Gênesis 12

ଅବ୍ରାମଇଁ ମାହାପୂରୁ ହା଼ଟିନାୟି

1 ଏଚେଟିଏ ପ୍ରବୁ ଅବ୍ରାମଇଁ ଏଲେଇଚେସି, "ନୀନୁ ନୀ ଦେ଼ସା ଅ଼ଡ଼େ ଲ଼କୁ, ନୀ କୁଟମି ଅ଼ଡ଼େ ତାଞ୍ଜି ଇଲୁ ପିସାହାଁ, ନା଼ନୁ ଏମିନି ଦେ଼ସା ତ଼ସ୍ତାଇଁ ଏ଼ ଦେ଼ସାତା ହାଲାମୁ। 2 ନା଼ନୁ ନୀ ତା଼ଣାଟି ର଼ କାଜା କୂଡ଼ା କିୟାଇଁ, ଇଞ୍ଜାଁ ନା଼ନୁ ନିଙ୍ଗେ ବ଼ର ହୀହାଁ ନୀ ଦ଼ରୁତି ୱେ଼ଙ୍ଗି କିଇଁ, ନୀନୁ ବ଼ର ବେଟାଆ଼ନାତି ଆ଼ଦି।

3 ଆମ୍ବାଆରି ନିଙ୍ଗେ ବ଼ର ହିୟାନେରି ଏ଼ୱାରାକି ନା଼ନୁ ବ଼ର ହୀଇଁ,

ସାମା ଆମ୍ବାଆରି ବା଼କା ଇଟାନେରି ଏ଼ୱାରାଇଁ ନା଼ନୁ ବା଼କା ହୀଇଁ;

ଅ଼ଡ଼େ ନୀ ତା଼ଣାଟି ଦାର୍‌ତିତି ବାରେ କୂଡ଼ା ବ଼ର ବେଟାଆ଼ନେରି।"

4 ଏଚେଟିଏ ଅବ୍ରାମ ପ୍ରବୁତି ଈ କାତା ତଲେ ହାଚେସି, ଇଞ୍ଜାଁ ଲ଼ତ ଏ଼ୱାଣି ତଲେ ହାଚେସି; ହାରଣଟି ହାଚି ବେ଼ଲା ଅବ୍ରାମ ତୀନି କ଼ଡ଼ି ପନ୍ଦର ବାର୍ସା ଆ଼ହାମାଚେସି। 5 ଇଲେକିଁ ଅବ୍ରାମ ତାନି ଡକ୍ରି ସାରିନି ଅ଼ଡ଼େ ତାୟି ମୀର୍‌ଏସି ଲ଼ତଇଁ ଅ଼ଡ଼େ ହାରଣତା କୂଡ଼ି କିହାମାଚି ଦ଼ନ ଇଞ୍ଜାଁ ହ଼ଲିୟାଙ୍ଗା ତଲେ କିଣାନ ଦେ଼ସା ୱାକି ହାଜାହାଁ ଏ଼ୱାରି କିଣାନ ଦେ଼ସାତା ଏଗାହାଚେରି।

6 ଅବ୍ରାମ ଏ଼ ଦେ଼ସାଟି ହାଜି ହାଜିହିଁ ସିକିମ ଦାରିତା ମରିତି ଅଲନ୍‌ ମା଼ର୍‌ନୁ ଡ଼଼ଇକା ଏତେସି। ଏ଼ ବେ଼ଲାତା କିଣାନିୟ ଲ଼କୁ ଏ଼ ଦେ଼ସାତା ବାସା କିହିମାଚେରି। 7 ଏଚେଟିଏ ପ୍ରବୁ ଅବ୍ରାମଇଁ ତ଼ଞ୍ଜାଆ଼ହାଁ ଏଲେଇଚେସି, "ନା଼ନୁ ନୀ କୂଲୁ ତାକି ଈ ଦେ଼ସା ହୀଇଁ;" ଏଚେଟିଏ ଅବ୍ରାମ ତାଙ୍ଗେ ତ଼ଞ୍ଜା ଆ଼ତି ପ୍ରବୁକି ଏ଼ ଟା଼ୟୁତା ପୂଜା ପିଣ୍ତା କେ଼ପିତେସି। 8 ଏଚେଟିଏ ଏ଼ୱାସି ଏ଼ ଟା଼ୟୁ ପିସାହାଁ ବେତେଲ୍‌ତି ୱେ଼ଡ଼ା ହ଼ପୁୱାକି ହ଼ରୁତା ହାଜାହାଁ ତାନି ତୂମୁ ଇଲୁ କେ଼ପିତେସି; ୱେ଼ଡ଼ା ହାନି ୱାକି ବେତେଲ୍‌ ଅ଼ଡ଼େ ୱେ଼ଡ଼ା ହ଼ପୁୱାକି ଅୟ ଗା଼ଡ଼ା ମାଚେ; ଇଞ୍ଜାଁ ଏ଼ ଟା଼ୟୁତା ପ୍ରବୁକି ର଼ ପୂଜା ପିଣ୍ତା କିହାଁ ପ୍ରବୁ ଦ଼ରୁତା ପ୍ରା଼ତାନା କିତେସି। 9 ଏଚେଟିଏ ଅବ୍ରାମ ରେ଼ଜି ରେ଼ଜିହିଁ ଅ଼ଡ଼େ ଟିଃନି ୱାକି ନେଗେବତା ହାଚେସି।

ମିସରତା ଅବ୍ରାମ

10 ଏ଼ ବେ଼ଲାତା କିଣାନ ଦେ଼ସାତା କା଼ତାରା ଆ଼ହାଲିଏ, ଅବ୍ରାମ ମିସର ଦେ଼ସାତା ଏଚର ଦିନା ଡ଼ୟାଲି ହାଚେସି; ଏ଼ନାଆଁତାକି ଇଚିହିଁ ଦେ଼ସାତା ହା଼ରେକା କା଼ତାରା ଆ଼ହାମାଚେ। 11 ଏ଼ୱାସି ମିସର ଦେ଼ସାତା ଏଗା ହାଜିମାଚାଟି, ତାନି ଡକ୍ରି ସାରିନି ଏଲେଇଚେସି, "ମେହ୍‌ମୁ ନୀନୁ ମେସାଲି ହା଼ରେକା ଅ଼ଜିତାତି, ଏ଼ଦାଆଁ ନା଼ନୁ ପୁଞ୍ଜାମାଇଁ। 12 ଏ଼ଦାଆଁତାକି ମିସରତି ଲ଼କୁ ନିଙ୍ଗେ ମେସାହାଁ ନା଼ ଡକ୍ରି ଇଞ୍ଜିହିଁ ପୁଚିସାରେ, ନାଙ୍ଗେ ପା଼ୟାହାଁ ନିଙ୍ଗେ ଜୀୱୁ ତଲେ ପିସ୍ତାନେରି। 13 ଏ଼ଦାଆଁତାକି ନା଼ନୁ ବାତିମା଼ଲି ମାଞ୍ଜାଇଁ, ନୀନୁ ନା଼ ତାଙ୍ଗିତେଏଁ ଇଞ୍ଜିହିଁ ୱେହ୍‌ମୁ; ଏଚେଟିଏ ନୀ ତାକି ନା଼ ନେହେଁ ଆ଼ନେ ଅ଼ଡ଼େ ନୀ ତାକି ନା଼ ଜୀୱୁ ନୀଡିନେ।" 14 ଏଚେଟିଏ ଅବ୍ରାମ ମିସର ଦେ଼ସାତା ଏଜାଲିଏ, ମିସରତି ଲ଼କୁ ଏ଼ୱାଣି ଡକ୍ରିନି ହା଼ରେକା ଅ଼ଜିତାଣି ମେସ୍ତେରି। 15 ଇଞ୍ଜାଁ ପା଼ରତି କାଜାରି ଏ଼ଦାନି ମେସାହାଁ ପା଼ର ନ଼କିତା ଅ଼ଜିତାୟି ଇଞ୍ଜିଁ ୱେସାଲିଏ; ଏ଼ ଆୟାଟି ପା଼ର ଇଲୁତା ଅ଼ୱିଆ଼ତେ। 16 ପା଼ର ଏ଼ଦାଣି ତାକି ଅବ୍ରାମଇଁ ଜୀୱୁ ନ଼ହାଁ ଏ଼ୱାଣାକି ମେ଼ଣ୍ତାୟାଁ, ଗରିୟାଁ, ଗା଼ଡ଼୍‌ଦେୟାଁ, ହ଼ଲିୟାଙ୍ଗା ହ଼ଲେଣିସିକା, ତାଲି ଗା଼ଡ଼୍‌ଦେୟାଁ ଅ଼ଡ଼େ ଊଟୁୟାଁ ହୀତେସି।

17 ସାମା ଅବ୍ରାମତି ଡକ୍ରି ସାରି ତାକି ପ୍ରବୁ ପା଼ର ଅ଼ଡ଼େ ତାନି କୁଟମି ଲାକ ଆଜିହ଼ପେତି ର଼ଗ ପାଣ୍ତିତେସି। 18 ଏଚେଟିଏ ପା଼ର ଅବ୍ରାମଇଁ ହା଼ଟାହାଁ ଏଲେଇଚେସି, "ନୀନୁ ମା଼ ତଲେ ଏ଼ନାଆଁତାକି ଇଲେକିଁ ଲେ଼ମ୍ବାତି ? ଏ଼ଦି ନା଼ ଡକ୍ରି ଇଞ୍ଜିହିଁ ଏ଼ନାଆଁତାକି ୱେସ୍ତାଆତି ? 19 ନୀନୁ ଏ଼ନାଆଁତାକି ଈଦି ନା଼ ତାଙ୍ଗି ଇଞ୍ଜିଁ ୱେସ୍ତାତି ? ଏ଼ଦାଆଁତାକି ନା଼ନୁ ଏ଼ଦାନି ବୀହା ଆ଼ହାଲି ଅ଼ତେଏଁ; ନୀଏଁ ନୀ ଡକ୍ରିନି ମେହ୍‌ମୁ, ଏ଼ଦାନି ଅ଼ହିଁ ହାଲାମୁ।" 20 ଏଚେଟିଏ ପା଼ର ତାନି ଲ଼କୁଣି ହୁକୁମି ହୀତେସି, ଅ଼ଡ଼େ ଏ଼ୱାରି ବାରେ ଦ଼ନ ତଲେ ଅବ୍ରାମ ଅ଼ଡ଼େ ତାନି ଡକ୍ରିନି ହେଲ ହୀହାଁ ପାଣ୍ତିତେରି।