1 ସିଲତ୍ତେ ପ୍ରବୁନ୍‌ ମୋସାନ୍‌ଆଡଙ୍‌ ବରେନ୍‌, 2 "ଆମ୍ୱେନ୍‌ ଆପର୍ତମ୍ମୁନ୍‌ ଗାଜନ୍‌ ଆପର୍ତମ୍ମୁ ଡିନାନ୍‌ ରନୁକ୍କୁ ସରେବା ତମ୍ୱୁସିଙ୍‌ଲୋଙନ୍‌ ଡରକୋନେନ୍‌ ତୁବ୍‌ବା ।" 3 ଆରି ତିଲୋଙ୍‌ ସାକିନ୍‌ ପେଲନ୍‌ ଡକୋଲେ ଡନଙ୍‌ କାବନ୍‌ ସିନ୍‌ରିନ୍‌ ତବ୍‌ନଙ୍‌ଲେ ପେଲନ୍‌ ୟୁମ୍‌ତେ । 4 ତିଆସନ୍‌ ମେଜନ୍‌ ଆ ଅମଲୋଙ୍‌ ପାଙ୍‌ଲେ ତି ଆତୋଣ୍ତୁଲୋଙ୍‌ ଆଜନବ୍‌ ଅନ୍ତମ୍‌ ଡକୋବା; ଆରି ପିଙ୍ଗତୋଡନ୍‌ ଆ ଅମଲୋଙ୍‌ ଲୋଙ୍‌ ସିଲଡ୍‌ ପାଙ୍‌ଲେ ତେତ୍ତେ ପିଙ୍କନ୍‌ ଅଡ଼୍‌କୋନ୍‌ ସୟ୍‌ବା । 5 ସାକିନ୍‌ ପେଲନ୍‌ ଆମୁକ୍କାବାନ୍‌ ସୁନ୍ନା ତନୋମ୍ମୋଡନ୍‌ ଡକୋବା,ଆରି ଡର୍ରକୋନେ ଡାରନିନ୍‌ ଆସିନ୍‌ରି ୟୁଡ୍‌ଲେ ଡକୋବା । 6 ଆରି ସରେବା ତମ୍ୱୁସିଙ୍‌ଲୋଙନ୍‌ ଡର୍ରକୋନେନ୍‌ ସନଙ୍‌ ଆମୁକ୍କାବାନ୍‌ ଅନମଙନ୍‌ ଡକୋବା । 7 ସମାଗମ ତମ୍ୱୁ ଡ ତନମ୍ପିଲ ଲୋଙନ୍‌ ଅରାସିନେନ୍‌ ଡାଆନ୍‌ ଡକୋବା । 8 ଆରି ଅଡ଼୍‌କୋରେଙନ୍‌ ଡୁଆରାନ୍‌ ତୁବ୍‌ବା ଡ ଡୁଆରାଲୋଙନ୍‌ ଡରଙ୍‌ନେକାବନ୍‌ ଆସିନ୍‌ରି ୟୁଡ୍‌ଲେ ଡକୋବା ।

9 ତି ସିଲଡ୍‌ ଅବିସେକ ମିଞଲନ୍‌ ପାଙ୍‌ଲେ ଡରକୋନେନ୍‌ ଡ ତେତ୍ତେ ଡକୋନ୍‌ ଅଡ଼୍‌କୋନ୍‌ ଆ ଜିନିସ ଆବିସେକଡାଲେ ତିଆତେ ଆରି ତେତ୍ତେ ଡକୋନ୍‌ ଅଡ଼୍‌କୋନ୍‌ ଆସିମ୍ମା ମବ୍‌ଡ଼ିର୍‌ତେ ଏତ୍ତେଲ୍‌ଡେନ୍‌ ତିଆତେ ମଡ଼ିର୍‌ ଡେତେ । 10 ଆରି ଆମ୍ୱେନ୍‌ ତନୁମ୍ମୋଡ୍‌ତନମ୍ପିଲନ୍‌ ଡ ତେତ୍ତେ ଡକୋନ୍‌ ଅଡ଼୍‌କୋନ୍‌ ଆସିମ୍ମା ଅବିସେକଲେ ମବ୍‌ଡ଼ିର୍‌ବା; ଏତ୍ତେଲ୍‌ଡେନ୍‌ ତନମ୍ପେଲନ୍‌ ଗୋଗୋୟ୍‌ ମଡ଼ିର୍‌ ଡେତେ । 11 ଆରି ଆମ୍ୱେନ୍‌ ଗରିୟ୍‌ଡାସିମନ୍‌ ଡ ତି ଅନେଡ୍ଡାନ୍‌ ଅବିସେକ ଏମ୍ମେଲେ ମବ୍‌ଡ଼ିର୍‌ବା । 12 ତେନେଲୋଙ୍‌ ଆରୋଣ ଡ ଆଡାଙ୍ଗାଡ଼ାଅନନ୍‌ ସରେବା ତମ୍ବୁସିଙନ୍‌ ଆଡୁଆରାଲୋଙ୍‌ ଡାଆନ୍‌ ପାଙ୍‌ଲେ ଉମ୍ମାବା । 13 ଆରି ଲତ୍ତେଙ୍‌ଲୋଙ୍‌ଞେନ୍‌ ରାଓଡ଼ାଲନୁମଞ୍ଜି ଆସନ୍‌ ଆରୋଣନ୍‌ଆଡଙ୍‌ ମଡ଼ିର୍‌ ସିନ୍‌ରିନ୍‌ ଅବ୍‌ରଲେ ଅବିସେକ ଏମ୍ମେଲେ ମବ୍‌ଡ଼ିର୍‌ତାୟ୍‌ । 14 ଆରି ଆଡାଙ୍ଗାଡ଼ାଅନ୍‌ଆଡଙ୍‌ ଓରୋଙ୍‌ଲେ ସିନ୍‌ରିନ୍‌ ଅବ୍‌ରବା । 15 ଆରି ଆପ୍ପେୟନ୍‌ ଏଙ୍ଗାଲେ ଅବିସେକ ଏମ୍ମେଏନ୍‌, ଏତ୍ତେଲେମା ଆନିଞ୍ଜିଆଡଙ୍‌ ଅବିସେକ ଏମ୍ମେବା, ସିଲତ୍ତେ ଆନିଞ୍ଜି ରାଓଡ଼ା କାବ୍ବାଡ଼ାଞେନ୍‌ ଲୁମ୍‌ତଜି; ତି ଅବିସେକ ଆନିଞ୍ଜି ଆମ୍ମୁଙ୍‌ ସିଲଡ୍‌ ଆଏଡ଼ର୍‌ ଆସନ୍‌ ରାଓଡ଼ା ମୁଡ଼ାଡେତେ ।

16 ମସାନ୍‌ କେନ୍‌ ଅନ୍ତମ୍‌ ଲୁମେନ୍‌, ଆନିନ୍‌ ପ୍ରବୁନ୍‌ ଆବର୍ନେ ଅନ୍ତମ୍‌ ଅଡ଼୍‌କୋନ୍‌ ଲୁମେନ୍‌ । 17 ତି ସିଲଡ୍‌ ମୋସାନ୍‌ଆଡଙ୍‌ ପ୍ରବୁନ୍‌ ଆବନାଁୟ୍‌ବର୍‌ ଅନ୍ତମ୍‌ ବାଗୁ ବର୍ସେଙ୍‌ ଆପର୍ତମ୍ମୁନ୍‌ ଆଙ୍ଗାୟ୍‌ ଆପର୍ତମ୍ମୁନ୍‌ ଡିନ୍ନା ସରେବା ତମ୍ବୁସିଙନ୍‌ ତନୁବନ୍‌ ଡେନ୍‌ । 18 ଆରି ମସାନ୍‌ ଅସିଂଙନ୍‌ ତବ୍‌ନଙ୍‌ଲେ ତିଲୋଙ୍‌ 19 ତିଲୋଙ୍‌ ଅସିଂଙନ୍‌ ଆତୋଣ୍ତୋଲୋଙ୍‌ ତମ୍ୱୁନ୍‌ ତୁବେନ୍‌ଞ୍ଜି ଡ ତମ୍ୱୁନ୍‌ ଆତୁଣ୍ତୋ ୟୁମେଞ୍ଜି । 20 ତିଲୋଙ୍‌ ମସାନ୍‌ ଆଡଙ୍‌ ପ୍ରବୁନ୍‌ ଆବର୍ନେ ଆନିନ୍‌ ସାକିନ୍‌ଅଲନ୍‌ ପାଙ୍‌ଲେ ପେଲନ୍‌ ଆ ଆମନ୍‌ ଡକୋଏନ୍‌ଲେ ପେଲନ୍‌ ଆତୋଣ୍ତୋ ମନଙ୍‌ ଡକୋଏନ୍‌ । 21 ଆରି ସରେବା ତମ୍ବୁସିଙନ୍‌ ଆ ଅମ୍ମ ପେଲନ୍‌ ପାଙ୍‌ଲାଜି ଡ ୟନୁମନ୍‌ ଆନାଙ୍‌ସାକାବନ୍‌ ୟୁଡ୍‌ଲେ ସାକି ପେଲନ୍‌ ୟୁମେଞ୍ଜି । 22 ତିଆସନ୍‌ ମସାନ୍‌ ଆଡଙ୍‌ ପ୍ରବୁନ୍‌ ଆବର୍ନେ ଅମ୍‌ଡଙ୍‌ଲେ ଅସିଂଙନ୍‌ ଅର୍ଜଡ଼ୋମ୍‌ଗଡ୍‌ ଡର୍ରଙ୍‌ନେକାବନ୍‌ ଡାନ୍‌ଡନ୍‌ ସରେବା ତମ୍ୱୁସିଙ୍‌ଲୋଙନ୍‌ ମେଜନ୍‌ ଡକୋଏଞ୍ଜି; 23 ଆରି ଆନିନ୍‌ ପ୍ରବୁନ୍‌ ଆମୁକ୍କାଲୋଙ୍‌ ନିଅମନ୍‌ ଅନ୍ତମ୍‌ ତି ଆତୋଣ୍ତୋ ରୁଟିନ୍‌ ଡକୋଏଞ୍ଜି । 24 ମସାନ୍‌ ଆଡଅଙ୍‌ ପ୍ରବୁନ୍‌ ଆବନାଁୟ୍‌ବର୍‌ ଅନ୍ତମ୍‌ ମେଜନ୍‌ ଆମୁକ୍କାଲୋଙ୍‌ ଅସିଂଙନ୍‌ ଅର୍କାବଡ଼ିଗଡ୍‌ ସରେବା ତମ୍ୱୁସିଙ୍‌ଲୋଙନ୍‌ ପିଙ୍କନ୍‌ ଆଡ୍ରକୋ ଡକୋଏଞ୍ଜି । 25 ପ୍ରବୁନ୍‌ ଆମୁକ୍କାବାନ୍‌ ପିଙ୍କତୋଡନ୍‌ ସୟେଞ୍ଜି । 26 ଆରି ମସାନ୍‌ ଆଡଅଙ୍‌ ପ୍ରବୁନ୍‌ ଆବର୍ନେ ଆନିନ୍‌ ସରେବା ତମ୍ୱୁସିଙ୍‌ଲୋଙନ୍‌ ଡନଙ୍‍ଡଙ୍‌ କାବନ୍‌ ଆମୁକ୍କା ସୁନ୍ନାନ୍‌ ଆତନମ୍ପେଲ୍‌ ଡକୋଏଞ୍ଜି । 27 ତେତ୍ତେ ଆ ତୋଣ୍ତୁଲୋଙ୍‌ ଲଙିଡ୍‌ ମିଞଲନ୍‌ ରୁଏଞ୍ଜି । 28 ଆରି ମସାନ୍‌ ଆଡଅଙ୍‌ ପ୍ରବୁନ୍‌ ଆବର୍ନେ ଆନିନ୍‌ ଡୁଆରାସିଂନ୍‌ ଡନଙ୍‌ଡଙ୍‌କାବନ୍‌ ବୟନ୍‌ ତବ୍‌ନଙ୍‌ଲେ ଡକୋଏନ୍‌ । 29 ସମାଗମ ତମ୍ୱୁସିଂନ୍‌ ଆଡୁଆରାରେଙନ୍‌ ତନମ୍ପେଲନ୍‌ ଡକୋଲେ ତି ଆତୋଣ୍ତୁଲୋଙ୍‌ ତନମ୍ପେଲନ୍‌ ଡ ଅନମଙନ୍‌ ସୋରୋପାୟେଞ୍ଜି । 30 ସିଲତ୍ତେ ମସାନ୍‌ ଆଡଅଙ୍‌ ପ୍ରବୁନ୍‌ ଆବନାଁୟ୍‌ବର୍‌ ଅନ୍ତମ୍‌ ଆନିନ୍‌ ସରେବା ତମ୍ୱୁସିଙ୍‌ଲୋଙନ୍‌ ଡ ବେଦିନ୍‌ ଆମଡ୍ଡିରେଙ୍‌ ଗରିୟ୍‌ଡାସିମନ୍‌ ଡକୋନ୍‌ ତେତେଲୋଙ୍‌ ନିୟ୍‌ ଗରିୟ୍‌ଡାସିମନ୍‌ ଆସନ୍‌ ଡାଆନ୍‌ ତିୟେନ୍‌ । 31 ତିଲୋଙ୍‌ ମସାନ୍‌‍ ଡ ଆରୋଣନ୍‌ ଆରି ଆଡାଙ୍ଗାଡ଼ାଅନ୍‍ ରମଙ୍‍ ରମ୍ମଙ୍‌ ଆସି ଆଜଙ୍‌ ଗିୟ୍‌ଡାଏଞ୍ଜି । 32 ଅଙ୍ଗାଜାକିଁୟ୍‌ ଆଡିଡ୍‌ ଆନିଞ୍ଜି ସମାଗମ ତମ୍ୱୁଲୋଙନ୍‌ ଗନେଞ୍ଜି ଡ ବେଦି ଆମଙ୍‌ବା ଡେନଞ୍ଜି ତି ଆବନେଡ଼ା ଆନିଞ୍ଜି ଗିୟ୍‌ଡାଏଞ୍ଜି । 33 ତି ସିଲଡ୍‌ ଆନିନ୍‌ ସରେବାସିଙନ୍‌ ଡ ବେଦିନ୍‌ ଅଡ଼୍‌କୋରେଙନ୍‌ ଡୁଆରାନ୍‌ ତୁବେଞ୍ଜି ଡ ଡୁଆରାନ୍‌ ଆମୁକ୍କାବାନ୍‌ ଡର୍ରଙ୍‌ଡଙ୍‌କାବନ୍‌ ତବ୍‌ନଙେଞ୍ଜି, କେନ୍‌ ଅନ୍ତମ୍‌ ମସାନ୍‌ ଆଲନୁମ୍‌ ଅବ୍‌ସୁଜ୍ଜେଏନ୍‌ ।

34 ତି ସିଲଡ୍‌ ସମାଗମ ତମ୍ୱୁନ୍‌ ମେଗନ୍‌ ୟୁମେନ୍‌ ଡ ପ୍ରବୁନ୍‌ ଆଗନୁଗୁ ପନେମେଙ୍‌ ତମ୍ୱୁସିଂନ୍‌ ବର୍ରଜେନ୍‌ । 35 ତି ସିଲଡ୍‌ ମସାନ୍‌ ସରେବା ତମ୍ୱୁସିଙ୍‌ଲୋଙନ୍‌ ଗନ୍‌ଲେ ଅର୍ରପ୍ତିଲୋ, ଇନିଆସନ୍‌ଗାମେଣ୍ଡେନ୍‌ ମେଗନ୍‌ ତି ଆତୋଣ୍ତୋ ଡକୋଲନ୍‌ ଡ ପ୍ରବୁନ୍‌ ସରେବା ତମ୍ୱୁସିଙ୍‌ଲୋଙନ୍‌ ଆଗନୁଗୁ ପନେମେଙନ୍‌ ବରିୟ୍‌ ଡକୋଏନ୍‌ । 36 ଆରି ଅଙ୍ଗାଆଡିଡ୍‌ ସରେବାସିଙନ୍‌ ଆତୋଣ୍ତୋ ସିଲଡ୍‌ ମେଗନ୍‌ ପନାଙନ୍‌ ଡେଏନ୍‌ ତିଆଡିଡ୍‌ ଇସ୍ରାଏଲ ମରଞ୍ଜି ଜନିରନ୍‌ ଆସନ୍‌ ଉଲଞ୍ଜି । 37 ବନ୍‌ଡ ମେଗନ୍‌ ତିଆବନେଡ଼ା ତୁଣ୍ତୁନ୍‌ ସିଲଡ୍‌ ଜାୟ୍‌ତାନ୍‌ ଅଃଜିର୍ରାୟ୍‌ ତି ଆବନେଡ଼ା ତୁଣ୍ତୁନ୍‌ ସିଲଡ୍‌ ଜାୟ୍‌ତାନ୍‌ ଅନ୍‌ର୍ରଙ୍‌ଜିରାଞନ୍‌ ଜାୟ୍‌ ଆନିଞ୍ଜି ଅଃତଞ୍ଜିଲଞ୍ଜି । 38 ଇନିଆସନ୍‌ଗାମେଣ୍ଡେନ୍‌ ଅଡ଼୍‌କୋ ଇସ୍ରାଏଲନ୍‌ ଆକେଜ୍ଜାଜି ଆଗନିଯ୍‌ଗିୟ୍‌ଲୋଙ୍‌ ଆନିଞ୍ଜି ଅଡ଼୍‌କୋନ୍‌ ତମ୍ୱାଓଲନ୍‌ ଆତଙିୟ୍‌ନେନ୍‌ ସଦାପ୍ରବୁନ୍ ‌ଆମେଗ ଡ ତଗଲନ୍‌ ତଗୋ ସିଙନ୍‌ ଆତୋଣ୍ତୋ ଡକୋଏନ୍‌ ।