1 କେନ୍‌ ସିଲଡ୍‌ ପ୍ରବୁନ୍‌ ମୋସାନ୍‌ଆଡଙ୍‌ ବରେନ୍‌, "ଆମନ୍‌ ଆମ୍ମୁଙ୍‌ ଅନ୍ତମ୍‌ ବାଗୁ ଅରେଙନ୍‌ ସଜା । ଆମନ୍‌ ଅଙ୍ଗା ଆରେଙ୍‌ ପଟାନ୍‌ ଇସ୍ସୁମ୍‌ନମ୍‌ ବାତ୍ତେ ଲବ୍‌ଗଡେନ୍‌, ତି ଆତୋଣ୍ତୁ ଇନି ଇନି ଆଇଡିଡ୍‌ ଡକୋଏନ୍‌, ତି ଅଡ଼୍‌କୋନ୍‌ ଆବର୍ନେ ଞେନ୍‌ କେନ୍‌ ବାଗୁ ଅରେଙନ୍‌ ଆତୋଣ୍ଡୋ ଏଇବ୍ବା । 2 ଆରି ଆମ୍ୱେନ୍‌ ଡୋତାନ୍‌ ଆଡିଡ୍‌ ଅବ୍‌ଜାଡାନା ଡ ଡୋତାନ୍‌ଆଡିଡ୍‌ ସିନୟ୍‌ ଆବୁରୁଲୋଙ୍‌ ଜିର୍ରେ ତେତେଲୋଙ୍‌ ଡେରିଙ୍‌ବୁର୍ରରେଙନ୍‌ ଅମଙ୍‌ଞେନ୍‌ ଡକୋନା । 3 ବନ୍‌ଡ ଆମ୍ୱେନ୍‌ ବୟନ୍‌ ଆରି ଆନ୍ନା ଆଉପରେଙ୍‌ଲୋଙ୍‌ ଅଜିରାୟ୍, ଆରି କେନ୍‌ ଅଡ଼୍‌କୋନ୍‌ ଆବୁରୁଲୋଙ୍‌ ଆନିଙ୍‌ଜା ଅଃଗିୟ୍‌ତାଏଜି ଗୋସାମେଡନ୍‌ ନିୟ୍‌ କେନ୍‌ ଆବରୁ ଆମୁକ୍କାବାନ୍‌ ଅଃଜୋମ୍‌ଲଜି ।" 4 ସିଲତ୍ତେ ମସାନ୍‌ ଆପର୍ତମ୍ମୁନ୍‌ ଆରେଙ୍‌ ବାଗୁ ଅରେଙ୍‌ ପଟାନ୍‌ ତାଙେନ୍‌; ଆରି ପ୍ରବୁନ୍‌ ଆବନାୟ୍‌ ଡୋତାନ୍‌ ଡୋଲନ୍‌ ସିନୟ୍‌ ଆବରୁ ତୁଣ୍ତୁନ୍‌ ଜିର୍ରେନ୍‌ କି ନିୟ୍‌ ବାଗୁ ଅରେଙ୍‌ପଟାନ୍‌ ଅସିଂଲୋଙନ୍‌ ପାଙେନ୍‌ । 5 ତିଡେନ୍‌ ପ୍ରବୁନ୍‌ ମେଗନ୍‌ ୟୁମ୍‌ଲେ ତି ଆଡରକୋନେଲୋଙ୍‌ ଆନିନ୍‌ ବୟନ୍‌ ତନଙ୍‌ଡାଲେ ପ୍ରବୁନ୍‌ ଆଞୁମ୍‌ଲୋଙ୍‌ ଅନପ୍ପୁଙନ୍‌ ଡେନ୍‌ । 6 ଆରି ପ୍ରବୁନ୍‌ ଆମୁକ୍କାଗଡ୍‌ ଜିର୍ରେ କେନ୍‌ ଅନପ୍ପୁଙନ୍‌ ଡେନ୍‌, "ସଦାପ୍ରବୁନ୍, ପ୍ରବୁନ୍‌ ଇସ୍ୱରନ୍‌ ଡନୁଙ୍‌ୟମନ୍‌ କାନକାରମ୍‌, ବରାବ୍‌ଲୋଙନ୍‌ ସୟୁ, ସାୟୁମନ୍‌ ଡ ଆଜାଡ଼ିନ୍‌ ଆବରିୟ୍‌; 7 ଅଜାର ଅଜାର କନୋଡ୍‌କୋଡ୍‌ ଜାୟ୍‌ ସନାୟୁମ୍‌ଡୋବନ୍‌, ଡୋସାନ୍‌ ଡ ମନଙ୍‌ତଡନ୍‌ ଆକାବ୍ବାଡ଼ା ଇର୍ସେ କେମ୍ମାନ୍‌, ଏଙ୍ଗାଲେ ଜାକିଁୟ୍‌ଡେନ୍‌ ତିଲୋଙ୍‌ ଡଣ୍ତନ୍‌ଞାଙ୍‌ତେ, ୟାଗି ଡ ଉଞ୍ଜି ଆମନ୍‌ରା ଜାୟ୍‌ ଡାଙ୍ଗାଡ଼ାଅନ୍‌ ଆଉପ୍ରେଙ୍‌ ବାପାଞ୍ଜି ଡୋସା ଆସନ୍‌ ଡଣ୍ତନ୍‌ଏତିୟ୍‌ବା ।" 8 ସିଲତ୍ତେ ମସାନ୍‌ ଲଜିର୍ର ଲବନ୍‌ ବରୁମ୍‌ଲେ ଲୋମ୍‌ଲେ ବର୍ନେ, 9 ଆନିନ୍‌ ଗାମେନ୍‌, "ପ୍ରବୁ, ଞେନ୍‌ ଗନିୟ୍‌ଗିୟ୍‌ଲୋଙ୍‌ନମ୍‌ ସମାୟୁମନମ୍‌ ଞାଙ୍‌ଲାୟ୍‌, ତିଡେନ୍‌ କାକୁର୍ତିତନାୟ୍‌, ପ୍ରବୁନ୍‌ ଞେନ୍‌ ବୟନ୍‌ ଡକୋଲନ୍‌ ଜିର୍ରତେ ଜିର୍ରତାୟ୍‌, ଇନିଆସନ୍‌ଗାମେଣ୍ଡେନ୍‌ କେନ୍‌ ଆ ମନ୍‌ରାଜି ରଡୋ, ଆରି ମନଙ୍‌ତଡନ୍‌ ଆକାବ୍ବାଡ଼ା ଇର୍ସେଲେନ୍‌ ଅମ୍‌ରେଙ୍‌ଲେ ଡନେନମ୍‌ ଆସନ୍‌ ଇନ୍‌ଲେଞ୍ଜିଆଡଙ୍‌ ଜାଲେନ୍‌ ।"

10 ଆନିନ୍‌ ଗାମେନ୍‌, "ଗିୟ୍‌ବା, ଞେନ୍‌ ଅବୟ୍‌ ଅନସଜନ୍‌ ତୁବ୍‌ତାୟ୍‌; ଅଡ଼୍‌କୋନ୍‌ ପୁର୍ତିନ୍‌ ଅଡ଼େ ଅଙ୍ଗାଜାକିଁୟ୍‌ ଆକେଜ୍ଜାଲୋଙ୍‌ ଅଙ୍ଗାତେ ଆଙ୍ଗିୟ୍‌ ଅନ୍‌ର୍ରଙ୍‌ତୁବେଜି, ଏନ୍ନେଗନ୍‌ ସାନ୍ନି କାବ୍ବାଡ଼ାନ୍‌ ଅଡ଼କୋ ମନ୍‌ରାଞ୍ଜି ଆମୁକ୍କାଲୋଙ୍‌ ଏତୁବ୍‍ବ୍ବା; ତିଲୋଙ୍‌ ଅଙ୍ଗା ଅଡ଼୍‌କୋନ୍‌ ମନ୍‌ରାଲୋଙନ୍‌ ଆମ୍ୱେନ୍‌ ଡକୋ, ଆନିଞ୍ଜି ପ୍ରବୁନ୍‌ ତି ଆକାବ୍ବାଡ଼ା ଗିୟ୍‌ତେ, ଇନିଆସନ୍‌ଗାମେଣ୍ଡେନ୍‌ ଞେନ୍‌ ଅମଙ୍‌ବାବେନ୍‌ ଇନି ଲୁମ୍‌ତାୟ୍‌, ତିଆତେ ବର୍ରନ୍ତଙନ୍‌ ଆତେ । 11 ଲଙେ ଞେନ୍‌ ଅମଙ୍‌ବାବେନ୍‌ ଇନି ବର୍ରତନାୟ୍‌, ତିଲୋଙ୍‌ ମନଙ୍‌ ଅମ୍‌ଡଙ୍‌ବା; ଗିୟ୍‌ବା, ଆମ୍ୱେନ୍‌ ଅନ୍‌ରଙ୍‌ ଜିର୍ରାଞେନ୍‌ ଆମ୍ମୁଙ୍‌ ଞେନ୍‌ ଇମୋରିଅନ୍‌ କିଣାନିଅନ୍‌, ଇତିୟନ୍‌, ପରିସିୟ୍‌, ଇତିଅ ଡ ଜିବୁସିୟ୍‌ମନ୍‌ରାଞ୍ଜି ଏଗଙ୍‌ତାଜି । 12 ଆମ୍ୱେନ୍‌ ଆବୟ୍‌ଲନ୍‌ ଡକୋନାବା, ଅଙ୍ଗାଡେସା ଆମ୍ୱେନ୍‌ ଏଜିର୍ତେ, ତି ଆଡେସାବାଜି ବୟନ୍‌ ଅନସଜନ୍‌ ଏଲୁମ୍‌ଡଙ୍‌; ଅସମୟ୍‌ ତିଆତେ ଆମ୍ୱେଞ୍ଜି ଅବୟ୍‌ ଞନମ୍‌ଞମ୍‌ ଡାଗୋଡେତେ । 13 ବନ୍‌ଡ ଆମ୍ୱେଞ୍ଜି ଆତନମ୍ପିଲଞ୍ଜି ଅଡ଼୍‌କୋନ୍‌ ଏପୁଡ୍‌ତେ ଆରି ଆକୁଣ୍ଟିଆଞ୍ଜି ଅଡ଼୍‌କୋନ୍‌ ଲବ୍‌ଗଡ୍‌ଲେ ଏସେତ୍ତେ ଆରି ଆସେରାନ୍‌ ଆକୋଣ୍ତାୟ୍‌ ପାଲ୍‌ପାଲ୍‌ଲେ ଏସେତ୍ତେ ।

14 ଇନିଆସନ୍‌ ଆମ୍ୱେଞ୍ଜି କୁଣ୍ଡାୟ୍‌ସୁମଞ୍ଜି ଏଲୁମ୍‌ଡଙ୍‌, ଇନିଆସନ୍‌ଗାମେଣ୍ଡେନ୍‌ ଆଞୁମ୍‌ ସନ୍ନେସେନନ୍‌ ଆନିନ୍‌ ସନ୍ନେସେନ୍‌ ଇସ୍ୱରନ୍‌ । 15 ଓଡେନ୍‌ ଆମ୍ୱେନ୍‌ ନିୟ୍‌ ଆଡେସାବାଜି ମନ୍‌ରାଞ୍ଜି ବୟନ୍‌ ଅନସଜନ୍‌ ତୁବ୍‌ବା; ଅଙ୍ଗା ଆଡିଡ୍‌ ଆନିଞ୍ଜିଡମ୍‌ ଆକୋଣ୍ତାୟଞ୍ଜି ଆମଙ୍‌ ସନ୍‌ଣ୍ତୋଙ୍‌ଲେ ଡାରିତଞ୍ଜି ଡ ଆସନୁମଞ୍ଜି ଆମଙ୍‌ ଅନମଙନ୍‌ ତିୟ୍‌ତଜି, ତିଆଡିଡ୍‌ ଆନ୍ନିଙ୍‌ ଆମ୍ୱେଞ୍ଜି ଓଡ୍ଡେଲବେଞ୍ଜି ଡେନ୍‌, ଆମ୍ୱେନ୍‌ ଆ ଅନମଙ୍‌ ଜିନିସଞ୍ଜି ଏଜୋମ୍‌ତେ । 16 ଅଡ଼େ ଆମ୍ୱେନ୍‌ ଡାଙ୍ଗଡ଼ାବେଞ୍ଜି ଆସନ୍‌ ଆ ଡାଙ୍ଗିଡ଼ିଅନଞ୍ଜି ଜନାଏଞ୍ଜିଡେନ୍‌, ଆ ଡାଙ୍ଗିଡ଼ିଅନଞ୍ଜି ଆସନୁମଞ୍ଜି ସନଡୋଙ୍‌ଲେ ଡାଙ୍ଗଡ଼ାଅନବେଞ୍ଜି ଆସନୁମଞ୍ଜି ସନ୍‌ଲେ ଅବ୍‌ଡାରିନେତଜି । 17 ଆମ୍ୱେନ୍‌ ଆସନ୍‌ ଇନିଜାକିଁୟ୍ ଆତୁବ୍‌ତୁବ୍‌ କୋଣ୍ଡାୟନ୍‌ ସନୁମନ୍‌ ଏତୁବ୍‌ଡଙ୍‌ ।

18 ଆମ୍ୱେନ୍‌ ତାଡ଼ିସୁନ୍ୟ ରୁଟିନ୍‌ ଞଣ୍ଡ୍ରମ୍‌ନାବା,ଆରି ଅବିବ୍‌ ଆଙ୍ଗାୟ୍‌ ଅଙ୍ଗାଆଡିଡ୍‌ ଏଙ୍ଗାଲେ ଲୁମ୍‌ତବୋ ଏତ୍ତେଲେ ଏବର୍ତବେନ୍‌, ତି ଅନ୍ତମ୍‌ ଆମ୍ୱେନ୍‌ ସାତଡିନ୍ନା ତାଡ଼ିସୁନ୍ୟ ରୁଟିନ୍‌ ଜୋମ୍‌ବା; ଇନିଆସନ୍‌ଗାମେଣ୍ଡେନ୍‌ ତି ଆବିବ୍‌ ଆଙ୍ଗାୟ୍‌ ଆମ୍ୱେନ୍‌ ମିସର୍‌ ଡେସାନ୍‌ ସିଲଡ୍‌ ଡୁଙ୍‌ଲନ୍‍ ଏଜିର୍ରାୟ୍‌ ।

19 ଆରି ଅଡ଼କୋମ୍ବେନ୍‌ ଆପର୍ତମ୍ମୁନ୍‌ ଆଜ ଡ ଆବରନ୍ତବନ୍‌ ଆଜନ୍ତୁ ନିୟ୍‌ ଆପର୍ତମ୍ମୁନ୍‌ ଆଜନ୍ତୁ ଅଡ଼୍‌କୋନ୍‌ ଞେନ୍‌ଆତେ । 20 ବନ୍‌ଡ ଆପର୍ତମ୍ମୁନ୍‌ ଆକୋନୋଡ୍‌ ଗୋଡୋଁୟନ୍‌ ଆପାଲ୍‌ତେଙ୍‌ ଆମ୍ୱେନ୍‌ ଆଅନ୍‌ମେନନ୍‌ ତିୟ୍‌ଲେ ଆନିନ୍‌ ଅମ୍‌ରେଙ୍‌ଲେ ରପ୍ତିତେ; ଅମ୍‌ରେଙ୍‌ଲେ ଏଃରପ୍ତିଲଡେନ୍‌, ତିଡେନ୍‌ ଆସଙ୍କାନ୍‌ ଗଡ୍‌ଲେସେଡା । ଆପର୍ତମ୍ମୁନ୍‌ ଆଡାଙ୍ଗାଡ଼ାଅନ୍‌ ଅଡ଼୍‌କୋନ୍‌ ଆମ୍ୱେନ୍‌ ଅନୁରନ୍‌ ଏଞାଙ୍‌ତେ । ଆରି ଆନ୍ନିଙ୍‌ ଆରିକାସିନ୍‌ ଅମଙ୍‌ବାଞେନ୍‌ ଅଡ଼ୋଡଙାୟ୍‌ତଡ୍‌ । 21 ଆମ୍ୱେନ୍‌ ତୁଡ୍ରୁ ଡିନ୍ନା କାବ୍ବାଡ଼ାନାବା, ବନ୍‌ଡ ସାତ ଡିନ୍ନାଇଙନ୍‌ ଲୋଲୋନାବା; ଅର୍ରନ୍‌ ଡ ଜନ୍‌ରୋମନ୍‌ ଆଗନଡ୍‌ ଆଡିନ୍ନା ନିୟ୍‌ ଲୋଲୋନାବା । 22 ଆମ୍ୱେନ୍‌ ପାଲ୍ଲିଞ୍ଜି ଆପୁର୍‌ପୁର୍‌, ଆଗରାମ୍‌ଗାମ୍‌ ଆପର୍ତମ୍ମୁ ଗମ୍ମଜନ୍‌ ଆପୁର୍‌ପୁର୍‌ ଆରି ବର୍ସେଙନ୍‌ ଆତନିକ୍କି ଜନ୍‌ ଆପୁର୍‌ପୁର୍‌ ତୁମ୍‌ବା । 23 ଆମ୍ୱେଞ୍ଜି ଅଡ଼୍‌କୋନ୍‌ ଓବ୍ବାମରନ୍‌ ବବର୍ସେଙନ୍‌ ୟାଗିତର୍‌ ଇସ୍ରାଏଲନ୍‌ ଆ ପ୍ରବୁନ୍‌ ଇସ୍ୱରନ୍‌ ଆମୁକ୍କାବାନ୍‌ ଡକୋତନେ । 24 ଆମ୍ୱେନ୍‌ ମୁକାବାବେନ୍‌ ଅନ୍ନା ଡେସାମରଞ୍ଜି ଏବ୍‌ସଙାୟ୍‌ବା ଡ ସଣ୍ତିବେନ୍‌ ଏବ୍‌ଗୋଗୋୟ୍‌ବା ଆରି ଆମ୍ୱେନ୍‌ ବର୍ସେଙନ୍‌ ୟାଗି ତର ସଦାପ୍ରବୁ ଇସ୍ୱରନ୍‌ ଆମୁକ୍କାବାନ୍‌ ଡକୋନେନ୍‌ ଆଜନିର୍‌ ଆସନ୍‌ ଜିରେଞ୍ଜି, ଲବବେନ୍‌ଆଡଙ୍‌ ଆନ୍ନିଙ୍‌ ଅଃଲୋବଏ । 25 ଆମ୍ୱେନ୍‌ ଞେନ୍‌ଆଡଙ୍‌ ଅନମଙନ୍‌ ଆ ମିଞାମ୍‌ ଏସୋରୋପ୍ପାୟ୍‌ତେ ତି ଆଡିଡ୍‌ ମିଞାମନ୍‌ ମାୟ୍‌ଲେ ଗବ୍‌ରୋଙ୍‌ସାଲନ୍‌ ଞେନ୍‌ଆଡଙ୍‌ ଏତିଲ୍‌ଡଙିଁୟ୍‌ । କେନ୍‌ଆଡିଡ୍‌ ଅନେଲାୟ୍‌ପୁର୍‌ ଆନମଙ୍‌ ଡୋତାନ୍‌ଜାୟ୍‌ ଏଡକ୍କୋଡଙ୍‌ । 26 ଆମ୍ୱେନ୍‌ ଲବଲୋଙନ୍‌ ଆପର୍ତମ୍ମୁନ୍‌ ଆଜ ପ୍ରବୁନ୍‌ ଆସିଙ୍‌ ପାଙାୟ୍‌ବା । ଆରି ଆମ୍ୱେନ୍‌ ଆଅନ୍‌ ମେଣ୍ତାନ୍‌ଆଡଙ୍‌ ଆୟୋଙନ୍‌ ଆଡ଼ୁବ୍‌ ବାତ୍ତେ ଏଡିଁୟ୍‌ଡଙେ ।" 27 ଆରି ପ୍ରବୁନ୍‌ ମସାନ୍‌ ବର୍ରେନ୍‌, "ଆମ୍ୱେନ୍‌ କେନ୍‌ଅଡ଼କୋନ୍‌ ଗାମେନ୍‌ ନ୍‌ ଇଡା,ଇନିଆସନ୍‌ଗାମେଣ୍ଡେନ୍‌ ଞେନ୍‌ କେନ୍‌ ଆବର୍ନେ ଆମ୍ୱେନ୍‌ ବୟନ୍‌ ଡ ଇସ୍ରାଏଲଞ୍ଜି ବୟନ୍‌ ଆନସଜନ୍‌ ଗନବ୍‌ରିନ୍‌ ଡେନ୍‌ ।" 28 ତିଆଡିଡ୍‌ ମସାନ୍‌ ପ୍ରବୁନ୍‌ ବୟନ୍‌ ନିୟ୍‌ ଆବୁରୁଲୋଙ୍‌ ବାକୁଡ଼ିଡିନ୍ନା ତଗଲ୍‌ ତମ୍ୱା ତୋଣ୍ଡୋନ୍‌ ଡକୋଲନ୍‌; ଆନିନ୍‌ ତେତ୍ତେ ଅଃଗାଗାଲନ୍‌ କି ଡାଆନିୟ୍‌ ଅଃଗାଲୋ । ଆନିନ୍‌ ବାତ୍‌ବାନେନ୍‌ ଅନଗଡ୍‌ ଗାମେନ୍‌, ଆଗ୍ରାମ୍‌ଗାମ୍‌ ଦସଟା ଞନଙନେନ ଇଡେନ୍‌ ।

29 କେନ୍‌ ସିଲଡ୍‌ ମସାନ୍‌ ସିନୟ୍‌ ଆବୁରୁଲୋଙ୍‌ ସିଲଡ୍‌ ଆପ୍ରଲନାଞନ୍‌ ଆଡିଡ୍‌ ସାକିନ୍‌ ଅନ୍ତମ୍‌ ବାଗୁ ଅରେଙନ୍‌ ଆସିଲୋଙନ୍‌ ଞମ୍‌ଲେ ପଲ୍ଲ୍‌ନାୟ୍‌, ବନ୍‌ଡ ପ୍ରବୁନ୍‌ ବୟନ୍‌ ଅଃକାଡାଡ଼ିଲନ୍‌ ଆସନ୍‌ ଆମୁକାନ୍‌ ସାଆର୍‌ ଡକୋଏନ୍‌, ତିଆତେ ମସାନ୍‌ ଜନାତଡ୍‌ । 30 ଆରି ଆରୋଣନ୍‌ ଡ ଇସ୍ରାଏଲନ୍ ଆଅନଞ୍ଜି ମୋସାନ୍‌ଆଡଙ୍‌ ଗିଜେଞ୍ଜି, ତିଆଡିଡ୍‌ ଆମୁକାନ୍‌ ଆସନାଆର୍‌ କଡୋଏନ୍‌; ତିଆସନ୍‌ ଆନିଞ୍ଜି ଆମଙନ୍‌ ଜନିରନ୍‌ ଆସନ୍‌ ବତଙେଞ୍ଜି । 31 ବନ୍‌ଡ ମସାନ୍‌ ଆନିଞ୍ଜି ଓଡେନ୍‌, ଆରୋଣନ୍‌ ଡ ମଣ୍ତଡ଼ିନ୍‌ ଆସୋଡ଼ାମର୍‌ଜି ଆମଙ୍‌ ୟର୍ରଞ୍ଜି; ତିଲୋଙ୍‌ ମସାନ୍‌ ଆନିଞ୍ଜି ବୟନ୍‌ କଡାଡ଼ିଲଞ୍ଜି । 32 ତି ସିଲଡ୍‌ଲ୍ଲନ୍‌ ଇସ୍ରାଏଲ୍‌ମରଞ୍ଜି ଆମଙନ୍‌ ଜିର୍ରେଞ୍ଜି; ତିଲୋଙ୍‌ ପ୍ରବୁନ୍‌ ସିନୟ୍‌ ଆବୁରୁଲୋଙ୍‌ ଆନିନ୍‌ ବୟନ୍‌ ଅଙ୍ଗା ଅଙ୍ଗା ଆବର୍ନେ ବର୍ରୟା, ତି ଅଡ଼୍‌କୋନ୍‌ ଆଞନଙ୍‌ ଆନିଞ୍ଜି ଅବ୍‌ଜନାଏନ୍‌ । 33 ଆରି ମସାନ୍‌ ଆନିଞ୍ଜି ବୟନ୍‌ କଡାଡ଼ିନ୍‌ ଆସ୍ରୁଜ୍ଜେଏନ୍‌ ସିଲଡ୍‌ ଆମୁକାନ୍‌ ୟୁମେନ୍‌ । 34 ବନ୍‌ଡ ମସାନ୍‌ ପ୍ରବୁନ୍‌ ସରିନ୍‌ କଡାଡ଼ିନେନ୍‌ ଆସନ୍‌ ଅମ୍ମନ୍‌ ଆନିନ୍‌ ଅବ୍‌ଗିତାଲନ୍‌ ଜିର୍ରେ ଡାନ୍‌ଡନ୍‌ ଡୁଙଡନାୟ୍‌ ଜାୟ୍‌ ନିୟ୍‌ ୟରୁମ୍‌ୟୁମନ୍‌ ତବ୍‌ଲେ ଡକୋଏନ୍‌; ଆରି ଅଙ୍ଗା ଆବର୍ନେ ଞାଙେନ୍‌ ଡାନ୍‌ଡନ୍‌ଡୁଙଲନ୍‌ ଇସ୍ରାଏଲନ୍‌ ଆ ମନ୍‌ରାଜି ତିଆତେ ବର୍ରଞ୍ଜି । 35 ତିଲୋଙ୍‌ ମସାନ୍‌ ଆମୁକ୍କା ସାଆର୍‌, କେନ୍‌ ଇସ୍ରାଏଲ୍‌ମରଞ୍ଜି ଆମୁକାନ୍‌ ଗିୟ୍‌ଲ୍ଲେ ଅଃର୍ରପ୍ତିଲଜି; ମସାନ୍‌ ପ୍ରବୁନ୍‌ ବୟନ୍‌ ଅଃକଡାଡ଼ିଲନ୍‌ ଜାୟ୍‌ ଆମନ୍‌ ଅଃଜିରଡେନ୍‌; ତିଆଡିଡ୍‌ ଜାୟ୍‌ ଆମୁକାନ୍‌ ୟୁମ୍‌ଲେ ଡକୋଏନ୍‌ ।