Êxodo 36

1 କେନ୍‌ ଆସନ୍‌ ପ୍ରବୁନ୍‌ ଅଡ଼୍‌କୋନ୍‌ ଆବନାଁୟ୍‌ବରନ୍‌ ଅନ୍ତମ୍‌ ମଡ଼ିର୍‌ ଡରକୋନେନ୍‌ ଆ କାବ୍ବାଡ଼ା ଅଡ଼୍‌କୋନ୍‌ ଆତନୁବ୍‌ ଆସନ୍‌ ପ୍ରବୁନ୍‌ ବତ୍ସଲେଲନ୍‌ ଡ ଅଅଲିଆବନ୍‌ ଅଡ଼୍‌କୋ ଅଙ୍ଗା ଆମନ୍‌ରାଜିଆଡଙ୍‌ ଜନନାନ୍‌ ଡ ବୁଡ୍ଡିନ୍‌ ତିଏନ୍‌, ତି ଅଡ଼୍‌କୋନ୍‌ ଗୋଗୋୟ୍‌ ଜନାମରନ୍‌ କାବ୍ବାଡ଼ାତଞ୍ଜି ।

2 ମସାନ୍‌ ବତ୍ସଲେଲନ୍‌, ଅଅଲିଆବନ୍‌ଆଡଙ୍‌ ପ୍ରବୁନ୍‌ ଆମଙ୍‌ସିଲଡ୍‌ ମନ୍ନଲୋଙନ୍‌ ଜନନାନ୍‌ କେନ୍‌ ଅଡ଼୍‌କୋନ୍‌ ଆକାବ୍ବାଡ଼ାନ୍‌ ଆସନ୍‌ ମନ୍ନଲୋଙନ୍‌ ଅଡ଼୍‌କୋନ୍‌ ଗୋଗୋଲେୟ୍‌ ମନ୍‌ରାଜି ଓଡ୍ଡେଏଞ୍ଜି । 3 ତିଲୋଙ୍‌ ଆନିଞ୍ଜି ମଡ଼ିର୍‌ ଡରକୋନେଲୋଙନ୍‌ ଲନୁମନ୍‌ ଆସନ୍‌ ଇସ୍ରାଏଲନ୍‌ ମରଞ୍ଜି ଆପରାଙ୍‌ଲାଙାଞ୍ଜି ଆତିନିୟ୍‌ତିୟ୍‌ ଅଡ଼୍‌କୋନ୍‌ ମସାନ୍‌ ଆମ୍ମଙ୍‌ ସିଲଡ୍‌ ଜାଏଞ୍ଜି; ଏଲେଜାକିଁୟ୍‌ଡେନ୍‌ ମନ୍‌ରାଞ୍ଜିଆଡଙ୍‌ ଆଏଡ଼ର୍‌ ଡୋତାନ୍‌ ଆମଙ୍‌ବାଞ୍ଜି ଆ ଇସ୍ସୁମଞ୍ଜି ବାତ୍ତେ ଆରି-ଆରି ତନିୟ୍‌ତିୟନ୍‌ ପାଙ୍‌ଲାଜି । 4 ତିଲୋଙ୍‌ ମଡ଼ିର୍‌ ଡରକୋନେଲୋଙ୍‌ ଅଡ଼୍‌କୋ କାବ୍ବାଡ଼ାମରଞ୍ଜି ଡ ଜନାଡମ୍‌ମରଞ୍ଜି ରମ୍ମଙ୍‌ ରମ୍ମଙ୍‌ ଆକାବ୍ବାଡ଼ା ସିଲଡ୍‌ ଜିର୍ରାଜି କି ମୋସାନ୍‌ଆଡଙ୍‌ ଇୟ୍‌ଲାୟ୍‌ ବରେଜି, 5 "ପ୍ରବୁନ୍‌ ଇନି ଇନି ଲନୁମନ୍‌ ବନାୟଁନ୍‌ ତିୟେନ୍‌, ମନ୍‌ରାଞ୍ଜି ତି ଆଲନୁମନ୍‌ ଆସନ୍‌ ସନାୟ୍‌ସାୟ୍‌ ଆଜନବ୍‌ଜି ଗୋଗୋୟ୍‌ ପାଙ୍‌ତାୟ୍‌ ।" 6 ସିଲତ୍ତେ ମସାନ୍‌ ବନାୟନ୍‌ ତିୟ୍‌ଲେ ତମ୍ୱୁନ୍‌ ଅଡ଼୍‌କୋନ୍‌ କେନ୍‌ ଆତେ ବରାଜେନ୍,ଓବ୍ବାମର୍‌ କି ଆଇମର୍‌ କେନ୍‌ ଆଡରକୋନେ ଆସନ୍‌ ଆରି ତନିୟ୍‌ତିୟନ୍‌ ତୁବ୍‌ଡଙ୍‌ଜିତଡ୍‌; ତିଆସନ୍‌ ମନ୍‌ରାଜି ପନାଙନ୍‌ ସିଲଡ୍‌ ଲୋଲୋଲଞ୍ଜି । 7 ଇନିଆସନ୍‌ଗାମେଣ୍ତେନ୍‌ ଅଡ଼୍‌କୋନ୍‌ ଆକାବ୍ବାଡ଼ା ଆଲନୁମନ୍‌ ଆସନ୍‌ ଆଜନବଞ୍ଜି ଗୋଗୋୟ୍‌ ଡ ଆରି ଗୋଗୋୟ୍‌ ଡକୋଏନ୍‌ ।

ତମ୍ୱୁସିଙ୍‌ଲୋଙନ୍‌ ଇସ୍ୱରନ୍‌ ଡକୋଲନ୍‌

8 କେନ୍‌ ସିଲଡ୍‌ କାବ୍ବାଡ଼ାମରଞ୍ଜି ନିୟ୍‌ ଅଡ଼୍‌କୋନ୍‌ ଜନାମରଞ୍ଜି କବୁଙ୍‌ ମନଙ୍‌ଜେଏ ତାଳେରନ୍‌, ନିଡ଼ି, କରୋମାବ୍‌ ଡ ଲୁଲୁ ତାଳେରମ୍‌ ବାତ୍ତେ ସରେବା ତମ୍ବୁସିଙନ୍‌ ଦସଟା ଡରଙ୍‌ଡଙ୍‌କାବନ୍‌ ତୁବେଞ୍ଜି; ଆରି ତିଲୋଙ୍‌ କାବ୍ବାଡ଼ାମରଞ୍ଜି କିରୁବନ୍‌ ଆସିତ୍ର ତୁବେଞ୍ଜି । 9 ଅଡ଼୍‌କୋନ୍‌ ଆଡର୍‌ଙ୍‌ନେକାବ୍‌ ବକୁଡ଼ି ଆଟ ସନ୍ତି ଡନେଙ୍ଗାନ୍‌, ଉଞ୍ଜି ସନ୍ତି ଲନାଆଙନ୍‌ ଅଡ଼୍‌କୋନ୍‌ ଆଡରଙ୍‌ନେକାବ୍‌ ସମାନ୍‌ ଡକୋଏନ୍‌ । 10 ଆରି ଆନିନ୍‌ ମଲୟ୍‌ ଡରଙ୍‌ନେକାବନ୍‌ ଅଡ଼୍‌କୋନ୍‌ ମାୟେଞ୍ଜି; ଆନ୍ନା ମଲୟ୍‌ ଡରଙ୍‌ନେକାବନ୍‌ ମାୟ୍‌ମାୟେଞ୍ଜି । 11 ଆରି ନିୟ୍‌ ମରାୟ୍‌ନେଲୋଙ୍‌ ଆପର୍ତମ୍ମୁନ୍‌ ମଡ଼ିନ୍‌ ଡର୍ରଙ୍‌ନେକାବନ୍‌ ଡାଡ଼ିଲୋଙ୍‌ ନିଡ଼ି ତାଡ଼େରନ୍‌ ପାସଏଞ୍ଜି; ମରାୟ୍‌ନେଲୋଙନ୍‌ ବାଗୁ ମଡିନ୍‌ ଡର୍ରଙ୍‌ନେକାବନ୍‌ ଆତାଡ଼େର୍‌ଲୋଙ୍‌ ଏତ୍ତେଲେମାତୁବେଞ୍ଜି । 12 ଆନିନ୍‌ ଆପର୍ତମ୍ମୁ ଡରଙ୍‌କାବନ୍‌ ଆଲୁଡ୍‌ଲୋଙ୍‌ ବାକୁଡ଼ିଦସ ପାସନ୍‌ ଡ ମରାୟ୍‌ନେଲୋଙନ୍‌ ବାଗୁ ଡନଙ୍‌ନେକାବନ୍‌ ବାକୁଡ଼ିବାଗୁ ପାସନ୍‌ଏଞ୍ଜି; ତି ଆପାସ ଅଡ଼୍‌କୋନ୍‌ ରମ୍ମଙ୍‌ ଆମୁକ୍କାବାନ୍‌ ଡକୋଲନ୍‌ । 13 ଆରି ତି ବାଗୁଡ଼ିଦସ ସୁନ୍ନାନ୍‌ ଆନ୍ନାଲନ୍‌ ଡରଙ୍‌ନେକାବ୍‌ଲୋଙନ୍‌ ରମ୍ମଙ୍‌ ମାୟ୍‌ଲଞ୍ଜି; ତିଲୋଙ୍‌ ସରେବା ତମ୍ବୁସିଙନ୍‌ ଆବୟନ୍‌ ଡେଲୋ । 14 ତିସିଲଡ୍‌ ସରେବା ତମ୍ବୁସିଙନ୍‌ ୟନୁମନ୍‌ ଆସନ୍‌ କୁମ୍ମେଡନ୍‌ ଆଉସାଲ୍‌ ଏଗାର ଡର୍ରଙ୍‌ଡଙ୍‌କାବନ୍‌ ତୁବେଞ୍ଜି । 15 ଅଡ଼୍‌କୋନ୍‌ ଡନଙ୍‌ଡଙକାବନ୍‌ ଡନେଙ୍ଗାନ୍‌ ବକୁଡ଼ିଦସ ସନ୍ତି ଡ ଲନାଙନ୍‌ ଉଞ୍ଜି ସନ୍ତି, ନିୟ୍‌ ଏଗାର୍‌ଟା ଡନଙ୍‌ଡଙ୍‌କାବନ୍‌ ସମାନ୍‌ ଡକୋଏନ୍‌ । 16 ଆରି ଆନିନ୍‌ ମଲୟ୍‌ ଡର୍ରଙ୍‌ନେକାବନ୍‌ ରମ୍ମଙ୍‌ ଅନ୍ନାଲେ ଡକୋଏନ୍‌ ଡ ଡର୍ରଙ୍‌ନେକାବନ୍‌ ଅନ୍ନାଲେ ତୁଡ୍ରୁ ଡକୋଏନ୍‌ । 17 ଆଜନୁଡ଼େଲୋଙନ୍‌ ଆ ପର୍ତମ୍ମୁନ୍‌ ଆନମେଙ୍‌ ଦାଡ଼ିଜାଙ୍‌ ବାକୁଡ଼ି ଦସ ପାସଏଞ୍ଜି କି ବାଗୁ ଡରଙ୍‌ନେକାବନ୍‌ ଆଜନୁଡ଼େଲୋଙନ୍‌ ବାକୁଡ଼ି ଦସ ପାସଏଞ୍ଜି । 18 ଆରି ଆନିନ୍‌ ମାୟ୍‌ମାୟ୍‌ଲେ ଅବୟ୍‌ ତମ୍ୱୁନ୍‌ ତନୁବନ୍‌ ଆସନ୍‌ ପିତ୍ତଡ଼ଲୋଙନ୍‌ ବାକୁଡ଼ିଦସ ଆନ୍ନାଲନ୍‌ ତୁବେଞ୍ଜି । 19 ଆନିନ୍‌ ମିଞାମନ୍‌ ମେଣ୍ତାନ୍‌ ଆଉସାଲ୍‌ ତମ୍ୱୁନ୍‌ ଅବୟ୍‌ ବିଲେଙନ୍‌ ଡ ତିଆତୁଣ୍ତୁ ଲମନ୍‌ ଉସାଲନ୍‌ ଅବୟ୍‌ ବିଲେଙ୍‌ଲୋଙ୍‌ ତୁବ୍‌ବା । 20 କେନ୍‌ସିଲଡ୍‌ ଆନିନ୍‌ ସରେବା ତମ୍ବୁସିଙନ୍‌ ଆସନ୍‌ ସିଟିମ୍‌ ଅରାନ୍‌ ଆତନଙ୍‌ପଟାନ୍‌ ତୁବେଞ୍ଜି । 21 ତଙ୍‌ବୟ୍‌ ତଙ୍‌ବୟ୍‌ ପଟାନ୍‌ ଦସ ସନ୍ତି ଡନେଙଙ୍ଗା ଡ ବସନ୍ତି ବସାଙ୍କଡ଼େ ଲନାଆଙନ୍‌ ଡକୋଏନ୍‌ । 22 ଅଡ଼୍‌କୋନ୍‌ ପଟାନ୍‌ ରମ୍ମଙ୍‌ ରମ୍ମଙ୍‌ ବାଗୁ ଆମାୟ୍‌ମାୟ୍‌ ଡକୋଏନ୍‌; କେନ୍‌ ଅନ୍ତମ୍‌ ଆନିନ୍‌ ଅଡ଼୍‌କୋ ସରେବା ତମ୍ବୁସିଙନ୍‌ ଆ ପଟା ଆସନ୍‌ ତୁବେଞ୍ଜି । 23 ଆରି ଆନିନ୍‌ ଡର୍ରକୋନେସିଂନ୍‌ ଅର୍ଜଡ଼ୋମ୍‌ଗଡ୍‌ ଆସନ୍‌ ବକୁଡ଼ି ପଟାନ୍‌ ତୁବେଞ୍ଜି । 24 ଆରି ତି ବକୁଡ଼ି ପଟାନ୍‌ ଆଜାୟ୍‌ତା ବାକୁଡ଼ି ରୁପାନ୍‌ ଆନ୍ନାଲନ୍‌ ତୁବେଞ୍ଜି; ଅବୟ୍‌ ପଟାନ୍‌ ଆଜାୟ୍‌ତା ତିଲୋଙ୍‌ ବାଗୁଗଡ୍‌ ଆସନ୍‌ ବାଗୁ ଆନ୍ନାଲନ୍‌ ଡ ଲାଙ୍‌ଲେୟ୍‌ ପଟାନ୍‌ ଆଜାୟ୍‌ତା ଆନିଞ୍ଜି ବାଗୁ ବାଗୁ ଆସନ୍‌ ବାଗୁ ବାଗୁ ଆନ୍ନାଲନ୍‌ ତୁବେଞ୍ଜି । 25 ଆରି ଡର୍ରକୋନେସିଂନ୍‌ ଅନ୍ନାଗଡ୍‌ ଆସନ୍‌ ଅର୍କାବଡ଼ିଗଡ୍‌ ବକୁଡ଼ି ପଟାନ୍‌ ତୁବେଞ୍ଜି । 26 ଅବୟ୍‌ ପଟାନ୍‌ ଜାୟ୍‌ତାନ୍‌ ଆନ୍ନାଲନ୍‌ ଡ ଲାଙ୍‌ଲେୟ୍‌ ପଟାନ୍‌ ଆ ଜାୟ୍‌ତା ବାଗୁ ବାଗୁ ଆନ୍ନାଲନ୍‌, କେନ୍‌ ଅନ୍ତମ୍‌ ରୁପାନ୍‌ ବାକୁଡ଼ି ଆନ୍ନାଲନ୍‌ ତୁବେଞ୍ଜି । 27 ଆନିନ୍‌ ତମ୍ବୁସିଙନ୍‌ ଆବରୁବ୍‌ୟୋଙ୍‌ ଆକିଣ୍ଡୋଙ୍‌ସିଙ୍‌ଗଡ୍‌ ଆସନ୍‌ ତୁଡ୍ରୁ ପଟାନ୍‌ ତୁବେଞ୍ଜି । 28 ଆରି ସରେବା ତମ୍ବୁସିଙନ୍‌ ତି ଆକିନ୍‌ଡୋଙ୍‌ସିଙ୍‌ଗଡ୍‌ ବାଗୁ ଅନେଙ୍‌ଗଡ୍‌ ଆସନ୍‌ ବାଗୁ ପଟାନ୍‌ ଡୟ୍‌ଡୟ୍‌ଜେଞ୍ଜି । 29 ତିଲୋଙ୍‌ ଜାୟ୍‌ତାନ୍‌ ଆମାନେ ଡକୋଏନ୍‌ ଡ ତି ଅନ୍ତମ୍‌ ତି ଆତୋଣ୍ତୋ ଆପର୍ତମ୍ମୁନ୍‌ କାଡ୍ଡୁନ୍‌ ଆମଙ୍‌ ମାୟ୍‌ଲନ୍‌ ଡକୋଲନ୍‌, କେନ୍‌ ଅନ୍ତମ୍‌ ଆନିନ୍‌ ବାଗୁନ୍‌ ଅନେଙ୍‌ଗଡ୍‌ ମାୟେଞ୍ଜି । 30 ତିଲୋଙ୍‌ ଆଟଟା ପଟାନ୍‌ ଆରି ଅବୟ୍‌ ଅବୟ୍‌ ପଟାନ୍‌ ଆଜାୟ୍‌ତା ବାଗୁ ବାଗୁ ଆନ୍ନାଲନ୍‌, କେନ୍‌ ଅନ୍ତମ୍‌ ସଓଡ଼୍‌ଟା ରୁପାଅନ୍ନାକଲନ୍‌ ତୁବେଞ୍ଜି ।

31 ଆରି ଆନିନ୍‌ ସିଟିମ୍‌ ଆରାନ୍‌ ଡାଙ୍ଗୋନ୍‌ ତୁବ୍‌ଲେ ଡର୍ରକୋନେସିଂନ୍‌ ବନେଙ୍‌ଗଡ୍‌ ମଲୟ୍‌ ଡାଙ୍ଗୋନ୍‌ 32 ଆରି ଅନ୍ନାଗଡ୍‌ ପଟାନ୍‌ ମଲୟ୍‌ ଡାଙ୍ଗୋନ୍‌, ଆରି ଡର୍ରକୋନେସିଂ ବରୁବ୍‌ୟୋଙ୍‌ଗଡ୍‌ ପଟାନ୍‌ ମଲୟ୍‌ ଅଙ୍କିଆନ୍‌ ତୁବେଞ୍ଜି, 33 ଆରି ମଡ୍ଡିନ୍‌ ଆ ଅଙ୍କିଆ, ପଟାନ୍‌ ଆମଡ୍ଡିଲୋଙ୍‌ କେନ୍‌ ଆନେଙ୍‌ ଗଡ୍‌ ସିଲଡ୍‌ ତି ଆନେଙ୍‌ଗଡ୍‌ ତୁଙେନ୍‌ । 34 ଆରି ଆନିନ୍‌ ନିୟ୍‌ ଅଡ଼୍‌କୋନ୍‌ ଆପଟା ସୁନ୍ନାନ୍‌ ବଲେଞ୍ଜି ।

35 କେନ୍‌ ସିଲଡ୍‌ ଆନିନ୍‌ ନିଡ଼ି, କରୋମାବ୍‌, ଲୁଲୁ, ଆନାଙ୍‌ଗୁଡ୍‌ ଜେଏ ଲତୁମ୍‌କାବନ୍‌ ଡ କିରୁବନ୍‌ ଅନ୍ତମ୍‌ ସିତ୍ରନ୍‌ ଅବୟ୍‌ ଆପତେନ୍‌ ଆସିନ୍‌ରି ତୁବେଞ୍ଜି । 36 ଆରି ଆନିନ୍‌ ତିଆସନ୍‌ ସିଟିମ୍‌ ଅରାନ୍‌ ଉଞ୍ଜି ସୋଣ୍ତାଙନ୍‌ ତୁବ୍‌ଲେ ସୁନ୍ନାନ୍‌ ବଲେଞ୍ଜି ଡ ତି ଅଡ଼୍‌କୋନ୍‌ ଆନ୍ନାଲନ୍‌ ସୁନ୍ନାନ୍‌ ବାତ୍ତେ ବଲେଞ୍ଜି ଡ ତି ଆସନ୍‌ ରୁପାନ୍‌ ଉଞ୍ଜି ଆନ୍ନାଲନ୍‌ ଡକୋଏଞ୍ଜି । 37 ଆରି ଆନିନ୍‌ ତମ୍ୱୁନ୍‌ ଆଡୁଆରା ଆସନ୍‌ ନିଡ଼ି କବୁଙ୍‌ ମନଙ୍‌ ସରୁତାଳେରନ୍‌ ବାତ୍ତେ ଆତୁବ୍‌ତୁବ୍‌ ସିତ୍ରନ୍‌ ଆତୁବ୍‌ତୁବ୍‌ ଅବୟ୍‌ ୟନୁମ୍‌କାବନ୍‌ ତୁବେଞ୍ଜି । 38 ତିଲୋଙ୍‌ ମଲୟ୍‌ ସୋଣ୍ତାଙନ୍‌ ତି ଅଡ଼୍‌କୋନ୍‌ ଆନ୍ନାଲନ୍‌ ତୁବେଞ୍ଜି; ଆରି ତି ଅଡ଼୍‌କୋନ୍‌ ଆନଗଡ୍‌ବାନ୍‌ ଡ ଜରିବାଡନ୍‌ ସୁନ୍ନାନ୍‌ ବାତ୍ତେ ତୁବେଞ୍ଜି, ବନ୍‌ଡ ଆନିଞ୍ଜି ମଲୟ୍‌ ଆନ୍ନାଲନ୍‌ ପିତ୍ତଳନ୍‌ ଆତେ ଡକୋଏଞ୍ଜି ।