1 ଆରି ଆମ୍ୱେନ୍‌ କେନ୍‍ ଅଡ଼୍‌କୋନ୍‌ ଆ ସାସନ ଆନିଞ୍ଜିଆଡଙ୍‌ ଅବ୍‍ଜନାବାଜି । 2 ଆମ୍ୱେନ୍‌ ଏବ୍ରିଅ କମ୍ୱାରିନ୍‌ ଏଞିଏଣ୍ଡେନ୍‌, ଆନିନ୍‌ ତୁଡ୍‌ରୁ ବର୍ସେଙ୍‍ ଡଅଙ୍‌ବେନ୍‌ ସେବାତେ, ଆରି ସାତ ବର୍ସେଙ୍‌ଲୋଙ୍‍ ଆନିନ୍‌ଆଡଙ୍‌ ଅନୁରନ୍‌ ଞାଙ୍‌ତେ । 3 ଆଉଙ୍‌ସଜନ୍‌ ଆଙ୍ଗା ଆନିନ୍‌ ଜିର୍ତାୟ୍‌, ତିଡେନ୍‌ ଆନିନ୍‌ ଆଉଙ୍‌ସଜନ୍‌ ଜିର୍ତେ; ଆରି ଆନିନ୍‌ ଞାଙ୍‌ବୟ୍‌ଲନ୍‌ ଜିର୍ରାୟ୍‍ଡେନ୍‍, ତିଡେନ୍‌ ଆଡୁକ୍ରିନ୍‌ ବୟନ୍‍ ଡୁଙ୍‌ଲନ୍‌ ଜିର୍ତଜି । 4 ଆରି ଆଙ୍ଗା ଆ ସାଉକାରନ୍‌ ଆନିନ୍‌ଆଡଙ୍‌ ଅବ୍‌ଞାଙ୍‌ବଜେଣ୍ଡେନ୍‌ ଡ ତି ଆଇବୟ୍‌ କୋଡନେନ୍‌ ଡେନ୍‌, ତି ଆଇବୟ୍‌ ଡ ଆଅନଞ୍ଜିଆଡଙ୍‌ ଆ ସାଉକାରନ୍‌ ଆ ଅଡିକାର ଡେତେ ଆରି ଆନିନ୍‌ ଆଉଙ୍‌ସଜନ୍‌ ଡୁଙ୍‌ଲନ୍‌ ଜିର୍ତେ । 5 ବନ୍‌ଡ ସାଉକାରଞେନ୍‌ଆଡଙ୍‌, ଆରି ଆ ଡୁକ୍ରିନ୍‌ ଡ ଆଅନଞ୍ଜିଆଡଙ୍‌ ଡୁଙ୍‌ୟମ୍‌ତାୟ୍‌, ତିଆସନ୍‍ ଞେନ୍‌ ଅଃନଡ଼ୁର୍ରିଁୟ୍‌, କେନ୍‌ଅନ୍ତମ୍‌ ତି ଆ କମ୍ୱାରିମର୍‌ ବରେଣ୍ଡେନ୍‌ 6 ତିଡେନ୍‌ ଆ ସାଉକାରନ୍‌ ଆନିନ୍‌ଆଡଙ୍‌ ଇସ୍ୱରନ୍‌ ଆମଙ୍‌ବା ଓରୋଙ୍‌ତେ, ଆରି ଆନିନ୍‌ଆଡଙ୍‌ ସନଙନ୍‌ ଅଡ଼େ ଡାର୍ନିବାନ୍‌ ଓରୋଙ୍‌ଲେ ପରଡ୍‌ଲୁଡନ୍‌ ବାତ୍ତେ ଆ ସାଉକାରନ୍‌ ପଡ୍‌ଲୁଡ୍‌ତେ; ସିଲତ୍ତେ ଆନିନ୍‌ ଆଏଡ଼ର୍‌ ଆନିନ୍‌ଆଡଙ୍‌ ସେବାତେ ସାକେତେ । 7 ଆରି ଆନ୍ନିଙ୍‌ ଆଙ୍ଗିୟ୍‌ ଆଡାଙ୍ଗାଡ଼ିଅନନ୍‍ଆଡଙ୍‌ କମ୍ୱାରିନ୍‌ ତମେଣ୍ଡେନ୍‌, ଆନିନ୍‌ କମ୍ୱାରିମରନ୍‌ ଅନ୍ତମ୍‌ ଅନୁରନ୍‌ ଅଃଞାଙେ । 8 ଆ ସାଉକାରନ୍‌ ଆନିନ୍‌ଆଡଙ୍‌ ଆନିନ୍‍ଡମନ୍‌ ଆସନ୍‌ ଡନକ୍କୋନ୍‌ ଇସ୍ସୁମେଣ୍ଡେନ୍‌, ଆନିନ୍‌ଆଡଙ୍‌ ଅଃନିସ୍ସୁମ୍‌ଲଡେନ୍‌, ଆନିନ୍‌ ଆନିନ୍‌ଆଡଙ୍‌ ଇର୍ତେ; ଆନିନ୍‌ଆଡଙ୍‌ ଆକରଣ୍ତାୟେନ୍‌ ଆସନ୍‌ ବଜାଙ୍‌ଲବାୟ୍‌ ଆମଙ୍‌ବା ଆନିନ୍‌ଆଡଙ୍‌ ତନମନ୍‌ ଆ ଅଦିକାର ଅଡ୍‌ଞାଙେ । 9 ଅଡ଼େ ଆଙ୍ଗା ତି ଆ ସାଉକାର ଆ ଡାଙ୍ଗଡ଼ାଅନନ୍‌ ଆସନ୍‌ ଆନିନ୍‌ଆଡଙ୍‌ ଇସ୍ସୁମେଣ୍ଡେନ୍‌, ଏତ୍ତେଲ୍‌ଡେନ୍‌ ଆନିନ୍‌ ଆନିନ୍‌ଆଡଙ୍‌ ଅନଗଡ୍‌ ଅନ୍ତମ୍‌ ଞମ୍‌ରମ୍‌ତେ । 10 ଆଙ୍ଗା ଆନିନ୍‌ ଅନବ୍‌ବାଗୁ ଆଇବଜନ୍‌ ସରିନ୍‌ ଞାଙ୍‌ବୟ୍‌ଲନ୍‌ ଜାୟ୍‌ ଡେନ୍‌ ଡାରଜନ୍‌ ସିନ୍‌ରିନ୍‌ ଡ ଞାଙ୍‌ବୟ୍‌ନେ ଲନୁମଞ୍ଜି ଅବ୍ବାଡ଼ଡଙେତଡ୍‌ । 11 ଆନିନ୍‌ କେନ୍‌ ୟାଗି ଲନୁମନ୍‌ ଅବ୍‌ସିସିଡ୍‌ଡେଣ୍ଡେନ୍‌, ତି ଆଇବୟ୍‌ ଇନ୍ନିଙ୍‌ ଏର୍ତନିୟନ୍‌ ଅନୁରନ୍‌ ଞାଙ୍‌ତେ ।

12 ଆନ୍ନିଙ୍‌ ଆଙ୍ଗିୟ୍‌ ଅନ୍ନିଙ୍‌ ଆମନ୍‌ରାଆଡଙ୍‌ ଆନିନ୍‌ ରବ୍ବୁଏଡେନ୍‌, ତିଡେନ୍‌ ଆ ପ୍ରାନାନ୍‌ ଡନଣ୍ତାୟନ୍‌ ଡେତେ । 13 ଅନ୍ନିଙ୍‌ ଆମନ୍‌ରା ଆନ୍ନିଙ୍‌ଆଡଙ୍‌ ରନବ୍ବୁନ୍‌ ଆସନ୍‌ ଅଃନେରଜି ଅଃଗୋଜେଜି, ବନ୍‌ଡ ଇସ୍ୱରନ୍‌ ଆଇସୁମ୍‌ ଆସିନ୍‌ ବାତ୍ତେ ଆନିନ୍‌ ରବୁଏଡେନ୍‌, ତିଡେନ୍‌ ଅଙ୍ଗା ଆଡ୍ରକୋନେଲୋଙ୍‌ ଆନିନ୍‌ ଜିର୍ରେ ରପ୍ତିତେ, ତିଅନ୍ତମ୍‌ ଆଡ୍ରକୋନେ ଞେନ୍‌ ଆମ୍ୱେନ୍‌ ଆସନ୍‌ ଗବ୍‌ରିତାୟ୍‌ । 14 ବନ୍‌ଡ ଆନ୍ନିଙ୍‌ କଣ୍ଡାୟ୍‌ଲେ ଆତୟ୍‍ଲିସିଙ୍‌ମରନ୍‍ ଆଇସ୍ସୁମ୍‌ଡମନ୍‌ ବାତ୍ତେ ରବ୍ବୁଏନ୍‌ଡେନ୍‌, ଆପରାନ୍ନାନ୍‌ ଆଡନଣ୍ତାୟ୍‌ ଆସନ୍‌ ଆମ୍ୱେନ୍‌ ତନମ୍ପିଲ୍‌ବାଲେନ୍‌ ଆନିନ୍‌ଆଡଙ୍‌ ଓରୋଙ୍‌ବା । 15 ଆରି ଅନ୍ନିଙ୍‌ ଆମନ୍‌ରା ଆପ୍ପେୟନ୍‌ ଅଡ଼େ ଆୟୋଙନ୍‌ଆଡଙ୍‌ ତିଡ୍‌ତ୍ତେ, ତିଡେନ୍‌ ଆପରାନ୍ନାନ୍‌ ଡନଣ୍ତାୟ୍‌ ଡେତେ । 16 ଅବୟ୍‌ ମନ୍‌ରାନ୍‌ ଆନ୍ନାମରନ୍‌ଆଡଙ୍‌ ରାଉଡାଲନ୍‌ ତମେଣ୍ଡେନ୍‍, ଅଡ଼େ ଆନିନ୍‌ ଆନିନ୍‌ଡମ୍‌ ଆସନ୍‌ କମ୍ବାରିନ୍‌ ଡକ୍କୋଏଣ୍ଡେନ୍‌, ଏତ୍ତେଲ୍‌ଡେନ୍‌ ଆନିନ୍‌ ଆଜାଡ଼ିନ୍‌ମା ରନବ୍ବୁନ୍‌ଡେତେ । 17 ଆନାଜାକିଁୟ୍‌ ଆପ୍ପେୟନ୍‌ ଅଡ଼େ ଅୟୋଙନ୍‌ଆଡଙ୍‌ ସୟ୍‌ପତେ ଆନିନ୍‌ ରନବ୍ବୁନ୍‌ ଡେତେ । 18 ଆରି ମନ୍‌ରାଞ୍ଜି ତର୍ଡମ୍‌ ଗୋଡ଼େଲନ୍‌ ବମନ୍‌ରା ବମନ୍‌ରାନ୍‌ଆଡଙ୍‌ ଅରେଙନ୍‌ ଅଡ଼େ କୁମ୍‍କୁମ୍‍ସିଲନ୍‌ ପାପ୍‌ରାଏନ୍‌ଡେନ୍‌, ଆନିନ୍‌ ଏର୍ରନବୁନ୍‌ ବମ୍‌ଲେ ଲୁଡ୍‌ଲେସେଡେଣ୍ଡେନ୍‌ । 19 ଆରି ତିକ୍କି ଆନିନ୍‌ ଡୋଲନ୍‌ ଡାଙ୍ଗୋନ୍‌ ଞମ୍‌ଲେ ଡାଣ୍ତନ୍‌ ବୁଲେଏଣ୍ଡେନ୍‌, ଏତ୍ତେଲ୍‌ଡେନ୍‌ ତିତ୍ତିଡ୍‌ମରନ୍‌ ଅଃଡୋସାଏ; ବନ୍‌ଡ ଆପରାବ୍‌ରାଏନ୍‌ ଆମୁଲ୍ଲ ଡ ସନାକେନ୍‌ ଆସନ୍‌ କର୍ସନ୍‌ ଆନିନ୍‌ଆଡଙ୍‌ ତନିୟନ୍‌ ଡେତେ । 20 ଆରି ଆନ୍ନିଙ୍‌ ଆକମ୍ୱାରିନ୍‍ ଅଡ଼େ ଆକମ୍ୱାରିବଜନ୍‍ ଡାଙ୍ଗୋନ୍‌ ବାତ୍ତେ ତିଡେନ୍‍ଡେନ୍‍, ଆନିନ୍‌ ଆସିଲୋଙନ୍‌ ଅବ୍‌ତାଡ଼ନ୍‌ ରବୁଏନ୍‍ଡେନ୍‍, ଆନିନ୍‌ ଡନଣ୍ତାୟନ୍‍ ଡେତେ । 21 ବନ୍‌ଡ ଆନିନ୍‌ ବଡିନ୍ନା ଅଡ଼େ ବାଗୁଡିନ୍ନା ଅମେଙେନ୍‌ଡେନ୍‌, ତିଡେନ୍‍ ଆନିନ୍‌ ଡନଣ୍ତାୟନ୍‌ ଅଃଡ୍ଡେଏ; ଇନିଆସନ୍‌ଗାମେଣ୍ତେନ୍‌ ଆନିନ୍‌ ଆରୁପ୍ପାନ୍‌ ଅନ୍ତମ୍‌ । 22 ଆରି ଓବ୍ବାମରଞ୍ଜି ତର୍ଡମ୍‌ ଗୋଡ଼େଡାଲନ୍‌ ଅନ୍ନିଙ୍‌ ଆତିଲ୍‌କୋଡ୍‌ବଜନ୍‌ ଆ ଡଅଙ୍‌ ତିଡ୍‌ତୁମେଞ୍ଜିଡେନ୍‌ ଆରି ତିବାତ୍ତେ ଜଲୟ୍‌ ଅନେନ୍‌ଡେନ୍‌, ବନ୍‌ଡ ଆରି ଇନ୍ନିଙ୍‌ ତନଙଡନ୍‌ ଅଃଡ୍ଡେଏ, ତିଡେନ୍‌ ତି ଆଇବୟ୍‌ ଆଅୟ୍‌ତବ୍‌ ଏଙ୍ଗାଲେ ଡାବିତେ,ତିଅନ୍ତମ୍‌ ଆନିନ୍‌ଆଡଙ୍‌ ତନଣ୍ତେଡାବ‌ନ୍‌ ତିୟ୍‌ତେ, ଆରି ଆନିନ୍‌ ପନ୍‌ସୁଆତିମରଞ୍ଜି ଆନବ୍‌ତନଣ୍ତେ ଅନ୍ତମ୍‌ ଆନିନ୍‌ ତିୟ୍‌ତେ । 23 ବନ୍‌ଡ ଇନ୍ନିଙ୍‌ ଆତନଙଡ୍‌ ଗଟେଏଣ୍ଡେନ୍‌, ତିଡେନ୍‌ ଆପରାନ୍ନାନ୍‌ ଆପାଲ୍‌ତେଙ୍‌ ପରାନ୍ନା 24 ଅମଡନ୍‍ ଆପାଲ୍‌ତେଙ୍‌ ଅମଡନ୍‍, ଅଜିନ୍‌ ପାଲ୍‌ତେଙ୍‌ ଅଜିନ୍‌, ଅସିନ୍‍ ପାଲ୍‌ତେଙ୍‌ ଅସିନ୍‍, ଅଜଙନ୍‌ ଆପାଲ୍‌ତେଙ୍‌ ଅଜଙନ୍‌, 25 ସନୟନ୍‌ ଆପାଲ୍‌ତେଙ୍‌ ସନୟନ୍‌, ପନାବ୍‌ରାନ୍‌ ଆପାଲ୍‌ତେଙ୍‌ ପନାବ୍‌ରାନ୍‌, ଅନଙ୍‌ବାରନ୍‌ ଆପାଲ୍‌ତେଙ୍‌ ଅନଙ୍‌ବାରନ୍‌, ଆ ଡନଣ୍ତାୟ୍‌ ଡେତେ । 26 ଆରି ଆନ୍ନିଙ୍‌ ଆ କମ୍ୱାରିନ୍‌ ଅଡ଼େ ଆକମ୍ୱାରିବଜନ୍‍ ଆମଙ୍‌ଲୋଙ୍‌ ତୁଃଡ୍‌ଲେ ପପ୍‌ତାୟ୍‌ମଡେଣ୍ଡେନ୍‌, ତିଡେନ୍‌ ଆନିନ୍‌ ଆମଡନ୍‌ ଆସନ୍‌ ଆନିନ୍‌ଆଡଙ୍‌ ଇର୍ତେ । 27 ଆରି ଆକମ୍ୱାରିନ୍‌ ଅଡ଼େ ଆକମ୍ୱାରିବଜନ୍‍ ତିଡ୍‌ତମ୍‌ଲେ ଆଜିନ୍‌ ରପିଜେନ୍‍ଡେନ୍‍, ତି ଆଜି ଆସନ୍‌ ଆନିନ୍‌ଆଡଙ୍‌ ଇର୍ତେ ।

28 ଆରି, ପତାଙ୍‍ଲେ ଅନ୍ନିଙ୍‌ ଆମନ୍‌ରା ଅଡ଼େ ଆଇବଜନ୍‌ ଆଙ୍ଗା ଆନିନ୍‌ ରବୁତେ, ତିଡେନ୍‌ ତି ଆତାଙ୍‌ଲେୟ୍‌ଜି ଅରେଙନ୍‌ ବାତ୍ତେ ରନବୁନ୍‌ ଡେତେ, ଆରି ଆଜେଲୁନ୍‌ ଜନୋମନ୍‌ ଅଃଡେଏ; ବନ୍‌ଡ ତାଙ୍‌ଲେୟନ୍‌ ଆସାଉକାର ଡନଣ୍ତାୟନ୍‌ ଅଃଡେଏ । 29 ବନ୍‌ଡ ତି ଆତାଙ୍‌ଲେୟ୍‌ ଆମ୍ମୁଙ୍‌ ପପଲନ୍‌, ତିଆସନ୍‌ ଆଅୟ୍‌ତବନ୍‌ଆଡଙ୍‌ ଅନବ୍‌ଜନାନ୍‌ ଡେଏନ୍‌ ଜନଙ୍‌ଡେନ୍‌ ଆନିନ୍‌ ଅଃତବାଲନ୍‌ ଆସନ୍‌ ତିଆ ଆତାଙ୍‌ଲେନ୍‌ ଓବ୍ବାମର୍‌ ଡେଏତୋ ଆଇମର୍‌ ଡେଏତୋ ପଲେ ରବ୍ବୁଏଣ୍ଡେନ୍‌ ତି ଆତାଙ୍‌ଲେୟ୍‌ ଅରେଙନ୍‌ ବାତ୍ତେ ତିଡ୍‌ଲେ ରନବ୍ବୁନ୍‌ ଡେତେ ଆରି ଆ ଅୟ୍‌ତବନ୍‌ ନିୟ୍‌ ରନବ୍ବୁନ୍‌ ଡେତେ । 30 ଆପରାନ୍ନାନ୍‌ ଆସନ୍‌ ଅନବ୍‌ତାନାଣ୍ତେନ୍‌ ଗନବ୍‌ରିନ୍‌ ଡେଏନ୍‌ ଡେନ୍‌, ତିଡେନ୍‌ ଆନିନ୍‌ ଆପରାନ୍ନାନ୍‌ ଆ ଅନୁର୍‌ ଆସନ୍‌ ଅଡ଼୍‌କୋନ୍‌ ଆ ଗନବ୍‌ରି ତନଣ୍ତେନ୍‌ ତିୟ୍‌ତେ । 31 ତାଙ୍‍ଲେୟ୍‍ନ୍‌ ଡାଙ୍ଗଡ଼ାଅନ୍‍ଆଡଙ୍‌ ଅଡ଼େ ଡାଙ୍ଗଡ଼ିଅନନ୍‍ଆଡଙ୍‌ ପଏନ୍‍ଡେନ୍‍, କେନ୍‌ ଆସାସନ ଅନ୍ତମ୍‌ ଡନଣ୍ତାୟନ୍‌ ଡେତେ । 32 ଆନା ଆତାଙ୍‌ଲେୟ୍‌ ଆନ୍ନିଙ୍‌ ଆ କମ୍ୱାରି ଅଡ଼େ ଆ କମ୍ୱାରିବୟ୍‌ଆଡଙ୍‌ ପଏନ୍‍ଡେନ୍‍, ତିଡେନ୍‌ ଆନିନ୍‌ ଆ ସାଉକାରନ୍‍ଆଡଙ୍‌ ତିରିସି ସେକଲ ରୁପାନ୍‍ ତିୟ୍‌ତେ, ଆରି ତାଙ୍‍ଲେୟ୍‍ନ୍‍ ଅରେଙନ୍‌ ବାତ୍ତେ ରନବୁନ୍‌ ଡେତେ । 33 ଆରି ଆନ୍ନିଙ୍‌ କୁଆନ୍‍ ଏର୍ରନୁବ୍‌ ଡକ୍କୋଏଣ୍ଡେନ୍‌, ଅଡ଼େ କୁଆନ୍‍ ଗାୟ୍‌ଲେ ଅଃରୁବ୍‌ଲଡେନ୍‌, ଆରି କୁଆଲୋଙନ୍‌ ଇନ୍ନିଙ୍‌ ତାଙ୍‌ଲେୟ୍‌ କି ଗୋଡୋଞନ୍‌ ଅସେଡେଣ୍ଡେନ୍‌, 34 ତି ଆ କୁଆ ଆ ସାଉକାର ତନଣ୍ତେନ୍‌ ତିୟ୍‌ତେ; ରୁପାନ୍‍ ଆମୁଲ୍ଲ ଆନିନ୍‌ ଆ ସାଉକାରନ୍‌ଆଡଙ୍‌ ତିୟ୍‌ତେ, ବନ୍‌ଡ ଆରବୁ ଜନ୍ତୁନ୍‌ କୁଆମରନ୍‌ ଆତେ ଡେତେ । 35 ଆରି ଅବୟ୍‌ନେ ଆତାଙ୍‌ଲେୟ୍‌ ଆରି ଅବୟ୍‌ନେ ଆତାଙ୍‌ଲେୟ୍‌ଆଡଙ୍‌ ପଲେ ରବୁଏନ୍‌ ଡେନ୍‌, ଆନିଞ୍ଜି ଆମେଙନ୍‌ ଆତାଙ୍‌ଲେୟ୍‌ ତମ୍‌ଲେ ଆମୁଲ୍ଲନ୍‍ ବାଗୁବନ୍ତା ଏମ୍ମେତଜି; ଆରି ଆରବୁନ୍‍ ଆତାଙ୍‌ଲେୟ୍‌ ଜାୟ୍‌ ବାଗୁବନ୍ତାଅମେଲେ ପାଙ୍‍ତଜି । 36 ବନ୍‌ଡ ତାଙ୍‍ଲେୟ୍‍ ଆମ୍ମୁଙ୍‍ମା ସିଲଡ୍‌ ଆପପନେନ୍‌ ଜନାଡାଲେ ଆ ସାଉକାରନ୍‌ ତାଙ୍‌ଲେୟନ୍‌ ଜାଗର୍ତଲେ ଅଃଡକୋଲନ୍‌ଡେନ୍‌, ତିଡେନ୍‍ ଆନିନ୍‌ ତାଙ୍‌ଲେୟନ୍‌ ଆପାଲ୍‌ତେଙ୍‌ ତାଙ୍‌ଲେୟନ୍‌ ତିୟ୍‌ତେ, ବନ୍‌ଡ ଆରବୁତାଙନ୍‌ ଆନିନ୍‍ଆତେ ଡେତେ ।