Gênesis 50

1 ଏଚିବେ଼ଲା ଜସେପ ତାନି ଆ଼ବାତି ମୂମ୍ବୁତା ମୂମ୍ବୁ ଇଟାହାଁ ଡ଼ୀହିହିଁ ନଣ୍ତିତେସି। 2 ଇଞ୍ଜାଁ ଜସେପ ତାମି ଆ଼ବାତି ମାଡ଼୍‌ହା, ଗାନ୍ଦା ଆ଼ସ୍ତି ରୁବାଲି ତାନି ହ଼ଲିୟାଙ୍ଗା ଅସ ଗୂର୍‌କାଣି ହୁକୁମି ହୀତେସି; ଏଚେଟିଏ ଅସ ଗୂର୍‌କା ଇସ୍ରାୟେଲତି ମାଡ଼୍‌ହାତି ଗାନ୍ଦା ଆ଼ସ୍ତି ରୁବିତେରି। 3 ଏ଼ଦାଆଁ କିହାଲି ରୀ କ଼ଡ଼ି ଦିନା ଆ଼ତେ; ଇଚିହିଁ ଗାନ୍ଦା ଆ଼ସ୍ତି ରୁବାଲି ରୀ କ଼ଡ଼ି ଦିନା ଆ଼ନେ; ଇଞ୍ଜାଁ ମିସରତି ଲ଼କୁ ଏ଼ୱାଣି କ଼ସମି ତୀନି କ଼ଡ଼ି ଦସ ଦିନା ଦୁକୁ କିତେରି।

4 ଏ଼ ଦୁକୁତି ଦିନା ରା଼ହାଲିଏ, ଜସେପ ପା଼ରତି ଲ଼କୁଣି ଏଲେଇଚେସି, "ନା଼ନୁ ମୀ ନ଼କିତା କାର୍ମା ବେଟାଆ଼ହାମାଇଁ, ଆତିହିଁ ପା଼ରତି କିର୍ୟୁଁତା ଈ କାତା ୱେହ୍‌ଦୁ, 5 ‘ନା଼ ଆ଼ବା ହା଼ନି କାଟୁତା ନାଙ୍ଗେ ପାର୍‌ମାଣା କିୱିକିହାଁ ୱେସାମାଞ୍ଜାନେସି, କିଣାନ ଦେ଼ସାତା ଜାହାରା ତାକି ଏମିନି ମାହ୍‌ଣିମାଣ୍ତା କା଼ର୍‌ହାମାଇଁ ଏମ୍ବାଆଁ ନାଙ୍ଗେ ଦ଼ନ କିୟାମୁ। ଏ଼ଦାଆଁତାକି ବାତିମା଼ଲି ମାଞ୍ଜାଇଁ ନୀଏଁ ନାଙ୍ଗେ ହାଜାଲି ହିୟାମୁ ନା଼ନୁ ହାଜାହାଁ ନା଼ ଆ଼ବାଇଁ ଦ଼ନ କିହାଁ, ଅ଼ଡ଼େ ୱେଣ୍ତା ୱା଼ଇଁ।’"

6 ରାଜା ଏଲେଇଚେସି, "ହାଲାମୁ, ମୀ ଆ଼ବା ନିଙ୍ଗେ ଏମିନି ପାର୍‌ମାଣା କିୱି କିହାମାଞ୍ଜାନେସି, ନୀନୁ ଏଲେକିହିଁଏ ଏ଼ୱାଣାଇଁ ଦ଼ନ କିମୁ।"

7 ଏଚେଟିଏ ଜସେପ ତାନି ଆ଼ବାଇଁ ଦ଼ନ କିହାଲି ହାଚେସି; ଇଞ୍ଜାଁ ପା଼ରତି ହ଼ଲିୟାଙ୍ଗା, ତାନି ଇଲୁତି କାଜାରି, ଅ଼ଡ଼େ ମିସର ଦେ଼ସାତି କାଜାରି ହାଚେରି। 8 ଇଞ୍ଜାଁ ଜସେପତି ଇଲୁକୁଟମି, ତାନି ତାୟିୟାଁ, ଅ଼ଡ଼େ ତାନି ଆ଼ବାତି ଏଟ୍‌କା ଇଲୁକୁଟମି ଏ଼ୱାଣି ତଲେ ହାଚେରି; ଗ଼ସନ୍‌ ରା଼ଜିତା ଏ଼ୱାରି ତାମି କକାରି ପ଼ଦାଁଣି ଅ଼ଡ଼େ ମେ଼ଣ୍ତାୟାଁ, କ଼ଡିୟାଁ ମାନ୍ଦା ପିସା ହାଚେରି। 9 ତାନି ତଲେ ରାତା ଅ଼ଡ଼େ ଗ଼ଡ଼ାୟାଁ ଗାଟାରି ଜିକେଏ ହାଚେରି; ଏଚେ଼ଟିଏ ଗାଡୁ ଲ଼କୁ ଆ଼ତେରି।

10 ଏଚେଟିଏ ଏ଼ୱାରି ଜର୍ଦନତି ଗା଼ଣ୍‌ଚାହାଁ ଆଟଦର କା଼ଡ଼୍‌ନୁତା ୱା଼ତେରି, ଏ଼ୱାରି ଏମ୍ବାଆଁ ହା଼ରେକା ଡ଼ୀତେରି, ଅ଼ଡ଼େ ଜସେପ ଏମ୍ବାଆଁ ତାଞ୍ଜି ତାକି ସା଼ତା ଦିନା ପାତେକା ଦୁକୁତଲେ ଡ଼ୀତେସି। 11 ଇଞ୍ଜାଁ ଏ଼ ଦେ଼ସାତା ବାସା କିହାମାନି କିଣାନ ଲ଼କୁ ଆଟଦର କା଼ଡ଼୍‌ନୁତା ଏ଼ୱାରି ଇଲେତି ଦୁକୁତି ଡ଼ୀକି ମେସାହାଁ, ଏ଼ୱାରି ଏଲେଇଚେରି, "ମିସର ଲ଼କୁତି ଈଦି ହା଼ରେକା କାଜା ଦୁକୁ," ଏ଼ଦାଆଁତାକି ଜର୍ଦନ ଆତାଲାତି ଏ଼ ଟା଼ୟୁ ଆବେଲ ମିସର*50:11 ମିସର ଲ଼କୁତି ଦୁକୁ ଦ଼ରୁତଲେ ୱେ଼ଙ୍ଗିତେ।

12 ଏଚେଟିଏ ଜାକୁବ ତାନି ମୀର୍‌କାଣି ଏ଼ନିକିଁ ହୁକୁମି ହୀହାମାଚେସି, ଏ଼ୱାରି ଏ଼ୱାଣି ତାକି ଏଲେକିଁ କିତେରି; 13 ଇଚିହିଁ ତାନି ମୀର୍‌କା ଏ଼ୱାଣାଇଁ କିଣାନ ଦେ଼ସାତା ଅ଼ହାଁ ମକ୍‌ପେଲା ଗୁଡିୟା ମାଦିତି ପା଼ୱୁତା ଦ଼ନ କିତେରି; ଏ଼ ପା଼ୱୁ ମମ୍ରି ନ଼କିତି ଗୁଡିୟା ତଲେ ମାହ୍‌ଣିମାଣ୍ତା ଅଦିକାରା ତାକି ହୀତିୟ ଇପ୍ରଣ ତା଼ଣାଟି ଅବ୍ରାହାମ ତା଼ଣାଟି କଡ୍‌ୱି ଆ଼ହାମାଚେ। 14 ଜସେପ ତାନି ଆ଼ବାଇଁ ଦ଼ନ କିତି ଡା଼ୟୁ, ଏ଼ୱାସି ତାନି ତାୟିୟାଁ ତଲେ ଏଚେକା ଲ଼କୁ ତାମି ଆ଼ବାଇଁ ଦ଼ନ କିହାଲି ଏ଼ୱାଣି ତଲେ ହାଜାମାଚେରି ଏ଼ ବାରେ ମିସରତା ୱେଣ୍ତା ୱା଼ତେରି।

ଜସେପ ତାୟିୟାଁଣି ବା଼ର୍ସୁ ହୀନାୟି

15 ତାମି ଆ଼ବା ହା଼ହାମାନେସି, ଈଦାଆଁ ମେସାହାଁ ଜସେପତି ତାୟିୟାଁ ଏଲେଇଚେରି, "ଜସେପ ମାଙ୍ଗେ ଅ଼ପଅସି ହାବୁଲା, ଅ଼ଡ଼େ ମା଼ର ଏ଼ୱାଣାଇଁ ଏ଼ନିକିଁ ଲାଗେଏ କିହାମାନାୟି ଏମ୍ବାତି ବାଦୁଲି ମାଙ୍ଗେ ହିୟାନେସି।" 16 ଏ଼ଦାଆଁତାକି ଏ଼ୱାରି ଜସେପଇଁ ଈ କାତା ୱେସା ପାଣ୍ତିତେରି, "ମା଼ ଆ଼ବା ହା଼ନି ନ଼କେଏ ମାଙ୍ଗେ ଏଲେଇଞ୍ଜା ମାଞ୍ଜାତେସି, ମୀରୁ ଜସେପଇଁ ଈ କାତା ୱେହ୍‌ଦେରି, 17 ମୀ ତାୟିୟାଁ ନୀ ଲାଗେଏ କିହାମାଞ୍ଜାନେରି; ସାମା ନୀନୁ କାର୍ମା ଆ଼ହାଁ ଏ଼ୱାରି ଲାଗେଏତି କାମା ଅ଼ଡ଼େ ପା଼ପୁ କେମା କିମୁ; ଏ଼ଦାଆଁତାକି ମା଼ମ୍ବୁ ବାତିମା଼ଲି ମାଞ୍ଜାନମି, ମୀ ଆକୁତି ମାହାପୂରୁ ହ଼ଲିୟାଙ୍ଗାଣି ଦ଼ହ କେମା କିମୁ।" ଏ଼ୱାରି ଈ କାତା ଏଲେଇଞ୍ଜାଲିଏ ଜସେପ ଡ଼ୀହାଲି ମା଼ଟ୍‌ହେସି।

18 ଏଚେଟିଏ ତାନି ତାୟିୟାଁ ଏ଼ୱାଣି ନ଼କିତା ହାଜାହାଁ ଏ଼ୱାଣାଇଁ ଜହରା କିହାଁ ଏଲେଇଚେରି, "ମେହ୍‌ମୁ ମା଼ମ୍ବୁ ନୀ ହ଼ଲିୟାଙ୍ଗାତମି।"

19 ସାମା ଜସେପ ଏ଼ୱାରାଇଁ ଏଲେଇଚେସି, "ମୀରୁ ଆଜାଆଦୁ; ନା଼ନୁ ଏ଼ନାଆଁ ମାହାପୂରୁ ତ଼ଣେତେଏଁ ?" 20 ମୀରୁ ନା଼ କ଼ପାଟି ଲାଗେଏତି ଅଣ୍‌ପୁ ଅଣ୍‌ପାମାଚେରି, ସାମା ମାହାପୂରୁ ଏ଼ଦାଆଁ ନେହାଣି ଅଣ୍‌ପା ମାନେସି; ନୀଏଁ ଏ଼ନିକିଁ ମେସିମାଞ୍ଜେରି, ଏଲେକିହିଁଏ ହା଼ରେକା ଲ଼କୁତି ଜୀୱୁ ଗେଲ୍‌ପାଲି ଏ଼ୱାଣି ଅଣ୍‌ପୁ ମାଚେ। 21 ଏ଼ଦାଆଁତାକି ମୀରୁ ନୀଏଁ ଆଜାଆଦୁ, ନା଼ନୁ ମିଙ୍ଗେ ଅ଼ଡ଼େ ମୀ ମୀର୍‌କାଣି ପ଼ହିକିଇଁ। ଇଲେକିଁ ହିୟାଁ ତାକି ନେହିଁ ହା଼ଡା ୱେସାନା ଏ଼ୱାରି ଦୁକୁ ଡୂକ୍‌ହେସି।

ଜସେପ ହା଼ନାୟି

22 ଏଚେଟିଏ ଜସେପ ଅ଼ଡ଼େ ତାମି ତାଞ୍ଜିତି କୁଟମି ମିସରତା ବାସା କିହାଁ ଡ଼ୟିତେରି; ଜସେପ ପା଼ସା କ଼ଡ଼ି ଦସ ବାର୍ସା ନୀଡାହାଁ ଡ଼ୟିତେସି। 23 ଜସେପ ଇପ୍ରୟିମତି ତୀନି ଆକୁ ପାତେକା ମୀର୍‌କା ମା଼ସ୍‌କାଣି ମେସ୍ତେସି; ଅ଼ଡ଼େ, ଜସେପ ମନଃସିତି ମାକିର ଦ଼ରୁଗାଟି ମୀର୍‌କାତି କକାରି ପ଼ଦାଁଣି ଜ଼ଙ୍ଗିତେସି। 24 ଏଚେଟିଏ ଜସେପ ତାୟିୟାଁଣି ଏଲେଇଚେସି, "ନା଼ନୁ ହା଼ହିମାଇଁ, ସାମା ମାହାପୂରୁ ସାତାତଲେ ମିଙ୍ଗେ ଜାତ୍‌ନୁ ଅୟାନେସି, ଈ ଦେ଼ସାଟି ମିଙ୍ଗେ ହ଼ପ୍‌ହାଁ ଏମିନି ବୂମି ହୀହାଲି ଅବ୍ରାହାମ, ଇସାହାକ ଅ଼ଡ଼େ ଜାକୁବଇଁ ଆ଼ଞ୍ଜାମାଚେସି ଏ଼ ଦେ଼ସାତା ମିଙ୍ଗେ ଅୟାନେସି।" 25 ଏଚେଟିଏ ଜସେପ ଇସ୍ରାୟେଲତି ମୀର୍‌କାଣି ଈ ପାର୍‌ମାଣା କିୱିକିତେସି, "ମାହାପୂରୁ ସାତେଏ ମିଙ୍ଗେ ଜାତ୍‌ନୁ ଅୟାନେସି, ଏ଼ ବେ଼ଲାତା ମୀରୁ ଈ ଟା଼ୟୁଟି ନା଼ ପେ଼ଡ଼୍‌କା ଡୁମ୍‌କା ଅ଼ଦେରି।" 26 ଇଲେକିହିଁ ଜସେପ ପା଼ସା କ଼ଡ଼ି ଦସ ବାର୍ସା ବେ଼ଲାତା ମିସର ଦେ଼ସାତା ହା଼ତେସି; ଏଚେଟିଏ ଏ଼ୱାରି ତାନି ମାଡ଼୍‌ହାତି ଗାନ୍ଦା ଆ଼ସ୍ତି ରୁବାହାଁ ମିସର ଦେ଼ସାତା ର଼ ପେ଼ଡ଼ାତା ଇଟିତେରି।