ପିତ୍ତଡ଼ନ୍‌ ବାତ୍ତେ ଆରାକୟଁନ୍ ତୁବ୍‌ଲେ ଜୁଡ଼େଆ ଆରି ତିଆତେ ମାୟ୍‌ଲନ୍ ଅବୟ୍ ତମ୍ବୁସିଙନ୍ ଗଡେଲ୍‌ତେ । 12 ତମ୍ବୁସିଙନ୍ ଆଡରଙ୍‌କାବ୍‌ ଆର୍‌ଲାଗାଏନ୍‌ ଆତେ ଆଗରାମ୍‌ଗାମ୍‌ ଅଙ୍ଗା ଆଡରଙ୍‌କାବ୍‌ ଆଲାଗ୍ଗାନ୍‌ ଡକୋନ୍‌ ଆତେ ତିଆତେ ସରେବାସିଙନ୍‌ ଆକିଣ୍ଡୋଙ୍‌ଗଡ୍‌ ୟୋଡ୍‌ଲନ୍‌ ଡକୋତନ୍‌ । 13 ବାର୍ମଡ଼ିୟ୍‌ତାନ୍ ତମ୍ବୁନ୍ ଆଡନେଙ୍ଗାଗଡ୍ ବସନ୍ତି ଡରଙ୍‌କାବନ୍ ଲାଗ୍ଗାଏନ୍ ତି ଆଡରଙ୍‌କାବ୍ ବାର୍ମଡ଼ିୟ୍‌ତାଲନ୍ ୟନୁମନ୍ ଆସନ୍‌ ୟୋଡ୍‌ଲନ୍ ଡକୋତନ୍ ।

14 ତମ୍ବୁନ୍ ଆଡନଙ୍ ଆସନ୍‌ ଅବୟ୍ ଲୁଲୁ ମିଞାମନ୍ ଅନ୍ତମ୍‌ ମେଣ୍ଡାସାଲନ୍ ଆ ବୁଲେଙନ୍‌ ତୁବା, ଆରି ତି ଆତୋଣ୍ତୋ ଲମନ୍‌ ଉସାଲ୍‌ ବାତ୍ତେ ଅବୟ୍‌ ବୁଲେଙନ୍‌ ତୁବା ।

15 ଆମନ୍‌ ସରେବା ତମ୍ବୁସିଙନ୍ ଆସନ୍‌ ସିଟିମ୍ ଅରାନ୍‌ ବାତ୍ତେ ଆତନଙ୍ ପଟ୍ଟାଞ୍ଜି ତୁବା । 16 ତଙ୍‌ବଜନ୍ ଆପଟା ଡନେଙ୍ଗାନ୍ ଦସ ସନ୍ତି ଆରି ରନକୋଡନ୍ ବସନ୍ତି ବସାଙ୍କଡ଼େ ଡେତେ, 17 ଅଡ଼୍‌କୋନ୍ ଆପଟାଲୋଙ୍ ବାଗୁଲେକାଁୟ୍ ଆବସମାନନ୍ ଆଜଙନ୍ ଡକୋତନ୍ । ତମ୍ବୁ ସରେବାସିଙନ୍ ଅଡ଼୍‌କୋନ୍ କେନ୍‌ଅନ୍ତମ୍ ତୁବା । 18 ସରେବା ତମ୍ବୁସିଙନ୍ ଆର୍ଜଡ଼ୋମ୍‌ସିଗଡ୍ ବକୁଡ଼ି ଆତନଙ୍ ପଟ୍ଟାନ୍ ତୁବା 19 ଆରି ପଟ୍ଟାନ୍ ଆଜଙ୍ ଆଜାୟ୍‌ତା ଜନୁଡ଼େନ୍ ଆସନ୍‌ ରୁପ୍ପାନ୍ ବାତ୍ତେ ଉଞ୍ଜିକୁଡ଼ି ଗୋର୍ଜୋନ୍, ଅଡ଼୍‌କୋନ୍ ଆଜନୁଡ଼େ ଆସନ୍‌ ତଙ୍‌ବୟ୍ ଗୋର୍ଜୋନ୍ ତୁବା । 20 ସରେବା ତମ୍ବୁସିଙନ୍ ଆର୍କାବଡ଼ିଗଡ୍ ବକୁଡ଼ି ଆତନଙ୍ ପଟ୍ଟାନ୍ ଡକୋତନ୍ 21 ଆରି ଅଡ଼୍‌କୋନ୍ ଆପଟା ଆଜାୟ୍‌ତା ବାଗୁଲେକାଁୟ୍ ଅଡ଼୍‌କୋନ୍ ବାକୁଡ଼ି ରୁପ୍ପାନ୍ ବାତ୍ତେ ଗୋର୍ଜୋନ୍ ଡେତେ । 22 ସରେବା ତମ୍ବୁସିଙନ୍ ବରୁବ୍‌ୟୋଙ୍‌ଗଡ୍ ଆସନ୍‌ ତୁଡ୍ରୁ ପଟ୍ଟାନ୍ ଡେତେ, 23 ସରେବା ତମ୍ବୁସିଙନ୍ ଆକୁଣ୍ଡୋଙ୍ ବାଗୁନ୍ ଆକୁନେଗଡ୍ ବାଗୁ ପଟ୍ଟାନ୍ ଡେତେ । 24 କୁନେଗଡ୍ ଡକୋନ୍ ଆପଟାଜି ଜୁଡ଼େଡାଲେ ତୋଣ୍ଡୋଗଡ୍ ଆକୁନେ ନିୟ୍ ଜନୁଡ଼େନ୍ ଡେତେ ବାଗୁନ୍ ଆକୁନେଗଡ୍ ଆପଟା ଏତ୍ତେଲେମା ଜନୁଡ଼େନ୍ ଡେତେ । 25 ରୁପ୍ପାନ୍ ବାତ୍ତେ ସଓଡ଼୍‌ଟା ଗୋର୍ଜୋନ୍ ବାତ୍ତେ ଆଟଟା ପଟ୍ଟାନ୍ ଡେତେ ଆରି ଅଡ଼୍‌କୋନ୍ ଆପଟାଲୋଙ୍ ବାଗୁଲେକାଁୟ୍ ଗୋର୍ଜୋନ୍ ଡେତେ । 26 ଆରି ଆମନ୍‌ ସିଟିମ୍ ଆରାନ୍ ଆ ଅଙ୍କିଆ ତୁବା; ସରେବା ତମ୍ବୁସିଙନ୍‌ ବନେଙ୍‌ଗଡ୍‌ ପଟାନ୍‌ ବାତ୍ତେ ମନ୍‌ଲୟ୍‌ ଅଙ୍କିଆନ୍‌ ଡ ବମିୟ୍‌ତାଲ୍‌ଗଡ୍‌ ପଟାନ୍‌ ବାତ୍ତେ ମନ୍‌ଲୟ୍‌ ଅଙ୍କିଆନ୍‌ 27 ଆରି ସରେବା ତମ୍ବୁସିଙନ୍‌ ଆ ବରୁବ୍‌ୟୁଙ୍‌ଗଡ୍‌ ବାରିଆଡେଗଡ୍‌ ପଟାନ୍‌ ବାତ୍ତେ ମନ୍‌ଲୟ୍‌ ଅଙ୍କିଆନ୍‌ ତିୟ୍‌ବା । 28 ଆରି ମଡ୍ଡିନ୍‌ ଆ ଅଙ୍କିଆ ବାର୍ମଡ଼ିୟ୍‌ତାଲନ୍‌ ଆଜରାବ୍‌ତେନ୍‌ ଅନ୍ତମ୍‌ ତୁବା । 29 ତି ଅଡ଼୍‌କୋନ୍‌ ଆ ପଟାଜି ସୁନ୍ନାନ୍‌ ବାତ୍ତେ ବଲ୍‌ବା ଆରି ଅରା କୁଣ୍ଟିଆଞ୍ଜି ଆସନ୍‌ ସୁନ୍ନାନ୍‌ ବାତ୍ତେ କାଡୁଞ୍ଜି ତୁବ୍‌ବା, ଆରି କୁଣ୍ଟିଆଞ୍ଜି ଅଡ଼୍‌କୋନ୍‌ ସୁନ୍ନାନ୍‌ ବାତ୍ତେ ବଲ୍‌ବା । 30 ଞେନ୍‌ ଏଙ୍ଗାଲେ ତମ୍ବୁସିଙନ୍‌ ଆତନୁବ୍‌ ଆସନ୍‌ ତୋଣ୍ତୋ ବରୁନ୍‌ ଆମନ୍‌ଆଡଙ୍‌ ଅବ୍‌ତୁୟ୍‌ଲମ୍‌; ତିଅନ୍ତମ୍‌ ତିଆତେ ତୁବା । 31 ଆରି ଆମ୍ୱେନ୍‌ ନିଡ଼ି ଡ କରୋମାବ୍‌ ଡ ସିଣ୍ଡରନ୍‌ ଡ ଆଅଙିଡନ୍‌ ଜେଏ ଲତୁମ୍‌କାବ୍‌ଲୋଙ୍‌ ଅବୟ୍‌ ଡରଙ୍‌ନେକାବନ୍‌ ତୁବା; ତିଆତେ ତନ୍‌ରୁବନ୍‌ ଆଗରୟ୍‌ଡମ୍‌ତେନ୍‌ ଆମନ୍‌ରା ଆ କାବ୍ବାଡ଼ାଲୋଙ୍‌ କିରୁବଞ୍ଜି ଆତନାଲ୍‌ମଡ୍‌ ଅନ୍ତମ୍‌ ତନୁବନ୍‌ଡେତେ । 32 ଆମ୍ୱେନ୍‌ ତିଆତେ ସୁନ୍ନାନ୍‌ ବାତ୍ତେ ବଲ୍‌ଲେ ସିଟିମ୍‌ ଅରାନ୍‌ ଉଞ୍ଜି ସୋଣ୍ତାଙନ୍‌ ଆତୋଣ୍ତୋ ସୁବ୍‌ବା; ଆରି ରୁପାନ୍‌ ଉଞ୍ଜି ସୁଙ୍ଗିନ୍‌ ଆତୋଣ୍ତୋ ଆରାଗୋଡଞ୍ଜି ଅଡ଼୍‌କୋନ୍‌ ସୁନ୍ନାନ୍‌ ତୁବା । 33 ଆରି ଗୁଣ୍ତିନ୍‌ ଆଜାୟ୍‌ତା ଅଡ଼୍‌କୋନ୍‌ ଡରଙ୍‌ନେକାବନ୍‌ ୟୁଡ୍‌ଲେ, ତି ଆ ଡରଙ୍‌ନେକାବ୍‌ ଆମଙ୍‌ବା ସାକିନ୍‌ ଅନ୍ତମ୍‌ ପେଲାନ୍‌ ପାଙାୟ୍‌ବା; ସିଲତ୍ତେ ତି ଆଡରଙ୍‌ନେକାବ୍‌ ମଡ଼ିର୍‌ ଡରକୋନେ ଡ ସୋଡ଼ାମଡ଼ିର୍‌ ଡରକୋନେନ୍‌ ଜାୟ୍‌ ରୟ୍‌ତାଡ୍‌ତେ । 34 ଆରି ଆମ୍ୱେନ୍‌ ମଡ଼ିର୍‌ଡମନ୍‌ ଆଡରକୋନେଲୋଙନ୍‌ ସାକିପେଲନ୍‌ ଆତୋଣ୍ତୋ ଇର୍ସେନ୍‌ ଆୟନୁମ୍‌ ଡକୋବା । 35 ଡରଙ୍‌କାବନ୍‌ ଆଅମ ମେଜନ୍‌ ଏଡକ୍କୋଡଙ୍‌ ଆରି ମେଜନ୍‌ ଆମୁକ୍କାବା ସରେବା ତମ୍ବୁସିଙନ୍‌ ଆର୍ଜଡ଼ୋମ୍‌ଗଡ୍‌ ଡିପନୁବନ୍‌ ଡକୋବା ଆରି ଅର୍କାବଡ଼ିଗଡ୍‌ ମେଜନ୍‌ ଡକୋବା । 36 ଆରି ସରେବା ତମ୍ବୁସିଙନ୍‌ ଆ ସନଙ୍‌ ଆସନ୍‌ ନିଡ଼ି, କରୋମାବ୍‌, ଆରି ଲୁଲୁ ଡ ଆଅଙିଡ୍‌ ଜେଏ ଲତୁମ୍‌କାବନ୍‌ ଆତନୁବ୍‌ ଆରୁଗେରିଗେ ଅବୟ୍‌ ଡରଙ୍‌ନେକାବନ୍‌ ତୁବା । 37 ତି ଆ ଡରଙ୍‌ନେକାବ୍‌ ଆସନ୍‌ ମନ୍‌ଲୟ୍‌ ସିଟିମ୍‌ ଅରାନ୍‌ ଆ ସୋଣ୍ତାଙ୍‌ ତୁବ୍‌ଲେ ସୁନ୍ନାନ୍‌ ବଲ୍‌ବା, ଆରି ସୁନ୍ନାନ୍‌ ବାତ୍ତେ ଆରାଗୋଡନ୍‌ ତୁବା ଆରି ତିଆସନ୍‌ ପିତଡ଼ନ୍‌ ମନ୍‌ଲୟ୍‌ ତରବ୍‌ନଙ୍‌ ପତୁଡନ୍‌ ଲାବା ।