1 ଈ ବାରେ ଆ଼ତି ଡା଼ୟୁ, ପ୍ରବୁତି ବ଼ଲୁ ଅବ୍ରାମ ତା଼ଣା ୱା଼ତେ, "ଏ଼ ଅବ୍ରାମ ଆଜାଆନି, ନା଼ନୁ ନୀ ଆଡୁତେଏଁ ଅ଼ଡ଼େ ନୀ କାଜା ଦା଼ନା ସମାନା।"

2 ଏଚେଟିଏ ଅବ୍ରାମ ଏଲେଇଚେସି, "ହେ଼ ପ୍ରବୁ ମାହାପୂରୁ, ନୀନୁ ନାଙ୍ଗେ ଏ଼ନାଆଁ ହିୟାଦି ? ନା଼ନୁ ନୀଏଁ ପାତେକା କକାରି ପ଼ଦାୟାଁ ବେଟାଆ଼ଆନା ତା଼କିମାଇଁ, ଇଞ୍ଜାଁ, ଦମେସକତି ଇଲିୟେଜର ନା଼ ଇଲୁତି ଅଦିକାରା ଆ଼ନେସି।" 3 ଇଞ୍ଜାଁ, ଅବ୍ରାମ ଏଲେଇଚେସି, "ନୀନୁ ନାଙ୍ଗେ କକାରି ପ଼ଦାୟାଁ ହୀହାମାଞ୍ଜଅତି, ଏ଼ଦାଆଁତାକି ନା଼ ଇଜତି ହ଼ଲେଏସି ନା଼ ଦ଼ନତି ଅଦିକାରା ଆ଼ନେସି।"

4 ଏଚିବେ଼ଲା ଏ଼ୱାଣି ତାକି ପ୍ରବୁତି ବ଼ଲୁ ୱା଼ତେ, "ମେହ୍‌ମୁ ଏ଼ ମାଣ୍‌ସି ନୀ ଅଦିକାରା ଆ଼ହାଲି ଆ଼ଡଅସି; ସାମା ଆମ୍ବାଆସି ନୀ ତା଼ଣାଟି ଜାର୍ନା ଆ଼ନେସି, ଏ଼ୱାସି ନୀ ଅଦିକାରା ଆ଼ନେସି।" 5 ଏଚେଟିଏ ପ୍ରବୁ ଏ଼ୱାଣାଇଁ ପାଙ୍ଗାତା ତାଚାହାଁ ଏଲେଇଚେସି, "ନୀନୁ ହା଼ଗୁ ଲାକ ସିନିକିହାଁ ହୁକାଣି ଏଜିକିହାଲି ଆ଼ଡିଦି, ଆତିହିଁ ଏଜିକିହାଁ ୱେସ୍ତାମୁ।" ଏ଼ୱାସି ଅ଼ଡ଼େ ଏଲେଇଚେସି, "ନୀ କୂଡ଼ା ଇଲେକିଁ ଏ଼ପା ଆ଼ନେରି।"

6 ଏଚିବେ଼ଲା ଅବ୍ରାମ ପ୍ରବୁ ତା଼ଣା ନାମାଲିଏ, ପ୍ରବୁ ଏ଼ୱାଣାଇଁ ଦାର୍ମୁଗାଟାସି ଇଞ୍ଜିହିଁ ଇଚେସି।

7 ଏଚେଟିଏ ପ୍ରବୁ ଏ଼ୱାଣାଇଁ ଏଲେଇଚେସି, "ଆମ୍ବାଆସି ନୀ ଅଦିକାରା ତାକି ଈ ଦେ଼ସା ହୀହାଲି କଲ୍‌ଦିୟ ଲ଼କୁତି ଊରଟି ତାତାତେସି, ଏ଼ ମାହାପୂରୁତେଏଁ ନା଼ନୁ।"

8 ଏଚେଟିଏ ଅବ୍ରାମ ଏଲେଇଚେସି, "ହେ଼ ପ୍ରବୁ ମାହାପୂରୁ, ନା଼ନୁ ଈ ଦେ଼ସାତି ଅଦିକାରା ଆ଼ଇଁ, ଏ଼ଦାଆଁ ନା଼ନୁ ଏ଼ନିକିଁ ପୁଇଁ ?"

9 ପ୍ରବୁ ଏଲେଇଚେସି, "ନୀନୁ ତୀନି ବାର୍ସାତି ର଼ ତାଲି କ଼ଡି, ତୀନି ବାର୍ସାତି ର଼ ତାଲି ଗରି, ଅ଼ଡ଼େ ତୀନି ବାର୍ସାତି ର଼ ତାଲି ମେ଼ଣ୍ତା, ଇଞ୍ଜାଁ ର଼ ପା଼ର୍‌ୱା ଅ଼ଡ଼େ ର଼ କୁଗୁରି ନା଼ ତା଼ଣା ତାମୁ।" 10 ଏଚେଟିଏ ଅବ୍ରାମ ଏ଼ ବାରେ ମାହାପୂରୁ ତା଼ଣା ତାଚାହାଁ, ରୀ ପା଼ଡ଼ିୟା କିହାଁ ର଼ ପା଼ଡ଼ିୟା ଅ଼ର ପା଼ଡ଼ିୟା ନ଼କିତା ଇଟିତେସି; ସାମା ପଟାୟାଁଣି ରୀ ପା଼ଡ଼ିୟା କିଆତେସି। 11 ଏଚେଟିଏ ଊଙ୍ଗା ତିନି ପଟାୟାଁ* ଏ଼ ହା଼ତି ମାଡ଼୍‌ହା ଲାକ ରିହାଲିଏ, ଅବ୍ରାମ ଏ଼ୱାସିକାଣି ପେ଼ର୍‌ହେସି।

12 ଇଞ୍ଜାଁ ୱେ଼ଡ଼ା ହାନି ବେ଼ଲାତା ଅବ୍ରାମ ବା଼ରୁ ଇଦା କିହାଁ, ଗାଡି ଆନ୍ଦେରି ତାକି ହା଼ରେକା ଆଜିତେସି। 13 ଏଚିବେ଼ଲା ମାହାପୂରୁ ଅବ୍ରାମଇଁ ଏଲେଇଚେସି, "ନୀ କୂଡ଼ା ସା଼ରି ୱାଞ୍ଜା ବାର୍ସା ଏଟ୍‌କା ଦେ଼ସାତା ଡ଼ୟାହାଁ ୱେଟି କାମା କିହାଁ କସ୍ତ ବେଟାଆ଼ନେରି; ଈଦି ସାତେଏ ଇଞ୍ଜିହିଁ ପୁଞ୍ଜି। 14 ସାମା ଏ଼ୱାରି ଏମିନି ଦେ଼ସାତି ଲ଼କୁ ତା଼ଣା ୱେଟି କାମା କିନେରି, ନା଼ନୁ ଏ଼ୱାରି ବିଚାରା କିଇଁ; ଏଚେଟିଏ ଏ଼ୱାରି ହା଼ରେକା ଦ଼ନ ଆସାହାଁ ଏ଼ ଦେ଼ସାଟି ହ଼ଚା ୱା଼ନେରି। 15 ସାମା ନୀନୁ ରା଼ହାଁ ତଲେ ନୀ ଆକୁ ଆ଼ବାୟାଁ ତା଼ଣା ହାଜି ଅ଼ଡ଼େ ବୁଡ଼୍‌ହା ବେ଼ଲାତା ଦ଼ନ କିୱିଆ଼ଦି। 16 ଇଞ୍ଜାଁ, ନୀ କୂଡ଼ାତି ସାରି ପା଼ଟୁତି ଲ଼କୁ ଈ ଦେ଼ସାତା ୱେଣ୍ତେ ୱା଼ନେରି; ଇଚିହିଁ ଇମରିୟ ଲ଼କୁତି ପା଼ପୁ ନୀଏଁ ପାତେକା ପୂରାଆ଼ହା ହିଲେଏ।"

17 ଏଚେ଼ତା ୱେ଼ଡ଼ା ହାଚେ ଅ଼ଡ଼େ ଆନ୍ଦେରି ଆ଼ତେ, ମେହ୍‌ଦୁ ହଲୁତି ବ଼ୟିଁ ଅ଼ଡ଼େ ହିଚୁ ଗୁଦ୍‌ୱା ଡ଼ୀଞ୍ଜାହାଁ ଏ଼ ଜ଼ନ୍ତୟାଁତି ରୀ ବା଼ଗା ମାଦିଟି ହାଚେ। 18 ଇଞ୍ଜାଁ ଏ଼ ଦିନା ପ୍ରବୁ ଅବ୍ରାମ ତଲେ ରା଼ଜିମା଼ନା ତୀରିକିହାଁ ଏଲେଇଚେସି, "ନା଼ନୁ ଈ ମିସର କାଡାଟିଏ ପରାତ୍‌ ଦ଼ରୁତି କାଡା ପାତେକା ଈ ଦେ଼ସା ନୀ କୂଡ଼ାତି ଲ଼କୁକି ହୀତେଏଁ। 19 ଏମିନି ଦେ଼ସାତା ନୀଏଁ କେନିୟ, କନଜିୟ, କଦ୍‌ମନିୟ, 20 ହୀତିୟ, ପରିସିୟ, ରପାୟିୟ, 21 ଇମରିୟ, କିଣାନିୟ, ଗିର୍ଗାସିୟ ଅ଼ଡ଼େ ଜିବୁସିୟ ଲ଼କୁ ବାସା କିହାମାନେରି।"