1 ତିସିଲଡ୍‍ ଇସ୍ରାଏଲନ୍‌ ଆଅଞ୍ଜି ଅଡ଼୍‌କୋନ୍‌ ମଣ୍ଡଡ଼ି ସିନ୍‌ ଆରିଙ୍‌ରିଙ୍‌ ପଡ଼ିଆନ୍‌ ସିଲଡ୍‌ ତଙିୟ୍‌ଲନ୍‍ ପ୍ରବୁନ୍‌ ଆବନାଁୟ୍‌ବର୍‌ ଅନ୍ତମ୍‌ ଆଡରକୋନେଲୋଙଞ୍ଜି ବୁଲେଲେ ରପିଦିମ୍‍ଲୋଙ୍‍ ତୁପସିଙନ୍‌ ତୁବେଞ୍ଜି; ବନ୍‌ଡ ତି ଆଡ୍ରକୋନେଲୋଙ୍‌ ମନ୍‌ରାଞ୍ଜି ଆ ଗାଡାନେନ୍‍ ଆସନ୍‌ ଡାଆନ୍‌ ଅଡ୍‍କୋଲୋ । 2 ତିଆସନ୍‍ଲନ୍‍ ମନ୍‌ରାଜି ମସାନ୍‍ ଜାଲଙ୍‌ଲେ ବରେଞ୍ଜି, ଡାଆନ୍‌ ତିୟ୍‍ଲେନ୍‍, ଇନ୍‌ଲେଞ୍ଜି ଏଗାତାୟ୍‍ । "ତିସିଲଡ୍‍ ମସାନ୍‍ ବର୍ରନ୍‌ ଆମ୍ୱେଞ୍ଜି ଇନିଗାମ୍‌ଲେ ଞେନ୍‌ ଏବାଡତିଁୟ୍‍ ? ଇନିଆସନ୍‌ ପ୍ରବୁନ୍‌ ଏମାଲ୍‌ତେ ?" 3 ତିଆଡିଡ୍‌ ମନ୍‌ରାଜି ଅଡ଼େଙ୍ଗା ଡକୋଲଞ୍ଜି ତିସେଙ୍‌ ଡାଆନ୍‌ ଅଡ୍‌କୋଲନ୍‌ ଆସନ୍‌ ମନ୍‌ରାଜି ଇର୍‍ଗାଲେଞ୍ଜି କି ମସାନ୍‍ ସଙ୍ଗତାଲେ ବର୍ରେଞ୍ଜି, "ଇନିଆସନ୍‌ ଆମନ୍‌ ଇନ୍‌ଲେଞ୍ଜି,ପସିୟ୍‍ଲେଞ୍ଜି ଡ ଜନ୍ତୁଲେଞ୍ଜି ଇର୍ଗାଲନ୍‌ ବାତ୍ତେ ରନବ୍ବୁନ୍‌ ଆସନ୍‌ ପଙ୍‌ ମିସରନ୍‍ ସିଲଡ୍‌ ଓରୋଙ୍‍ଲଲେନ୍‍ ?" 4 ତିଲୋଙ୍ ମସାନ୍‍ ପ୍ରବୁନ୍‌ ଆମଙ୍‍ ପ୍ରାର୍ତନାଲନ୍‍ ବର୍ରନ୍‌, "କେନ୍‍ ଆମନ୍‍ରାଜି ଆସନ୍‌ ଞେନ୍‌ ଇନିଏଙ୍ଗାନାୟ୍‍ ? ଆନିଞ୍ଜି ଅରେଙନ୍‌ ବାତ୍ତେ ସନମନ୍ ଆସନ୍‌ ସାୟ୍‍ତଜି ।" 5 ପ୍ରବୁନ୍‌ ମସାନ୍‍ ବରେନ୍‍, "ଆମନ୍‌ ଅଙ୍ଗା ଆଡାଙ୍ଗୋ ବାତ୍ତେ ନିଡ଼ ଅଲନ୍‌ ସମେନ୍‍, ତି ଆଡାଙ୍ଗୋ ପାଙ୍‌ଲେ ଇସ୍ରାଏଲନ୍‌ ଆମ୍ମୁଙ୍‌ଗଡ୍‌ମରଞ୍ଜି ଆରି ଇସ୍ରାଏଲମରଞ୍ଜି ଆମ୍ମୁଙ୍‌ଲନ୍‌ ଜିର୍ରା । 6 ଗିୟ୍‌ବା, ଇନ୍‌ଲେନ୍‌ ଓରେବ ବରୁନ୍‌ ଅରେଙନ୍‌ ଆତୋଣ୍ଡୋ ମୁକାବାନ୍‍ ତନଙ୍‍ତାୟ୍‍; ଆମନ୍‌ ତି ଅରେଙନ୍‌ ସମେଡେନ୍‍ ଡାଆନ୍‌ ଡୁଙ୍‌ତନାୟ୍‌, ଆରି ମନ୍‌ରାଜି ତିଆତେ ଗାତଜି, ତିଡେନ୍‍ ମସାନ୍‍ ଇସ୍ରାଏଲନ୍‌ ଆମ୍ମୁଙ୍‍ଗଡ୍‌ମରଞ୍ଜି ଆମୁକ୍କାଲୋଙ୍‌ ତିଅନ୍ତମ୍‌ ଲୁମେନ୍‌ । 7 ଆରି, ତି ଆଡରକୋନେଲୋଙ୍‌ ଇସ୍ରାଏଲ୍‌ମରଞ୍ଜି ଆଗୋଡ଼େ ଆସନ୍‌ ପ୍ରବୁନ୍‌ ଇନ୍‌ଲେଞ୍ଜି ସରିନ୍‌ ଡକୋ ଅଡ଼େ ଇଜ୍ଜା କେନ୍‌ ଏନ୍ନେଲେ ବର୍ରନ୍‌ ପ୍ରବୁନ୍‌ଆଡଙ୍‌ ଏତରୋରେନ୍‌ ଆସନ୍‌ ଆନିନ୍‌ ତି ଆଡରକୋନେ ଆଞୁମ୍‌ ମଃସା ଡ ମିରିବା ଡକ୍କୋଏନ୍‌ ।"

8 ତି ଆଡିଡ୍‌ ଅମାଲେକ ଜିର୍ରେ ରପିଦିମଲୋଙ୍‍ ଇସ୍ରାଏଲ ବାତ୍ତେ ଜୁଜଲଞ୍ଜି । 9 ତି ଲୋଙ୍‍ ମସାନ୍‍ ଜିଉସୟନ୍‍ଆଡଙ୍‌ ବରେନ୍‍, "ଆମ୍ୱେନ୍‌ ଇନ୍‌ଲେନ୍‌ ଆସନ୍‌ ମନ୍‍ଡ୍ରାନ୍‍ ବାସେଲେ ଅମାଲେକମରଞ୍ଜି ବାତ୍ତେ ଜୁଜନେନ୍‍ ଆସନ୍‌ ଜିର୍ରବା; ବିଅଡେଡ୍‍ ଅସିଙ୍‌ଞେନ୍‍ ଇସ୍ୱରନ୍‌ ଡାଙ୍ଗୋପାଙ୍‍ଲେ ବରୁନ୍‌ ଆଗନେଡ଼େଙନ୍‌ ତନଙ୍‍ତାୟ୍‍ ।" 10 ତିଲୋଙ୍‌ ମସାନ୍‍ ଆବର୍ନେନ୍‍ ଜିଉସୟନ୍‍ ଅମାଲେକ ବାତ୍ତେ ଜୁଜେଲନ୍‍, ଆରି ମସାନ୍‍ ଡ ଆରୋଣନ୍‌ ଡ ଉରନ୍‌ ବରୁନ୍‌ ଆଗନେଡ଼େଙ୍‌ ଡାଜେଞ୍ଜି । 11 ଆରି, ମସାନ୍‍ ଆତରେକ୍କେ ସିଲନ୍‌ ଆଡିଡ୍‌ ଇସ୍ରାଏଲଞ୍ଜି ଜିନୟେଞ୍ଜି ଆରି ଆନିନ୍‌ ଆସିନ୍‌ ଜାୟ୍‍ତାନ୍‍ ଆରମ୍ମେନ୍‌ ଆଡିଡ୍‌ ଅମାଲେକଞ୍ଜି ଜିନୟେଞ୍ଜି । 12 ବନ୍‌ଡ ମସାନ୍ ଲଗିନ୍‍ସିଏନ୍‍; ତିଆସନ୍‌ ଆନିଞ୍ଜି ଅରେଙନ୍‌ ପାଙ୍‌ଲେ ଆସିନ୍‌ ଆ ଜାୟ୍‍ତାନ୍‍ ଡକ୍କୋଏଞ୍ଜି, ମସାନ୍‍ ତେତ୍ତେ ତଙ୍କୁମେନ୍‌, ଆରି ଆରୋଣନ୍‌ ଡ ଉରନ୍‍ ଅବୟ୍‌ନେ କେନ୍‌ଗଡ୍‌ ଆରି ଅବୟ୍‌ନେ ଅତ୍ତେଗଡ୍‌ ଆସିନ୍‌ ତେକ୍କେଲେ ଞମେଞ୍ଜି; ତିସିଲଡ୍‌ ବିବ୍‌ୟୋଙ୍‌ ବେଡ଼ାନ୍‌ ଜାୟ୍‌ ମସାନ୍‌ ଆସିନ୍‌ ଅଃଲଡୁୟ୍‌ଲୋ । 13 ତାସନ୍‌ ଅମାଲେକଞ୍ଜି ଜିଉସୁୟଞ୍ଜି ଡ ଆମନ୍‌ରାଞ୍ଜି କଡ଼ିବନ୍‌ ବାତ୍ତେ ଅବ୍‌ନାରେଏଞ୍ଜି । 14 ତି ସିଲଡ୍‌ ପ୍ରବୁନ୍‌ ମସାନ୍‍ ବରେନ୍‍, "କେନ୍‍ ଆବର୍ନେ ଆମ୍ରନେତବନ୍‌ ଆ ବଇଲୋଙ୍‌ ଇଡ୍‌ଲେ ଡକୋବା, ଆରି, ଜିଉସୟନ୍‍ ମନଙ୍‌ ଡାଲୁଡାଲେ ତିଆତେ ପଡ଼େନାବା, ଇନ୍‌ଲେନ୍‌ ରୁଆଙନ୍‌ ଆଜାୟ୍‍ତା ଅମାଲେକଞ୍ଜି ଆମରନ୍ନେ ଅବ୍‌ସସବା ।" 15 ତିଆସନ୍‍ ମସାନ୍‍ ଅବୟ୍‌ ବେଦିନ୍‍ ତୁବେନ୍‍ କି ଆଞୁମନ୍‌ ଜିଓବା ନିସି ପ୍ରବୁନ୍‌ ପତକାଲେ ଡକୋଏନ୍‌ । 16 ଆରି, ଆନିନ୍‌ "ପ୍ରବୁନ୍‌ ଆ ପତକାଲୋଙ୍‌ ଆସିନ୍‌ ଡକ୍କୋଲେ ବର୍ରନ୍‌, ଅଲ୍‌ସଙ୍କୋଡ୍‌ସଙ୍କୁଡ୍‌ ଅମାଲେକ ସରିନ୍‌ ପ୍ରବୁନ୍‍ ଆଲ୍‌ଜୁଜ୍ଜେଡେତେ ।"