1 ଇସ୍ରାଏଲନ୍‌ ଆମନ୍‍ରାଜି ମିସର୍‌ ଡେସାନ୍‌ ସିଲଡ୍‌ ଆଡ୍ରୁଙ୍‌ଲଞ୍ଜି ୟାଗିଆଙ୍ଗାୟ୍‍ ଆପର୍ତମ୍ମୁ ଡିନ୍ନା, ଆନିଞ୍ଜି ସିନୟ୍‌ ଆରିଙ୍‌ରିଙ୍‌ ଲବବାନ୍‍ ତୁଙେଞ୍ଜି । 2 ଆନିଞ୍ଜି ରପିଦିମନ୍‌ ସିଲଡ୍‍ ତଙିଲନ୍‍ ସିନୟ ଆରିଙ୍‍ରିଙ୍‍ଲବାନ୍‍ ତୁଙେଞ୍ଜି, ତି ଆରିଙ୍‍ରିଙ୍‍ଲଲୋଙ୍‍ ତମ୍ୱୁନ୍‍ ତୁବେଞ୍ଜି; ଇସ୍ରାଏଲନ୍‌ ତି ବରୁନ୍‌ ଆମୁକ୍କାବାନ୍‌ ତମ୍ୱୁସିଂନ୍‍ ତୁବେଞ୍ଜି । 3 ତି ସିଲଡ୍‌ ମସାନ୍‍ ଇସ୍ୱରନ୍‌ ଆମଙ୍‍ ଜିର୍ରେନ୍‌ ଆରି ପ୍ରବୁନ୍‌ ବରୁଲୋଙନ୍‌ ଓଡ୍ଡେଲେ ବରେନ୍‍, "ଆମନ୍‌ ଜାକୁବନ୍‌ ଆକେଜ୍ଜାମର୍‌ କେନ୍‍ ଆବର୍ନେ ବର୍ନା ଡ ଇସ୍ରାଏଲନ୍‌ ଆମନଡ୍ରାଜି ଅବ୍‍ଜନାଆଜି ।" 4 ଞେନ୍‌ ମିସରିବାଜି ଆମଙ୍‌ବା ଇନିଜି ଲୁମ୍‌ଲାୟ୍‌ ଆରି ଆମ୍ବେଞ୍ଜିଆଡଙ୍‌ ଏଙ୍ଗାଲେ ଗିର୍ଜାତିଡନ୍‌ ଆକାପ୍ପାଲୋଙ୍‍ ଅବ୍‌ତଙ୍କୁମ୍‌ଲେ ଅମଙ୍‌ବାଞେନ୍‌ ଓରୋଙ୍‌ଲବେନ୍‌ । ତିଆତେ ଆମ୍ବେନ୍‌ ଏଗିୟ୍‌ତେ । 5 ନମି ଆମ୍ୱେନ୍‌ ସରଙ୍‍ଞେନ୍‍ ଅମ୍‌ଡଙ୍‌ବା ଡ ଅନସୟ୍‌ଞେନ୍‌ ଲୁମ୍‌ବା, ତିଡେନ୍‍ ଆମ୍ୱେନ୍‌ ଅଡ଼୍‌କୋମନ୍‌ରାନ୍‌ ଆତିକି ଇନ୍‌ଲେନ୍‌ ଡମ୍‍ ତର୍ରତୁମ୍‍ ଆରନ୍ନା ଡେତେ; ଇନିଆସନ୍‌ଗାମେଣ୍ଡେନ୍‌ ଅଡ଼୍‌କୋନ୍‌ ଆ ପୁର୍ତିନ୍‌ ଞେନ୍‍ଆତେ । 6 ଆରି,ଆମ୍ବେଞ୍ଜି ଇନ୍‌ଲେନ୍‌ ଆସନ୍‌ ରାଓଡ଼ାଞ୍ଜି ଅବୟ୍‌ ରାଜାକେଜାନ୍‍ ଡ ମଡ଼ିର୍‌ ବିରିଣ୍ତା ଡେତେ; କେନ୍‍ ଅଡ଼୍‌କୋନ୍‌ ଆବର୍ନେ ଇସ୍ରାଏଲଞ୍ଜି ବର୍ରା । 7 ତିଲୋଙ୍‌ ମସାନ୍‍ ଜିର୍ରେ ଆମ୍ମୁଙ୍‌ଗଡ୍‌ ମରଞ୍ଜିଆଡଙ୍‌ ଓଡ୍ଡେଲେ ପ୍ରବୁନ୍‌ ବାତ୍ତେ ଆବର୍ନେ କେନ୍‍ ଅଡ଼୍‌କୋନ୍‌ ଆନିଞ୍ଜି ଆମୁକ୍କାଲୋଙନ୍‌ ପ୍ରସ୍ତାବଏନ୍‌ । 8 ତିସିଲଡ୍‍ ଅଡ଼୍‌କୋନ୍‌ ଆମନ୍‍ରା ଆବସର୍ରଙନ୍‌ ବାତ୍ତେ ଓଡ୍ଡେଲେ ବର୍ରଞ୍ଜି, "ପ୍ରବୁନ୍‌ ଅଙ୍ଗା ଆବର୍ନେ ବର୍ତନେ, ତିଆତେ ଅଡ଼୍‌କୋନ୍‌ ଇନ୍‌ଲେନ୍‌ ଏଲୁମ୍‍ବା । ତାଡିନ୍ନା ମସାନ୍‍ ପ୍ରବୁନ୍‌ ଆମଙ୍‍ ମନ୍‌ରାଜି ଆବର୍ନେ ଅବ୍‍ଜନାଏନ୍‍ ।" 9 ତିଆସନ୍‌ ପ୍ରବୁନ୍‌ ମସାନ୍‍ଆଡଙ୍‌ ଗାମେନ୍‌, ଗିଜା ଞେନ୍‌ ଆମନ୍‌ ସରିନ୍‌ ଅକରଡାଡ଼ିତନାଞନ୍‌ ଆଡିଡ୍‌ ଏଙ୍ଗାଲେ ମନ୍‌ରାଜି ଅମ୍‍ଡଙ୍‌ଲେ ରପ୍ତିତଜି, ଆରି ଅମଙ୍‌ନମ୍‌ ଏଙ୍ଗାଲେ ଆ ଡର୍ ଡର୍‍ତନ୍‍ଜି , ତିଆସନ୍‍ଲନ୍‍ ଞେନ୍‌ ଲୋଙଡ୍‍ ମେଗଲୋଙନ୍‌ ଅମଙ୍‌ବାନମ୍‌ ଜିର୍ରତାୟ୍‍ । ତିଆସନ୍‍ଲନ୍‍ "ମସାନ୍‍ ମନ୍‌ରାଜି ଆବର୍ନେ ପ୍ରବୁନ୍‌ ଆମଙ୍‌ବା ଅବ୍‍ଜନାଏନ୍‍ । 10 ତିସିଲଡ୍‍ ପ୍ରବୁନ୍‌ ମସାନ୍‍ଆଡଙ୍‌ ବରେନ୍‌, ଆମନ୍‌ ମନ୍‌ରାଞ୍ଜି ଆମଙ୍‌ବା ଜିର୍ରେ ଲଙେ ଡ ବିଅଡ଼େଃ ଆନିଞ୍ଜିଆଡଙ୍‌ ମବ୍‌ଡ଼ିରା, ଆରି ଆନିଞ୍ଜି ରମ୍ମଙ୍‌ ରମ୍ମଙ୍‌ ଆସିନ୍‍ରି ତୋବେତୁଜି, 11 ଆରି ୟାଗିଡିନ୍ନା ଆସନ୍‍ଲନ୍‍ ଅବ୍‍ଜାଡାନେତଜି ଇନିଆସନ୍‍ଗାମେଣ୍ଡେନ୍‍ ୟାଗିଡିନ୍ନାଲୋଙ୍‌ ଅଡ଼୍‌କୋନ୍‌ ମନ୍‌ରାଜି ଆତେମଡ୍‌ଲୋଙ୍‌ ପ୍ରବୁନ୍‌ ସିନୟ ବରୁଲୋଙନ୍‌ ଇୟ୍‌ତାୟ୍‌ପଡ୍‌ନ୍ନେ । 12 ତିଆସନ୍‍ଲନ୍‍ ଆମ୍ୱେଞ୍ଜି ଏର୍ରେ ମନ୍‌ରାଜି ଆସନ୍‌ ସଣ୍ଡିନ୍‌ ତୁବ୍‌ଲେ କେନ୍‌ ଆବର୍ନେ ବରା, ଆମ୍ୱେଞ୍ଜି ବ୍ବରୁନ୍‍ ଅଡ଼େ ସନ୍‍ଣ୍ଡି ଜାଗ୍ରତ ଏସୁଙେଡଙେ, ଆନାଜି ବ୍ବରୁନ୍‍ ଏସୁଙେତେ ଆନିନ୍‌ ରନବ୍ବୁନ୍‌ ଡେତେ । 13 ଆନ୍ନିଙ୍‌ ଆସି ଆନିନ୍‌ଆଡଙ୍‌ ଅଃସୁଙେଏ, ବନ୍‌ଡ ଆନିନ୍‌ ଏଙ୍ଗାଲେଜାକିଁୟ୍‌ଡେନ୍‌ ଅରେଙନ୍‌ ବାତ୍ତେ ରନବ୍ବୁନ୍‌ ଡେତେ, ଇଜ୍ଜଡେନ୍‍ ଅଆମନ୍‌ ବାତ୍ତେ ତନୁଞନ୍‌ ଡେତେ, ଜନ୍ତୁ ଡେତୋକି ମନ୍‍ରା ଡେଏତୋ ଅଃନମେଙେ ଗୋଗୋୟ୍‌ ଅୟମ୍‌ ପନେଡନ ଆସର୍ରଙ୍‌ ସଡ୍ଡାଏଣ୍ଡେନ୍‌ ଆନିଞ୍ଜି ତୋଣ୍ଡୋବରୁନ୍‌ ଜିର୍ରତାଜି ।" 14 ତି ସିଲଡ୍‌ ମସାନ୍‍ ବ୍ବରୁନ୍‍ ସିଲଡ୍‌ ପଲ୍ଲନାୟ୍‍ ମନ୍‌ରାଜି ଆମଙ୍‍ ଇୟ୍‌ଲେ ଆନିଞ୍ଜି ଆଡଅଙ୍‍ ମଡ଼ିର୍‌ ଏମ୍ମେଏଞ୍ଜି, ଅଡ଼େ ରମ୍ମଙ୍‌ ରମ୍ମଙ୍‌ ଆସିନ୍‌ରି ଅଡ଼୍‌କୋନ୍‌ ତୋବେତଜି । 15 ଆନିନ୍‌ ମନ୍‌ରାଜି ବର୍ରନ୍‍ଜି, ଆମ୍ୱେଞ୍ଜି ୟାଗି ଡିନ୍ନା ଆସନ୍‌ଲନ୍ ଅବ୍‌ଜାଡାନାବା, ରମ୍ମଙ୍‌ ରମ୍ମଙ୍‌ ଆଡୁକ୍ରି ସରିନ୍‌ ଏଲୁଡ୍‌ଡଙେ । 16 ତିସିଲଡ୍‌ ଅନବ୍‌ୟାଗି ଡିନା ଆଡୋତା ମେଗନ୍‌ ସଡାଲେ ଡ ମଲିୟ୍‍ତୋଡନ୍‍ ଡ ବରୁନ୍‌ ଆତୋଣ୍ଡୋ ଲୋଙଡ୍‌ ମେଗନ୍‌ ଡ ଗୋଗୋୟ୍‌ ଅବ୍‍ସଡ୍‌ଡାଲେ ପନେଡନ୍‍ ଅବ୍‍ସର୍‍ରଙଲନ୍‍, ତି ତମ୍ୱୁସିଂ ଆଡ୍ରକୋଲନ୍‍ଞ୍ଜି ଆମନ୍‍ରାଜି ୟୁଲନ୍‍ଞ୍ଜି । 17 ତି ଆତିକି ଇସ୍ୱରନ୍‌ ବାତ୍ତେ ଆର୍‌ନବାଙ୍‌ ଆସନ୍‌ ମସାନ୍‍ ମନ୍‌ରାଞ୍ଜିଆଡଙ୍‌ ତୁପସିଙନ୍‌ ସିଲଡ୍‌ ଅମ୍‌ଡୁଙ୍‌ଲେ ଓରୋଙ୍‌ଲାଜି, ତି ସିଲଡ୍‌ ଆନିଞ୍ଜି ବରୁନ୍‌ ଆଜାୟ୍‍ତା ତନଙେଞ୍ଜି । 18 ତାଡିନ୍ନା ସିନୟ ଆବରୁ ଓମୋଡ୍‌ଗୋ ଡେଲୋ, ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍‌ ତଗୋନାତୋଣ୍ଡୋଲୋଙ୍‍ ତକୁମଲେ ଜିର୍ରନେ ତେତ୍ତେ କୋଡ଼ାତୁଡନ୍‌ ଆଓମୋଡ୍‌ ତୋଣ୍ଡୋ ଡୋଲେନେ, ଆରି ଅଡ଼୍‌କୋନ୍‌ ଆବରୁ ୟୁଲେନେ । 19 ଆରି ପନେଡନ୍‍ ଆସନଡ୍ଡା ଗୋଗୋୟ୍‌ ସଡ୍ଡାଲେ ପାଙେନ୍‌, ମସାନ୍‍ ଗାମେନ୍‌ ତେତ୍ତେ ଇସ୍ୱରନ୍‌ ଅବୟ୍‌ ସର୍ରଙନ୍‌ ବାତ୍ତେ ଆନିନ୍‌ଆଡଙ୍‌ ଜାଲଙେନ୍‌ 20 ତି ସିଲଡ୍‌ ପ୍ରବୁନ୍‌ ସିନୟ ଆବରୁ ଆତୋଣ୍ଡୋ ଆଜିର୍ରେନ୍‌ ଆତିକି ମସାନ୍‍ ତି ଆବରୁ ଆତୋଣ୍ଡୋ ଓଡ୍ଡେଲାୟ୍‌, ତି ସିଲଡ୍‌ ମସାନ୍‍ ଜିର୍ରନ୍‍ । 21 ତାଡିନ୍ନା ପ୍ରବୁନ୍‌ ମସାନ୍‍ ବର୍ରନ୍‌, ଆମନ୍‌ ପଡ୍‌ଲନ୍‌ ମନ୍‌ରାଞ୍ଜିଆଡଙ୍‌ ବରାଜି, ଇଜ୍ଜାଡେନ୍‌ ପ୍ରବୁନ୍‌ଆଡଙ୍‌ ଆଗନିୟ୍‌ ଆସନ୍‌ ସଣ୍ଡିନ୍‌ ପଡେଞ୍ଜିଡେନ୍‌ ଆନିଞ୍ଜିଲୋଙ୍‌ ସିଡଲ୍‌ ଗୋଗୋୟ୍‌ ମନ୍‌ରାଜି ରବୁତଜି । 22 ଆରି ଅଙ୍ଗା ଆ ରାଓଡ଼ାଜି ପ୍ରବୁନ୍‌ ଆମଙ୍‌ବା ଅଡମ୍‌ଡେତଜିବନ୍‌ ଆନିଞ୍ଜି ନିୟ୍‌ ଆନିଞ୍ଜିଡମ୍‌ ମବ୍‌ଡ଼ିର୍‌ନେତଜି ଇଜ୍ଜଡେନ୍‌ ଆନିନ୍‌ ଆନିଞ୍ଜିଆଡଙ୍‌ ପବ୍‌ରଡ୍‌ତେ । 23 ତି ସିଲଡ୍‌ ମସାନ୍‍ ପ୍ରବୁନ୍‌ ବର୍ରନ୍‌ ମନ୍‌ରାଜି ସିନୟ ଆବରୁ ଜିର୍ରେ ଅଃରପ୍ତିଏଜି ଇନିଆସନ୍‌ଗାମେଣ୍ଡେନ୍‌ ଆମ୍ୱେନ୍‌ ରଡୋ ଆନସଜନ୍‌ ତିୟିଲେ ଇନ୍‌ଲେନ୍ଞ୍ଜି ବ୍ରର୍‍ଲେନ୍‍, ବ୍ରରୁନ୍‍ ଆସଣ୍ଡି ସଣ୍ଡିବା ଅଡ଼େ ତି ଆତେ ମଡ଼ିର୍‌ ଏମ୍ମେବା । 24 ତିଆଡିଡ୍‍ ପ୍ରବୁନ୍‌ ଆନିନ୍‌ଆଡଙ୍‌ ବରେନ୍‌, ଜିରା ଇୟ୍‌ପଡ୍‌ନା; ଆରି ଆରୋଣନ୍‌ ଆମନ୍‌ସରିନ୍‌ ଓରୋଙ୍‌ଡାଲେ ଇୟ୍‌ଡାୟ୍‌ବା; ବନ୍‌ଡ ରାଓଡ଼ାଞ୍ଜି ଡ ମନ୍‌ରାଞ୍ଜିଆଡଙ୍‌ ଏଙ୍ଗାଲେ ପ୍ରବୁନ୍‌ ଡନଣ୍ଡାୟନ୍‌ ଅଃତିୟେଜି, ତିଆସନ୍‍ ଆନିଞ୍ଜି ଆମଙ୍‌ବାନ୍‌ ଆଜନିର୍‌ ଆସନ୍‌ ସଣ୍ଡିନ୍‌ ପଡ୍ଡଙେଜିତଡ୍‌ । 25 ତିସିଲଡ୍‍ ମସାନ୍‍ ମନ୍‌ରାଜି ଆମଙ୍‍ ପ୍ପଡଲନ୍‍ ଜିର୍ରେ ଆନିଞ୍ଜି ଏତ୍ତେଲେ ଇୟ୍‌ଲେବରେଜି ।