1 ମସାନ୍‍ ଇସ୍ୱରନ୍‌ଆଡଙ୍ ଗାମେନ୍‌, "ଗିଜା ଞେନ୍ ଇନି ଗାମ୍‌ତାୟ୍ ଆନିଞ୍ଜି ବର୍ନେଞେନ୍ ଅଃଡର୍ନେଜି ଆରି ବର୍ନେଞେନ୍‌ ଅଃନମ୍‌ଡଙେଜି । ଆରି ଆନିଞ୍ଜି ଗାମ୍‌ତଜି ଆମନ୍‌ ସରିନ୍‌ ଇସ୍ୱରନ୍‌ ଆମନ୍‌ ସରିନ୍‌ ଅଃନବ୍‌ରାଙ୍‌ଡାଲନ୍‌ ?"

2 ପ୍ରବୁନ୍‌ ଆନିନ୍‌ଆଡଙ୍‌ ବରେନ୍‍, "ଅସିଲୋଙ୍‌ନମ୍‌ ଇନି ଡକୋ?"

ଆନିନ୍ ଗାମେନ୍‌, "ଅବୟ୍ ଡାଙ୍ଗୋ ।"

3 ପ୍ରବୁନ୍‌ ଗାମେନ୍‌, "ତି ଆତେ ଲବଲୋଙନ୍‌ ସେଡା ।" ମସାନ୍ ଜାୟ୍‌ତାନ୍ ଆରସେଡେନ୍‌, ତିଆତେ ଜାଆଡନ୍ ଗଡେଲେନ୍, ସିଲତ୍ତେ ମୋସାନ୍‌ ଜାଆଡନ୍‌ ଗିୟ୍‌ଲେ ଜିରେନ୍‌ । 4 ସଦାପ୍ରବୁନ୍ ମସାନ୍‍ଆଡଙ୍‌ ବରେନ୍‍, ଆ ପୁର୍ବାଜୋଜୋଞ୍ଜି ଆ ପ୍ରବୁ ଇସ୍ୱରନ୍‌ ଆଗରାମ୍‌ଗାମ୍‌ ଅବ୍ରାଆମନ୍‌, ଇସାକନ୍‌ ଡ ଜାକୁବନ୍‌ ଆ ଇସ୍ୱର ଆମନ୍‌ଆଡଙ୍‌ ଅବ୍‌ଗିୟ୍‌ତାଲନ୍‌ କେନ୍‌ଆତେ ଆନିଞ୍ଜି ଡର୍ତଞ୍ଜି । 5 "ତିଆସନ୍‌ ଆମନ୍‌ ଅସିନମ୍‌ ବାତ୍ତେ ଜାଆଡନ୍‌ ଆଲା ଞମା, ଆରି ଆନିନ୍‌ ଆସିନ୍‌ ବାତ୍ତେ ଜାଆଡନ୍‌ ଞମେନ୍‌, ଆସିଲୋଙନ୍‌ ଜାଆଡନ୍‌ ଡାଙ୍ଗୋ ଗଡେଲେନ୍‌ ।

6 ପ୍ରବୁନ୍‌ ମସାନ୍‌ଆଡଙ୍ ଆରି ବରେନ୍‌, ମାୟଙ୍‌ଲୋଙ୍‌ମନ୍ ଅସିନମ୍ ଡକ୍କୋଆ ।" ତାସନ୍‌ ମସାନ୍ ଆସିନ୍ ଆ ମାୟଙ୍‌ଲୋଙ୍‌ନମ୍‌ ଡକ୍କୋଏନ୍‌; ତିଆସନ୍‌ ଆନିନ୍‌ ଆସିନ୍‌ ଆ ମାୟଙ୍‌ଲୋଙନ୍ ଡକ୍କୋଡାଲେ ଆ ଆରି ବତର ଆସିନ୍‌ ତବେନ୍‌, ଗିଜା, ଆସିନ୍‌ ତାବ୍‌ରେଡନ୍‌ ଅନ୍ତମ୍‌ ମୋଡ୍ଡୋନ୍‌ ଅନ୍ତମ୍‌ ଡେଏନ୍‌ । 7 ଇସ୍ୱରନ୍‌ ଗାମେନ୍‌, "ଅସିନମ୍ ଆରି ବତର ମାୟଙ୍‌ଲୋଙ୍‌ନମ୍ ଡକ୍କୋଆ ।" ତାସନ୍‌ ଆନିନ୍ ଏତ୍ତେଲେ ଲୁମେନ୍‌, ଆରି ଅଙ୍ଗାଆଡିଡ୍‌ ଆନିନ୍ ଡକ୍କୋଡାଲେ ଆସିନ୍ ତବେନ୍, ତିଆତେ ମନଙେନ୍, ଆଜାଡ଼ିଡମ୍‌ ଆ ଡଅଙନ୍‌ ମନଙେନ୍ । 8 ଆପର୍ତମ୍ମୁ ସାନ୍ନି ଅରମ୍ମଡ୍‌ କାବ୍ବାଡ଼ାନମ୍‌ ଅଃମାନେଲଜିଡେନ୍‌ ଏତ୍ତେଲ୍‌ଡେନ୍‌ ଅନବ୍‌ ବାଗୁ ଅରମ୍ମଡ୍‌ ସାନ୍ନି କାବ୍ବାଡ଼ାନ୍‌ ଆଡିଡ୍‌ ଡର୍ତଞ୍ଜି, ଆନିନ୍‌ ଆ ଆରି ବତର ଆସିନ୍‌ ଆ ମାୟଙ୍‌ଲୋଙଣ୍‌ ଡକ୍କୋଡାଲେ ତବେନ୍‌, ଗିୟ୍‌ବା ତିଆତେ ଆଜାଡ଼ିନ୍‌ ଜେଲୁନ୍‌ ଲରେନ୍‌ । 9 କେନ୍‌ ବାଗୁ ଅରମ୍ମଡନ୍‌ ବାତ୍ତେ ଆନିଞ୍ଜି ଅଃଡର୍ରଞ୍ଜି ଡେନ୍‍ ଅଡ଼େ ବର୍ନେନମ୍ ଅଃନମ୍‌ଡଙ୍‌ଲଜିଡେନ୍, ଆମନ୍‌ ଅସୋୟ୍ ନିଡ଼ ଅଲନ୍ ସିଲଡ୍‌ ଡାଆନ୍ ପାଙ୍‌ଲେ ଆସର୍ ଲବଲୋଙନ୍‌ ଲାଆ । ଆମନ୍‌ ଅଲନ୍‌ ସିଲଡ୍‌ ଅଙ୍ଗା ଆଡାଆ ପାଙ୍‌ଲାୟ୍‌ ତିଆତେ ଆସର୍‌ଲଲୋଙନ୍‌ ମିଞାମନ୍‌ ଗଡେଲ୍‌ତେ ।

10 ବନ୍‌ଡ ମସାନ ପ୍ରବୁନ୍‌ଆଡଙ୍‌ ବରେନ୍‌, "ଇଜ୍ଜା, ପ୍ରବୁ, ଞେନ୍‌ଆଡଙ୍ ଆପ୍ପାୟ୍‌ଡଙିୟ୍ । ଞେନ୍ ମନଙ୍ ବର୍ରନ୍ ଅଃରପ୍ତିଆୟ୍‌, ଆରି ଞେନ୍ ଲବିଡା ବର୍ତନାୟ୍, ଆରି ଆଜାଡ୍ଡାଗୋ ବର୍ତନାୟ୍ ।"

11 ପ୍ରବୁନ୍‌ ଆନିନ୍‌ଆଡଙ୍‌ ବରେନ୍‌, "ମନ୍‍ରାନ୍ ଆମୁକା ଆନା ଗବ୍‌ଡେଲେନ୍‌ ? ଆରି ମନ୍‍ରାନ୍‍ଆଡଙ୍ ଅନବ୍‌ଜାଡ୍ଡାନ୍, ଅଡ଼େ ଅନବ୍‌କାଲ୍ଲାନ୍, ଆରି ଅନବ୍‌କାଡ଼ୁନ୍ ଡ ଅଃନବ୍‌କାଡ଼ୁଏ ? କେନ୍ ଆତେଜି ଞେନ୍ ଲୁମ୍‌ତାୟ୍, ଞେନ୍ ପ୍ରବୁନ୍‌ ? 12 ତାସନ୍‌ ନମି ଇୟା ଞେନ୍‌ ଆମନ୍‌ ସରିନ୍‌ ଡକୋଡାଲନ୍ ବର୍ନେନ୍‌ ଞଙ୍‌ଞଙ୍‌ତମ୍, ଆରି ଇନି ଗାମ୍‌ତବୋ ଞେନ୍ ଆମନ୍‌ଆଡଙ୍ ବର୍ତମ୍ ।"

13 ବନ୍‌ଡ ମସାନ୍ ଗାମେନ୍‌, "ଏ ପ୍ରବୁ, ଞେନ୍ ଅମଙ୍‌ବାନମ୍‌ କାକୁର୍ତିତନାୟ୍ ଆମନ୍‌ ଞେନ୍‌ଆଡଙ୍‌ ଏର୍‌ନାପ୍ପାୟ୍‌ ଆନ୍ନାମର୍‌ ଆପ୍ପାୟା ।"

14 ମସାନ୍‍ ଆଉପରେଙ୍ ସଦାପ୍ରବୁନ୍ ବରାବେନ୍‌, ତିଆସନ୍‌ ଇସ୍ୱରନ୍‌ ଗାମେନ୍‌, "ଇନି ବୋଞାଙ୍‌ନମ୍ ଆରୋଣନ୍, ଲେବିଅନ୍ ତଡ୍‌ ପଙ୍ ? ଞେନ୍ ଜନା ଆନିନ୍‌ ମନଙ୍‌ ରେୟ୍‌ଲଙ୍ ବର୍ରନ୍ ରପ୍ତିତେ । ଆରି ଗିୟ୍‌ବା, ଆମନ୍‌ ସରିନ୍‌ ଆଲ୍‌ନରବାଙ୍ ଆସନ୍‌ ଆନିନ୍‌ ଇୟ୍‌ତାୟ୍‌ ଆରି ଆମନ୍‌ଆଡଙ୍‌ ଗିୟ୍‌ଲେ ସର୍ଡାତେ । 15 ଆମନ୍‌ ଆନିନ୍‍ଆଡଙ୍ ବରା ଆରି ଆନିନ୍ ଇନି ଗାମ୍‌ତେ ଆନିନ୍‌ଆଡଙ୍‌ ବର୍ବା । ଆମନ୍‌ ଇନି ଗାମ୍‌ଲେ ଆରି ବର୍ତନେ ଞେନ୍ ଆମନ୍‌ଆଡଙ୍ ବର୍ନେନ୍‌ ଞଙ୍‌ଞଙ୍‌ତମ୍ । 16 ଆନିନ୍‌ ମନ୍‌ରାଞ୍ଜି ଆମଙ୍‌ବା ଅକାଲ୍‌ତ୍ତି ବର୍ନେମର୍‌ଡେତେ ଆରି ମନ୍‌ରାଞ୍ଜି ବର୍ତଜି । ଆମନ୍‌ ଆ ଇସ୍ୱରନ୍‌ ଅନ୍ତମ୍‌ ଡେତମ୍ । 17 ଆରି ଆମନ୍‌ ଞମ୍‌ଲେ କେନ୍‌ ଆ ଡାଙ୍ଗୋ ପାଙା; କେନ୍ ବାତ୍ତେ କେନ୍ ଅଡ଼୍‌କୋନ୍ ସରାନ୍ନି ଅରମ୍ମଡ୍‌ କାବ୍ବାଡ଼ାନ୍ ଅବ୍‌ତୁୟ୍‌ତେ ।"

18 ମସାନ୍‍ ଆକୁଞାରନ୍‌, ଜିତ୍ରୋନ୍‌ ଆମଙ୍‍ବା ୟର୍ରନେ, "ଞେନ୍ କାକୁର୍ତିତନାୟ୍ ମିସର୍‌ ଡେସାଲୋଙନ୍ ଆଡ୍ରକୋଲଞ୍ଜି ବୋଞାଙ୍‌ଞେଞ୍ଜି ଆମଙ୍‌ବା ୟର୍ନେନ୍ ଆସନ୍‌ ଆରି ଆନିଞ୍ଜି ନମିଅନ୍ତାନ୍ ଆମେଙ୍‌ଜି ଅଡ଼େ ଇଜ୍ଜା ଗନିଜନ୍ ଆସନ୍‌ ଞେନ୍‌ଆଡଙ୍ ଜନିରନ୍ ଆସନ୍‌ ତିୟିଁୟ୍ ।" ଜିତ୍ରୋନ୍ ଅଡ଼େଏନ୍ ଆରି ଆନିନ୍‌ଆଡଙ୍‌ ବର୍ରେ ଆପ୍ପାୟେନ୍‌ ।

19 ଆରି ମିଦିଅନ୍‍ ଆଡିଡ୍ ପ୍ରବୁନ୍‌ ମସାନ୍‍ଆଡଙ୍‌ ବରେନ୍‍, "ଆମନ୍‌ ମିସରନ୍‍ ୟର୍ନା, ଇନିଆସନ୍‌ଗାମେଣ୍ଡେନ୍‌ ଅଙ୍ଗା ଆ ମନ୍‌ରାଜି ରନବ୍ବୁନ୍ ଆସନ୍‌ ପରାନ୍ନାନମ୍ ସାଜେଞ୍ଜି ଆନିଞ୍ଜି ଅଡ଼୍‌କୋନ୍ ରବୁଆଜେଞ୍ଜି ।" 20 ତିଆସନ୍‌ ମସାନ୍ ଆଡୁକରିନ୍‌ ଡ ଆ ଡାଙ୍ଗଡ଼ାଅନଞ୍ଜିଆଡଙ୍‌, ଗୋଡୋଁୟ୍‌ଲୋଙନ୍ ଅମ୍‌ଡାୟ୍‌ଲେ, ମିସର୍‌ ଡେସାନ୍‌ ୟର୍ରଞ୍ଜି, ଆରି ଆନିନ୍ ଇସ୍ୱରନ୍‌ ଆଡାଙ୍ଗୋ ଆସିଲୋଙନ୍‌ ଞମ୍‌ଲେ ପାଙେନ୍‌ ।

21 ପ୍ରବୁନ୍‌ ମସାନ୍‍ଆଡଙ୍‌ ବରେନ୍‌, "ଆମନ୍‌ ନମି ମିସର୍‌ ଡେସାନ୍‌ ୟର୍ରନ୍‍ ଡେନ୍‍, ଞେନ୍ ଅସିଲୋଙ୍‍ନମ୍‍ ଇନିଜି ଅଡ଼୍‌କୋନ୍‍ ସାନ୍ନିଆକାବ୍ବାଡ଼ା ଲନୁମନ୍‌ ଆସନ୍‌ ଏତିୟ୍‍ଲମ୍‍, ତିଆତେ ମିସର୍‌ ରାଜାନ୍ ଆତେମଡ୍ ଲୁମା, ବନ୍‌ଡ ଞେନ୍ ଆମନ୍ନନ୍ ରବ୍‌ଡୋତାୟ୍, ଆରି ଆନିନ୍ ମନ୍‌ରାଞ୍ଜିଆଡଙ୍ ଅଃନମ୍‌ରେଙେ । 22 ଆରି ଆମନ୍‌ ପାରୋନ୍ଆଡଙ୍‌ ବରା, ପ୍ରବୁନ୍ ବର୍ତନେ, ଇସ୍ରାଏଲନ୍ ଆମନ୍‌ରାଜି ଆପର୍ତମ୍ମୁ ଡାଙ୍ଗାଡ଼ାଅନ୍‌ଞେନ୍‌ । 23 ଞେନ୍‌ ଆମନ୍‌ଆଡଙ୍‌ ବର୍ରମ୍‌ ସନେବାଞେନ୍‌ ଆସନ୍‌ ଆମନ୍‌ ଡାଙ୍ଗାଡ଼ାଅନ୍‌ଞେଞ୍ଜିଆଡଙ୍‌ ଅମ୍‌ରେଙା, ବନ୍‌ଡ ଆନିନ୍‌ଆଡଙ୍‌ ଅନମ୍‌ରେଙନ୍‌ ଆସନ୍‌ ଆମନ୍‌ ଅସାତମ୍ । ନମି ଆପର୍ତମ୍ମୁ ଡାଙ୍ଗାଡ଼ାଅନ୍‌ନମଜିଆଡଙ୍‌ ଞେନ୍ ଏରବ୍ବୁତାୟ୍ ।"

24 ଅନେଙ୍‌ତଙରନ୍‍ ଆ ଲୋଲୋନେ ଆସିଙ୍‌ଲୋଙ୍‌, ପ୍ରବୁନ୍‌ ମସାନ୍‌ଆଡଙ୍ ରବାଙେନ୍ ଆରି ଆନିନ୍‌ଆଡଙ୍‌ ରନବ୍ବୁନ୍‍ ଆସନ୍‌ ଏରେନ୍‍ଗୋଜେନ୍‍ । 25 ତିଆଡିଡ୍‌ ସିପ୍ପୋରାନ୍‌ ଅବୟ୍‌ ଅସୁବ୍‌ କୁଣ୍ତିନ୍‌ ଞମ୍‌ଲେ ଆ ଡାଙ୍ଗାଡ଼ାଅନନ୍‌ ଗନରେଡ୍ଡେବନ୍‌ ସାଡ୍‌ଲେ ମସାନ୍ ଆଜଙ୍‌ଲୋଙ୍‌ ଡକ୍କୋଲେ ଗାମେନ୍‌ । "ଆମନ୍‌ ମିଞାମ୍‌ ଅୟ୍‌ତବ୍‌ଞେନ୍‌ ।" 26 କେନ୍‌ଅନ୍ତମ୍‌ ଇସ୍ୱରନ୍‌ ଆନିନ୍‌ଆଡଙ୍‌ ଅମ୍‌ରେଙେନ୍ ଆରି ମସାନ୍ ଆଡୁକରିନ୍‌ଆଡଙ୍ ବରେନ୍‌ ଆମନ୍‌ ଗନରେଡ୍ଡେବନ୍‌ ମିଞାମ୍‌ ଅୟ୍‌ତବ୍‌ଞେନ୍‌ ।

27 ପ୍ରବୁନ୍‌ ଆରୋଣନ୍‍ଆଡଙ୍‌ ବରେନ୍‌, "ଆମନ୍‌ ମସାନ୍‍ ବାତ୍ତେ ଆଲ୍‌ରନବାଙ୍‌ ଆସନ୍‌ ଆରିଙ୍‌ରିଙ୍ ବସେଙ୍‌ବାନ୍‌ ଇୟା ।" ଆନିନ୍‌ ଇୟ୍‌ଲେ ଇସ୍ୱରନ୍‌ ଆବରୁବା ଆନିନ୍‌ ସରିନ୍‌ ଅଃଲରବାଙେଞ୍ଜି ଆରି ଆନିନ୍ଆଡଙ୍ ଜୋର୍‌ଜୋରେନ୍ । 28 ଅଙ୍ଗାଆଡିଡ୍‌ ଆନିନ୍ ମିସରନ୍ ଆୟର୍ନେ ଆସନ୍‌ ଆନିନ୍‌ଆଡଙ୍‌ ବରେନ୍ ପ୍ରବୁନ୍ ଇନିଜି ଗାମେନ୍ ତି ଅଡ଼୍‌କୋନ୍ ସନ୍ନିକାବ୍ବାଡ଼ାଞ୍ଜି ମସାନ୍ ଆରୋଣନ୍‌ଆଡଙ୍‌ ବରାଜେନ୍; 29 ମସାନ୍‍ ଡ ଆରୋଣନ୍‌ ମିସର୍‌ ଡେସାନ୍‌ ଇୟେଞ୍ଜି ଆରି ଅଡ଼୍‌କୋ ଇସ୍ରାଏଲନ୍ ଆମ୍ମୁଙ୍‌ଗଡ୍‌ମରଞ୍ଜିଆଡଙ୍‌ ଅବ୍‌ରୁକ୍କୁଏଞ୍ଜି । 30 ଇସ୍ୱରନ୍‌ ମସାନ୍‌ଆଡଙ୍‌ ଇନିଜି ବରେନ୍‌ ତିଅଡ଼୍‌କୋନ୍‌ ଆରୋଣନ୍‌ ଆନିଞ୍ଜିଆଡଙ୍‌ ବରେଞ୍ଜି ଆରି ମନ୍‌ରାଞ୍ଜି ଆତେମଡ୍‌ ମସାନ୍‌ ଅରମ୍ମଡ୍‌ କାବ୍ବାଡ଼ାନ୍‌ ଲୁମେନ୍‌ ଆରି ଆ ମନ୍ନଲୋଙଞ୍ଜି ଅବ୍‌ଡର୍ନେଏଞ୍ଜି । 31 ମନ୍‌ରାଞ୍ଜି ଡର୍ରଞ୍ଜି, ଆରି ପ୍ରବୁନ୍‌ ଇସ୍ରାଏଲମରଞ୍ଜି ଆ ଡାଙ୍ଗାଡ଼ାଅନ୍‌ଞ୍ଜି ଆଦୁକ ଗିୟ୍‌ଲେ ତୁର୍ଡାଏନ୍‌, କେନ୍‌ଆତେ ଆନିଞ୍ଜି ଅମ୍‍ଡଙ୍‌ଲେ ଆନିନ୍‌ଆଡଙ୍‌ ତୁଡ଼ୁମ୍‌ଲେ ସେଙ୍କେଏଞ୍ଜି ।