1 ପ୍ରବୁନ୍‌ ମସାନ୍‍ଆଡଙ୍‌ ବରେନ୍‌, "ଆମନ୍‌ ପାରୋନ୍‍ ଆମଙ୍‍ ଇୟ୍‌ଲେ ଆନିନ୍‌ଆଡଙ୍‌ ଇୟ୍‌ବରା, କେନ୍‍ ଆବର୍ନେ ବର୍ତନ୍‌‍ ଆରି ସେବାଞେନ୍‍ ଆସନ୍‌ ମନ୍‍ରାଞେନଞ୍ଜି ଜନିରନ୍‍ ତିଆ । 2 ବନ୍‌ଡ ଆମନ୍‌ ଆନିଞ୍ଜିଆଡଙ୍‌ ଅଃନମ୍‌ରେଙେ ଆସନ୍‌ ଅସାଲମ୍‌ଡେନ୍, ଞେନ୍ କିଣ୍ଡୋଡନ୍ ବାତ୍ତେ ସମ୍ପରା ମିସର୍‌ ଡେସାନ୍‌ ପବ୍‌ରଡ୍‌ତାୟ୍ । 3 ନିଡ଼ ଅଲଲୋଙନ୍ କିଣ୍ଡୋଡଞ୍ଜି ବରିୟ୍‌ ଡେତଜି ଆରି ଅଡ଼୍‌କୋନ୍ ଆ କିଣ୍ଡୋଜି ଜିର୍ରେ ଅସିଙ୍‌ରେଙ୍‌ବେନ୍, ଲରୁଲୁଡ୍‌ସିଙ୍‌ରେଙ୍‌ବେନ୍, ଲରୁଡ୍‌ଲୁଡ୍‌ରେଙ୍‌ବେନ୍, କମ୍ବାରିମର୍‌ବେଞ୍ଜି ଆସିଙ୍‌ରେଙ୍‌ ମନ୍‌ରାବେଞ୍ଜି ଆମଙ୍‌ରେଙ୍‌ ଆରି କୋଡ଼ାତୁଡ୍‌ରେଙନ୍‌ ଡ ଅଟାନ୍‌ ଆସରଡ୍‌ସଡ୍‌ ସିମ୍‌ରେଙନ୍‌ ଜିର୍ତାଜି । 4 କିଣ୍ଡୋଡଞ୍ଜି ଡଅଙ୍‌ଲୋଙ୍‌ନମ୍, ମନ୍‍ରାନମ୍‍ଞ୍ଜି ଆ ଡଅଙ୍‌ଲୋଙ୍ ଡ ସୋଡ଼ାମର୍‌ନମ୍‌ଜି ଆ ଡଅଙ୍‌ଲୋଙ୍‌ ଡାୟ୍‌ତଜି ।"

5 ପ୍ରବୁନ୍‌ ମସାନ୍‍ଆଡଙ୍ ବରେନ୍, "ଆରୋଣନ୍‌ ବରା ଆମନ୍‌ ଅଲନ୍, ଅନାନ୍, ଡ ବଣ୍ଡାରେଙନ୍ ତନୁଡ଼େଡାଙ୍‌ନମ୍‌ ଞମ୍‌ଲେ ଅସିନମ୍ ତେକ୍କେଡାଲେ ମିସର୍‌ ଡେସାରେଙନ୍ କିଣ୍ଡୋଡନ୍ ଆପ୍ପାୟା ।" 6 ଆରୋଣନ୍‌ ମିସର ଡେସାନ୍‌ ଅଡ଼୍‌କୋନ୍‌ ଆ ଡାଆରେଙ୍‌ ଆସିନ୍‌ ଆତରେକ୍କେଏନ୍‌, କିଣ୍ଡୋଡଞ୍ଜି ଜିର୍ରାଜି ଆରି ମିସର୍‌ ଡେସାରେଙନ୍‌ ସମ୍ପରାନ୍‌ ଡେଆଜେନ୍‌ । 7 ତି ଆ ବନେଡ଼ା ମନ୍ତ୍ରମରଞ୍ଜି ଆନିଞ୍ଜିଡମ୍‌ ମନ୍ତ୍ରନ୍‌ ବାତ୍ତେ ଏତ୍ତେଲେମା ମିସରଡେସାଲୋଙନ୍‌ କିଣ୍ଡୋଡନ୍‌ ଅବ୍‌ଜିର୍‌ଜିର୍‌ରାଜି । 8 ପାରୋନ୍‍ ମସାନ୍‍ ଡ ଆରୋଣନ୍‌ ଓଡ୍ଡେଲେ ବରେଞ୍ଜି, "ପ୍ରବୁନ୍‌ ଆମଙ୍‍ ପାର୍ତନାନାବା ଅମଙ୍‌ଲେନ୍‌ ଡ ମନ୍‍ରାଞେଞ୍ଜି ଆମଙ୍‍ ସିଲଡ୍‌ କିଣ୍ଡୋଡଞ୍ଜି ସବ୍‌ଙାୟ୍‌ବା ଆରି ପ୍ରବୁନ୍‌ ଆମଙ୍‌ବା ପାର୍ତନାନାବା, ଏତ୍ତେଲ୍‌ଡେନ୍‌ ଞେନ୍‌ ପ୍ରବୁନ୍‌ ଆଞୁମ୍‌ଲୋଙ୍‌ ଅନମଙନ୍‌ ଆତନିୟ୍‌ ଆସନ୍‌ ମନ୍‌ରାଞ୍ଜିଆଡଙ୍‌ ଜନିରନ୍‌ ଆସନ୍‌ ଅନଡ଼େନ୍‌ ତିୟ୍‌ତାୟ୍‌ ।" 9 ମସାନ୍‍ ପାରୋନ୍‍ଆଡଙ୍‌ ବରେନ୍‍, ଆମନ୍‌ ବର୍ନା ଏଙ୍ଗାଲେ ଅମଙ୍‌ବାନମ୍‌ ଡ ଅସିଙ୍‌ନମ୍‌ ସିଲଡ୍‌ କିଣ୍ଡୋଡଞ୍ଜି ଅଡ଼୍‌କୋନ୍‌ ସଙାୟ୍‌ତଜି ତିଆସନ୍‌ ଞେନ୍‌ ଆମନ୍‌ ଆସନ୍‌ ପାର୍ତନା ତନାୟ୍‌ ଆରି କମ୍ବାରିମର୍‌ନମ୍‌ଜି ଡ ମନ୍‌ରାନମ୍‌ଜି ଆସନ୍‌ ନିୟ୍‌ ପାର୍ତନା ତନାୟ୍‌ ଏତ୍ତେଲ୍‌ଡେନ୍‌ କିଣ୍ଡୋଡଞ୍ଜି ଅଲନ୍‌ତୁମ୍‌ ଜିର୍ରେ ଇୟ୍‌ତେଡକୋନେଜି । 10 ଆନିନ୍‌ ବର୍ରନ୍‌, "ବିଅଲୋମ୍‍ବା ।" ତି ଆଡିଡ୍‌ ମସାନ୍‍ ବର୍ରନ୍, ସଦାପ୍ରବୁଲେନ୍‍ ଇସ୍ୱରନ୍‌ ଅନ୍ତମ୍‌ ଆନିଙ୍‍ତଡ୍‌, କେନ୍‌ଆତେ ଆମନ୍‌ ଜନାଅମ୍‌ତୋ, ତିଆସନ୍‍ ଗାମେନ୍‌ ନମ୍‍ ଡେଏତୁ । 11 କିଣ୍ଡୋଡଞ୍ଜି ଅମଙ୍‌ନମ୍‌ ସିଲଡ୍‌ ଅସିଙ୍‌ନମ୍‌, କମ୍ୱାରିନମ୍‍ଜି ଡ ଅଡ଼୍‌କୋନ୍‌ ଆମନ୍‍ରାନ୍‌ ଆମଙ୍‌ସିଲଡ୍‌ ସବ୍‍ଙାଲେ ନିଡ଼ ଅଲଲୋଙନ୍‍ ତୁମ୍‌ ଡକୋତନ୍‍ଜି । 12 ତିସିଲଡ୍‍ ମସାନ୍‍ ଡ ଆରୋଣନ୍‌ ପାରୋନ୍‍ ଆମଙ୍‍ସିଲଡ୍‍ ଡୁଙ୍‌ଲନ୍‌ ଜିରେଞ୍ଜି; ଆରି ମସାନ୍‍ ଅଙ୍ଗା ଆ କିଣ୍ଡୋଜି ପାରୋନ୍‌ ଆସନ୍‍ଙ୍ଗତାଲୋଙ୍‌ ଆପ୍ପାୟେନ୍‌ ତିଆତେଜି ସନବ୍‌ଗାଁଜନ୍‌ ଆସନ୍‌ ମସାନ୍‌ ପ୍ରବୁନ୍‌ ଆମଙ୍‌ବା ପାର୍ତନାଲନ୍‌ । 13 ତିସିଲଡ୍‌ ପ୍ରବୁନ୍‌ ମସାନ୍‍ ଆବର୍ନେ ଅନ୍ତମ୍‌ ଲୁମେନ୍‍, ଅସିଂରେଙନ୍‌ ଡାଡ୍‌ଣ୍ତରେଙନ୍‌ ବସେଙନ୍‍ ଅଡ଼୍‌କୋନ୍ ଆକିଣ୍ଡୋଡ୍‌ ରବୁଏଞ୍ଜି । 14 ମନ୍‌ରାଞ୍ଜି ଅଡ଼୍‌କୋନ୍ ଆରବୁନ୍‌ କିଣ୍ଡୋଜି ଅବ୍‌ରୁକ୍କୁଏଞ୍ଜି, ଆରି ଆରବୁଡୋଡନ୍ ଆ ସନଅ ବାତ୍ତେ ଡେସାନ୍‌ ସଅଡମ୍ ଡେଏନ୍‌ । 15 ବନ୍‌ଡ ପାରୋନ୍‍ ଆ ବନ୍‍ତଙନ୍‍ ଆସ୍ରଙାଜେନ୍‌ ପ୍ରବୁନ୍‌ ଆବର୍ନେ ଆ ଉଗ୍ଗରନ୍‌ ରବ୍ବ୍‍ଡୋଏନ୍ ଡ ଆବର୍ନେଞ୍ଜି ଅଃନମ୍‌ଡଙ୍‌ଲଜି ।

16 ସିଲତ୍ତେ ସଦାପ୍ରବୁନ ମସାନ୍‍ଆଡଙ୍‌ ବରେନ୍‍, "ଆରୋଣନ୍‍ଆଡଙ୍‌ ବରା, ଅଡ଼୍‌କୋନ୍‌ ମିସର୍‌ ଡେସାନ୍‌ ଏଙ୍ଗାଲେ ସିଆୟ୍‌ବୋଡନ୍‌ ଡେତେ, କେନ୍‍ ଆସନ୍‌ ଆମ୍ୱେଞ୍ଜି ଡାଙ୍ଗୋନ୍‌ ତେକେଲେ ଆଉମରିଲନ୍‌ ସମ୍ମା ।" 17 ସିଲତ୍ତେ ଆନିଞ୍ଜି ଏତ୍ତେଲେ ଲୁମେଞ୍ଜି; ଆରୋଣନ୍‌ ଅଡ଼୍‌କୋନ୍‌ ଆଡାଙ୍ଗୋ ଆସିଲୋଙନ୍‌ ବୁଲାୟ୍‍ଲେ ଲବନ୍‍ ଆଉମରି ଆସ୍ରମେନ୍‍, ମନ୍‍ରାନ୍‍ ଡ ଜନ୍ତୁଜି ଆମଙ୍‍ ଇଇନ୍‍ ଡେଲୋ; ଆରି, ମିସର୍‌ ଡେସାନ୍‌ ଅଡ଼୍‌କୋନ୍‌ ଆଉମରିଲ ଇଇନ୍‍ ଡେନ୍‍ । 18 ତି ଆଡିଡ୍‌ ମନ୍ତ୍ରମରଞ୍ଜି ରମଙ୍‍ ରମଙ୍‍ ଆମାୟାଞ୍ଜି ଇଇନ୍‍ ଅନ୍ତମ୍‌ ତନୁବନ୍‍ ଆସନ୍‌ ଏରେଞ୍ଜିଗୋଜେଞ୍ଜି, ବନ୍‌ଡ ଅଃର୍ରବ୍‍ତିଲଜି; ସିଲତ୍ତେ ମନ୍‍ରାନ୍‍ ଡ ଜନ୍ତୁଜି ଆତୁଣ୍ତୋ ସିଆଁୟ୍‌ବୋଡନ୍‌ ଡେଲୋ । 19 ତେତ୍ତେ ମନ୍ତ୍ରମରଞ୍ଜି ପାରୋନ୍‍ଆଡଙ୍‌ ବରେଞ୍ଜି, "କେନ୍‍ ତ ଇସ୍ୱରନ୍‌ ଆ ଅଣ୍ତେର୍‌ସିନ୍ ଆକାବ୍ବାଡ଼ା," ଡେଲୋଜନଙ୍‌ ପ୍ରବୁନ୍‌ ଆବର୍ନେ ଅନ୍ତମ୍‌ ପାରୋନ୍‍ ଆଉଗ୍ଗର୍‍ ରଡୋଏନ୍‌, ଆରି ଆନିନ୍‌ ଆବର୍ନେଞ୍ଜି ଏଃନମ୍‌ଡଙ୍‌ଲାୟ୍‌ ।

20 ତି ସିଲଡ୍‌ ପ୍ରବୁନ୍‌ ମସାନ୍‍ଆଡଙ୍‌ ବରେନ୍‍, "ଆମ୍ୱେନ୍‌ ଡୁତାନ୍‍ ଡୁଲନ୍‍ ପାରୋନ୍‍ ଆମୁକାବାନ୍‌ ତନଙ୍‍ବା; ଗିୟ୍‌ବା, ଆନିନ୍‌ ଡାଆନ୍‌ ଅନେଙ୍‍ବାନ୍‍ ଜିର୍ରାୟ୍‌, ଆମ୍ୱେନ୍‌ କେନ୍‍ ଆବର୍ନେ ବର୍ବା,ପ୍ରବୁନ୍‌ ବର୍ତନ୍‌‍ ଞେନ୍‌ ସେବାଞେନ୍‍ ଆସନ୍‌ ମନ୍‍ରାଞେଞ୍ଜି ଜନିରନ୍‍ ଆସନ୍‌ ତିଆ । 21 ଆରି, ମନ୍‍ରାଞେଞ୍ଜି ଜନିରନ୍‍ ଅଃତିୟ୍‍ଲଡେନ୍‍, ଞେନ୍‌ ଉପ୍ରେଙ୍‍ନମ୍‍ ଡ କମ୍ୱାରିନମ୍‍ଜି ମନ୍‍ରାନଞ୍ଜି ଡ ଅସିଙନ୍‌ ଆ ଅମଲୋଙ୍‍ ଏଃନେଗୋ ଆ ବର୍ତାଙନ୍‌ ଆପ୍ପାୟେନ୍‌ ଡ, ତି ବାତ୍ତେ ମିସ୍ରିୟ୍‍ମରଞ୍ଜି ଆସିଙ୍‌ ଡ ଡରକୋନେ ଲବନ୍‍ ବରିୟ୍‌ତେ । 22 ଆରି ପୁର୍ତିଲୋଙନ୍‌ ଞେନ୍‌ ତୁମ୍‌ ଡକୋ, କେନ୍‌ ଆତେ ଅନବ୍‌ଜନାନ୍‌ ଆସନ୍‌ ମନ୍‌ରାଲେଞ୍ଜି ଆଡ୍ରକୋନେ ଆସନ୍‌ ଗୋସେନ୍‌ ଡେସାନ୍‌ ଅନ୍ତମ୍‌ ଆନା ଏମ୍ମେତାୟ୍‌; ତିଲୋଙ୍‌ ବର୍ରତାଙନ୍‌ ଅଡ୍ଡେ ।" 23 ଞେନ୍‌ ମନ୍‌ରାଞେଞ୍ଜି ଆସନ୍ ଡ ମନ୍‌ରାନମ୍‌ଞ୍ଜିଲୋଙ୍‌ ଆନା ଡେତାୟ୍‌; ବିଅ କେନ୍‌ ଆରମ୍ମଡ୍‌ ଡେତେ । 24 ତାସନ୍‌ ଇସ୍ୱରନ୍‌ ତିଅନ୍ତମ୍‌ ଲୁମେନ୍‌, ସିଲତ୍ତେ ପାରୋନ୍‍ ଡ ଆ କମ୍ୱାରିମରଞ୍ଜି ଆସିଙ୍‌ରେଙନ୍‌ ବର୍ରତାଙନ୍‌ ଅଡ଼ୋଏଞ୍ଜି; ଆରି ଅଡ଼୍‌କୋ ମିସରଡେସାନ୍‌ ବର୍ରତାଙନ୍‌ ଆସନ୍‌ ଅଞିଡାଜେନ୍‌ । 25 ତିଆଡିଡ୍‌ ପାରୋନ୍‍ ମସାନ୍‍ ଡ ଆରୋଣନ୍‌ଆଡଙ୍‌ ଓଡ୍ଡେଲେ ବରେଞ୍ଜି, ଆମ୍ବେଞ୍ଜି ଜିର୍ରେ ଡେସାଲୋଙନ୍‌ ଇସ୍ୱରବେନ୍‌ ଆସନ୍‌ ଅନମଙନ୍‌ ତିୟ୍‌ବା । 26 ସିଲତ୍ତେ ମସାନ୍‍ ବର୍ରନ୍‌, "ତିଆତେ ମନଙ୍‌ତଡ୍‌; ଇନିଆସନ୍‌ଗାମେଣ୍ଡେନ୍‌ ତିଆତେ ଲୁମେନ୍‌ଜି, ସଦାପ୍ରବୁଲେନ୍‍ ଆଲତେଙ୍‌ଲୋଙ୍‌ ମିସ୍ରିୟ୍‍ମରଞ୍ଜି ସନ୍‍ଙ୍ଗତାଗୋ ସରୁପାଏନ୍‍ ଡେତେ; ଗିୟ୍‌ବା, ମିସ୍ରିୟ୍‍ମରଞ୍ଜି ଆଗନିୟ୍‍ମଡଞ୍ଜି ସଙ୍ଗତା ଅନମଙନ୍‌ ତିୟ୍‌ବା, ଆନିଞ୍ଜି ପଙ୍‌ ଇନ୍‌ଲେଞ୍ଜି ଅରେଙନ୍‌ ବାତ୍ତେ ସମ୍‍ସମ୍‍ଲଙ୍‍ତଞ୍ଜି ? 27 ତି ଆସନ୍‌ ଇନ୍‌ଲେନ୍‌ ୟାଗି ଡିନ୍ନା ଆତଙର୍‍ ଅନେଙ୍‍ ବୁରନ୍‍ ଜିର୍ରେ ସଦାପ୍ରବୁଲେନ୍‍ ଇସ୍ୱରନ୍‌ ଅଙ୍ଗା ବନାଁୟ୍‌ବର୍‌ ତିୟ୍‌ତବେନ୍‌, ତିୟ୍‍ ଅନ୍ତମ୍‌ ଆଞୁମ୍‌ଲୋଙନ୍‌ ଅନମଙନ୍‌ ଏତିୟ୍‌ବା ।" 28 ସିଲତ୍ତେ ପାରୋନ୍‍ ବର୍ରନ୍‌, "ଆମ୍ୱେଞ୍ଜି ଆରିଙ୍‌ରିଙ୍‌ ଲଅରେଙ୍‌ ଜନିରନ୍‍ ଆସନ୍,ଆମ୍ୱେନ୍‌ ପ୍ରବୁନ୍‌ ଆସନ୍‌ ଅନମଙନ୍‌ ତିୟ୍‌ବା ବନ୍‌ଡ ଗୋଗୋୟ୍‍ ସଙାୟ୍‍ ଏଜିର୍‌ଡଙ୍‌ ଆରି ଞେନ୍‌ ଆସନ୍‌ ପ୍ରାର୍ତନାନାବା ।" 29 ତିସିଲଡ୍‍ ମସାନ୍‍ ବରନେ, "ଗିଜା, ଞେନ୍‌ ଅମଙ୍‌ନମ୍‌ ସିଲଡ୍‌ ଜିର୍ରେନ୍‍ ଡେନ୍‍ ପ୍ରବୁନ୍‌ ଆମଙ୍‍ ପ୍ରାର୍ତନାତନାୟ୍‍, ତେତ୍ତେ ଆମନ୍‌ କମ୍ୱାରିନମ୍‍ଜି ଡ ମନ୍‍ରାନମ୍ଞ୍ଜି ଆମଙ୍‍ ବିଅଡେଡ୍‍ ଅଡ଼୍‌କୋନ୍‌ ବର୍ତାଙନ୍‌ ସଙାତଜି; ବନ୍‌ଡ ସଦାପ୍ରବୁନ୍ ଆଲତେଙ୍‌ଲୋଙ୍‌ ଅନେଲାୟ୍‍ ପୁରନ୍‍ ଆସନ୍‌ ମନ୍‌ରାଞ୍ଜି ଜନିରନ୍‍ ଆବର୍ନେ ପାରୋନ୍‍ ଆରି ବତର । 30 ମସାନ୍‍ ପାରୋନ୍‍ଆମଙ୍‍ ସିଲଡ୍‌ ଡୁଙ୍‌ଲନ୍‌ ଜିରେନ୍‌ କି ସଦାପ୍ରବୁନ୍‍ଆମଙ୍‍ ପ୍ରାର୍ତନାଲନ୍, 31 ପ୍ରବୁନ୍‌ ମସାନ୍‍ ଆପାର୍ତନା ଅନ୍ତମ୍‌ ପାରୋନ୍‍ଆମଙ୍‍ ସିଲଡ୍‌ ଆକମ୍ୱାରିଞ୍ଜି ଡ ଅଡ଼୍‌କୋ ମନ୍‌ରାନ୍‌ ସିଲଡ୍‌ ବର୍ତାଙନ୍‌ ଅଡ଼୍‌କୋନ୍‌ ସବ୍‍ଙାଜେନ୍‌; ଅବୟ୍‌ନିୟ୍‌ ଅଡ୍‌କୋଲନ୍‌ । 32 ବନ୍‌ଡ କେନ୍ଆତର ନିୟ୍ ପାରୋନ୍‍ ଆଉଗ୍ଗର୍‍ ରଡୋଡେଏନ୍ ଆରି ମନ୍‌ରାଞ୍ଜିଆଡଙ୍ ଅଃନ୍ନମ୍‌ରେଙ୍‌ଲଜି ।