Gênesis 21

ଇସାହାକତି ଜାର୍ନା

1 ଏଚେଟିଏ ପ୍ରବୁ ତାନି ଆ଼ଞ୍ଜିତି ଲେହେଁ ସାରାନି ଜାତ୍‌ନୁ କିତେସି; ଇଞ୍ଜାଁ ପ୍ରବୁ ଏ଼ନାଆଁ ଏଲେଇଞ୍ଜାମାଚେସି, ସାରାନି ଏଲେ କିତେସି। 2 ଏଚେଟିଏ ସାରା ଅବ୍ରାହାମତି ବୁଡ଼୍‌ହା ବେ଼ଲାତା ପୂରାମା଼ସା ଆ଼ହାଁ ମାହାପୂରୁ ତା଼ଣାଟି ତୀରି କିହାମାନି ବେ଼ଲାତା କକାଣାଇଁ ଜାର୍ନି କିତେ। 3 ଅବ୍ରାହାମ ସାରାନି ତା଼ଣାଟି ଜାର୍ନା ଆ଼ତି ମୀର୍‌ଏଣା ଦ଼ରୁ ଇସାହାକ*21:3 କାକ୍‌ନାୟି ଇଟିତେସି। 4 ଇଞ୍ଜାଁ ଅବ୍ରାହାମ ମାହାପୂରୁତି ହୁକୁମି ଲେହେଁ ତାନି ମୀର୍‌ଏସି ଇସାହାକ ଆ଼ଟାଦିନା ଆୟାଲିଏ ତ଼ଲୁ ଦା଼ପି କିତେସି। 5 ଅବ୍ରାହାମ ପା଼ସାକ଼ଡ଼ି ବାର୍ସା ଆୟାଲିଏ ଇସାହାକ ଜାର୍ନା ଆ଼ତେସି। 6 ଅ଼ଡ଼େ ସାରା ଏଲେଇଚେ, "ମାହାପୂରୁ ନାଙ୍ଗେ ରା଼ହାଁ ତଲେ କାପ୍‌କି କିୟାତେସି, ଈଦାଆଁ ୱେଞ୍ଜାହାଁ ବାରେ ଜା଼ଣା ନା଼ ତଲେ କାକ୍‌ନୁ।" 7 ଏ଼ଦି ଅ଼ଡ଼େ ଏଲେଇଚେ, "ସାରା କକାରି ପ଼ଦାୟାଁଣି ପା଼ଲୁ ଊଟ୍‌ନେ, ଈ କାତା ଅବ୍ରାହାମଇଁ ଆମ୍ବାଆୟି ଏଲେଇଞ୍ଜାଲି ଆ଼ଡିତେମା ? ଆ଼ତିଜିକେଏ ନା଼ନୁ ନୀଏଁ ତାନି ବୁଡ଼୍‌ହା ବେ଼ଲାତା କକାଣାଇଁ ଜାର୍ନି କିତେଏଁ।"

8 କକାସି ପାଡା ଆ଼ହାଲିଏ, ଏ଼ୱି ଏ଼ୱାଣାଇଁ ପା଼ଲୁ ପିସ୍‌ପି କିତୁ, ଏମିନି ଦିନା ଇସାହାକ ପା଼ଲୁ ପିସ୍ତେସି ଏ଼ ଦିନା ଅବ୍ରାହାମ କାଜା ବ଼ଜି ହୀତେସି।

ହାଗାର ଅ଼ଡ଼େ ଇସ୍‌ମାୟେଲଇଁ ପାଣ୍ତିନାୟି

9 ଏଚେଟିଏ ମିସରତି ହାଗାର ଅବ୍ରାହାମକି ଏମିନି ମୀର୍‌ଏଣାଇଁ ଜାର୍ନି କିହାମାଚେ, ଏ଼ ଇସ୍‌ମାୟେଲ ଇସାହାକଇଁ ପୀସେୟି କିହିମାଚାଣି ସାରା ମେସ୍ତେ। 10 ଏ଼ଦାଆଁତାକି ସାରା ଅବ୍ରାହାମଇଁ ଏଲେଇଚେ, "ନୀନୁ ଈ ହ଼ଲେଣିନି ଅ଼ଡ଼େ ତାନି ମୀର୍‌ଏଣାଇଁ ପାଣ୍ତାତୁହ୍‌ମୁ; ଇଚିହିଁ ଈ ହ଼ଲେଣି ମୀର୍‌ଏସି ନା଼ ମୀର୍‌ଏସି ଇସାହାକ ଅଦିକାରା ଆ଼ଅସି।" 11 ଈ କାତା ୱେଞ୍ଜାହାଁ ଅବ୍ରାହାମ ହା଼ରେକା ଦୁକୁ କିତେସି, ଏ଼ନାଆଁତାକି ଇଚିହିଁ ଇସ୍‌ମାୟେଲ ତାନି ମୀର୍‌ଏସି ମାଚେସି। 12 ଏଚିବେ଼ଲା ମାହାପୂରୁ ଅବ୍ରାହାମଇଁ ଏଲେଇଚେସି, "ନୀନୁ ଈ ମୀର୍‌ଏସି ଅ଼ଡ଼େ ହ଼ଲେଣି ତାକି ଦୁକୁ କିଆନି; ସାରା ନିଙ୍ଗେ ଏ଼ନାଆଁ ୱେସିମାଞ୍ଜାନେ, ଏ଼ଦାନି କାତା ଆହ୍‌ମୁ; ଇଚିହିଁ ଇସାହାକ ତା଼ଣାଟି ନୀ କୂଡ଼ା ୱେ଼ଙ୍ଗିନେ। 13 ଈ ହ଼ଲେଣିନି ମୀର୍‌ଏସି ନୀ କୂଡ଼ା, ଏ଼ଦାଆଁତାକି ନା଼ନୁ ଏ଼ୱାଣି ତା଼ଣାଟି ର଼ କୂଡ଼ା ଏ଼ପାକିଇଁ।"

14 ଏଚେଟିଏ ଅବ୍ରାହାମ ଲା଼ଇ ନିଙ୍ଗାହାଁ କା଼ଦି ଅ଼ଡ଼େ ତ଼ଲୁ ମ଼ଣାତା*21:14 ତ଼ଲୁ ତଲେ କେ଼ପିତି ବାସ୍ତା ଟୂପୁ ଏ଼ୟୁ ନେଞ୍ଜିକିହାଁ ହାଗାରକି ହୀହାଁ କକାଣାଇଁ ହେର୍‌ପାହାଁ ହେଲ ହୀହାଁ ପାଣ୍ତିତେସି; ଏଚେଟିଏ ଏ଼ଦି ହାଜାହାଁ ବେର୍‌ସେବା ବାଟାତା ଜିରୁ ବା଼ଣାଆ଼ତେ। 15 ଏଚିବେ଼ଲା ତ଼ଲୁ ମ଼ଣାତି ଏ଼ୟୁ ରା଼ହାଲିଏ, ହାଗାର ର଼ ଦୁପାତା କକାଣାଇଁ ପିସ୍ତେ। 16 ଅ଼ଡ଼େ ଏ଼ଦି ଏ଼ୱାଣି ତା଼ଣାଟି ହିରେ ହେକ ହାଜାହାଁ କୁଗିତେ; ଇଚିହିଁ ଏ଼ଦି ଏଲେଇଚେ, "କକାଣି ହା଼ନାଣି ନା଼ନୁ ମେହ୍‌ଆପେଏଁ।" ଇଞ୍ଜାଁ ଏ଼ଦି ଏ଼ୱାଣି ନ଼କିତା କୁଗାହାଁ କାଜା ଗିୟାଁତଲେ ଡ଼ୀତେ।

17 ଏଚିବେ଼ଲା ମାହାପୂରୁ କକାଣି ଡ଼ୀକି ୱେଚେସି; ଇଞ୍ଜାଁ ମାହାପୂରୁତି ଦୂତୁ ହା଼ଗୁଲାକଟି ହା଼ଟାହାଁ ହାଗାରନି ଏଲେଇଚେସି, "ଆଲ, ହାଗାର ନିଙ୍ଗେ ଏ଼ନାଆଁ ଆୟାତେ ? ଆଜାଆନି; ଇଚିହିଁ ଏମିନି ଟା଼ୟୁତା କକାସି ମାନେସି, ଏ଼ ଟା଼ୟୁତା ମାହାପୂରୁ ଏ଼ୱାଣି ହା଼ଡା ୱେଞ୍ଜାମାନେସି। 18 ନୀନୁ ହାଲାମୁ କକାଣାଇଁ ପେର୍‌ହା କଡାହାଁ ଏ଼ୱାଣି କେୟୁ ଆହ୍‌ମୁ; ନା଼ନୁ ଏ଼ୱାଣି ତା଼ଣାଟି ର଼ କାଜା କୂଡ଼ା ହ଼ପ୍‌ଇଁ।" 19 ଏଚିବେ଼ଲା ମାହାପୂରୁ ତାନି କାନୁତି ଦେତେସି, ଅ଼ଡ଼େ ଏ଼ଦି ର଼ କୁହି ମେସ୍ତେ ଇଞ୍ଜାଁ ଏମ୍ବାଆଁ ହାଜାହାଁ ଏ଼ୟୁ ନେଞ୍ଜିକିହା ତାଚାହାଁ ମୀର୍‌ଏଣାଇଁ ଊଟ୍‌ହେ। 20 ମାହାପୂରୁ କକାଣି ସା଼ୟେମି ଆ଼ହାଲିଏ; ଏ଼ୱାସି ପାଡାଆ଼ତେସି ଇଞ୍ଜାଁ ପାରଣ ଜା଼ଡ଼ାତା ମାଞ୍ଜାହାଁ ଏ଼ୱାସି ଆପ୍‌କା ୱେଲ୍‌କା ତଲେ ଜୁଜୁ କିନାସି ଆ଼ତେସି। 21 ଏ଼ୱାସି ପାରଣ ଦ଼ରୁତି ଜା଼ଡ଼ାତା ବାସା କିତେସି; ଏଚେଟିଏ ତାମି ଇୟା ର଼ ମିସର ଦେ଼ସାତି ମା଼ଙ୍ଗା ତଲେ ଏ଼ୱାଣାଇଁ ବୀହା କିତେ।

ଅବ୍ରାହାମ ଅ଼ଡ଼େ ଅବିମେଲକ ରା଼ଜିମା଼ନା

22 ଏଚିବେ଼ଲା ଅବିମେଲକ ଅ଼ଡ଼େ ପିକଲ ଦ଼ରୁତି ପା଼ସାକ଼ଡ଼ି କ଼ସ୍‌କା ମୁହେଁ କାଜାସି ଅବ୍ରାହାମଇଁ ଏଲେଇଚେରି, "ମାହାପୂରୁ ନୀ ବାରେ କାମାତା ସା଼ୟେମି ଆୟାନେସି। 23 ଏ଼ଦାଆଁତାକି ନୀନୁ ନା଼ ତାକି ଅ଼ଡ଼େ ନା଼ ମୀର୍‌କା ତାଙ୍ଗା ମୀର୍‌କାଣି ନା଼ଡ଼ି କିଅତି; ଇଞ୍ଜାଁ, ନା଼ନୁ ଏ଼ନିକିଁ ନିଙ୍ଗେ କାର୍ମା ମେସାମାଞ୍ଜାଇଁ, ଏ଼ଲେକିଁଏ ନୀନୁ ମା଼ ତାକି ଅ଼ଡ଼େ ନୀ ଡ଼ୟିନି ଟା଼ୟୁ ଈ ଦେ଼ସାତି କାର୍ମା ମେହ୍‌ଦି, ମା଼ ନ଼କିତା ମାହାପୂରୁତି ପାର୍‌ମାଣା କିହାଁ ଈ କାତା ୱେହ୍‌ମୁ।"

24 ଏଚେଟିଏ ଅବ୍ରାହାମ ଏଲେଇଚେସି, "ନା଼ନୁ ପାର୍‌ମାଣା କିଇଁ।" 25 ଅ଼ଡ଼େ ଅବିମେଲକତି ହ଼ଲିୟାଙ୍ଗା ଅବ୍ରାହାମତି ର଼ କୁହିତି ବା଼ଡ଼୍‌ୟୁ ତଲେ ଅ଼ହାମାଚେରି, ଏ଼ଦାଆଁତାକି ଅବ୍ରାହାମ ଅବିମେଲକଇଁ ଲା଼ଗିତେସି। 26 ଏଚେଟିଏ ଅବିମେଲକ ଏଲେଇଚେସି, "ଈ କାମା ଆମ୍ବାଆସି କିତେସି ନା଼ନୁ ପୁଞ୍ଜାହିଲଅଁ, ଇଞ୍ଜାଁ ନୀନୁୱା ନାଙ୍ଗେ ୱେସାମାଞ୍ଜଅତି; ନୀଞ୍ଜୁ ନା଼ନୁ ଈ କାତା ୱେଞ୍ଜିମାଇଁ।" 27 ଏଚେଟିଏ ଅବ୍ରାହାମ ମେ଼ଣ୍ତାୟାଁ ଅ଼ଡ଼େ କ଼ଡିୟାଁ ଅ଼ହାଁ ଅବିମେଲକକି ହୀତେସି, ଇଞ୍ଜାଁ ରିଆରି ର଼ ରା଼ଜିମା଼ନା ତୀରି କିତେରି। 28 ଅ଼ଡ଼େ ଅବ୍ରାହାମ ମାନ୍ଦାଟି ସା଼ତାଗଟା ମେ଼ଣ୍ତା ଡା଼ଲ୍‌କା ଏଟ୍‌କା କିହାଁ ଇଟିତେସି। 29 ଏଚେଟିଏ ଅବିମେଲକ ଅବ୍ରାହାମଇଁ ୱେଚେସି, "ନୀନୁ ଏ଼ନାଆଁତାକି ଈ ସା଼ତାଗଟା ମେ଼ଣ୍ତା ଡା଼ଲ୍‌କା ଏଟ୍‌କା କିହାଁ ଇଟିତି ?"

30 ଅବ୍ରାହାମ ଏଲେଇଚେସି, "ନା଼ନୁ ଈ କୁହି କା଼ର୍‌ହାଁମାଇଁ ଏ଼ଦାନି ସା଼କି ତାକି ନା଼ ତା଼ଣାଟି ଈ ସା଼ତାଗଟା ମେ଼ଣ୍ତା ଡା଼ଲ୍‌କା ଅ଼ନାୟି ମାନେ।" 31 ଏ଼ଦାଆଁତାକି ଏ଼ ଟା଼ୟୁତି ଦ଼ରୁ ବେର୍‌ସେବା*21:31 ପାର୍‌ମାଣା କୁହି ଆ଼ତେ, ଇଚିହିଁ ଏମ୍ବାଆଁ ଏ଼ ରିଆରି ପାର୍‌ମାଣା କିତେରି।

32 ଇଲେକିହିଁ ଏ଼ୱାରି ବେର୍‌ସେବା ଦାରିତା ରା଼ଜିମା଼ନା ତୀରି କିହାଲିଏ, ଅବିମେଲକ ଅ଼ଡ଼େ ପିକଲ ଦ଼ରୁତି କ଼ସ୍‌କା ମୁହେଁ କାଜାସି ନିଙ୍ଗାହାଁ ପାଲେସ୍ତିୟ ଦେ଼ସାତା ୱେଣ୍ତା ହାଚେରି। 33 ଏଚେଟିଏ ଅବ୍ରାହାମ ବେର୍‌ସେବା ଟଟତା ର଼ ଜାଉଁ*21:33 ପୁଲା ମା଼ର୍‌ନୁ ଲେହେଁତି ଗୁୟେଡ଼ି ମା଼ର୍‌ନୁ ମା଼ର୍‌ନୁ ଉହାଁ ଏ଼ ଟା଼ୟୁତା କା଼ଲାକା଼ଲାତି ପ୍ରବୁ ମାହାପୂରୁ ଦ଼ରୁତା ପ୍ରା଼ତାନା କିତେସି। 34 ଇଞ୍ଜାଁ ଅବ୍ରାହାମ ପାଲେସ୍ତିୟ ଦେ଼ସାତା ହା଼ରେକା ଦିନା ଡ଼ୟିତେସି।