1 ଆରି ଞେନ୍‌ ଆସନ୍‌ ରାଓଡ଼ା କାବ୍ବାଡ଼ାନ୍‌ ଆଲନୁମ୍‌ ଆସନ୍‌ ଆମ୍ୱେନ୍‌ ଆନିଞ୍ଜି ତନୁବନ୍‌ ଆସନ୍‌ ଆମ୍ୱେନ୍‌ ଆନିଞ୍ଜି ଆଡଙ୍‌ କେନ୍‌ ଅଡ଼୍‌କୋନ୍‌ ଆଲନୁମ୍‌ ଲୁମ୍‌ବା; ଏର୍ଡୋସା ଅବୟ୍‌ ଆଅନ୍‌ତାଙନ୍‌ ଡ ବାଗୁ ମେଣ୍ତାନ୍‌ ପାଙ୍‌ବା, 2 ଆରି କମିରନ୍‌ ଏର୍‌ମନାୟନ୍‌ ଆ ରୁଟି ଡ ମିଞଲନ୍‌ ଆମାୟ୍‌ମାୟନ୍‌ କମିରନ୍‌ ଏର୍‌ମନାୟନ୍‌ ଆ ପିଟା ଡ ମିଞଲନ୍‌ ଆମାୟ୍‌ମାୟନ୍‌ 3 ଆରି ଅବୟ୍‌ ଡାଲାଲଙନ୍‌ ତିଆତେ ଡକୋବା,ତି ଡାମ୍ୱଡ଼ାନ୍‌ ଡ ବାଗୁ ମେଣ୍ତାନ୍‌ ବାତ୍ତେ ତି ଆଡାଲା ଏପାଙ୍‌ତାୟ୍‌ । 4 ଆରି ଆରୋଣନ୍‌ ଡ ଆ ଡାଙ୍ଗାଡ଼ାଅଞ୍ଜି ସମାଗମ ତମ୍ୱୁନ୍‌ ଆମଙ୍‌ବାନ୍‌ ଓରୋଙ୍‌ଲେ ଡାଆଲୋଙନ୍‌ ଆନିଞ୍ଜି ଉମ୍ମାବାଜି । 5 ତି ସିଲଡ୍‌ ସିନ୍‌ରିଞ୍ଜି ଅଡ଼୍‌କୋନ୍‌ ପାଙ୍‌ଲେ ଆରୋଣନ୍‌ ଆସିନ୍‌ରିନ୍‌, ଏପୋଦନ୍‌, ଏପୋଦ ଡ ମାୟଙନ୍‌ ଆଡର୍‌ଙ୍‌ନେକାବ୍‌ ଅବ୍‌ରବା, ଆରି ଏପୋଦନ୍‌ ଏର୍ଜାଡ଼ିକାନ୍‌ ତୁବ୍‌ଲେ ଆକୁନ୍‌ଡୁବ୍‌ଲୋଙନ୍‌ ଜିବା । 6 ଆବବ୍‌ଲୋଙନ୍‌ ରେବ୍ବବ୍‌ଲନ୍‌ ତି ଆତୋଣ୍ତୁ ମଡ଼ିର୍‌ ରନୁବ୍‌ବବନ୍‌ ତିୟ୍‌ବା । 7 କେନ୍‌ ସିଲଡ୍‌ ଅବିସେକ ଆନ୍ନେମେ ମିଞଲନ୍‌ ପାଙ୍‌ଲେ ଆବବ୍‌ଲୋଙନ୍‌ ରୁଲେ ଆନିନ୍‌ ଅବିସେକ ଅମ୍ମେବା । 8 ତିଲୋଙ୍‌ ଆରୋଣନ୍‌ ଆ ଅନଞ୍ଜି ଓରୋଙ୍‌ଲେ ଅଙ୍ଗିନ୍‌ ଅବ୍‌ରବା । 9 ଆରୋଣନ୍‌ ଡ ଆଡାଙ୍ଗାଡ଼ାଅନଞ୍ଜିଆଡଙ୍‌ ଅବ୍‌ରେଡ୍‌ଡୁବାଜି ଡ ଆନିଞ୍ଜି ଆବବ୍‌ଲୋଙନ୍‌ ରନେବବ୍‌ ରେବ୍ବବ୍‌ତନ୍‌; ଏତ୍ତେଲ୍‌ଡେନ୍‌ ଆନିଞ୍ଜି ଆଏଡ଼ର୍‌ ଅନସଜନ୍‌ ବାତ୍ତେ ରାଓଡ଼ାନ୍‌ କାବ୍ବାଡ଼ାନ୍‌ ତନବ୍‌ନଙନ୍‌ ଡେତେ । କେନ୍‌ ଅନ୍ତମ୍‌ ଆମ୍ୱେନ୍‌ ଆରୋଣନ୍‌ ଡ ଆଡାଙ୍ଗାଡଅନଞ୍ଜି ଏତବ୍‌ନଙ୍‌ତଜି । 10 କେନ୍‌ ସିଲଡ୍‌ ଆମ୍ୱେନ୍‌ ସରେବା ତମ୍ବୁସିଙନ୍‌ ଆମୁକ୍କାଲୋଙ୍‌ ତି ସଣ୍ତତାଙନ୍‌ ପାଙାଇବା, ଆରି ଆରୋଣନ୍‌ ଡ ଆ ଡାଙ୍ଗଡାଅନଞ୍ଜି ତି ଆ ସଣ୍ଡତାଙନ୍‌ ଆବବ୍‌ଲୋଙନ୍‌ ତର୍ଡମ୍‌ ତର୍ଡମ୍‌ ଅସିନ୍‌ ଡକ୍କୋତଜି । 11 ତିଲୋଙ୍‌ ସରେବା ତମ୍ବୁସିଙନ୍‌ ଆଡୁଆରାବା ପ୍ରବୁନ୍‌ ଆମୁକ୍କାବାନ୍‌ ତି ଆଅନ୍‌ତାଙନ୍‌ ରବ୍ବୁବା । 12 କେନ୍‌ ସିଲଡ୍‌ ସଣ୍ତତାଙନ୍‌ ଆମିଞାମଲୋଙ୍‌ ଅସୋୟ୍‌ ପାଙ୍‌ଲେ ଅଣ୍ଡେର୍‌ସିନ୍‌ ବାତ୍ତେ ତନମ୍ପିଲ୍ନ୍‌ ଆଡେରିଙ୍‌ ଆ ତୋଣ୍ତୁଲୋଙ୍‌ ତିୟ୍‌ବା, ଆରି ତନମ୍ପିଲନ୍‌ ଆଜାୟ୍‌ତାରେଙ୍‌ ଅଡ଼୍‌କୋନ୍‌ ମିଞାମନ୍‌ ଲାବା । 13 ଆରି ଆ ଅନ୍‌ଲୟ୍‌ଡାନ୍‌ ଆକରି ଡ ଗରେନ୍‌ ଆତୋଣ୍ତୋ ଡକୋନ୍‌ ଆବ୍‌ସାଙନ୍‌ ଡ ବାଗୁ ଆନଣ୍ତିଗରନ୍‌ ଡ ଆତୋଣ୍ତୋ ଆକରିନ୍‌ ପାଙ୍‌ଲେ ତନମ୍ପେଲଲୋଙନ୍‌ ସୟ୍‌ବା । 14 ବନ୍‌ଡ ସଣ୍ତତାଙନ୍‌ ଆଜେଲୁ ଆଉସାଲ୍‌ ଡ ଆସଙ୍‌ତାଙନ୍‌ ତମ୍ବୁସିଙନ୍‌ ଆ ଡାଣ୍ତନ୍‌ ତଗୋଲୋଙନ୍‌ ସୟ୍‌ବା; କେନ୍‌ ଆତେ ଇର୍ସେ ଅନମଙ୍‌ । 15 କେନ୍‌ ସିଲଡ୍‌ ଆମ୍ୱେନ୍‌ ଆପର୍ତମ୍ମୁ ମେଣ୍ତାନ୍‌ ପାଙ୍‌ବା; ଆରି ଆରୋଣନ୍‌ ଡ ଆଡାଙ୍ଗାଡଅନଞ୍ଜି ତି ଆମେଣ୍ତାନ୍‌ ଆବବ୍‌ଲୋଙ୍‌ ରମ୍ମଙ୍‌ ରମ୍ମଙ୍‌ ଆସି ଡକୋତଜି । 16 ସିଲତ୍ତେ ଆମ୍ୱେନ୍‌ ତି ଆମେଣ୍ଡା ରବ୍ବୁଡାଲେ ଆମିଞାମନ୍‌ ପାଙ୍‌ଲେ ତନମ୍ପେଲନ୍‌ ଆତୋଣ୍ତୋ ଏରାନେଙ୍ ସିନ୍‌ସିରାବା । 17 ସିଲତ୍ତେ ମେଣ୍ତାନ୍‌ଆଡଙ୍‌ ଡୟ୍‌ ଡୟ୍‌ଲେ ଆ ଅନ୍‌ଲୟ୍‌ଡାନ୍‌ ଡ ଆଜଙନ୍‌ ଗିୟ୍‌ଡାଲେ ତିଆତେ ଅଡ଼୍‌କୋନ୍‌ ଆଡନେୟ୍‌ଜି ଅଡ଼୍‌କୋନ୍‌ ଆରି ଆବବନ୍‌ ବାତ୍ତେ ଡକ୍କୋବା । 18 ଆରି ଆମ୍ୱେନ୍‌ ମେଣ୍ତାନ୍‌ ତନମ୍ପେଲନ୍‌ ଆତୋଣ୍ଡୋ ସୟ୍‌ବା; ତିଆତେ ପ୍ରବୁନ୍‌ ଆସନ୍‌ ତନୋମ୍ମୋଡନ୍‌ ଡ ଲଙିଡ୍‌ ତନୋମ୍ମୋଡନ୍‌ ପ୍ରବୁନ୍‌ ଆସନ୍‌ ତଗୋଲୋଙନ୍‌ ତନିୟନ୍‌ ଡେତେ ।

19 କେନ୍‌ ସିଲଡ୍‌ ଆମ୍ୱେନ୍‌ ବାଗୁ ମେଣ୍ତାନ୍‌ ପାଙ୍‌ବା, ଆରି ଆରୋଣନ୍‌ ଡ ଆ ଡାଙ୍ଗାଡ଼ାଅଞ୍ଜି ତି ଆମେଣ୍ଡା ଆବବ୍‌ଲୋଙ୍‌ ତର୍ଡମ୍‌ ତର୍ଡମ୍‌ ଅସିନ୍‌ ଡକ୍କୋତଜି । 20 ସିଲତ୍ତେ ଆମ୍ୱେନ୍‌ ତି ଆ ମେଣ୍ତାନ୍‌ ରବ୍ବୁଲେ ଆମିଞାମନ୍‌ ପାଙ୍‌ଲେ ଆରୋଣନ୍‌ ଅର୍ଜଡ଼ୋମ୍‌ ଆନେଙ୍‌ଆଲୁଡ୍‌ଲୋଙ୍‌ ଡ ଆଡାଙ୍ଗାଡଅନଞ୍ଜି ଅର୍ଜଡ଼ୋମ୍‌ଗଡ୍‌ ଆଲୁଡ୍‌ରେଙନ୍‌, ଆନିଞ୍ଜି ଅର୍ଜଡ଼ୋମ୍‌ଗଡ୍‌ ଆବବ୍‌ସି ଆତୋଣ୍ତୋ ଡ ଅର୍ଜଡ଼ୋମ୍‌ଗଡ୍‌ ଆବବ୍‌ଜଙ୍‌ ଅବ୍‌ଜାବା, ଆରି ତନମ୍ପିଲନ୍‌ ଆତୋଣ୍ଡୋରେଙ୍‌ ଅଡ଼୍‌କୋନ୍‌ ମିଞାମନ୍‌ ସିନ୍‌ସିରାବା । 21 ସିଲତ୍ତେ ତନମ୍ପିଲନ୍‌ ଆତୋଣ୍ତୋ ମିଞାମଲୋଙନ୍‌ ଡ ଅବିସେକ ମିଞଲନ୍‌ ଅସୋୟ୍‌ ପାଙ୍‌ଲେ ଆରୋଣନ୍‌ ଆତୋଣ୍ତୁ ଡ ଆସିନ୍‌ରିନ୍‌ ଆତୋଣ୍ତୁ ଆରି ଆନିନ୍‌ ବୟନ୍‌ ଆଡାଙ୍ଗାଡ଼ାଅନ୍‌ ଆତୋଣ୍ତୁ ଡ ଆସିନ୍‌ରିଲୋଙଞ୍ଜି ସିନ୍‌ସିରାବା; ସିଲତ୍ତେ ଆନିନ୍‌ ଡ ଆସିନ୍‌ରିନ୍‌ ବୟନ୍‌, ଆରି ଆଡାଙ୍ଗାଡ଼ାଅନ୍‌ ଡ ଆସିନ୍‌ରିଞ୍ଜି ମଡ଼ିର୍‌ ଡେତେ । 22 ଆରି ଆମ୍ୱେନ୍‌ ତି ଆ ମେଣ୍ତାନ୍‌ ଆକରି, ଆଲାନ୍‌ ଆକରି, ଆ ଅନ୍‌ଲୟ୍‌ଡାନ୍‌ ଆତୋଣ୍ଡୋ ଆକରି ଗରେନ୍‌ ଆତୋଣ୍ତୋ ଆକରି,ବାଗୁନ୍‌ ଆଗରେ, ତେତ୍ତେ ଡକୋନ୍‌ ଆକରି ଡ ଅର୍ଜଡୋମ୍‌ଗଡ୍‌ ଆବୁଲୁ ଏପାଙ୍‌ତେ ଇନିଆସନ୍‌ଗାମେଣ୍ଡେନ୍‌ ତିଆତେ ଅନମଙନ୍‌ ଆତରିୟ୍‌ଲନ୍‌ ଆମେଣ୍ଡା । 23 ଆରି କମିରନ୍‌ ଏର୍‌ମନାୟ୍‌ ରୁଟ୍ଟି ଡାଙ୍ଗାରାନ୍‌ ପାଙ୍‌ଲେ ତି ଆଡାଙ୍ଗାରା ପ୍ରବୁନ୍‌ ଆମୁକାବା ଡକ୍କୋବା ଆରି ତି ଆଡାଙ୍ଗାରାଲୋଙ୍‌ ସିଲଡ୍‌ ଅବୟ୍‌ ରୁଟ୍ଟିନ୍‌, ମିଞଲନ୍‌ ବାତ୍ତେ ଆତୁବ୍‌ତୁବନ୍‌ ଅବୟ୍‌ ପିଟାନ୍‌ ଡ ଅବୟ୍‌ ସନ୍ନା ସକୁଡ଼ିନ୍‌ ଏପାଙ୍‌ତେ । 24 ତିଆତେ ଅଡ଼୍‌କୋନ୍‌ ଆରୋଣନ୍‌ ଆସିଲୋଙ୍‌ ଡ ଆ ଡାଙ୍ଗାଡାଅନଞ୍ଜି ଆସିଲୋଙ୍‌ ତିୟ୍‌ଲେ ଆନିଞ୍ଜି ବର୍ବାଜି ଆନିଞ୍ଜି ତିଅଡ଼୍‌କୋନ୍‌ ପ୍ରବୁନ୍‌ ଆମୁକାବା ଅସିଲୋଙନ୍‌ ଞମ୍‌ତଜି କେନ୍‌ଆତେ ପ୍ରବୁନ୍‌ ଆଞୁମ୍‌ଲୋଙ୍‌ ଅନମଙନ୍‌ ଡେତେ । 25 ସିଲତ୍ତେ ଆମ୍ୱେନ୍‌ ଆସିଲୋଙଞ୍ଜି ତି ଅଡ଼୍‌କୋନ୍‌ ପାଙ୍‌ଲେ ସର୍ରଡାନ୍‌ବୟନ୍‌ ପ୍ରବୁନ୍‌ ଆମୁକ୍କାବାନ୍‌ ଅନମଙ୍‌ ତନମ୍ପିଲନ୍‌ ଆ ତୋଣ୍ତୁଲୋଙ୍‌ ପନାଙ୍‌ଲେ ସୟବା । କେନ୍‌ ପ୍ରବୁନ୍‌ ଆସନ୍‌ ତଗୋନ୍‌ ଆତିନିୟ୍‌ତିୟ୍‌ ।

26 ତିସିଲଡ୍‌ ଆମନ୍‌ ଆରୋଣନ୍‌ ଆନମଙନ୍‌ ମେଣ୍ତାନ୍‌ ଆମାୟଙ୍‌ ପାଙା ଆରି କେନ୍‌ଆତେ ଅନମଙନ୍‌ ଅନ୍ତମ୍‌ ପ୍ରବୁନ୍‌ ଆମୁକାବା ଞମ୍‌ବା; ତିଆତେ ବନ୍ତାନମ୍‌ ଡେତେ ।

27 ଆରି ଆରୋଣନ୍‌ ଡ ଆଡାଙ୍ଗାଡ଼ାଅନନ୍‌ ଅନମଙନ୍‌ ମେଣ୍ତାନ୍‌ ଆମାୟଙ୍‌ ଡ ଆଜଙନ୍‌ ପାଙ୍‌ବା ଆରି କେନ୍‌ ଆତେ ମଡ଼ିର୍‌ ଅମ୍ମେବା । 28 ସିଲତ୍ତେ ଆଏଡ଼ର୍‌ ଆଡ୍ରକୋତନ୍‌ ଅନସଜନ୍‌ ବାତ୍ତେ ଇସ୍ରାଏଲ୍‌ମରଞ୍ଜି ଆମଙ୍‌ ସିଲଡ୍‌ ଆରୋଣନ୍‌ ଡ ଆଡାଙ୍ଗାଡଅନଞ୍ଜି ଡନେମର୍‌ ଡେତେ, ତିଆସନ୍‌ ତିଆତେ ତନେକେ ତନିୟନ୍‌ ଡେତେ, ଇସ୍ରାଏଲ୍‌ମରଞ୍ଜି କେନ୍‌ ତନେକେ ତନିୟନ୍‌ ଆସନ୍‌ ସୁକ୍କା ଅନମଙନ୍‌ ଅନସଜନ୍‌ ତନିୟନ୍‌ ଡେତେ; କେନ୍‌ ଆତେ ସଦପ୍ରବୁନ୍‌ ଆସନ୍‌ ଆନିଞ୍ଜି ତନେକେ ତନିୟତିୟନ୍‌ । 29 ଆରି ଆରୋଣନ୍‌ ଆର୍ରବ୍ବୁଏନ୍‌ ସିଲଡ୍‌ ମଡ଼ିର୍‌ ଆସିନ୍‌ରି ଅଡ଼୍‌କୋନ୍‌ ଆଡାଙ୍ଗାଡଅନଞ୍ଜି ଡେତେ; ଅବିସେକ ତନବ୍‌ନଙନ୍‌ ଆଡିନ୍ନାଇଙନ୍‌ ଆନିଞ୍ଜି ତିଆତେ ରତଞ୍ଜି । 30 ଆଡାଙ୍ଗାଡଅନଞ୍ଜି ନିୟ୍‌ ଅଙ୍ଗା ମନ୍‌ରାଜି ଆପାଲ୍‌ତେଙନ୍‌ ରାଓଡ଼ାନ୍‌ ଡେଲେ ମଡ଼ିର୍‌ ଡରକୋନେଲୋଙ୍‌ ଆସନେବା ଆସନ୍‌ ସରେବା ତମ୍ୱୁସିଙ୍‌ଲୋଙନ୍‌ ଜିର୍ରତାୟ୍‌, ତି ଆସିନ୍‌ରି ସାତ ଡିନ୍ନା ରଲନ୍‌ ଡକୋତନ୍‌ ।

31 କେନ୍‌ ସିଲଡ୍‌ ଆମ୍ୱେନ୍‌ ତି ଅନମଙନ୍‌ ମେଣ୍ତାନ୍‌ ଆଜେଲୁ ପାଙ୍‌ଲେ ଅବୟ୍‌ ମଡ଼ିର୍‌ ଡ୍ରକୋଲୋଙନ୍‌ ଡିଞ୍‌ବା, 32 ଆରି ଆରୋଣନ୍‌ ଡ ଆଡାଙ୍ଗାଡ଼ାଅନ୍‌ ସରେବା ତମ୍ୱୁସିଙନ୍‌ ଆମଙ୍‌ବାନ୍‌ ତି ଆ ମେଣ୍ତାନ୍‌ ଆଜେଲୁ ଡ ତନଙ୍ଗାଲନ୍‌ ରୋଟିନ୍‌ ଜୁମ୍‌ତେ । 33 ଆନିଞ୍ଜି ତନବ୍‌ନଙ୍‌ଲୋଙନ୍‌ ଡ ମଡ଼ିର୍‌ ଆନମେ ଆସନ୍‌ ଆନା ବାତ୍ତେ ଇର୍ସେନ୍‌ ସିଲଡ୍‌ କେମ୍ମାନ୍‌ ଡେଏନ୍‌, ତିଆତେ ଆନିଞ୍ଜି ଜୋମ୍‌ତଜି; ବନ୍‌ଡ ଇନିଜାକିଁୟ୍‌ ଅନ୍ନା ବିରିଣ୍ତାମରଞ୍ଜି ତିଆତେ ଜୁମ୍‌ଲେ ଅଃର୍ରପ୍ତିଏଜି, ଇନିଆସନ୍‌ଗାମେଣ୍ଡେନ୍‌ ତିଆତେ ଅଡ଼୍‌କୋନ୍‌ ମଡ଼ିର୍ ଆଜନବ୍‌ । 34 ଆରି ତି ଆଜେଲୁ ଡ ଆ ରୁଟିଲୋଙନ୍‌ ସିଲଡ୍‌ ଡୋତାନ୍‌ଜାୟ୍‌ ଅସୁୟ ଲାଙ୍‌ଲେୟ୍‌ ଡକୋତନ୍‌, ତିଡେନ୍‌ ତି ଲାଙ୍‌ଲ୍ଲେୟ୍‌ ତଗୋଲୋଙନ୍‌ ଅବ୍‌ଗୁରୁଡେଆୟ୍‌ତେ,ଆନ୍ନିଙ୍‌ ତିଆତେ ଏଜୋମ୍‌ଡଙ୍‌; ଇନିଆସନ୍‌ଗାମେଣ୍ଡେନ୍‌ ତିଆତେ ମଡ଼ିର୍‌ ଆଜନବ୍‌ । 35 ଞେନ୍‌ ଆମନ୍‌ଆଡଙ୍‌ ଏଙ୍ଗାଲେ ଏବର୍ତବେନ୍‌ ତିଅନ୍ତମ୍‌ ଆମ୍ୱେନ୍‌ ଆରୋଣନ୍‌ଆଡଙ୍‌ ଡ ଆ ଡାଙ୍ଗାଡ଼ାଅଞ୍ଜିଆଡଙ୍‌ ତୁବ୍‌ବା; ଆନିଞ୍ଜି ଅନମଙନ୍‌ ସାତ ଡିନ୍ନା ଡେତଜି । 36 ଆରି ଆମ୍ୱେନ୍‌ ଉର୍ସେକେମ୍ମାନ୍‌ ଆସନ୍‌ ଡିତାନ୍‌ ଇର୍ସେନ୍‌ ଆନମଙ୍‌ ଅନ୍ତମ୍‌ ତାଙ୍‌ଲେୟନ୍‌ ସୋରୋପ୍ପାୟ୍‌ବା, ଆରି ଅନସଜନ୍‌ ଆସନ୍‌ ଉର୍ସେକେମ୍ମାନ୍‌ ଅମ୍ମେଲନ୍‌ ତିଆତେ ଇର୍ସେନ୍‌ ସିଲଡ୍‌ ଉର୍ବା ଆରି ତିଆତେ ମଡ଼ିର୍‌ ଅନମ୍ମେ ଆସନ୍‌ ଅବିସେକ ଡେତେ । 37 ଆମ୍ୱେନ୍‌ ବେଦି ଆସନ୍‌ ସାତ ଡିନ୍ନା ଉର୍ସେକେମ୍ମାନ୍‌ ଅମ୍ମେଲେ ତିଆତେ ମଡ଼ିର୍ ଅମ୍ମେବା; ତିଲୋଙ୍‌ ତନମ୍ପିଲନ୍‌ ଗୋଗୋୟ୍‌ ମଡ଼ିର୍‌ ଡେତେ, ଆରି ଇନିଜି ଅସୋୟ୍‌ ତନମ୍ପିଲନ୍‌ ସୁଙେତେ, ତି ଅଡ଼୍‌କୋନ୍‌ ମଡ଼ିର୍‌ ଡେତେ ।

38 ତି ଆନମଙ୍‌ ଆତୋଣ୍ତୋ ଆମ୍ୱେନ୍‌ କେନ୍‌ ଆନମଙ୍‌ ଲୁମ୍‌ବା; ଆମ୍ୱେନ୍‌ ଅଡ଼୍‌କୋଡିନାନ୍‌ ବବର୍ସେଙ୍‌ ବାଗୁ ମେଣ୍ତାନ୍‌, 39 ଆନିନ୍‌ ଆପର୍ତମ୍ମୁନ୍‌ ଆମେଣ୍ତାଅନ୍‌ ଡୋତାନ୍‌ ଅନମଙନ୍‌ ତିୟ୍‌ବା ଡ ଅନବ୍‌ବାଗୁ ଆମେଣ୍ତା ସାଲ୍ଲୁମ୍‌ ଓଲେନ୍‌ ଇଙନ୍‌ ସୋରୋପ୍ପାୟ୍‌ବା । 40 ଆରି ଆପର୍ତମ୍ମୁନ୍‌ ଆ ଅନ୍‌ମେଣ୍ଡାନ୍‌ ଉଞ୍ଜି ବାଗା ମଡ଼ି ଆଞାଲ୍‌ଞାଲନ୍‌ ଆ ମିଞଲ୍‌ଲୋଙନ୍‌ ଆମାୟ୍‌ମାୟ୍‌ ଅବୟ୍‌ ଏପାର ଦସମାଂସ ମଇଦାନ୍‌ ଡ ଗନାନ୍‌ ଅନମଙନ୍‌ ଆସନ୍‌ ଇନର ଉଞ୍ଜିବାଗା ଦ୍ରାକ୍ୟାଡାନ୍‌ ସରୋପ୍ପାୟ୍‌ବା । 41 ଆରି ସାଲ୍ଲୁମ୍‌ ଓଲେନ୍‌ ଅନବ୍‌ବାଗୁ ମେଣ୍ତାଅନନ୍‌ ଅନମଙନ୍‌ ତିୟ୍‌ବା, ଆରି ଡୋତାନ୍‌ ଜନୋମ୍‌ ଅନମଙନ୍‌ ଡ ଗନା ଅନମଙନ୍‌ ଞୁଏଣ୍ଡେନ୍‌ ଆମରଅଁୟ୍‌ତେନ୍‌ ଅନ୍ତମ୍‌ ପ୍ରବୁନ୍‌ ଆଞୁମ୍‌ଲୋଙ୍‌ ସନୟ୍‌ ତନିୟ୍‌ ଅନମଙନ୍‌ ଅନ୍ତମ୍‌ ଆନିନ୍‌ ତିୟ୍‌ବା । 42 କେନ୍‌ ଆ ସରେବା ତମ୍ୱୁସିଙ୍‌ଲୋଙ୍‌ ଆଡୁଆରା ଆମଙ୍‌ବାନ୍‌ ପ୍ରବୁନ୍‌ ଆମୁକ୍କାବାନ୍‌ ଆଜିର୍‌ତାଞନ୍‌ ଆମ୍ମୁଙ୍‌ଗଡ୍‌ମରଞ୍ଜି , ତି ଆଡ୍ରକୋନେଲୋଙ୍‌ ଞେନ୍‌ ଆମ୍ୱେନ୍‌ ବୟନ୍‌ କଡାଡ଼ିନ୍‌ ଆସନ୍‌ ଆମ୍ୱେନ୍‌ ବୟନ୍‌ ଅବ୍‌ଗିୟ୍‌ତାତନାୟ୍‌ । 43 ଆରି ତି ଆଡ୍ରକୋନେଲୋଙ୍‌ ଞେନ୍‌ ଇସ୍ରାଏଲନ୍‌ ଆ ଅଞ୍ଜି ବୟନ୍‌ ଏଲ୍‌ରବାଙ୍‌ତାୟ୍‌; ଆରି ସାଆର୍‌ଲୋଙଞେନ୍‌ ତମ୍ୱୁନ୍‌ ମଡ଼ିର୍‌ ଡେତେ । 44 ଆରି ଞେନ୍‌ ସରେବା ତମ୍ୱୁସିଙ୍‌ଲୋଙନ୍‌ ଡ ତନମ୍ପିଲନ୍‌ ମଡ଼ିର୍‌ ଅମ୍ମେବା, ଆରି ରାଓଡ଼ା କାବ୍ବାଡ଼ାଞେନ୍‌ ଆତନୁବ୍‌ ଆସନ୍‌ ଆରୋଣନ୍‌ଆଡଙ୍‌ ଡ ଆଡାଙ୍ଗାଡ଼ାଅନଞ୍ଜିଆଡଙ୍‌ ମଡ଼ିର୍‌ ଅମ୍ମେବା । 45 ଞେନ୍‌ ଇସ୍ରାଏଲମରଞ୍ଜିଲୋଙ୍‌ ନିୟ୍‌ ଡକୋନେନ୍‌ ଆସନ୍‌ ଆନିଞ୍ଜି ପରମେସ୍ୱରନ୍‌ ଡେତେ । 46 ତିଲୋଙ୍‌ ଞେନ୍‌ ପ୍ରବୁନ୍‌ ପରମେସ୍ୱରନ୍‌, ଆନିଞ୍ଜି ନିୟ୍‌ ଡକୋନେନ୍‌ ଆସନ୍‌ ମିସର୍‌ ଆଡେସା ଆନିଞ୍ଜି ଅମ୍‍ଡୁଙ୍‌ଲେ ଓରୋଙ୍‌ତାୟ୍‌, ତିଆତେ ଆନିଞ୍ଜି ଜନାତଜି; ଞେନ୍‌ ପ୍ରବୁନ୍‌ ଆନିଞ୍ଜି ପରମେସ୍ୱରନ୍‌ ।