1 ପ୍ରବୁନ୍‌ ମସାନ୍‍ଆଡଙ୍‌ ବରେନ୍‍, 2 "ଇସ୍ରାଏଲ୍‌ମରଞ୍ଜି ମନ୍‍ରାନ୍‍ ପଙ୍‌ ଜନ୍ତୁଡେଏତୁ ଆନାଜାକିଁୟ୍‌ ଆପର୍ତମ୍ମୁ କୋଡେନ୍‍ଜିଡେନ୍‍,ତି ଆପର୍ତମ୍ମୁ ଆକରୋଡେନ୍‍ଞ୍ଜିଆତେ ଇନ୍‌ଲେନ୍‌ ଆସନ୍‌ ସୋରୋପ୍ପାୟ୍‌ବା, ତିଆତେ ଞେନ୍‍ଡମ୍‌ ।"

3 ସିଲତ୍ତେ ମସାନ୍‍ ମନ୍‌ରାଜିଆଡଙ୍‌ ବରେନ୍‌, କେନ୍‍ ଆଡିନ୍ନା ମନେଲେ ଡକୋବା, ଇନିଆସନ୍‌ଗାମେଣ୍ଡେନ୍‌ କେନ୍‍ ଆଡିନ୍ନାଲୋଙ୍‌ ଆମ୍ୱେଞ୍ଜି ମିସର୍‌ ଡେସାନ୍‌ କମ୍ୱାରିସିଙନ୍‌ ସିଲଡ୍‌ ଏଡୁଙ୍‍ଲନାୟ୍‍, ଆରି ପ୍ରବୁନ୍‌ ଆ ରନପ୍ତିସି ବାତ୍ତେ ଆମ୍ୱେଞ୍ଜିଆଡଙ୍‌ ତେତ୍ତେ ସିଲଡ୍‌ ଅମ୍‌ଡୁଙ୍‌ଲେ ଓରୋଙ୍‌ଲବେନ୍‌; ତି ଆଡିଡ୍‌ କମିରନ୍‌ ଆମାୟ୍‌ନେ ଆ ରୁଟି ଜନୋମନ୍‌ ଅଃଡ୍ଡେଏ । 4 ଆମ୍ୱେଞ୍ଜି ଆବିବ୍‍ ଆଙ୍ଗାୟ୍‌ କେନ୍‍ ଆଡିନ୍ନାଲୋଙ୍‌ ଡୁଙ୍‍ଲନ୍‍ଏଜିର୍ରାୟ୍‍ । 5 ଆରି କିନାନିଅ, ଇତିୟ, ଇମୋରିଅନ୍‌, ଇଦିଅ ଡ ଜିବୁସିୟମରଞ୍ଜି ଆଡେସା ଆମ୍ୱେଞ୍ଜିଆଡଙ୍‌ ତନିୟନ୍‌ ଆସନ୍‌ ପ୍ରବୁନ୍‌ ପୁର୍ବା ଜୋଜୋବେଞ୍ଜି ଆମଙ୍‌ ସିବ୍‍ଡେୟ୍‍ବର୍ରନ୍‌, ତି ଆଡ଼ୁବନ୍‍ ଡ ଆଡଙ୍‍ଡାନ୍‌ ଆପ୍ରେତେନ୍ ଆଡେସା ଅଙ୍ଗା ଆଡିଡ୍‌ ଆନିନ୍‌ ଡଅଙ୍‌ବେନ୍‌ ଓରୋଙ୍‍ତବେନ୍‍, ତି ଆଡିଡ୍‌ ଆମ୍ୱେନ୍‌ କେନ୍‍ ଆଙ୍ଗାୟ୍‌ କେନ୍‍ ଆସେବା କାବ୍ବାଡ଼ାନ୍‌ ଏଲୁମ୍‌ତେ । 6 ବପାଲି ଜାୟ୍‌ କମିରନ୍‌ ଏର୍‌ମନାୟନ୍‌ ଆ ରୁଟି ଏଜୋମ୍‌ତେ ଆରି ସାତ ଡିନ୍ନାଲୋଙ୍‌ ପ୍ରବୁନ୍‌ ଆସନ୍‌ ଡିଞ୍‌ଲେ ଜୋମ୍‌ଲେ ସର୍ଡାନାବା । 7 ଆରି ତି ଆପାଲି ଜାୟ୍‌ କମିରନ୍‌ ଏର୍‌ମନାୟନ୍‌ ଆ ରୁଟି ଜନୋମନ୍‌ ଡେତେ ଆରି ଅମଙ୍‍ବାବେନ୍‍ କମିରନ୍‌ ଆମାୟ୍‌ମାୟନ୍‌ ଆ ରୁଟି ଅଃଗିୟ୍‌ତାଏ, ଆରି ସମ୍ପରା ଡେସାବେନ୍‌ କମିରନ୍‌ ଆମନାୟ୍‌ ଗିୟ୍‌ତାଡଙେତଡ୍‌ । 8 ଆରି ତି ଆଡିନ୍ନା ଡାଙ୍ଗାଡ଼ାଅନ୍‌ବେଞ୍ଜିଆଡଙ୍‌ ବର୍ବାଜି, ମିସରନ୍‌ ସିଲଡ୍‌ ଇନ୍‌ଲେନ୍‌ ଆଡ୍ରୁଙ୍‌ଲନାଞନ୍‌ ଆଡିଡ୍‌ ପ୍ରବୁନ୍‌ ଇନ୍‌ଲେଞ୍ଜି ଆସନ୍‌ ଇନି ଇନିଜି ଆଲନୁମ୍‌ ଲୁମେନ୍‍, ତିଅଡ଼୍‌କୋନ୍‌ ଆ ମନନ୍ନେ ଆସନ୍‌ କେନ୍‌ଆତେ ଡେତେ । 9 ଆରି ପ୍ରବୁନ୍‌ ଆ ବନାଁୟ୍‌ବର୍‌ ଏଙ୍ଗାଲେ ମୁକାଲୋଙ୍‍ବେନ୍‍ ଡକୋତନେ, ତିଆସନ୍‌ କେନ୍‌ଆତେ ଅରମ୍ମଡନ୍‌ ଅନ୍ତମ୍‌ ଅସିଲୋଙ୍‌ବେନ୍‌ ଡ ମନନ୍ନେନ୍‌ ଆରମ୍ମଡ୍‌ ଅନ୍ତମ୍‌ ବାର୍ମଡନ୍‌ ଆଗନିୟ୍‌ଗିୟ୍‌ଲୋଙ୍‌ ଡକୋତନେ; ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ଆ ବୋର୍ସା ରନପ୍ତିସିନ୍‌ ବାତ୍ତେ ମିସରନ୍‌ ସିଲଡ୍‌ ଡଅଙ୍‌ବେନ୍‌ ଅମ୍‌ଡୁଙ୍‌ଲେ ଓରୋଙ୍‌ଲବେନ୍‌ । 10 ତିଆସନ୍‍ ଡିଲେବର୍ସେଙ୍‌ କେନ୍‌ ଅନଗଡ୍‌ ମାନ୍ନେବା । 11 ପ୍ରବୁନ୍‌ ଆମ୍ୱେନ୍‌ ଡ ପୁର୍ବା ଜୋଜୋବେଞ୍ଜି ଆମଙ୍‍ ଅଙ୍ଗା ଆ ସିବ୍‍ଡେୟ୍‍ବର୍ରନ୍‌, ତିଅନ୍ତମ୍‌ ଅଙ୍ଗାଆଡିଡ୍‌ କିଣାନିଅମରଞ୍ଜି ଆଡେସାଲୋଙ୍‌ ଅମ୍‌ଗନ୍‌ଡାଲେ ତିଆତେ ଆମ୍ବେଞ୍ଜିଆଡଙ୍‌ ତିୟ୍‌ତବେନ୍‍, 12 ତିଆଡିଡ୍‌ ଆମ୍ୱେନ୍‌ ଆପର୍ତମ୍ମୁକୋଡ୍‌ ଅଡ଼୍‌କୋନ୍‌ ଆଅନ୍‌ ଡ ଜନ୍ତୁନ୍‌ ସିଲଡ୍‌ ଆପର୍ତମ୍ମୁକୋଡ୍‌ ଆଅନ୍‌ମେଡ୍‌ ପ୍ରବୁନ୍‌ ଆସନ୍‌ ଆଙ୍‌ସାବା; ଓବ୍ବାନ୍‌ଆତେ ଅଡ଼୍‌କୋନ୍‌ ପ୍ରବୁନ୍‌ଆତେ ଡେତେ । 13 ଆରି ଆମ୍ୱେନ୍‌ ଅଡ଼୍‌କୋନ୍‌ ଆଅନ୍‌ମେନନ୍‌ତିୟ୍‌ଲେ ଆପର୍ତମ୍ମୁନ୍‌ ଆକରୋତେନ୍‌ ଆ ଗୋଡୋଁୟ୍‌ ଉର୍ବା; ଏଃନୁର୍‌ଲଡେନ୍‌, ଆସଙ୍କାନ୍‌ ଅଲ୍‌ଡୋବ୍‌ବା; ବନ୍‌ଡ ଡାଙ୍ଗାଡ଼ାଅନ୍‌ବେଞ୍ଜି ସିଲଡ୍‌ ମନ୍‌ରାନ୍‌ ଆପର୍ତମ୍ମୁକୋଡ୍‌ ଅଡ଼୍‌କୋନ୍‌ଆଡଙ୍‌ ଅନୁରନ୍‌ ଡେତେ । 14 ଆରି ପୁର୍ବାଃତେ ଆଡିଡ୍‌ ଡାଙ୍ଗଡ଼ାଅନ୍‍ବେନ୍‍ ଏବରେଣ୍ଡେନ୍‌, କେନ୍‌ଆତେ ଇନି, ଏତ୍ତେଲ୍‌ଡେନ୍‌ ଆମ୍ୱେନ୍‌ ଆନିନ୍‌ଆଡଙ୍‌ ଏବର୍ତେ, ଅଙ୍ଗାଆଡିଡ୍‌ ପ୍ରବୁନ୍‌ ଆ ଡେନ୍ନାନ୍‌ ଆବୋର୍ସା ବାତ୍ତେ ଇନ୍‌ଲେଞ୍ଜିଆଡଙ୍‌ କମ୍ୱାରିସିଙନ୍‌ ଅନ୍ତମ୍‌ ମିସର୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲଙ୍‌ଲନ୍‌, 15 ତିଆଡିଡ୍‌ ପାରୋନ୍‍ ଇନ୍‍ଲେଞ୍ଜିଆଡଙ୍‌ ଅନୁମ୍‌ରେଙନ୍‌ ଆସନ୍‌ ଆ ଉଗ୍ଗରନ୍‌ ରବ୍‌ଡୋଏନ୍‌, ପ୍ରବୁନ୍‌ ମିସର୍‌ ଡେସାଲୋଙ୍‌ ଡକୋନ୍‌ ଆମନ୍‌ରା ଡ ଜନ୍ତୁଜି ଅଡ଼୍‌କୋନ୍‌ ଆପର୍ତମ୍ମୁକୋଡ୍‌ ଆଅନଞ୍ଜିଆଡଙ୍‌ ରବ୍ବୁଏନ୍‌; ତିଆସନ୍‌ ଞେନ୍‌ ଆପର୍ତମ୍ମୁକୋଡ୍‌ ଅନ୍‌ଞେଞ୍ଜିଆଡଙ୍‌ ପ୍ରବୁନ୍‌ ଆସନ୍‌ ଏଅମଙ୍‌ତାୟ୍‌; ବନ୍‌ଡ ଆପର୍ତମ୍ମୁକୋଡ୍‌ ଡାଙ୍ଗାଡ଼ାଅନ୍‌ଲେନ୍‌ ଅଡ଼୍‌କୋଞ୍ଜିଆଡଙ୍‌ ଏଇର୍ତାୟ୍‌ । 16 କେନ୍‌ଆତେ ଅରମ୍ମଡନ୍‌ ଅନ୍ତମ୍‌ ଅସିଲୋଙ୍‌ବେନ୍‌ ଡ ରନୁରୁନ୍‌ ଆତରମ୍‌ତମ୍‌ ଅନ୍ତମ୍‌ ଇଡାଡ଼ାଲୋଙ୍‌ବେନ୍‌ ଡକୋବା; ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ଆ ରନପ୍ତି ଅସିନ୍‌ ବାତ୍ତେ ଇନ୍‌ଲେଞ୍ଜିଆଡଙ୍‌ ମିସର୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲେ ଓରୋଙ୍‌ଲଲେନ୍‌ ।

17 ପାରୋନ୍‍ ମନ୍‌ରାଞ୍ଜିଆଡଙ୍‌ ଆରୁମ୍‌ରେଙେନ୍‌ ସିଲଡ୍‌, ପାଲେସ୍ଟିୟମରଞ୍ଜି ଆଡେସା ଆଜନିର୍‌ ତଙର୍‌ ତୁୟାଏନ୍‌ ଜନଙ୍‌ଡେନ୍‌ ଇସ୍ୱରନ୍‌ ତି ଆତଙର୍‌ଗଡ୍‌ ଆନିଞ୍ଜିଆଡଙ୍‌ ଅଘନବ୍‌ତଙିୟ୍‌ଲୋ; ଇନିଆସନ୍‌ଗାମେଣ୍ତେନ୍‌ ଇସ୍ୱରନ୍‌ ବରର୍ନେ, ଅଲ୍‌ଜୁଜ୍ଜେନ୍‌ ଗିୟ୍‌ଲେ ମନ୍‌ରାଞ୍ଜି ତିକ୍କି ଆବ୍‌ୟର୍‌ବୁଡ୍ଡିଲନ୍‌ ମିସର୍‌ ଡେସାନ୍‌ ସିଲଡ୍‌ ୟର୍ତନାଞ୍‌ଜିଡେତେ । 18 ତିଆସନ୍‌ ଇସ୍ୱରନ୍‌ ଆନିଞ୍ଜିଆଡଙ୍‌ ଲୁଲୁ ସମେଁୟ୍‌ଣ୍ଡ୍ରାନ୍‌ ଆରିଙ୍‌ରିଙ୍‌ ଆସର୍‌ ପଡ଼େଡ୍‌ପାଡ଼େଡ୍‌ ଆତଙର୍‌ଗଡ୍‌ ଅବ୍‌ତଙିୟେଞ୍ଜି ଆରି ଇସ୍ରାଏଲନ୍‌ ଆଅଞ୍ଜି ଅବ୍‌ଜାଡାଲନ୍‌ ମିସର୍‌ ଡେସାନ୍‌ ସିଲଡ୍‌ ଜିରେଞ୍ଜି । 19 ଆରି ମୋସାନ୍‍ ଜୋସେପନ୍‍ ଆଜାଙ୍‍ ପାଙ୍‌ଡମ୍‌ଲନ୍‌ ଜିରେନ୍‌; ଇନିଆସନ୍‌ଗାମେଣ୍ତେନ୍‌ ଆନିନ୍‌ ଇସ୍ରାଏଲନ୍‌ ଆଅଞ୍ଜିଆଡଙ୍‌ ଅବ୍‌ପର୍ମାଡ଼ାଲେ ବର୍ନେ, ଇସ୍ୱରନ୍‌ ଡଅଙ୍‌ବେନ୍‌ ତୁର୍ଡାତବେନ୍‌; ତିଆଡିଡ୍‌ ଆମ୍ୱେଞ୍ଜି କେନ୍‌ ଆଡ୍ରକୋନେ ସିଲଡ୍‌ ଅଜାଙ୍‌ଞେନ୍‌ ପାଙ୍‌ଡମ୍‌ଲନ୍‌ ଜିର୍ବା । 20 ସିଲତ୍ତେ ଆନିଞ୍ଜି ସୁକ୍କୋତନ୍‌ ସିଲଡ୍‌ ତଙିୟ୍‌ଲନ୍‍ ଆରିଙ୍‌ରିଙ୍‌ ଅନେଙ୍‌ ତମ୍ବୁସିଙ୍‌ ତୁବ୍‌ଲେ ଡକୋଲଞ୍ଜି । 21 ଆନିଞ୍ଜି ଏଙ୍ଗାଲେ ତମ୍ୱାନ୍‍ ଡ ତଗଲନ୍‍ ତଙିଲନ୍‍ ରପ୍ତିତଜି, ତିଆସନ୍‍ ପ୍ରବୁନ୍‌ ତମ୍ୱାନ୍‍ ତଙରନ୍‌ ଆନବ୍‌ତୁୟ୍‌ ଆସନ୍‌ ମେଗ ସୋଣ୍ତାଙନ୍‌ ଆରି ତଗଲନ୍‌ ଅନବ୍‌ସାଆରନ୍‌ ଆସନ୍‌ ତଗୋନ୍‌ ଆ ସୋଣ୍ତାଙ୍‌ଲୋଙ୍‌ ଡକୋଲନ୍‌ ଆମ୍ମୁଙ୍‌ଲନ୍‌ ଜିରେନ୍‌; 22 ଆନିନ୍‌ ମନ୍‌ରାଞ୍ଜି ଆମୁକ୍କାଲୋଙ୍‍ ସିଲଡ୍‌ ମେଗ ସୋଣ୍ତାଙନ୍‌ ଡ ତଗଲନ୍‌ ତଗୋ ସୋଣ୍ତାଙନ୍‌ ଅଃଡେଲୋ ।