1 ମିସର୍‌ ଡେସାଲୋଙ୍‌ ପ୍ରବୁନ୍‌ ମୋସାନ୍‌ ଡ ଆରୋଣନ୍‌ଆଡଙ୍‌ ବରେନ୍‌, 2 କେନ୍‍ ଆଙ୍ଗାୟ୍‌ ଆମ୍ବେନ୍‌ ଆସନ୍‌ ସୋଡ଼ା ଆଙ୍ଗାୟ୍‌ ଡେତେ ଆରି ବର୍ସେଙନ୍‌ ଆପର୍ତମ୍ମୁ ଆଙ୍ଗାୟ୍‌ ଡେତେ । 3 ଆମ୍ୱେଞ୍ଜି ସମ୍ପରା ଇସ୍ରାଏଲନ୍‌ ଆ ମଣ୍ଡଡ଼ି କେନ୍‍ ଆବର୍ନେ ବର୍ବାଜି, କେନ୍‌ ଆଙ୍ଗାୟ୍‌ ଦସ ଡିନ୍ନାଲୋଙ୍‌ ଡିଲେ ମନ୍‌ରାନ୍‌ ଆପ୍ପେୟ୍‌ସିଙନ୍‌ ଅନ୍ତମ୍‌ ଡିଲେ କୁତ୍ତମା ଆସନ୍‌ ତଙ୍‌ବୟ୍‌ ତଙ୍‌ବୟ୍‌ ଆଅନ୍‌ମେନ୍‌ ପାଙ୍‌ବା । 4 ଆରି ଅବୟ୍‌ ଆଅନ୍‍ମେନନ୍‌ ଆପନାଙ୍‌ ଆସନ୍‌ ଅନ୍ନିଙ୍‌ ଆକୁତ୍ତମା ଅଃଡେଲଜିଡେନ୍‌, ତିଡେନ୍‌ ଆନିନ୍‌ ଡ ଆତୟ୍‌ଲିସିଙନ୍‍, ଆମନ୍‍ରାଜି ଆଡନିଡି ଅନ୍ତମ୍‌ ଅବୟ୍‌ ଆଅନ୍‌ମେନନ୍‌ ପାଙ୍‌ତଜି; ଜୋମ୍‌ଲେ ଏରପ୍ତିତେନ୍‌ ଅନ୍ତମ୍‌ ଆମ୍ୱେଞ୍ଜି ଡିଲେ ମନ୍‌ରାନ୍‌ ଆସନ୍‌ ପାଙ୍‌ବା । 5 ଆମ୍ୱେଞ୍ଜି ଗୋସ୍ସାମେନନ୍‌ ଅଡ଼େ ଗୋସାମେଡନ୍‌ ସିଲଡ୍‌ ଆଅନ୍‌ମେଡନ୍‌ ପାଙ୍‌ବା; ତିଆତେ ଏର୍ଡୋସା, ବବର୍ସେଙ୍‌ ଡ ଓବ୍ବାମେଡ୍‌ ଡେତେ; 6 ତି ଆଙ୍ଗାୟ୍‌ ସଉଦ ଡିନ୍ନା ଜାୟ୍‌ ଆନିନ୍‍ଆଡଙ୍‍ ଅମସିଙନ୍‌ ଇଙଡ୍‌ଲେ ଡକୋବା; ଇସ୍ରାଏଲ ମଣ୍ଡଡ଼ିନ୍‌ ଅଡ଼୍‌କୋନ୍ ଆରନୁକୁ ସାଲ୍ଲୁମ୍‍ଓଲେନ୍‍ ତି ଆ ଅନ୍‌ମେନନ୍‌ ରବୁତଜି । 7 ଆରି ମନ୍‌ରାଞ୍ଜି ଆ ମିଞାମ୍‍ ଅସୋୟ୍ ପାଙ୍‍ଲେ ଅଙ୍ଗା ଅଙ୍ଗା ଆସିଙ୍‌ଲୋଙ୍‌ ମେଣ୍ତାଜେଲନ୍‌ ଜୋମ୍‌ତଜି, ତିଜି ଆସିଙ୍‌ ଆଗରନ୍ନେ ଆଡାରାନ୍ନି ବାଗୁ ଆକୁନେ ଆତୋଣ୍ଡୋ ଜବା । 8 ଆରି ତି ଆତଗଲ୍‍ ଆ ଜେଲୁନ୍‌ ଜୋମେତଜି; ତଗୋଲୋଙନ୍‌ ବାଲ୍‌ଲେ କମିରନ୍‌ ଏର୍‌ମନାୟନ୍‌ ଆ ରୁଟି ଡ ଅସାଙ୍‌ ଅବନ୍‍ ମାୟ୍‌ଲେ ତିଆତେ ଜୋମେତଜି । 9 ଆମ୍ୱେଞ୍ଜି ତି ଆଜେଲୁ ଏର୍‌ଡନିଞନ୍‌ ଅଡ଼େ ଡାଆନ୍‌ ବାତ୍ତେ ଡିୟଁଲେ ଏଜୋମ୍‌ଡଙ୍‌, ବନ୍‌ଡ ତଗୋଲୋଙନ୍‌ ଆବବନ୍‌ ଡ ଆବୁଲୁନ୍‌ ଆରି ଆ ଡଅଙନ୍ ଅମ୍ପରା ବାଲ୍‌ଲେ ଜୋମ୍‌ବା । 10 ଆରି ତିଆତେ ଡୋତାନ୍‍ ଜାୟ୍‌ ଇନ୍ନିଙ୍‌ ଏଡକ୍କୋଡଙ୍‌, ଅସମୟ୍‌ ଡୋତାନ୍‍ ଜାୟ୍‌ ଅସୋୟ୍‌ ରଏଏନ୍‌ଡେନ୍‌, ତିଆତେ ତଗୋଲୋଙନ୍‌ ସୟ୍‌ଲେ ଅବ୍‌କୋମାବ୍‌ବା । 11 କେନ୍‍ ଅନ୍ତମ୍‌ ଆମ୍ୱେଞ୍ଜି ତିଆତେ ଏଜୋମ୍‌ତେ, ଆଗରାମ୍‌ଗାମ୍‌ ରେଡ୍ଡୁବ୍‌ଲନ୍‌ ପାଣ୍ତୋୟନ୍‌ ରଲନ୍‌ ଡାଙ୍ଗୋନ୍‌ ଞମ୍‍ଲେ ଲଜିର୍‌ ତିଆତେ ଜୋମ୍‌ବା; କେନ୍‌ଆତେ ପ୍ରବୁନ୍‌ ଅନେଲାୟ୍‍ପୁର୍‍ । 12 ଇନିଆସନ୍‌ଗାମେଣ୍ତେନ୍‌ ଲଙେ ଆତଗଲ୍‍ ଞେନ୍‌ ମିସର୍‌ ଡେସାନ୍‌ ଆମନ୍‌ରା ଡ ଜନ୍ତୁନ୍‌ ଆ ପର୍ତମ୍ମୁକୋଡ୍‌ଆଡଙ୍‌ ଅଡ଼୍‌କୋନ୍‌ ରବୁତାୟ୍‌; ଆରି ମିସରନ୍‌ ଅଡ଼୍‌କୋନ୍‌ ଆସନୁମ୍‍ ଅଃପନ୍‌ସୁଆତିଲେ ପବ୍‌ରଡ୍‌ତାୟ୍‌; ଞେନ୍‌ ସଦାପ୍ରବୁ । 13 ତିଆସନ୍‍ ଆମ୍ୱେଞ୍ଜି ଅଙ୍ଗା ଅଙ୍ଗା ଆସିଙ୍‌ଲୋଙ୍‌ ଏଡକୋତନ୍‌, ତିଜି ଆସିଙ୍‌ଲୋଙ୍‌ ଅନବ୍‌ମଡନ୍‌ ଅନ୍ତମ୍‌ ମିଞାମନ୍‌ ଡକୋତନ୍‌; ଆରି ମିସର୍‌ ଡେସାନ୍‌ଆଡଙ୍‌ ଆ ପବ୍‌ରଡ୍‌ତାଞନ୍‌ ଆଡିଡ୍‌ ତି ଆମିଞାମ୍‌ ଗିୟ୍‌ଲାୟ୍‌ଡେନ୍‌, ଆମ୍ୱେଞ୍ଜିଆଡଙ୍‌ ସାମୁଙ୍‌ଲେ ଜିର୍ତେ, ରନବ୍ବୁମରନ୍‌ ଆମ୍ୱେଞ୍ଜିଆଡଙ୍‌ ଅଃସୁଙେବେନ୍‌ । 14 ଆରି ତି ଆଡିନ୍ନା ମନନ୍ନେବେନ୍‌ ଡେତେ, ଆରି ଆମ୍ବେଞ୍ଜି ତି ଆଡିନ୍ନା ପ୍ରବୁନ୍‌ ଆ ପୁର୍‌ପୁର୍‌ ଅନ୍ତମ୍‌ ମାନ୍ନେବା; ବକନୋଡ୍‌ ସିଲଡ୍‌ ବକନୋଡ୍‌ ଜାୟ୍‌ ଅଃନ୍ନଞିଡେନ୍‌ ଆନଗଡ୍‌ କେନ୍‌ ଆ ପୁର୍‌ପୁର୍‌ ମାନ୍ନେବା ।

15 ଆମ୍ୱେଞ୍ଜି ସାତଡିନା ଜାୟ୍‌ କମିରନ୍‌ ଏର୍‌ମନାୟନ୍‌ ଆରୁଟି ଜୋମ୍‌ବା; ଆପର୍ତମ୍ମୁ ଡିନାନ୍‌ ରମ୍ମଙ୍‌ ରମ୍ମଙ୍‌ ଆସିଙ୍‌ ସିଲଡ୍‌ କମିରନ୍‌ ସବ୍‌ଙାୟ୍‌ବା, ଇନିଆସନ୍‌ଗାମେଣ୍ତେନ୍‌ ଅଙ୍ଗା ଆମନ୍‌ରା ଆପର୍ତମ୍ମୁ ଡିନାନ୍‌ ସିଲଡ୍‌ ସାତଡିନାନ୍‌ ଜାୟ୍‌ କମିରନ୍‌ ଆମାୟ୍‌ମାୟନ୍‌ ଆରୁଟି ଜୋମ୍‌ତେ, ତି ଆପରାନ୍ନା ଇସ୍ରାଏଲନ୍‌ ଆମଙ୍‌ସିଲଡ୍‌ ସନବ୍‌ଙାଜନ୍‌ ଡେତେ । 16 ଆମ୍ୱେଞ୍ଜି ଆସନ୍‌ ଆପର୍ତମ୍ମୁ ଡିନା ମଡ଼ିର୍‌ ସବାନ୍‌ ଡେତେ, ଆରି ସାତ ଡିନାଲୋଙ୍‌ ନିୟ୍‌ ଆମ୍ୱେଞ୍ଜି ଆସନ୍‌ ମଡ଼ିର୍‌ ସବାନ୍‌ ଡେତେ; ଆରି ତି ବାଗୁ ଡିନାଲୋଙ୍‌ ନିୟ୍‌ ଅଡ଼୍‌କୋ ଜନ୍ତୁଞ୍ଜି ଆଜନୋମ୍‌ ଆସନ୍‌ ଅମ୍‌ରେଙ୍‌ଲେ ଆରି ଇନ୍ନିଙ୍‌ ଆକାବ୍ବାଡ଼ା ଲନୁମନ୍‌ ଅଃଡେଏ, ତିତୁମ୍‌ ଆକାବ୍ବାଡ଼ା ଆମ୍ବେଞ୍ଜି ଲୁମ୍‌ଲେ ଏରପ୍ତିତେ । 17 କେନ୍‌ ଅନ୍ତମ୍‌ ଆମ୍ୱେନ୍‌ କମିରନ୍‌ ଏର୍‌ମନାୟନ୍‌ ଆରୁଟି ଅବ୍‌ଡୁର୍‌ ଏମାନ୍ନେତେ, ଇନିଆସନ୍‌ଗାମେଣ୍ତେନ୍‌ ତି ଆଡିନ୍ନାଲୋଙ୍‌ ମା ଞେନ୍‌ ସିପାୟ୍‌ବେଞ୍ଜିଆଡଙ୍‌ ମିସର୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲେ ଏଓରୋଙ୍‌ତାୟ୍‌; ତିଆସନ୍‌ ଆମ୍ୱେଞ୍ଜି ବକନୋଡ୍‌ ସିଲଡ୍‌ ବକନୋଡ୍‌ ଜାୟ୍‌ ଆଏଡ଼ର୍‌ କେନ୍‌ ଆଡିନା ମାନ୍ନେବା । 18 ଆମ୍ୱେଞ୍ଜି ଆପର୍ତମ୍ମୁ ଆଙ୍ଗାୟ୍‌ ବାଗୁପାଲିନ୍‌ ଆସାଲ୍ଲୁମ୍ ଆଡିଡ୍‌ ସିଲଡ୍‌ ବକୁଡ଼ି ବଡିନ୍ନା ଆସାଲ୍ଲୁମ୍‌ ଜାୟ୍‌ କମିରନ୍‌ ଏର୍‌ମନାୟନ୍‌ ଆରୁଟି ଜୋମ୍‌ବା । 19 ବପାଲି ଜାୟ୍‌ ଅସିଙ୍‌ଲୋଙ୍‌ବେନ୍‌ ବତୋପାଜା କମିରନ୍‌ ଏଡକ୍କୋଡଙ୍‌, ଇନିଆସନ୍‌ଗାମେଣ୍ତେନ୍‌ ବଡେସାବାୟ୍‌ ଅଡ଼େ ଡେସାବାୟ୍‌ ଅଙ୍ଗା ଆମନ୍‌ରା ତିପାଲିଲୋଙ୍‌ କମିରନ୍‌ ଆମାୟ୍‌ମାୟନ୍‌ ଆଜନବ୍‌ ଜୋମ୍‌ନ୍ତେ, ତି ଆପରାନ୍ନା ଇସ୍ରାଏଲନ୍‌ ଆମଣ୍ତଡ଼ି ସିଲଡ୍‌ ଡନେଡନ୍‌ ଡେତେ । 20 କମିରନ୍‌ ଆମାୟ୍‌ମାୟନ୍‌ ଆଜନବ୍‌ ଇନ୍ନିଙ୍‌ ଏଜୋମ୍‌ଡଙ୍‌, ରମ୍ମଙ୍‌ ରମ୍ମଙ୍‌ ଅଡ଼୍‌କୋ ଡ୍ରକୋନେଲୋଙ୍‌ବେନ୍‌ କମିରନ୍‌ ଏର୍‌ମନାୟନ୍‌ ଆ ରୁଟି ଏଜୋମ୍‌ତେ ।

21 ତିଆଡିଡ୍‌ ଇସ୍ରାଏଲନ୍‌ ଅଡ଼୍‌କୋନ୍‌ ପାପୁର୍‌ମରଞ୍ଜିଆଡଙ୍‌ ମସାନ୍‌ ଓଡ୍ଡେଲେ ବରେନ୍‌, ଆମ୍ୱେଞ୍ଜି ଆସନ୍‌ ରମ୍ମଙ୍‌ ରମ୍ମଙ୍‌ ଅସିଙ୍‌ମରନ୍‌ ତଙ୍‌ବୟ୍‌ ତଙ୍‌ବୟ୍‌ ଆଅନ୍‌ମେନ୍‌ ପାଙ୍‌ଲେ ରବୁଲେ ଅନମଙ୍‌ ଅନେଲାୟ୍‌ପୁର୍‌ ଅବ୍‌ଡୁର୍‌ ଲୁମ୍‌ବା । 22 ଆରି ବବିଡ୍ଡା ଏସୋବନ୍‌ ପାଙ୍‌ଲେ ସିମ୍ମାଲୋଙନ୍‌ ଆମିଞାମ୍‌ଲୋଙ୍‌ ତବୁବ୍‌ଲେ ଗରର୍ନେ ଡାରନିନ୍‌ ଡ ବାଗୁ କୁନେନ୍‌ ଆତୋଣ୍ତୋ ସିମ୍ମାଲୋଙନ୍‌ ଆମିଞାମ୍‌ ଜବା; ଆରି ଅନ୍‌ରଙ୍‌ସାଆରେନ୍‌ ଜାୟ୍‌ ମନ୍‌ରାବେଞ୍ଜି ଆନ୍ନିଙ୍‌ ଅସିଙନ୍‌ ଆଡୁଆରାଗଡ୍‌ ଡାଣ୍ତନ୍‌ ଏଜିର୍‌ଡଙ୍‌ । 23 ଇନିଆସନ୍‌ଗାମେଣ୍ତେନ୍‌ ମିସ୍ରିୟଞ୍ଜିଆଡଙ୍‌ ଆର୍‌ନବୁ ଆସନ୍‌ ଆମଙ୍‌ଗଡଞ୍ଜି ଜିର୍ତେ; ସିଲତ୍ତେ ଗରର୍ନେ ଡାରନିନ୍‌ ଡ ବାଗୁ କୁନେନ୍‌ ଆତୋଣ୍ତୋ ଆଜଜ୍ଜଡନ୍‌ ମିଞାମନ୍‌ ଗିୟ୍‌ଲେ, ପ୍ରବୁନ୍‌ ତି ଆଡୁଆରା ଅମ୍‌ରେଙ୍‌ଲେ ସାମୁଙ୍‌ଲେ ଜିର୍ତେ, ଅସିଙ୍‌ବେନ୍‌ ଗନ୍‌ଲେ ରନବୁନ୍‌ ଆସନ୍‌ ରବୁମରନ୍‌ଆଡଙ୍‌ ଅଃତିୟେ । 24 ଆରି ଆମ୍ୱେଞ୍ଜି ଆରି ଅଅନ୍‌ବେଞ୍ଜି ଆ ଅନ୍‌ଞ୍ଜି ନିୟ୍‌ ବନାଁୟ୍‌ବରନ୍‌ ଅନ୍ତମ୍‌ କେନ୍‌ ଅନଗଡ୍‌ ମାନ୍ନେବା । 25 ଆରି ପ୍ରବୁନ୍‌ ଆ ସନିବ୍‌ଡୟ୍‌ବରନ୍‌ ଅନ୍ତମ୍‌; ଆମ୍ୱେଞ୍ଜିଆଡଙ୍‌ ଅଙ୍ଗା ଆଡେସା ତିୟ୍‌ତବେନ୍‌, ତେତ୍ତେ ଏଜିର୍ତେନ୍‌ ଆଡିଡ୍‌ କେନ୍‌ ଅନଗଡ୍‌ ମନ୍ନେବା । 26 ଆରି ଆମ୍ୱେଞ୍ଜି କେନ୍‌ ଏସ୍ରେବାତେନ୍‌ ଆଗ୍ରାମ୍‌ଗାମ୍‌ ଇନି ? 27 ଅଅନ୍‌ବେଞ୍ଜି କେନ୍‌ଆତେ ବର୍ରବେଞ୍ଜିଡେନ୍‌, ଆମ୍ୱେଞ୍ଜି ଏବର୍ତନ୍‌, କେନ୍‌ଆତେ ପ୍ରବୁନ୍‌ ଆସନ୍‌ ଅନେଲାୟ୍‌ପୁର୍‌ ଅନମଙ୍‌; ଇନିଆସନ୍‌ଗାମେଣ୍ତେନ୍‌ ମିସର୍‌ବାୟ୍‌ଜିଆଡଙ୍‌ ଆର୍ରବୁଏନ୍‌ ଆଡିଡ୍‌ ଆନିନ୍‌ ମିସର୍‌ଲୋଙ୍‌ ଆଡ୍ରକୋଲଞ୍ଜି ଇସ୍ରାଏଲନ୍‌ ଆଅନ୍‌ଞ୍ଜି ଆସିଙ୍‌ ଅଡ଼୍‌କୋନ୍‌ ସାମୁଙ୍‌ଲେ ଜିର୍ରେ ଅସିଙ୍‌ଲେଞ୍ଜି ଡୋବେନ୍‌ । ତିଆଡିଡ୍‌ ମନ୍‌ରାଞ୍ଜି ବରୁମ୍‌ଲେ ଲୋମେଞ୍ଜି । 28 ସିଲତ୍ତେ ଇସ୍ରାଏଲନ୍‌ ଆଅନଞ୍ଜି ଜିର୍ରେ ତିଅନ୍ତମ୍‌ ଲୁମେଞ୍ଜି; ଆରି ଆନିଞ୍ଜି ମୋସାନ୍‌ ଡ ଆରୋଣନ୍‌ ଆଡଙ୍‌ ପ୍ରବୁନ୍‌ ଆ ବନାଁୟ୍‌ବର୍‌ ଅନ୍ତମ୍‌ କାବ୍ବାଡ଼ାଲଞ୍ଜି ।

29 ତୁଙାର୍‌ ତଗଲନ୍‌ ଆଡିଡ୍‌ ପ୍ରବୁନ୍‌ ପାରୋନ୍‌ ଆ ତନଙ୍କୁମ୍‌ କୁର୍ସି ଆପର୍ତମ୍ମୁକୋଡ୍‌ ଆଅନ୍‌ ସିଲଡ୍‌ ଆ ବନଣ୍ତିମରନ୍‌ ଆପର୍ତମ୍ମୁକୋଡ୍‌ ଆଅନ୍‌ ଜାୟ୍‌ ମିସର୍‌ ଡେସାନ୍‌ ଅଡ଼୍‌କୋନ୍‌ ଆପର୍ତମ୍ମୁକୋଡ୍‌ ଆଅଞ୍ଜିଆଡଙ୍‌ ଡ ଜନ୍ତୁନ୍‌ ଆପର୍ତମ୍ମୁକୋଡ୍‌ଆଡଙ୍‌ ରବୁଏନ୍‌ । 30 ସିଲତ୍ତେ ପାରୋନ୍‌ ଆରି ଆ କମ୍ୱାରିଞ୍ଜି ଡ ମିସ୍ରବାୟ୍‌ଜି ଅଡ଼୍‌କୋନ୍‌ ତଗଲନ୍‌ ଡୋଲନ୍‌ଞ୍ଜି; ଇନିଆସନ୍‌ଗାମେଣ୍ତେନ୍‌ ଏର୍‌ରନବ୍ବୁନ୍‌ ଅନ୍ନିଙ୍‌ ଆସିଙ୍‌ ଅଡ଼୍‌ଲେଞ୍ଜି । 31 ସିଲତ୍ତେ ତଗଲନ୍‌ ଆଡିଡ୍‌ ପାରୋନ୍‌, ମୋସାନ୍‌ ଡ ଆରୋଣନ୍‌ଆଡଙ୍‌ ଓଡ୍ଡେଲେ ବରେନ୍‌, ଆମ୍ୱେଞ୍ଜି ଡ ଇସ୍ରାଏଲନ୍‌ ଆକେଜ୍ଜା ମନ୍‌ରାଞେଞ୍ଜି ଆମଙ୍‌ ସିଲଡ୍‌ ଡୁଙ୍‌ଲନ୍‌ ଜିର୍ବା, ବର୍ନେବେନ୍‌ ଅନ୍ତମ୍‌ ପ୍ରବୁନ୍‌ ଆ ସନେବା ଆସନ୍‌ ଜିର୍ବା । 32 ଆରି ବର୍ନେବେନ୍‌ ଅନ୍ତମ୍‌ ମେଣ୍ତାନ୍‌, କିମେଡନ୍‌ ଡ ତାଙ୍‌ଲେୟନ୍‌ ଅଡ଼୍‌କୋନ୍‌ ପାଙ୍‌ଲେ ଡଅଙ୍‌ଞେନ୍‌ ଆସିର୍ବାଦଲେ ଜିର୍ବା । 33 ତିଆଡିଡ୍‌ ମିସ୍ରିୟଞ୍ଜି ମନ୍‌ରାଞ୍ଜିଆଡଙ୍‌ ଡେସାନ୍‌ ସିଲଡ୍‌ ଲଜିର୍‌ ଅନାପାୟନ୍‌ ଆସନ୍‌ କାକୁର୍ତିଲଞ୍ଜି; ଇନିଆସନ୍‌ଗାମେଣ୍ତେନ୍‌ ଆନିଞ୍ଜି ବର୍ରଞ୍ଜି, ଞେନ୍‌ ଅଡ଼୍‌କୋନ୍‌ ଆରବୁଗୋ । 34 ସିଲତ୍ତେ ଆସଡ୍‌ସଡନ୍‌ ଆ ମଇଦା କମିରନ୍‌ ଆମନାୟ୍‌ ଆମ୍ମୁଙ୍‌, ମନ୍‌ରାଜି ମଇଦାନ୍‌ ଆସରଡ୍‌ସଡ୍‌ ସିମ୍‌ ଅଡ଼୍‌କୋନ୍‌ ରମ୍ମଙ୍‌ ରମ୍ମଙ୍‌ ଆସିନ୍‌ରିଲୋଙ୍‌ ଜିରାଲେ ବୋୟ୍‌ଲେ ଜିରେଞ୍ଜି । 35 ଆରି ଇସ୍ରାଏଲନ୍‌ ଆଅଞ୍ଜି ମୋସାନ୍‌ ଆବର୍ନେ ଅନ୍ତମ୍‌ ମିସ୍ରିୟଞ୍ଜିଆଡଙ୍‌ ରୁପାନ୍‌ ଡ ସୁନ୍ନାନ୍‌ ଆରି ସିନ୍‌ରିନ୍‌ ବେଡେଞ୍ଜି । 36 ସିଲତ୍ତେ ପ୍ରବୁନ୍‌ ମିସ୍ରିୟଞ୍ଜି ଆଗନିୟ୍‌ଗିୟ୍‌ଲୋଙ୍‌ ମନ୍‌ରାଞ୍ଜିଆଡଙ୍‌ ସନାୟୁମନ୍‌ ଆଞରାଙେଞ୍ଜି ଆସନ୍‌ ଆନିଞ୍ଜି ଆନିଞ୍ଜିଆଡଙ୍‌ ଇନି ବେଡେଞ୍ଜି, ଆନିଞ୍ଜି ତିଆତେ ତିୟେଞ୍ଜି । କେନ୍‌ ଅନ୍ତମ୍‌ ଆନିଞ୍ଜି ମିସ୍ରିୟଞ୍ଜି ଆନର୍ଜେ ପାଙେଞ୍ଜି ।

37 ଇସ୍ରାଏଲନ୍‌ ଆଅଞ୍ଜି ଆ ପସିୟ୍‌ ଅମ୍‌ରେଙ୍‌ଲେ ତୁଡ୍‌ରୁ ଲକ୍ୟ ଓବ୍ବାମରନ୍‌ ତଙିୟ୍‌ଲନ୍‌ ରାମିସେସ୍‌ ସିଲଡ୍‌ ସୁକୋତ୍‌ ଜିରେଞ୍ଜି । 38 ଆରି ଆନ୍ନାମରଞ୍ଜି ଡ ଗୋଗୋୟ୍‌ ମନ୍‌ରାନ୍‌ ଡ ମଣ୍ତାମେନନ୍‌, କିମେଡଞ୍ଜି ଡ ଜନ୍ତୁଜି ଆନିଞ୍ଜି ସରିନ୍‌ ଜିରେଞ୍ଜି । 39 ସିଲତ୍ତେ ଆନିଞ୍ଜି ମିସରନ୍‌ ଡେସାନ୍‌ ସିଲଡ୍‌ ଆ ପରାଙ୍‌ଡମ୍‌ଲନାଞଞ୍ଜି ଆସଃସଡନ୍‌ ଆ ମଇଦା ବାତ୍ତେ କମିରନ୍‌ ଏର୍‌ମନାୟନ୍‌ ଆ ରୁଟି ତୁବେଞ୍ଜି; ଇନିଆସନ୍‌ଗାମେଣ୍ତେନ୍‌ ଆନିଞ୍ଜି ମିସର୍‌ ଡେସାନ୍‌ ସିଲଡ୍‌ ଲଜିର୍‌ ଅନମ୍‌ଡୁଙନ୍‌ ଡେଏଞ୍ଜି, ତିଆସନ୍‌ ଅବ୍‌ଡିଙ୍‌ଲନ୍‌ ଡକୋଲନ୍‌ ଅଃରପ୍ତିଲଞ୍ଜି ଆସନ୍‌ ଆନିଞ୍ଜିଡମନ୍‌ ଆଜନୋମ୍‌ ଇନ୍ନିଙ୍‌ ଡିଞ୍‌ଲେ ଅଃରପ୍ତିଲଜି । 40 ଜାକୁବନ୍‌ ଆକେଜ୍ଜା ଉଞ୍ଜିସଅ ତିରିସି ବର୍ସେଙ୍‌ ଜାୟ୍‌ ମିସର୍‌ ଡେସାନ୍‌ଲୋଙ୍‌ ଡକୋଲଞ୍ଜି । 41 ତି ଉଞ୍ଜିସଅ ତିରିସି ବର୍ସେଙ୍‌ ଆନଞିଡ୍‌ ଡିନ୍ନାଲୋଙ୍‌ ପ୍ରବୁନ୍‌ ଆସିପ୍ପାୟ୍‌ ଅଡ଼୍‌କୋନ୍‌ ମିସର୍‌ ଡେସାନ୍‌ ସିଲଡ୍‌ ଡୁଙ୍‌ଲଞ୍ଜି । 42 ମିସର୍‌ ଡେସାନ୍‌ ସିଲଡ୍‌ ପ୍ରବୁନ୍‌ ଆନିଞ୍ଜିଆଡଙ୍‌ ଆରମ୍‌ଡୁଙେଞ୍ଜି ଆସନ୍‌ ତି ଆତଗଲ୍‌ ଗୋଗୋୟ୍‌ ମନାନେତଗଲ୍‌; ତିଆତେ ପ୍ରବୁନ୍‌ ଆତଗଲ୍‌ ଗାମ୍‌ଲେ ଇସ୍ରାଏଲନ୍‌ ଆଅଞ୍ଜି ବକନୋଡ୍‌ ସିଲଡ୍‌ ବକନୋଡ୍‌ ଜାୟ୍‌ ମନାନ୍ନେତଗଲ୍‌ ।

43 ଆରି ପ୍ରବୁନ୍‌ ମୋସାନ୍‌ ଡ ଆରୋଣନ୍‌ଆଡଙ୍‌ ବରେନ୍‌, ଅନେଲାୟ୍‌ପୁରନ୍‌ ଆନଗଡ୍‌ କେନ୍‌; ବଡେସା ଆମନ୍‌ରା ଆନ୍ନିଙ୍‌ ତିଆତେ ଜୋମ୍‌ଡଙେ ତଡ୍‌ । 44 ବନ୍‌ଡ ରୁପାନ୍‌ ବାତ୍ତେ ଆଞିଞିନ୍‌ ଡିଲେ ମନ୍‌ରାନ୍‌ ଆ କମ୍ୱାରି ଗନରେଡ୍ଡେବନ୍‌ ଡେଏନ୍‌ଣ୍ଡେନ୍‌ ଜୋମ୍‌ଲେ ରପ୍ତିତେ; 45 ଆମ୍ୱେନ୍‌ ସରିନ୍‌ ମାୟ୍‌ଲନ୍‌ ଆଡ୍ରକୋତନ୍‌ ବଡେସାମର୍‌ ଅଡ଼େ ବଡିଜୋମ୍‌ କମ୍ୱାରିମରନ୍‌ ତିଆତେ ଜୋମ୍‌ଲେ ଅଃରପ୍ତିଏ । 46 ବସିଙ୍‌ଲୋଙ୍‌ ତିଆତେ ଜନୋମନ୍‌ ଡେତେ; ଆମ୍ୱେନ୍‌ ତି ଆଜେଲୁ ଅଜିଡ୍‌ ଜାକିଁୟ୍‌ ଅସିଙନ୍‌ ସିଲଡ୍‌ ଏଅମ୍‌ଡୁଙ୍‌ଡଙ୍‌; ଅଡ଼େ ବଆଜାଙ୍‌ଜାୟ୍‌ ଏଲବ୍‌ଗଡ୍‌ଡଙେ । 47 ସମ୍ପରା ଇସ୍ରାଏଲନ୍‌ ଆ ମଣ୍ଡଡ଼ି ତିଆତେ ପାଡ଼େତଜି । 48 ଅସମଁୟ୍ ଆମ୍ୱେନ୍‌ ସରିନ୍‌ ମାୟ୍‌ଲନ୍‌ ଆଡ୍ରକୋତନ୍‌ ବଡେସାମର୍‌ ପ୍ରବୁନ୍‌ ଆନେଲାୟ୍‌ପୁର୍‌ ମନାନେନ୍‌ ଇସୁମେନ୍‌ ଡେନ୍‌, ତିଡେନ୍‌ ଆସିଙନ୍‌ ଆ ଓବ୍ବାମରନ୍‌ ଅଡ଼୍‌କୋନ୍‌ ଗନବ୍‌ରେଡ୍ଡେବନ୍‌, ସିଲତ୍ତେ ଆନିନ୍‌ ଜିର୍ରେ ଅନେଲାୟ୍‌ପୁରନ୍‌ ମାନେଏତୋ; ସିଲତ୍ତେ ଆନିନ୍‌ ଇସ୍ରାଏଲ ଜାତିନ୍‌ ଆକନୋଡ୍‌କୋଡ୍‌ ଆମନ୍‌ରା ଅନ୍ତମ୍‌ ଡେତେ; ବନ୍‌ଡ ଅନ୍ନିଙ୍‌ ଏର୍‌ଗନବ୍‌ରେଡନ୍‌ ଆମନ୍‌ରା ତିଆତେ ଜୋମ୍‌ଲେ ଅଃରପ୍ତିଏ । 49 ଆରି ଇସ୍ରାଏଲ୍‌ମରଞ୍ଜି ଆମଙ୍‌ଲୋଙ୍‌ କନୋଡ୍‌କୋଡନ୍‌ ଆଡ୍ରେନ୍‌ ଆମନ୍‌ରା ଅଡ଼େ ଆମ୍ୱେନ୍‌ ସରିନ୍‌ ଆଡ୍ରକୋତନ୍‌ ବଡେସାମର୍‌ ଆସନ୍‌ ଆବୟନ୍‌ ଅନସଜନ୍‌ ଡେତେ । 50 ସିଲତ୍ତେ ଇସ୍ରାଏଲନ୍‌ ଆଅନ୍‌ ଅଡ଼୍‌କୋନ୍‌ କେନ୍‌ ଅନ୍ତମ୍‌ ଲୁମେଞ୍ଜି; ମୋସାନ୍‌ ଡ ଆରୋଣନ୍‌ ଆଡଅଙ୍‌ ପ୍ରବୁନ୍‌ ଆ ବନାଁୟ୍‌ବର୍‌ ଏଙ୍ଗାଲେ ଡକୋଏନ୍‌, ତିଅନ୍ତମ୍‌ ଆନିଞ୍ଜି ତୁବେଞ୍ଜି । 51 କେନ୍‌ ଅନ୍ତମ୍‌ ପ୍ରବୁନ୍‌ ତିଆଡିନ୍ନା ଇସ୍ରାଏଲନ୍‌ ଆଅଞ୍ଜିଆଡଙ୍‌ ମିସରନ୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲେ ଓରୋଙ୍‌ଲାୟ୍‌ ।