1 ତି ସିଲଡ୍‌ଲ୍ଲନ୍‌ ମସାନ୍‌ ଇସ୍ରାଏଲ୍‌ମରଞ୍ଜି ଅଡ଼କୋଞ୍ଜି ମଣ୍ତଡ଼ିନ୍‌ ରୁକୁଲନ୍‌ ବର୍ରଞ୍ଜି, "ପ୍ରବୁନ୍‌ କେନ୍‌ ଅଡ଼୍‌କୋନ୍‌ ଆବର୍ନେ ଅନମ୍‌ଡଙନ୍‌ ଆସନ୍‌ ତିୟ୍‌ତିୟ୍‌ଲଙଲନ୍‌ । 2 ତୁଡ୍ରୁ ଡିନ୍ନା କାବ୍ବାଡ଼ାନ୍‌ ତମ୍ବୋ, ବନ୍‌ଡ ସାତ ଡିନାଇଙନ୍‌ ଅମଙ୍‌ରେଙ୍‌ବେନ୍‌ ମଡ଼ିର୍‌ ଡେତେ, ତିଆତେ ପ୍ରବୁନ୍‌ ଆସନ୍‌ ସୋଡ଼ା ଲରୋଲୋନେନ୍‌ ଡେତେ, ଆନାଜାକିଁୟ୍‌ ତିଆଡିଡ୍‌ କାବ୍ବାଡ଼ାତନ୍‌ ଆନିନ୍‌ଆଡଙ୍‌ ରନବ୍ବୁନ୍‌ ଡେତେ । 3 ଆମ୍ୱେନ୍‌ ଲୋଲୋନେ ଡିନ୍ନାଇଙନ୍‌ ଇନିଜାକିଁୟ୍‌ ଡର୍ରକୋନେରେଙନ୍‌ ଏସୟ୍‌ଡଙ୍‌ ।"

4 ମସାନ୍‌ ଇସ୍ରାଏଲ୍‌ମରଞ୍ଜି ଅଡ଼୍‌କୋନ୍‌ ଆମଣ୍ତଡ଼ି ଆରି ବର୍ରଞ୍ଜି, ପ୍ରବୁନ୍‌ କେନ୍‌ ଆବର୍ନେ ବର୍ରବର୍‌ଲଙତନ୍‌ । 5 ଆମ୍ୱେଞ୍ଜି ଆସନ୍‌ ପ୍ରବୁନ୍‌ ନିୟ୍‌ ତନିୟ୍‌ତିୟନ୍‌ ରୁକୁବା; ଆନା ଇସ୍ସୁମ୍‌ ଆନିନ୍‌ ପ୍ରବୁନ୍‌ ଆସନ୍‌ ସୁନ୍ନାନ୍‌ ରୁପାନ୍‌ ଡ ପିତ୍ତଡ଼ନ୍‌, 6 ନିଡ଼ିନ୍‌, କରୋମାବ୍‌, ଲୁଲୁ, ଜେଏ ସରୁ ତାଲେର୍‌ ଡ କୁମ୍ମେଡନ୍‌ ଆଉସାଲ୍‌, 7 ଆମିଞାମ୍‌ କୁମ୍ମେଡନ୍‌ ଆଉସାଲ୍‌, ଲମନ୍‌ ଆଉସାଲ୍‌ ଡ ସିଟିମ୍‌ ଅରାନ୍‌, 8 ପିଙ୍କମେନ୍‌, ଅବିସେକ ମିଞଲନ୍‌ ଡ ଲଙିଡ୍‌ ତରୁଡ୍‌ମୋଡନ୍‌ ଆମିଞଲ୍‌, 9 ଏପୋଦ ଡ ମାୟଙନ୍‌ ଆଡରଙ୍‌ନେକାବ୍‌ ଆସନ୍‌ ଗୋମେଦକନ୍‌ ଆମଣି ଅଡ଼୍‌କୋନ୍ ଆଡନାଲ୍‌ ଅରେଙନ୍‌, କେନ୍‌ ଅଡ଼୍‌କୋନ୍‌ ପ୍ରବୁନ୍‌ ତନିୟ୍‌ତିୟନ୍‌ ପାଙ୍‌ତାୟ୍‌ ।

10 ଆରି ଆମ୍ୱେଞ୍ଜି ସିଲଡ୍‌ ଅଡ଼୍‌କୋନ୍‌ ଜନାମରନ୍‌ ଜିର୍ରେ ପ୍ରବୁନ୍‌ ଆଜନବ୍‌ ଅଡ଼୍‌କୋନ୍‌ ତୁବେତଜି, 11 ସରେବା ତମ୍ବୁସିଙନ୍‌, ତେତ୍ତେଡକୋନ୍‌ ଆତମ୍ୱୁ, ବିଲେଙନ୍‌, ଆରାଗୋଡନ୍‌, ପଟାନ୍‌, ଅଙ୍କିଆନ୍‌, ସୋଣ୍ତାଙନ୍‌ ଡ ଆରାକଞନ୍‌, 12 ପେଲନ୍‌ ତିଲୋଙ୍‌ କୁଣ୍ତନ୍‌, ଇର୍ସେନ୍‌ ଆଞନୁମ୍‌ ଡନଙ୍‌ଡଙକାବନ୍‌, 13 ମେଜନ୍‌ ତିଲୋଙ୍‌ କୁଣ୍ତନ୍‌, ତିଲୋଙ୍‌ ଅଡ଼୍‌କୋନ୍‌ ଆସିମ୍ମା ତନାଲ୍‌ମଡନ୍‌ ଆରୁଟି, 14 ପିଙ୍କନ୍‌ ଆଡ୍ରକ୍କୋ ତି ଅଡ଼୍‌କୋନ୍‌ ଆସିମ୍ମା ଡ ପିଙ୍କମେନ୍‌, 15 ଆରି ତରୋମୋଡନ୍‌ ବେଦିନ୍‌, ତି ବରୋୟ୍‌ତେଙନ୍‌, ଅବିସେକ ମିଞଲନ୍‌, ଲଙିଡ୍‌ ତରୋଡ୍‌ମୋଡନ୍‌ ଡ ଡର୍ରକୋନେନ୍‌ ଆଡୁଆରା ସିନ୍‌ରିନ୍‌ ଆୟୁମ୍‌ୟୁମ୍‌, 16 ଆରି ତନମ୍ପିଲନ୍‌ ତିଲୋଙ୍‌ ପିତ୍ତଳନ୍‌ ସିଙ୍ଗୁଡ଼ିନ୍‌, ସୋଣ୍ତାଙନ୍‌, ତିଲୋଙ୍‌ ଗରିୟ୍‌ଡାସିମନ୍‌ ଅଡ଼୍‌କୋନ୍‌ ଆକଡାଡ଼ି, 17 ଡୁଆରାନ୍‌ ଆଡନଙ୍‌କାବ୍‌, ସୋଣ୍ତାଙନ୍‌, କୁଣ୍ତିନ୍‌ ଡ ଡୁଆରାନ୍‌ ଆମୁକ୍କାବାନ୍‌ ସିନ୍‌ରିନ୍‌ ଆୟୁମ୍‌ୟୁମ୍‌, 18 ଆରି ସରେବା ତମ୍ବୁସିଙନ୍‌ ଆମେକ, ଡୁଆରାନ୍‌ ଆମେକ, ଡ ଅଡ଼୍‌କୋନ୍‌ ଆଲୁଆଡ୍‌, 19 ମଡ଼ିର୍‌ ଡରକୋନେଲୋଙ୍‌ ସେବାନ୍‌ ଆସନ୍‌ ମନଙ୍‌ଆସିଂନ୍‌ରିୟ୍‌ ଆରୋଣନ୍‌ ରାଓଡ଼ାନ୍‌ ଆସନ୍‌ ମଡ଼ିର୍‌ ସିନ୍‌ରିନ୍‌ ଡ ରାଓଡ଼ାନ୍‌ କାବ୍ବାଡ଼ାନ୍‌ ଆସନ୍‌ ଆଡାଙ୍ଗାଡଅନଞ୍ଜି କେନ୍‌ ଆସିନ୍‌ରି ତୁବ୍‌ବା ।

20 କେନ୍‌ ସିଲଡ୍‌ ଇସ୍ରାଏଲ୍‌ମରଞ୍ଜି ଅଡ଼କୋମଣ୍ତଡ଼ି ମସାନ୍‌ ଆମୁକ୍କାବାନ୍‌ ଜିରେଞ୍ଜି । 21 ଆନା ଆମନ୍ନଲୋଙ୍‌ ଇନି ଇୟମ୍‌ତେ ଆରି ଆନା ଆପରାନ୍ନା ଇନି ଇସ୍ସୁମେନ୍‌, ଆନିଞ୍ଜି ସରେବା ତମ୍ବୁସିଙନ୍‌ ତନୁବନ୍‌ ଆସନ୍‌ ଆରି ତେତ୍ତେ ଅଡ଼୍‌କୋନ୍‌ ଆକାବ୍ବାଡ଼ା ଡ ମଡ଼ିର୍‌ ସିନ୍‌ରିନ୍‌ ଆସନ୍‌ ପ୍ରବୁନ୍‌ ଆସନ୍‌ ତନିୟ୍‌ତିୟନ୍‌ ପାଙ୍‌ଲାଜି । 22 ଓବ୍ବାମରନ୍‌ ଡ ଆଇମରନ୍‌ ଡିଅଙ୍ଗା ମନ୍‌ରାନ୍‌ ଆବମନ୍ନନ୍‌ ଡକୋଲଞ୍ଜି, ଆନିନ୍‌ ଅଡ଼କୋଞ୍ଜି ଜିର୍ରେ, ପାସିଆ, ଜୋଡ଼ୁର୍‌ମୁଜନ୍‌, ଅଲୁଡ୍‌ଲୋଙନ୍‌ ଆସୁନ୍ନା, ସଙ୍କାଲୋଙନ୍‌ ଆସୁନ୍ନା ଏନ୍‌ସିନ୍‌ ଅଡ଼୍‌କୋନ୍‌ ଆରନ୍‌ ପାଙ୍‌ଲାଜି; ଅଡ଼କୋ ମନ୍‌ରାନ୍‌ ପ୍ରବୁନ୍‌ ଆସନ୍‌ ସୁନ୍ନାନ୍‌ ତନିୟ୍‌ତିୟନ୍‌ ସୋରୋପ୍ପାୟ୍‌ବା । 23 ଅଙ୍ଗାମନ୍‌ରାଞ୍ଜି ଆମଙ୍‌ ନିଡ଼ି, ଲୁଲୁ, ଜେଏ ସରୁ ତାଳେରନ୍‌, କୁମ୍ମେଡନ୍‌ ଆଉସାଲ୍‌, ମିଞାମ୍‌ଡାଗୋ କୁମ୍ମେଡନ୍‌ ଆଉସାଲ୍‌ ଡ ଲମନ୍‌ ଉସାଲନ୍‌ ଡକୋଏନ୍‌, ତି ଆତେ ଅଡ଼୍‌କୋଞ୍ଜି ପାଙ୍‌ଲାଜି । 24 ଆନା ରୁପ୍ପାନ୍‌ ଅଡ଼େ ପିତ୍ତଡ଼ନ୍‌ ତନିୟ୍‌ତିୟନ୍‌ ତିୟ୍‌ଲେ ଅନମଙନ୍‌ ତିୟ୍‌ତେ, ଆନିନ୍‌ ପ୍ରବୁନ୍‌ ତନିୟ୍‌ତିୟନ୍‌ ପାଙ୍‌ଲାୟ୍‌; ଆନା ଆମଙ୍‌ ସେବାନ୍‌ ଇନିଜାକିଁୟ୍‌ ଆକାବ୍ବାଡ଼ା ଆସନ୍‌ ସିଟିମ୍‌ ଅଙଲନ୍‌ ଡକୋଏନ୍‌, ତିଆତେ ଆନିନ୍‌ ପାଙ୍‌ଲାୟ୍‌ । 25 ବୁଡ୍ଡିବଜଞ୍ଜି ତର୍ଡମ୍‌ ଆସିଙ୍‌ଲୋଙଞ୍ଜି ତାଡ଼େରନ୍‌ ଗିଡ୍‌ଲେ ନିଡ଼ି ଅରୋମୋଡ୍‌ ନରିଡ଼ି, ଲୁଲୁ ଡ ଜେଏ ମନଙ୍‌ ତାଡ଼େରନ୍‌ ପାଙ୍‌ଲାଜି । 26 ଆରି ଅଙ୍ଗା ଆଇବୟ୍‌ଜି ଆ ମନ୍ନଲୋଙନ୍‌ ବୁଡ୍ଡି ଡେଏନ୍‌, ତି ଅଡ଼୍‌କୋନ୍‌ ଆ ଉସାଲନ୍‌ ତାଡ଼େରନ୍‌ ଗଡେଞ୍ଜି । 27 ଆରି ଆମ୍ମୁଙ୍‌ଗଡ୍‌ମରଞ୍ଜି ଆସନ୍‌ ଏପୋଦ ବୋୟାକାବନ୍‌ ଆରି ଡରଙ୍‌ନେକାବନ୍‌ ଆସନ୍‌ କିଲାୟ୍‌ ମଡ଼ଗା ଅରେଙଞ୍ଜି ଆରି ଆନ୍ନା ମଡ଼ିର୍‌ ଅରେଙଞ୍ଜି ଅନବ୍‌ଜିଡନ୍‌ ଆସନ୍‌, 28 ପିଙ୍କନ୍‌ ଡ ଅବିସେକ ମିଞଲନ୍‌ ଡ ଲଙିଡ୍‌ ତରୁଡ୍‌ମୋଡନ୍‌ ଆସନ୍‌ ଲଙିଡ୍‌ ଜନବନ୍‌ ଡ ମିଞଲନ୍‌ ପାଙ୍‌ଲାଜି । 29 ଇସ୍ରାଏଲ୍‌ମରଞ୍ଜି ଆଇସ୍ସୁମଞ୍ଜି ପ୍ରବୁନ୍‌ ଆସନ୍‌ ତନିୟ୍‌ତିୟନ୍‌ ପାଙ୍‌ଲାଜି; ପ୍ରବୁନ୍‌ ମସାନ୍‌ ଇନି ଇନି ଲନୁମନ୍‌ ଆସନ୍‌ ତିଏନ୍‌, ତିଲୋଙ୍‌ ଇନିଜାକିଁୟ୍‌ ଆକାବ୍ବାଡ଼ା ଲନୁମନ୍‌ ଆସନ୍‌ ଅଙ୍ଗା ଓବ୍ବାମର୍‌ ଡ ଆଇମର୍‌ ମନ୍ନଲୋଙନ୍‌ ଇସୁମେନ୍‌, ଆନିଞ୍ଜି ଅଡ଼୍‌କୋଞ୍ଜି ତନିୟ୍‌ତିୟନଞ୍ଜି ପାଙଲାଜି ।

30 କେନ୍‌ ସିଲଡ୍‌ ମସାନ୍‌ ଇସ୍ରାଏଲନ୍‌ ଆଅନଞ୍ଜି ଆରି ବରେନ୍‌, "ଗିୟ୍‌ବା, ପ୍ରବୁନ୍‌ ଜିଉଦାନ୍‌ ଆକେଜ୍ଜା ଉରନ୍‌ ଆଉଲେଙ୍‌ ଉରିନ୍‌ ଆଡାଙ୍ଗାଡ଼ାଅନ୍‌ ବତ୍ସଲେଲନ୍‌ ଆଞୁମ୍‌ ଞମ୍‌ଲେ ଓଡ୍ଡେତଜି ।" 31 ଆରି ଆନିନ୍‌ଆଡଙ୍‌ ଜନନାନ୍‌, ବୁଡ୍ଡିନ୍‌, ଞଙ୍‌ନେନ୍‌ ଡ ରଞଙ୍‌କାବ୍ବାଡ଼ାମର୍‌ ଇସ୍ୱରନ୍‌ ଆପୁରାଡ଼ାନ୍‌ ତିୟ୍‌ତାୟ୍‌ 32 ସିତ୍ରନ୍‌ ଆକାବ୍ବାଡ଼ାନ୍‌ ଡ ସୁନ୍ନାନ୍‌, ରୁପାନ୍‌ ପିତ୍ତଡ଼ନ୍‌ ଆକନୁଣ୍ଟାୟ୍‌ 33 ଆରି ପନବ୍‌ଡିୟ୍‌ ମଣିନ୍‌ ଆଗନଡ୍‌ ଡ ଅନ୍ନାନ୍‌ ତନ୍‌ଡ୍ରୁବ୍‌ କାବ୍ବାଡ଼ାନ୍‌ ଆସନ୍‌ ଅରାନ୍‌ ଆସନୟ୍‌, କେନ୍‌ ଅଡ଼୍‌କୋନ୍‌ ତନ୍‌ଡ୍ରୁବ୍‌ କାବ୍ବାଡ଼ା ଆସନ୍‌ ଆନିନ୍‌ଆଡଙ୍‌ ଗୋଗୋୟ୍‌ ବୁଡ୍ଡିନ୍‌ ତିୟେନ୍‌ । 34 ଞନଙ୍‌ତିୟନ୍‌ ଆସନ୍‌ ଆନିନ୍‌ଆଡଙ୍‌ ଡ ଦାନନ୍‌ ଆକେଜ୍ଜା ଅଇସାମକନ୍‌ ଆଡାଙ୍ଗାଡ଼ାଅନ୍‌ ଅଲିଆବରନ୍‌ ଆମନଲୋଙ୍‌ ଜନନାନ୍‌ ତିୟେନ୍‌ । 35 ସେୟ୍‌ସେଜନ୍‌ ଡ ତନ୍‌ଡ୍ରୁବନ୍‌ ଆସନ୍‌ କାବ୍ବାଡ଼ାନ୍‌ ଆତନୁବ୍‌ ଆସନ୍‌, ଆରି ନିଡ଼ି, କରୋମାବ୍‌, ଲୁଲୁ ଡ ଜେଏ ଲତୁମ୍‌ ସରୁତାଡ଼େର୍‌ଲୋଙନ୍‌ ମଡ଼ିର୍‌ କାବ୍ବାଡ଼ାନ୍‌ ଡ ତନାଞ୍‌ କାବ୍ବାଡ଼ାନ୍‌ ଡ ସିତ୍ର କାବ୍ବାଡ଼ାନ୍‌ ଆଲନୁମ୍‌ ଆସନ୍‌, ଆଗ୍ରାମ୍‌ଗାମ୍‌, ଅଡ଼୍‌କୋନ୍‌ ତନ୍‌ଡ୍ରୁବ୍‌ କାବ୍ବାଡ଼ାନ୍‌ ଡ ସିତ୍ରତୁବନ୍‌ ଆକାବ୍ବାଡ଼ା ଆସନ୍‌ ଆମନ୍ନଞ୍ଜି ଗିଆନଲୋଙନ୍‌ ବବ୍‌ରିଜେନ୍‌ ।