1 ଇସ୍ୱରନ୍‌ କେନ୍‍ ଅଡ଼୍‌କୋନ୍ ଆବର୍ନେ ଗାମେନ୍‌, 2 ଆନା ଆମ୍ୱେନ୍‌ଆଡଙ୍‌ କମ୍ୱାରିସିଙନ୍‌ ଅନ୍ତମ୍‌ ମିସର୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲେ ଓରୋଙ୍‍ଲବେନ୍‍, ସଦାପ୍ରବୁବେନ୍‌ ତି ଆ ଇସ୍ୱର ଞେନ୍‌ । 3 ତେମଡ୍‌ଲୋଙ୍‌ ଞେନ୍‌ ଆମ୍ୱେଞ୍ଜି ଆସନ୍‌ ଅନ୍ନିଙ୍‌ ଆ ସନୁମ୍‍ ଅଃଡେଏ । 4 ଆମ୍ୱେନ୍‌ ଆମ୍ୱେଞ୍ଜିଡମ୍‌ ଆସନ୍‌ ଅନ୍ନିଙ୍‌ ଆ ଆସେୟ୍‌ସେଜନ୍‌ କୋଣ୍ତାୟ୍‌ ଏତୁବ୍‌ଡଙେ; ତୋଣ୍ଡୋ ରୁଆଙଲୋଙ୍‍ ଅଡ଼େ, ଜାୟ୍‌ତା ପୁର୍ତିଲୋଙନ୍‌, ପୁର୍ତିନ୍‌ ଆଜାୟ୍‌ତା ଆ ଡାଆଲୋଙ୍‍ ଡକୋନ୍‌ ଅନ୍ନିଙ୍‌ ଆଜନବ୍‌ ଆମୁକ୍କା କୁଣ୍ଡାୟ୍‌ ଏତୁବ୍‍ଡଙ୍‍ । 5 ଆମ୍ୱେନ୍‌ ଆନିଞ୍ଜିଆଡଙ୍‌ ତୁଡ଼ୁମ୍‌ଲେ ଏଲୋମ୍‌ଡଙ୍‌, ଅଡ଼େ ଆନିଞ୍ଜି ଏସେବାଡଙ୍‍ଞ୍ଜି ଇନିଆସନ୍‌ଗାମେଣ୍ଡେନ୍‌ ଞେନ୍‌ ସଦାପ୍ରବୁ ଇସ୍ୱରବେନ୍‌ ସଏଲେ ଅଃର୍ରପ୍ତିଆୟ୍‌, ଆରି ଆନାଜି ଞେନ୍‍ଆଡଙ୍‍ ଏଡ଼ୁର୍‌ମଡ୍‌ତିଁୟ୍‌ଞ୍ଜି, ଞେନ୍‌ ଆନିଞ୍ଜିଆଡଙ୍‌ ଆପେୟଞ୍ଜି ଡୋସା ୟାଗି ଉଞ୍ଜି କନୋଡ୍‌କୋଡ୍‌ ଜାୟ୍‌ ପନବ୍‌ରଡନ୍‌ ତିୟ୍‌ତାୟ୍‌; 6 ବନ୍‌ଡ ଆନାଜି ଡଅଙ୍‌ଞେନ୍‌ ଡୁଙ୍‌ୟୁମ୍‌ତିଞ୍‌ଞ୍ଜି ଆରି ବନାଁୟ୍‌ବର୍‌ଞେନ୍‍ ମାନ୍ନେତଜି, ଞେନ୍‌ ଆନିଞ୍ଜିଆଡଙ୍‌ ବଅଜାର କନୋଡ୍‌କୋଡ୍‌ ଜାୟ୍‌ କାନକାରମ୍‌ଗାମ୍‌ତାଜି । 7 ଆମ୍ୱେନ୍‌ ସଦାପ୍ରବୁ ଇସ୍ୱରନ୍‌ ଆଞୁମ୍‌ ପାତ୍ୟାଲେ ଏଡର୍‌ଡଙ୍‌ନେ; ଇନିଆସନ୍‌ଗାମେଣ୍ତେନ୍‌ ଆନ୍ନା ଆଞୁମନ୍‌ ପାତ୍ୟାଲେ ଜାତେ, ଆନିନ୍‌ଆଡଙ୍‌ ଇସ୍ୱରନ୍‌ ଡୋସା ତଡ୍‌ ଗାମ୍‌ଲେ ଅଃଡିଡିଏ । 8 ଲୋଲୋନେ ଡିନ୍ନା ମଡ଼ିର୍‌ ଗାମ୍‌ଲେ ମନାନ୍ନେନ୍‌ ଆସନ୍‌ ଇୟମ୍‌ବା । 9 ତୁଡ୍‌ରୁ ଡିନ୍ନା କାବ୍ବାଡ଼ାନ୍‌ ଆରି କାବ୍ବାଡ଼ାବେନ୍‌ ଅଡ଼୍‌କୋନ୍‌ ଲୁମ୍‌ବା; 10 ବନ୍‌ଡ ସାତ ଡିନ୍ନା ସଦାପ୍ରବୁ ଇସ୍ୱରବେନ୍‌ ଆ ଲୋଲୋନେ ଡିନ୍ନା; ତି ଆଡିଡ୍‌, ଡ଼ାଙ୍ଗଡାଅନ୍‍ବେନ୍‍ ଅଡ଼େ, ଡାଙ୍ଗଡ଼ିଅନ୍‍ବେନ୍‍, କମ୍ୱାରିମର୍‌ବେନ୍‌ ଅଡ଼େ, କମ୍ୱାରିବଜନ୍‌, ଜନ୍ତୁବେନ୍‌, ଅଡ଼େ ଗଡ଼ାବେନ୍‌ ଆଗର୍ନେବା ବଡେସାବାୟ୍‌, ଆନ୍ନିଙ୍‌ ଇନ୍ନିଙ୍‌ ଆକାବ୍ବାଡ଼ା ଏଲୁମ୍‌ଡଙ୍‌ । 11 ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ରୁଆଙନ୍‌ ଡ ପୁର୍ତିନ୍‌ ଡ ସମେଁୟ୍‌ଣ୍ଡ୍ରାନ୍‌ ଡ ତେତ୍ତେ ଡକୋନ୍‌ ଅଡ଼୍‌କୋନ୍‌ ଆଜନବ୍‌ ତୁଡ୍‌ରୁ ଡିନ୍ନାଲୋଙ୍‌ ତୁବ୍‌ଲେ ସାତ ଡିନ୍ନାଲୋଙ୍‌ ଲୋଲୋଲନ୍‌, ତିଆସନ୍‌ ପ୍ରବୁନ୍‌ ଲୋଲୋନେ ଡିନ୍ନାନ୍‌ ଆସିର୍ବାଦଲେ ମବ୍‌ଡ଼ିର୍‌ଲବେନ୍‌ । 12 ଆମ୍ୱେନ୍‌ ବାପାନ୍‌ ଡ ନନବେନ୍‌ଆଡଙ୍‌ ମାନ୍ନେବା, ସିଲତ୍ତେ ସଦାପ୍ରବୁ ଇସ୍ୱରନ୍‌ ଆମ୍ୱେନ୍‌ଆଡଙ୍‌ ଅଙ୍ଗା ଆଡେସା ତିୟ୍‍ତବେନ୍‍, ତି ଆଡେସାଲୋଙ୍‍ ଅଗୋୟ୍‌ ବର୍ସେଙ୍‌ ଅମେଙ୍‌ତବେନ୍‌ । 13 ଆମ୍ୱେନ୍‌ ମନ୍‌ରାନ୍‌ ଏସମ୍‌ବବ୍‌ଡଙ୍‌ । 14 ଆମ୍ୱେନ୍‌ ଏଡାରିଡଙ୍‌ନେ । 15 ଆମ୍ୱେନ୍‌ ଏରାଉଡଙ୍‌ନେ । 16 ଆମ୍ୱେନ୍‌ ତୟ୍‍ଲିସିଙ୍‌ମର୍‌ବେନ୍‌ ଆ ବିରୁଦଲୋଙ୍‌ କଣ୍ଡାୟ୍‍ ସାକିନ୍‍ ଏତିୟ୍‍ଡଙ୍‌ । 17 ଆମ୍ୱେନ୍‌ ତୟ୍‍ଲିସିଙ୍‍ମର୍‌ବେନ୍‌ ଆସିଙ୍‌ ଏଲୋବଡଙ୍‌, ଆମ୍ୱେନ୍‌ ତୟ୍‍ଲିସିଙ୍‌ମର୍‌ବେନ୍‌ ଆଡୁକ୍ରି, ଅଡ଼େ ଆ କମ୍ୱାରିନ୍‌, ଆ କମ୍ୱାରିବଜନ୍‌, ଅଡ଼େ ଆ ତାଙ୍‌ଲିୟନ୍‌, ଆ ଗୋଡୋୟ୍‌ଁଞନ୍‌, ତୟ୍‍ଲିସିଙ୍‌ମର୍‌ବେନ୍‌ ଆଜନବ୍‍ ଇନ୍ନିଙ୍‌ ଏଲୋବଡଙ୍‌ ।

18 ତିଆଡିଡ୍‌ ଅଡ଼୍‌କୋ ମନ୍‌ରାନ୍‌ ମେଗନ୍‌ ଆସନଡ୍ଡା ଡ ତାବ୍‌ରେଡନ୍‌ ଡ ପନେଡନ୍‌ ଆସନଡ୍ଡା ଡ ଓମୋଡନ୍‌ ଆବରିୟ୍‌ ବରୁନ୍‌ ଗିଜେଞ୍ଜି; ଆରି ଆନିଞ୍ଜି ତିଆତେ ଗିୟ୍‌ଲେ ବତଙ୍‌ଡାଲେ ସଙାୟ୍‌ ତନଙେଞ୍ଜି । 19 ଆରି ଆନିଞ୍ଜି ମସାନ୍‍ଆଡଙ୍‌ ବରେଞ୍ଜି, ଆମନ୍‌ ଇନ୍‌ଲେନ୍‌ ସରିନ୍‌ କଡାଡ଼ିନା, ଇନ୍‌ଲେଞ୍ଜି ଏଅମ୍‍ଡଙ୍‌ତାୟ୍‍, ବନ୍‌ଡ ଇସ୍ୱରନ୍‌ ଇନ୍‌ଲେନ୍‌ ସରିନ୍‌ କଡାଡ଼ିଡଙ୍‌ନେତଡ୍‌, ଇଜ୍ଜାଡେନ୍‌ ଇନ୍‌ଲେଞ୍ଜି ରବୁତଲେନ୍‍ । 20 ସିଲତ୍ତେ ମସାନ୍‍ ମନ୍‌ରାଞ୍ଜିଆଡଙ୍‌ ବରେନ୍‌, ବତଙ୍‌ଡଙ୍‌ବେନ୍‌; ଇନିଆସନ୍‌ଗାମେଣ୍ଡେନ୍‌ ଇନ୍‌ଲେଞ୍ଜିଆଡଙ୍‌ ମନାଲନ୍‌ ଆସନ୍‌ ଡ ଆମ୍ୱେଞ୍ଜି ଏଙ୍ଗାଲେ ଇର୍ସେନ୍‍ ଏଲ୍ଲୁମେ, ତିଆସନ୍‍ ଆ ବରନ୍ତଙନ୍‌ ଆମ୍ୱେଞ୍ଜି ଆନବ୍‌ଗିୟ୍‌ ଆସନ୍‌ ଇସ୍ୱରନ୍‌ ଜିର୍ରାୟ୍‌ । 21 ତିଆସନ୍‌ ମନ୍‌ରାଞ୍ଜି ସଙାୟ୍‌ ତନଙ୍‌ଲେ ଡକୋଲଞ୍ଜି, ବନ୍‌ଡ ଅଙ୍ଗାଲୋଙ୍‌ ଇସ୍ୱରନ୍‌ ଡକୋଲନ୍‌, ଆଲୋଙଡ୍‌ରେଙନ୍‌ ମସାନ୍‌ ଜିରେନ୍‌ ।

22 ସିଲତ୍ତେ ପ୍ରବୁନ୍‌ ମସାନ୍‍ଆଡଙ୍‌ ବରେନ୍‌, ଆମନ୍‌ ଇସ୍ରାଏଲନ୍‌ ଆଅଞ୍ଜିଆଡଙ୍‌ କେନ୍‍ ଆବର୍ନେ ବରା, ରୁଆଙ୍‌ଲୋଙନ୍‌ ଡକୋଲନ୍‌ ଆମ୍ୱେଞ୍ଜି ସରିନ୍‌ କଡାଡ଼ିଲନାୟ୍‌, ତିଆତେ ଆମ୍ୱେଞ୍ଜି ଏଗିଜେନ୍‍ । 23 ତିଆସନ୍‍ ଆମ୍ୱେଞ୍ଜି ସୁନ୍ନାନ୍‌ ଡ ରୁପାନ୍‌ ବାତ୍ତେ ଅନ୍ନିଙ୍‌ ଆସନୁମ୍‌ ଆକୋଣ୍ତାୟ୍‌ ବାଡଲେନ୍‌ ଆସନ୍‌ ସନୁମଞ୍ଜି ଏତୁବ୍‌ଡଙ୍‌ । 24 ଆମ୍ୱେନ୍‌ ଞେନ୍‌ ଆସନ୍‌ ଅବୟ୍‌ ଲବନ୍‍ ବାତ୍ତେ ତନମ୍ପିଲନ୍‌ ତୁବ୍‍ବା, ଆରି ତି ଆତୋଣ୍ଡୋ ଜନ୍ତୁଜି ସନୟ୍‌ ଅନମଙନ୍‌ ଡ ସୁକ୍କାଡକୋନେନ୍‌ ଆନମଙ୍‌ ସୋରୋପ୍ପାୟ୍‌ବା; ଞେନ୍‌ ଅଙ୍ଗା ଆଡ୍ରକୋନେଲୋଙ୍‌ ଅଞୁମ୍‌ଞେନ୍‌ ଅଃମାନ୍ନେତବେନ୍‌, ତି ଅଡ଼୍‌କୋନ୍‌ ଆଡ୍ରକୋନେଲୋଙ୍‌ ଅମଙ୍‌ବାବେନ୍‌ ଜିର୍ରେ ଞେନ୍‌ ଆମ୍ୱେଞ୍ଜିଆଡଙ୍‌ ଆସିର୍ବାଦତବେନ୍‌ । 25 ଆଙ୍ଗା ଞେନ୍‌ ଆସନ୍‌ ଅରେଙ୍‌ ତନମ୍ପିଲନ୍‌ ଏତୁବ୍‌ତେ, ତିଡେନ୍‌ ଆସେୟ୍‌ସେୟ୍‌ ଜରନ୍‌ ବାତ୍ତେ ଏତୁବ୍‌ଡଙ୍‌; ଇନିଆସନ୍‌ଗାମେଣ୍ତେନ୍‌ ସରଜରନ୍‌ ବାତ୍ତେ ଅରେଙନ୍‌ ଆତୋଣ୍ଡୋ ଏଆଙ୍‌ତାରେଣ୍ଡେନ୍‌, ତିଆତେ ଏର୍ମଡ଼ିର୍‌ ଏଅବ୍‌ମେତେ । 26 ଆମ୍ବେନ୍‌ ଆଉର୍ଡିୟ୍‌ ଗାମ୍‌ଲେ ଏଙ୍ଗାଲେ ତନମ୍ପିଲ୍‌ଲୋଙ୍‌ଞେନ୍‌ ଅଃରାଙ୍‌ଡାଏ, ତିଆସନ୍‌ ଆମ୍ୱେନ୍‌ ପାଆସଗଡ୍‌ ଡାୟ୍‌ଲେ ତନମ୍ପିଲନ୍‌ ଆତୋଣ୍ତୁ ଏଜିର୍‌ଡଙ୍‌ ।