1 ଇସ୍ରାଏଲନ୍‌ ଅଙ୍ଗା ଡାଙ୍ଗାଡ଼ାଅନ୍‌ ତର୍ଡମ୍‌ ତର୍ଡମ୍‌ କୁତମ୍ମାଞ୍ଜି ଓରୋଙ୍‌ଲେ ଜାକୁବନ୍‌ ସରିନ୍‌ ମିସର ଡେସାନ୍‌ ଜିର୍ରାଜି କେନ୍‌ ଆଞୁମଞ୍ଜି; 2 ରୁବେନ୍‌, ସିମନ୍‌, ଲେବିନ୍‌ ଡ ଜିଉଦାନ୍‌, 3 ଇସାକରନ୍‌, ସବୁଲୁନନ୍‌ ଡ ବେଞ୍ଜାମିନନ୍‌, 4 ଦାନନ୍‌ ଡ ନପ୍ତାଲିନ୍‌, ଗାଦନ୍‌ ଡ ଆସେରନ୍; 5 ଅଡ଼୍‌କୋନ୍‌ ଜାକୁବନ୍‌ ଆକେଜ୍ଜାଲୋଙ୍‌ ସିଲଡ୍‌ ୟାକୁଡ଼ିଦସ ମନ୍‌ରା ଡକୋଏଞ୍ଜି । ବନ୍‌ଡ ଆମ୍ମୁଙ୍‌ମା ଆ ଡାଙ୍ଗାଡ଼ାଅନନ୍‌ ଜୋସେପନ୍‌ ମିସର ଡେସାନ୍‌ ଡକୋଲନ୍‌ । 6 ତି ଆତିକ୍କି ଜୋସେପନ୍‍, ଆ ବୋଞାଙଞ୍ଜି, ଆରି ଆଡ୍ରକୋଲଞ୍ଜି ଆକେଜ୍ଜାଜି ଅଡ଼୍‌କୋନ୍‌ ରବୁଏଞ୍ଜି । 7 ବନ୍‌ଡ ଇସ୍ରାଏଲ ମରଞ୍ଜି, ଆକେଜ୍ଜାଜି, ଗୋଗୋଜେଞ୍ଜି ଆରି ଆନିଞ୍ଜି ମିସର୍‌ ଡେସାନ୍‌ଲୋଙନ୍ ଆନିଞ୍ଜି ବରିୟ୍ ଡେଏଞ୍ଜି ।

8 ତି ଆତିକି ଅବୟ୍‌ ରଙ୍‌ ରାଜାନ୍‌, ମିସର ଡେସାନ୍‌ ସାସନଏନ୍‌, ତି ଆରାଜା ଜୋସେପନ୍‌ ଗାମ୍‌ଲେ ଜନାଜି ତଡ୍‌ । 9 ଆନିନ୍‌ ଆମନ୍‍ରାଞ୍ଜିଆଡଙ୍‍ ବରେଞ୍ଜି, "ଗିୟ୍‌ବା, ଇସ୍ରାଏଲ ମରଞ୍ଜି ଆକେଜ୍ଜା, ବୋର୍ସାଲୋଙନ୍ ଡ ଡନିଡିଲୋଙନ୍‍ ଇନ୍‌ଲେଞ୍ଜି ସିଲଡ୍‌ ଗୋଗୋୟ୍‌ ଡକୋଜି । 10 ଆନିଞ୍ଜି ଏଙ୍ଗାଲ୍‌ଡେନ୍‌ ଅମ୍ମରଙେଜି ଅଡ଼େ ଅଃଗୋଗୋଜେଜି ଆରି ଅଲ୍‌ଜୁଜ୍ଜେନ୍‌ ଡେଏନ୍‌ଡେନ୍‍ ଇନ୍‌ଲେଞ୍ଜିଆଡଙ୍ ସଙ୍ଗତାଡାଲେ ଇନ୍‌ଲେଞ୍ଜି ସରିନ୍‌ ଅଃନଲ୍‌ଜୁଜ୍ଜେଏଜି, ଆରି କେନ୍ ଆଡେସା ସିଲଡ୍‌ ୟର୍ରନ୍ ଅଃରବ୍‌ତିଏଜି, ତିଆସନ୍‍ ଇନ୍‌ଲେନ୍‌ ଆନିଞ୍ଜି ବାତ୍ତେ ମନଙ୍‌ ଞର୍ରମ୍‌ନାବା ।" 11 ଆନିଞ୍ଜିଆଡଙ୍‌ ଲନୁମନ୍‌ ବାଁୟ୍‌ଲେ ଅନବ୍‌ ଡଣ୍ଡାୟନ୍ ଆସନ୍‌ କାବ୍ବାଡ଼ାନ୍‌ ଆନବ୍ ବାଁୟ୍‌ବାୟଁନ୍ ଆସନ୍‌ ମନ୍‌ରାନ୍‌ ତବ୍‌ନଙେଞ୍ଜି । ଆରି ଆନିଞ୍ଜିଆଡଙ୍ ବାଁୟ୍‌ଲେ ପାରୋନ୍ ଆସନ୍‌ ଗଡ଼ାଲୋଙନ୍ ଡରକ୍କୋସିଙନ୍ ଆଗରାମ୍‌ଗାମନ୍ ପିତୋମନ୍ ଡ ରାମିସେସନ୍ ଅବ୍‍ତୁବ୍‍ତୁବେଞ୍ଜି । 12 ବନ୍‌ଡ ମିସର୍‌ ମରଞ୍ଜି ଡ ଇସ୍ରାଏଲଞ୍ଜି ମରଞ୍ଜିଆଡଙ୍‍ ଡିଅଙ୍ଗା ଗୋଗୋୟ୍‌ ଅବ୍‌ଡଣ୍ଡାୟେଞ୍ଜି, ଆନିଞ୍ଜି ଡିୟ୍‌ତେନ୍‍ ମରଙ୍‌ଲେ ପାଙେଞ୍ଜି ଆରି ଡିୟ୍‌ତେନ୍‍ ଗୋଗୋୟ୍‌ଲେ ପାଙେଞ୍ଜି ତିଆସନ୍‍ ମିସର୍‌ ମରଞ୍ଜି ଇସ୍ରାଏଲ ମରଞ୍ଜିଆଡଙ୍ ବତଙେଞ୍ଜି 13 ଆରି ମିସରନ୍‌ ଆମନ୍‌ରାଜି ଅରିର୍‌ସୁୟମ୍‌ଡାନ୍‌ ଇସ୍ରାଏଲନ୍‌ ଆମନ୍‌ରାଜିଆଡଙ୍‌ କମ୍ବାରିନ୍‌ ଅନ୍ତମ୍‌ କାବ୍ବାଡ଼ାନ୍‍ ଅବ୍‌ଲୁମ୍‌ଲୁମେଞ୍ଜି । 14 ଆରି ତଙ୍‌ଲନ୍‌, ଇଟ୍ଟାନ୍‌ ଆରି ସରବା କାବ୍ବାଡ଼ାନ୍‌ ଅଡ଼୍‌କୋନ୍‌ କମ୍ବାରିନ୍‌ ଅନ୍ତମ୍‌ ଆନିଞ୍ଜିଆଡଙ୍‌ କାବ୍ବାଡ଼ାନ୍‌ ବାଁୟ୍‌ଲେ ଆ ପରାନ୍ନାଞ୍ଜି ବାଉଲ୍ଲି ଅମ୍ମେଏଞ୍ଜି । ଆନିଞ୍ଜି ଅଙ୍ଗା କମ୍ବାରି କାବ୍ବାଡ଼ା ଅଡ଼୍‌କୋନ୍‌ ଅବ୍‌ଲୁମ୍‌ଲୁମେଞ୍ଜି ତି ଅଡ଼୍‌କୋନ୍‌ ଅରିର୍‌ର୍ସୋୟମନ୍‌ ଅମ୍ମେଏଞ୍ଜି ।

15 ମିସରନ୍‌ ଆରାଜା ସିପ୍ରାନ୍‌ ଡ ପୁୟାନ୍‌ ଆଞୁମ୍‌ବୟ୍‌ ବାଗୁ ଏବ୍ରିଅ ଦାଇବଜନ୍‌ଆଡଙ୍ କେନ୍‍ ଆବର୍ନେ ବରେଞ୍ଜି । 16 ଅଙ୍ଗା ଆଡିଡ୍‌ ଆମ୍ବେଞ୍ଜି ଏବ୍ରିଅ ଆଇବୟ୍‍ଜି ଦାଇ କାବ୍ବାଡ଼ାନ୍‌ ଲୁମ୍‌ତେ, ଆନିଞ୍ଜିଆଡଙ୍ କୋକ୍କୋଡନିଙନ୍‌ ଗିୟ୍‌ତଜି; ତିଆଡିଡ୍‌ "ଓବ୍ବାସିୟ୍‌ କୋଡେଣ୍ଡେନ୍; ଆନିନ୍‌ଆଡଙ୍‌ ରବ୍ବୁବା ଆରି ଆଇସିୟ୍ ଡେନ୍‌, ଆନିନ୍‌ ଆମେଙ୍‌ ଡକ୍କୋବା ।" 17 ବନ୍‌ଡ ତି ଆ ଦାଇବୟ୍‌ଜି ଇସ୍ୱରନ୍‌ଆଡଙ୍‌ ଆବରତଙେଞ୍ଜି ଆସନ୍‌ ମିସର ରାଜାନ୍‌ ଆବନାଁୟ୍‌ ଅନ୍ତମ୍‌ ଏର୍‌ଲନୁମ୍‌ ଓବ୍ବାସିଜଞ୍ଜିଆଡଙ୍ ଏର୍‌ରନବ୍ବୁନ୍‌ ଆମେଙ୍‌ ଡକ୍କୋଏଞ୍ଜି । 18 ତିଆସନ୍‌ ମିସରନ୍‍ ଆ ରାଜା ଦାଇଞ୍ଜିଆଡଙ୍‌ ଓଡ୍ଡେଲେ ବରେଞ୍ଜି, "ଇନିଆସନ୍ ଆମ୍ୱେନ୍‌ ଏନ୍ନେଲେ ଆକାବ୍ବାଡ଼ା ଏଲୁମ୍‌ତେ ? ଓବ୍ବାସିଜଞ୍ଜିଆଡଙ୍‌ ଇନିବା ଆମେଙ୍‌ ଏଡକ୍କୋଏନ୍‌ ?"

19 ବନ୍‌ଡ ଦାଇଞ୍ଜି ପାରୋନ୍‍ଆଡଙ୍‌ ଜାଲଙେଞ୍ଜି, "ଏବ୍ରିଅବଜଞ୍ଜି ମିସରବଜଞ୍ଜି ଅନ୍ତମ୍‌ ତଡ୍‌; ଆନିଞ୍ଜି ବୋର୍ସାବୟ୍‍ଜି, ଆମଙ୍‌ବାଞ୍ଜି ଦାଇବଜନ୍‌ ଆରିୟ୍‌ତେନ୍‌ ଆମ୍ମୁଙ୍‌ ଆନିଞ୍ଜି କୋତ୍ତଜି ।" 20 ଇନିଆସନ୍‌ଗାମେଣ୍ଡେନ୍‌ ଦାଇବଜଞ୍ଜି ଇସ୍ୱରନ୍ଆଡଙ୍ ବତଙ୍‌ତଜି, ଇସ୍ୱରନ୍‌ ଦାଇଞ୍ଜି ନିୟ୍ ସୁକ୍କସାମଙ୍ ଡକ୍କୋଏଞ୍ଜି ଆରି ମନ୍‌ରାଞ୍ଜି ଗୋଗୋୟ୍‌ଲେ ପାଙେଞ୍ଜି ଆରି ଗୋଗୋୟ୍‌ ବୋର୍ସାଲେ ପାଙେଞ୍ଜି । 21 ତି ଆ ଦାଇବୟଜି ଇସ୍ୱରନ୍‌ଆଡଙ୍‌ ବତଙେଞ୍ଜି ତିଆସନ୍‌ ଆ କେଜ୍ଜାଞ୍ଜି ଅବ୍‌ଗୋଗୋଜେନ୍‌ । 22 ପାରୋ ରାଜାନ୍‌ ଅଡ଼୍‌କୋନ୍‌ ଆ ମନ୍‌ରାଞ୍ଜିଆଡଙ୍‌ କେନ୍‌ ଆବର୍ନେ ବରେଞ୍ଜି, "ଆମ୍ବେନ୍‌ ରଙ୍‌ କୋଡ୍‌ ଅଡ଼୍‌କୋ ଓବ୍ବାସିଜନ୍‌ଆଡଙ୍‌ ନିଡ଼ ଅଲଲୋଙନ୍‌ ସାଡ୍‌ବାଜି, ବନ୍‌ଡ ଅଡ଼୍‌କୋନ୍‌ ଆଇସିଜଞ୍ଜି ଅଡ଼୍‌କୋନ୍‌ ଆମେଙ୍‌ ଡକ୍କୋବା ।"