1 ତି ସିଲଡ୍‌ ଆନିଞ୍ଜି ଏଲିମ୍ ସିଲଡ୍‌ ଜିରେଞ୍ଜି, ଆରି ମିସର୍‌ ଡେସାନ୍‌ ଆରୁମ୍‌ରେଙେଞ୍ଜି ସିଲଡ୍‌ ଅନବ୍‌ବାଗୁ ଆଙ୍ଗାୟ୍‌ ପନ୍ଦର ଡିନ୍ନାଲୋଙ୍‌ ଇସ୍ରାଏଲନ୍‌ ଆଅଞ୍ଜି ଅଡ଼୍‌କୋନ୍‌ ଆ ମଣ୍ଡଡ଼ି ଏଲିମ୍‍ ଡ ସିନୟ୍‌ ଆମଡ୍ଡି ସିନ୍‍ ଆରିଙ୍‌ରିଙ୍‌ଲୋଙନ୍‍ ତୁଙେଞ୍ଜି । 2 ତିଆଡିଡ୍‌ ଇସ୍ରାଏଲ୍‌ମରଞ୍ଜି ଅଡ଼୍‌କୋ ମଣ୍ତଡ଼ିନ୍‌ ମସାନ୍‍ ଡ ଆରୋଣନ୍‍ ଆ ବିରୁଦଲୋଙ୍‌ ଆରିଙ୍‌ରିଙ୍‌ଲୋଙନ୍‍ ଡୁସେଲେ ବର୍ରଞ୍ଜି । 3 ଆରି,ଇସ୍ରାଏଲ ମରଞ୍ଜି ଆନିଞ୍ଜି ବର୍ରେଞ୍ଜି, "ୟୋଙ୍‌, ୟୋଙ୍‌, ଇନ୍‌ଲେଞ୍ଜି ଅଙ୍ଗାଆଡିଡ୍‌ ଜେଲୋ ସୋଡନ୍‍ ଆମଙ୍‍ ତୁତୁମ୍‍ଡାଲେ ବବ୍‍ରିୟ୍‍ପୁଙ୍‍ଲନ୍‍ ଏଗାଗାଲନାୟ୍‍, ତିଆଡି ଇନ୍‌ଲେଞ୍ଜି ମିସର୍‍ଡେସାନ୍‍ ପ୍ରବୁନ୍‌ ଆସିଂଲୋଙ୍‌ ରବୁତଲେନ୍‍ବନ୍‍ । ଆମ୍ବେଞ୍ଜି କେନ୍‌ ଅଡ଼୍‌କୋନ୍‌ ଆମଣ୍ତଡ଼ିଜି ଇର୍‍ଗାଲେ ରନବୁ ଆସନ୍‌ ଇନ୍‍ଲେଞ୍ଜିଆଡଙ୍‌ ଅମ୍‍ଡୁଙ୍‍ଡାଲେ କେନ୍‍ ଆରିଙ୍‌ରିଙ୍‌ଲୋଙନ୍‍ ଓରୋଙ୍‍ଲଲେନ୍‍ ।" 4 ତି ଆସନ୍‌ ସଦପ୍ରବୁନ୍ ମସାନ୍ ବରେନ୍‍, "ଗିୟ୍‌ବା, ଞେନ୍‌ ଆମ୍ୱେଞ୍ଜି ଆସନ୍‌ ରୁଆଙନ୍‌ ସିଲଡ୍‌ ଗାଗାନେ ଜନବନ୍‌ ଏତୁବ୍‍ବ୍ବା; ଆରି ମନ୍‌ରାଜି ଡୁଙ୍‌ଲନ୍‍ ଜିର୍ରେ ଅଡ଼୍‌କୋ ଡିନ୍ନାନ୍‌ ସମାନ୍‍ ଗାଗାନେ ସାୟ୍‍ତଜି; ତିଲୋଙ୍‌ ଆନିଞ୍ଜି ଇନ୍‌ଲେନ୍‌ ଅନସୟ୍‌ଲେନ୍‌ ଲୁମତଜି ଅଡ଼େ ଇଜ୍ଜା, ଇନ୍‌ଲେନ୍‌ କେନ୍‍ ଆମନାଲ୍‍ମାଲ୍‍ ଏତିୟ୍‍ବା । 5 ତୁଡ୍‌ରୁ ଡିନ୍ନାଲୋଙ୍‌ ଆନିଞ୍ଜି ଇନି ପାଙତାଜି, ତିଆତେ ଡିଞେଞ୍ଜିଡେନ୍‍ ଆଡ଼େରନ୍‌ ଅଙ୍ଗାତେ ସାୟ୍‍ତଜି, ତିଆତେ ବାଗୁଗୁନା ଡେତେ ।" 6 ତି ସିଲଡ୍‌ ମସାନ୍‍ ଡ ଆରୋଣନ୍‌ ଇସ୍ରାଏଲଞ୍ଜି ବର୍ରେଞ୍ଜି, "ପ୍ରବୁନ୍‌ ଡ ଆମ୍ବେଞ୍ଜି ମିସର୍‍ଡେସାନ୍‍ ସିଲଡ୍‌ ଅମ୍‍ଡୁଙ୍‍ଲେ ଓରୋଙ୍‍ଲବେନ୍‍, କେନ୍‍ ଆତେ ଆମ୍ୱେନ୍‌ ସାଲୁମନ୍‍ ଜନାତବେନ୍‌ । 7 ଆରି,ଡୋତାନ୍‍ ଆଓଲ୍ଲେ ପ୍ରବୁନ୍‌ ଆଗନୁଗୁ ଏଗିୟ୍‌ତେ; କେନ୍‍ ଆସନ୍‌ ପ୍ରବୁନ୍‌ ଆ ବିରୁଦଲୋଙ୍‌ ଡନୁସେବେନ୍‌ ଆନିନ୍‌ ଅମ୍‍ଡଙ୍‌ତେ; ଇନ୍‌ଲେଞ୍ଜି ଆନା ଡ, ଆମ୍ବେଞ୍ଜି ବିରୋଦଲୋଙ୍‌ଞେନ୍‌ ଏଡୋସେତେ ?" 8 ଆରି ମସାନ୍‍ ବର୍ରନ୍‌, "ପ୍ରବୁନ୍‌ ସାଲ୍ଲୁମ୍‍ଓଲେନ୍‍ ଗାଗାନେ ଆସନ୍‌ ଆମ୍ବେଞ୍ଜି ଜେଲୁନ୍‍ ତିୟ୍‍ତବେନ୍‍ ଆରି ଡୋତାନ୍‍ ଆଓଲ୍ଲେ ବନୋଓନ୍‌ ଜାୟ୍‌ ଗାଗାନେନ୍‌ ତିୟ୍‌ତବେନ୍‌; ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍‌ ଆବିରୋଡଲୋଙନ୍‌ ଏର୍‌ଲୁମେନ୍‌ ଡନୁସେବେନ୍‌ ଆନିନ୍‌ ଅମ୍‍ଡଙ୍‌ତେ । ଇନ୍‌ଲେନ୍‌ ଆନା ? ସଙ୍ଗତାବେନ୍‍ଞ୍ଜି ବିରୋଡଲେନ୍‍ ତଡ୍‌ ବନ୍‌ଡ ପ୍ରବୁନ୍‌ ଆବିରୁଦଲୋଙ୍‌ ଆମ୍ୱେଞ୍ଜି ଡନୁସେନ୍‌ ଡେତେ ।" 9 ଆରି ମସାନ୍‍ ଆରୋଣନ୍‍ଆଡଙ୍‌ ବରେନ୍‍, "ଆମ୍ୱେନ୍‌ ଇସ୍ରାଏଲନ୍‌ ଆଅଞ୍ଜି ଅଡ଼୍‌କୋନ୍‌ ଆ ମଣ୍ତଡ଼ିଆଡଙ୍‌ ବର୍ବା, ଆମ୍ୱେଞ୍ଜି ପ୍ରବୁନ୍‌ ଆମୁକ୍କାବା ଜିରାୟ୍‌ବା, ଆନିନ୍‌ ଡନୁସେବେନ୍‌ ଅମ୍‍ଡଙେନ୍‌ ।" 10 ତି ଆସନ୍‌ ଆରୋଣନ୍‌ ଇସ୍ରାଏଲ ମରଞ୍ଜି ଅଡ଼୍‌କୋନ୍‌ ମଣ୍ତଡ଼ିନ୍‍ କେନ୍‍ ଆବର୍ନେ ଆଡିଡ୍‌ ଆନିଞ୍ଜି ଆରିଙ୍‌ରିଙ୍‌ ଲଅଗଡ୍‍ ଆଗ୍ରିଜେଞ୍ଜି,ଗିୟ୍‌ବା,ମେଗନ୍‍ନିୟ୍‍ ପ୍ରବୁନ୍‌ ଆସାଆରନ୍‌ ଗିୟ୍‌ତାଏନ୍‌ । 11 ଆରି,ପ୍ରବୁନ୍‌ ମସାନ୍‍ଆଡଙ୍‌ ବରେନ୍‍, 12 ଇନ୍‌ଲେନ୍‌ ଇସ୍ରାଏଲ ମରଞ୍ଜି ଆ ବନଡ୍‌ବଡ୍‌ବରନ୍‌ ଏଅମ୍‍ଡଙ୍‍ଲାୟ୍‍, ଆମ୍ୱେନ୍‌ ଆନିଞ୍ଜିଆଡଙ୍‍ ବରାଜି ଆମ୍ୱେନ୍‌ ସାଲ୍ଲୁମ୍‌ ଓଲ୍ଲେନ୍‌ ଜେଲୁନ୍‍ ଏଜୋମ୍‌ତେ ଆରି ଡୋତାନ୍‍ ଆ ଓଲ୍ଲେ ରୁଟ୍ଟିନ୍‌ ଜୋମ୍‌ଲେ ବୋଓତବେନ୍‍, ଞେନ୍‍ ପ୍ରବୁ ଇସ୍ୱରବେନ୍‌ କେନ୍‌ଆତେ ଆମ୍ୱେନ୍‌ ଜନାତବେନ୍‌ । 13 ସିଲତ୍ତେ ସାଲ୍ଲୁମ୍‌ ଓଲେନ୍‌ ଗୁଡିତିଡଞ୍ଜି ଜିର୍ରେ ତୁପସିଙ୍‌ରେଙନ୍‌ ବରିଜେଞ୍ଜି, ଡୋତାନ୍‍ ଆଓଲ୍ଲେ ତୁପସିଙ୍‌ରେଙନ୍‌ ଏର୍ରେ ସସିରାନ୍‍ ଅସେଡ୍‌ଲାୟ୍‌ । 14 ତି ସିଲଡ୍‌ ଆରସେଡ୍‌ଲାଞନ୍‌ ଆସସିରା ତୁଣ୍ତୋନ୍‍ ତୋଣ୍ଡୋନ୍‌ ଆଜିର୍ରେନ୍‌ ସିଲଡ୍‌ ଲବରେଙନ୍‍ ଅଡ଼୍‌କୋନ୍‌ ଆସସିରା ଅନ୍ତମ୍‌ ତୋଡ଼ୋର୍‌ ସନ୍ନାରା ଆଜନବ୍‌ ଆରିଙ୍‌ରିଙ୍‌ ଡରକୋନେବାନ୍‌ ଆଗଲୋ ଡକୋଲନ୍‌ । 15 ଆରି ଇସ୍ରାଏଲ୍‌ମରଞ୍ଜି ତିଆତେ ଗିୟ୍‍ଲେ ରମଙ୍ ରମଙ୍ ବର୍ରଞ୍ଜି, "କେନ୍‍ ଆତେ ଇନି ?" କେନ୍‍ ଆତେ ଇନିଡକୋଏନ୍‍,ଆନିଞ୍ଜି ଅଜନାଲଜି । ତିଲୋଙ୍‌ ମସାନ୍‍ ବର୍ରନ୍‌, "କେନ୍‍ ଆମ୍ବେଞ୍ଜି ଗାଗାନେ ଆସନ୍‌ ପ୍ରବୁନ୍‌ ଆଜନୋମ୍‌ଜୋମ୍‌ ।" 16 କେନ୍‍ ଆବର୍ନେ ପ୍ରବୁନ୍‌ ବର୍ରନ୍‌, ଆମ୍ବେଞ୍ଜି ଅଡ଼୍‌କୋ ମନ୍‌ରାନ୍‌ ରମଙ୍‍ ରମଙ୍‍ ଆଗାଗାନେ ଆବୋର୍ସା ଜନାଲେ ତିଆତେ ସାୟ୍‍ବା, ଆମ୍ବେଞ୍ଜି ଅଡ଼୍‌କୋମନ୍‍ରାନ୍‍ ଆସନ୍‌ ରମଙ୍‍ ରମଙ୍ ପୁତଲୋଙନ୍‍ ଆମନ୍‌ରାଜି ଡିଡିଲେ ଅବୟ୍‌ନେ ଅବୟ୍‌ନେ ଆସନ୍‌ ଅବୟ୍‌ ଅବୟ୍‌ ମରଙ୍‍ ଆସ୍ରମାନ ସାୟ୍‍ବା । 17 ତିଲୋଙ୍‌ ଇସ୍ରାଏଲ୍‌ମରଞ୍ଜି ତିଅନ୍ତମ୍‌ ତୁବେଞ୍ଜି; ଆନା ଗୋଗୋୟ୍‌ ଡ ଆନା ଅସୋୟ୍‌ ସାଜେଞ୍ଜି । 18 ତି ସିଲଡ୍‌ ଆନିଞ୍ଜି ଓମରଲୋଙନ୍‌ ଆ ତରେରେଡେଞ୍ଜି; ଆନା ଗୋଗୋୟ୍‌ ସାଜେନ୍‍, ଆନିନ୍‌ ଆସନ୍‌ ଅଃଲାଗାଲୋ, ଆରି ଆନା ଅସୋୟ୍‌ ସାଜେନ୍‍ ଆନିନ୍‌ ଆରି ସନାୟ୍‌ସାୟ ଅଃଡେଲୋ; ଏନ୍ନେଲେ ଆରନପ୍ତି ଜୋମଞ୍ଜି ଅନ୍ତମ୍‌ ଆନିଞ୍ଜି ସାଜେଞ୍ଜି । 19 ତି ସିଲଡ୍‌ ମସାନ୍‍ ଆନିଞ୍ଜିଆଡଙ୍‌ ବରେଞ୍ଜି, "ଆମ୍ବେଞ୍ଜି ଆନ୍ନିଙ୍‌ ଡୋତାନ୍‍ ଜାୟ୍‌ ଇନ୍ନିଙ୍‌ ଏଡକ୍କୋଡଙ୍‌ ।" 20 ଏଲେଜନଙ୍‌ଡେନ୍‌ ଆନିଞ୍ଜି ମସାନ୍‍ ଆବର୍ନେ ଅଃମାନ୍ନେଲଜି ଆରି ଆନା ଆନା ଡୋତାନ୍‍ଜାୟ୍‍ ଅର୍ସୋୟ୍‌ ଅର୍ସୋୟ୍‌ ଡକ୍କୋଏଞ୍ଜି; ବନ୍‌ଡ ବୋବ୍ବୋଡେନ୍‌ ଆରି ସଅଏନ୍‍ । ତିଆସନ୍‌ ମସାନ୍‍ ଆଉପରେଙଞ୍ଜି ବରାବେନ୍‌ । 21 କେନ୍‌ ସିଲଡ୍‌ ଅଡ଼୍‌କୋ ଡିନାନ୍‌ ଡୋତାନ୍‍ ଆନିଞ୍ଜି ରମଙ୍‍ ରମଙ୍‍ ଗାଗାନେ ଆବୋର୍ସା ଡମ୍‍ଲେ ଆନିଞ୍ଜି ସାଜେଞ୍ଜି; ବନ୍‌ଡ ଅଗୋୟ୍‌ ଆଡ୍ରାଗାଏନ୍‌ ତିଆତେ ଲେଏମେନ୍‌ । 22 ତି ସିଲଡ୍‌ ତୁଡ୍ରୁ ଡିନ୍ନାଲୋଙନ୍‍ ଆନିଞ୍ଜି ବାଗୁଗୁଣା ଅଡ଼୍‌କୋ ମନଡ୍ରାନ୍‍ ବାଗୁ ବାଗୁ ଓମରନ୍‍ ସାଜେଞ୍ଜି,ତିଲୋଙ୍‌ ମଣ୍ତଡ଼ିନ୍‍ ଆସୋଡ଼ା ଅଡ଼୍‌କୋଞ୍ଜି ଜିର୍ରେ ମସାନ୍‍ ଅବ୍‍ଜନାଏନ୍‍ । 23 ତିଆଡିଡ୍‌ ମସାନ୍‍ ଆନିଞ୍ଜିଆଡଙ୍‌ ବରେଞ୍ଜି, "ପ୍ରବୁନ୍‌ ତିଆତେ ଗାମେନ୍‌, ବିଅ ଲୋଲୋନେ ଡିନ୍ନା, ପ୍ରବୁନ୍‌ ଆଞୁମ୍‌ଲୋଙ୍‌ ମଡ଼ିର୍‌ ଲୋଲୋନେ ଡିନାନ୍‌ ଡେତେ; କେନ୍‍ ଆସନ୍‌ ଆମ୍ବେଞ୍ଜି ଇନି ଏଗାୟ୍‌ତେ ଗାୟ୍‌ବା, ଅଙ୍ଗାତେ ଡିଁୟ୍‌ବା ଡିଞ୍‌ବା; ଲାଙ୍‌ଲେଡ୍‌ ଅସୋୟ୍‌ ଡକୋଏନ୍‌ ଡେନ୍‌, ତିଆତେ ଡୋତାନ୍‌ଜାୟ୍‌ ତର୍ତୁମ୍‌ଲେ ଡକ୍କୋବା ।" 24 ଆନିଞ୍ଜି ମସାନ୍‍ ଆବର୍ନେ ଅନ୍ତମ୍‌ ଡୋତାନ୍‍ଜାୟ୍‍ ଡକ୍କୋଏଞ୍ଜି, ଆରି ତିଆତେ ଅଃସଅଲୋ, କି ତିଲୋଙ୍‌ ଇଡ୍‌ନିଙ୍‍ ଅବ୍ବୋବୋଲ୍ଲୋ । 25 ମସାନ୍‍ ବର୍ରନ୍‌, "ଲଙେ ଆମ୍ବେଞ୍ଜି ତିଆତେ ଜୋମ୍‌ବା, ଇନିଆସନ୍‌ ଲଙେ ପ୍ରବୁନ୍‌ ଲୋଲୋନା ଡିନା, ଲଙେ ବସେଙନ୍‍ ତିଆତେ । 26 ଆମ୍ବେଞ୍ଜି ତିଆତେ ତୁଡ୍ରୁଡିନା ସାୟ୍‍ବା,ବନ୍‌ଡ ସାତଡିନ୍ନାଇଙନ୍‍ ଲୋଲୋନେ ଡିନ୍ନା, ତିଲୋଙ୍‌ ଇଡ୍‌ନିଙ୍‍ ।" 27 ଏଲେଜନଙ୍‌ଡେନ୍‌ ସାତଡିନାଲୋଙ୍‌ ନିୟ୍‌ ଆନା ଆନା ସନାୟ୍‍ବାନ୍‍ ଇୟେଞ୍ଜି, ବନ୍‌ଡ ଇନ୍ନିଙ୍‌ ଅଃଞାଙ୍‌ଲଜି । 28 ତିଲୋଙ୍‌ ପ୍ରବୁନ୍‌ ମସାନ୍‍ ବରେନ୍‍, "ଆମ୍ବେଞ୍ଜି ଗାମେନ୍‌ ନ୍‍ ଡ ଅନସଜନ୍‌ ଆମନାନ୍ନେ ଆସନ୍‌ ଡିଅଙ୍‍ଡିନ୍ନା ଏର୍ନଡ଼େନ୍‌ ଏଡକୋତନ୍‌ ? 29 ଗିୟ୍‌ବା,ପ୍ରବୁନ୍‌ ଆମ୍ବେଞ୍ଜି ଲୋଲୋନେଡିନ୍ନା ଇଙନ୍‌ ଆତରିୟ୍‌ତବେନ୍‌ ଆସନ୍‌ ପ୍ରବୁନ୍‌ ଆମ୍ବେଞ୍ଜି ତୁଡ୍ରୁଡିନା ବାଗୁଡିନ୍ନା ଆଗାଗାନେ ତିୟ୍‍ତବେନ୍‍; ଆମ୍ବେଞ୍ଜି ଅଡ଼୍‌କୋମନ୍‌ରାନ୍‌ ସାତଡିନ୍ନା ରମଙ୍‍ ରମଙ୍ ଆଡରକୋନେଲୋଙ୍‌ ଡୁଙ୍‌ଲନ୍‌ ଏର୍‌ଜନିରନ୍‌ ତେତେନ୍‍ ଡକୋନାବା ।" 30 ତିଡେନ୍‍ ମନ୍‍ଡ୍ରାଞ୍ଜି ସାତଡିନ୍ନା ଲୋଲୋଲଞ୍ଜି । 31 ଆରି, ଇସ୍ରାଏଲଞ୍ଜି ଆକେଜ୍ଜାମର୍‍ଜି ତି ଆଗାଗାନେ ଆଞୁମ୍‌ ମାନ୍ନା ଅବ୍‌ଞୁମେଞ୍ଜି; ତିଆତେ ଦନିଆନ୍‍ ଅନ୍ତମ୍‌ ଜେଏଡମ୍ ଆରି ଆ ମନନାନ୍‌ ଆଡଙ୍‌ଡାନ୍‌ ଆମୟ୍‌ମାୟନ୍‌ ଆରୁଟ୍ଟି ଅନ୍ତମ୍‌ ଡକୋଏନ୍‌ । 32 ତିସିଲଡ୍‍ ମସାନ୍‍ ଗାମେନ୍‌, ପ୍ରବୁନ୍‌ କେନ୍‍ ଆବନାଁୟ୍‌ବର୍‌ ତିୟ୍‍ତିୟ୍‍ଲଙ୍‍ଲନ୍‍, ଆନିନ୍‌ ମିସର୍‌ ଡେସାନ୍‌ ସିଲଡ୍‌ ଆରୋରୋଙ୍‌ଲଙ୍‌ଲନ୍‌ ଆଡିଡ୍‌ ଆରିଙ୍‌ରିଙ୍‌ ଡରକୋନେଲୋଙନ୍‌ ଅଙ୍ଗା ଆ ରୁଟ୍ଟି ଆଗାଗାନେ ତିୟ୍‍ତିୟ୍‍ଲଙ୍‍ନ୍‍ ତିଆତେ ଏଙ୍ଗାଲେ ଅଲ୍‌ସଙ୍କୁଡ୍‌ ସଙ୍କୁଡ୍‌ ମନ୍‌ରାବେଞ୍ଜି ଗିୟ୍‍ତଜି ତିଆସନ୍‍ ଆନିଞ୍ଜି ଆସନ୍‌ ବ ଓମର୍‌ ଆଡ୍ରେତେନ୍‌ ଅନ୍ତମ୍‌ ମାନ୍ନାନ୍‌ ଡକ୍କୋବା । 33 ତିଆଡିଡ୍‍ ମସାନ୍‍ ଆରୋଣନ୍‌ ବରେନ୍‍, "ଆମନ୍‌ ଅବୟ୍‌ ସିମ୍ମା ପାଙ୍‍ଲେ ଅବୟ୍‌ ମନ୍‍ଡ୍ରାନ୍‍ ଆସନ୍‌ ମାନ୍ନାନ୍‍ ବର୍ବରିୟ୍‍ଲେ ପ୍ରବୁନ୍‌ ଆମଙ୍‍ ଡକୋବା; ତିଆତେ ଆମ୍ବେଞ୍ଜି ପୁର୍ବା ଜୋଜୋଲେଞ୍ଜି ଆସନ୍‌ ଡକ୍କୋଆ ।" 34 ତିଆସନ୍‍ ଆରୋଣନ୍‌ ମସାନ୍‍ଆଡଙ୍‍ ପ୍ରବୁନ୍‌ ଆବର୍ରନ୍‌ ଅନ୍ତମ୍‌ ଅନଗଡ୍‌ ପେଲନ୍‌ ଅମଙ୍‌ବାନ୍‌ ଆଡନକ୍କୋ ଆସନ୍‌ ତିଆତେ ତର୍ତୁମ୍‌ଲେ ଡକ୍କୋଏଞ୍ଜି । 35 ଇସ୍ରାଏଲ୍‌ମରଞ୍ଜି ଆଡ୍ରକୋନେ ଡେସାଲୋଙ୍‌ ଅନ୍‌ରଙ୍‌ ଅଡ଼ୋଏଞ୍ଜି ଜାୟ୍‌ ବାକୁଡ଼ି ବର୍ସେଙ୍‍ ଜାୟ୍‌ ତି ଆମାନ୍ନା ଜୁମେଞ୍ଜି ଡ କିଣାନ୍‌ ଡେସାନ୍‌ ଆସଣ୍ଡି ଅନ୍‌ରଙ୍‌ ତୁଙାଙନ୍‍ଜାୟ୍‍ ଆନିଞ୍ଜି ତିଆତେ ଜୋମେଞ୍ଜି । 36 ଅବୟ୍‌ ଓମର ଓପାର ଦଶମାଂସ ।