1 ଏଚେଟିଏ ପ୍ରବୁ ନ଼ହଁଇଁ ଏଲେଇଚେସି, "ମୀରୁ ମୀ ଇଲୁ କୁଟମି ବାରେ ଜା଼ଜାତା ହ଼ଡ଼୍‌ଦୁ; ଇଚିହିଁ ଈ କା଼ଲାତି ଲ଼କୁ ବିତ୍ରା ନୀନୁ ନା଼ ନ଼କିତା ଦାର୍ମୁ ଗାଟାତି ତ଼ଞ୍ଜା ଆ଼ହାମାଞ୍ଜି। 2 ଅ଼ଡ଼େ ଦାର୍‌ତିତା ବେ଼ଲି ଏ଼ପି କିହାଲି ବାରେ କୂଡ଼ାତି ସୁଦୁ ଜ଼ନ୍ତଜିୱେଡ଼ି ସା଼ତା ଜ଼ଡ଼ୁ ଅ଼ଡ଼େ ବାରେ ଲାଗେଏତି ଜ଼ନ୍ତଜିୱେଡ଼ି ର଼ ର଼ ଜ଼ଡ଼ୁ ଅ଼ମୁ। 3 ବାରେ କୂଡ଼ାତି ପଟାୟାଁଣି ଜିକେଏ ସା଼ତା ସା଼ତା ଜ଼ଡ଼ୁ ଅ଼ମୁ। ଜ଼ନ୍ତ ଅ଼ଡ଼େ ପଟାୟାଁଣି ଦାର୍‌ତିତା ବେ଼ଲି ଏ଼ପି କିହାଲି ଜୀୱୁ ତଲେ ଇଟାମୁ। 4 ଇଚିହିଁ ସା଼ତା ଦିନା ଡା଼ୟୁ ଦୁଇ କ଼ଡ଼ି ଦିନା ଲା଼ଆଁ ମାଦେନା ପିୟୁ ପାଣ୍ତାହାଁ, ଦାର୍‌ତିତା ନା଼ନୁ ଗା଼ଡ଼ିକିତି ବାରେ ଜୀୱୁ ଗାଟାଆଁ ନା଼ସା କିଇଁ।" 5 ନ଼ହଁ ପ୍ରବୁ ହୁକୁମି ହୀତି ଲେହେଁ ବାରେ କାମା କିତେସି।

6 ନ଼ହଁକି ସ଼ୱାଞ୍ଜା ବାର୍ସା ଆ଼ହାମାଚି ବେ଼ଲାତା ଦାର୍‌ତି ରା଼ଜି ବୀଡ଼ୱି ଆ଼ତେ। 7 ରା଼ଜି ବୀଡ଼ୱି ଆ଼ନି ତା଼ଣାଟି ଗେଲ୍‌ପି ଆ଼ହାଲି ନ଼ହଁ, ତାନି ଡକ୍ରି ଅ଼ଡ଼େ ତାନି ମୀର୍‌କା ଇଞ୍ଜାଁ ତାନି କୁଡ଼୍‌ୟାସିକା ଜା଼ଜାତା ହ଼ଟୁ। 8 ଇଞ୍ଜାଁ ନ଼ହଁ ମାହାପୂରୁ ହୁକୁମି ହୀତି ଲେହେଁ ସୁଦୁ ଅ଼ଡ଼େ ଲାଗେଏତି ଜ଼ନ୍ତ ଜୀୱେଡ଼ିକା, ପଟା କା଼ଟି ଅ଼ଡ଼େ ବାଣ୍ତି ତଲେ ତା଼କିନି ଜ଼ନ୍ତୟାଁ ଜ଼ଡ଼ୁ ଜ଼ଡ଼ୁ ଆ଼ହିଁ, 9 ନ଼ହଁ ତା଼ଣା ହାଜାହାଁ ଜା଼ଜାତା ହ଼ଟୁ। 10 ଅ଼ଡ଼େ ଏ଼ ସା଼ତା ଦିନା ଡା଼ୟୁ ଦାର୍‌ତିତା ପିୟୁ ୱା଼ତେ।

11 ଏଚିବେ଼ଲା ନ଼ହଁକି ସ଼ୱାଞ୍ଜା ବାର୍ସା ରୀ ଲେ଼ଞ୍ଜୁ ସତର ଦିନା ଆ଼ତେ, ସାମ୍‌ଦୁରି ଦେପି ଆ଼ତେ ଅ଼ଡ଼େ ହା଼ଗୁ ବାରେ ଦେପିଆ଼ତେ। 12 ଏଚେଟିଏ ଦୁଇ କ଼ଡ଼ି ଦିନା ଲା଼ଆଁ ମାଦେନା ଦାର୍‌ତିତା ପିୟୁ ରିତେ। 13 ଏ଼ ଦିନା ନ଼ହଁ ତାନି ଡକ୍ରି ତଲେ ତାନି ତୀନି ଜା଼ଣା ମୀର୍‌କା ସେମ, ହାମ ଅ଼ଡ଼େ ଜେପତ୍‌ ଅ଼ଡ଼େ ତାନି କୁଡ଼୍‌ୟାସିକା ଜା଼ଜାତା ହ଼ଟୁ। 14 ଇଞ୍ଜାଁ ନା଼ୟୁଁତା ମାନି ବାରେ କୂଡ଼ାତି ଜ଼ନ୍ତ, ଜା଼ଡ଼ାତା ମାନି ବାରେ କୂଡ଼ାତି ଜ଼ନ୍ତ, ଅ଼ଡ଼େ ବାଣ୍ତିତଲେ ତା଼କିନି ଜ଼ନ୍ତ, ବାରେ କୂଡ଼ାତି ବୂମିତା ମେୟିଁନି ଜ଼ନ୍ତ ଅ଼ଡ଼େ ଊମ୍ବିନି ପଟା କା଼ଟି; 15 ଇଚିହିଁ, ଜୀୱୁଗାଟି ବାରେ ଜ଼ନ୍ତ ଜୀୱେଡ଼ିକା ଜ଼ଡ଼ୁ ଜ଼ଡ଼ୁ ଆ଼ହିଁ ନ଼ହଁ ତା଼ଣା ୱା଼ହାଁ ଜା଼ଜାତା ହ଼ଟୁ। 16 ମାହାପୂରୁ ହୁକୁମି ହୀତି ଲେହେଁ ବାରେ କୂଡ଼ାତି ଜ଼ନ୍ତୟାଁ ଜ଼ଡ଼ୁ ଜ଼ଡ଼ୁ ଆ଼ହିଁ ତାଲି ପ଼ତୁ ଜା଼ଜା ବିତ୍ରା ହ଼ଟୁ; ଏଚେଟିଏ ପ୍ରବୁ ଏମ୍ବାତି ଦା଼ରା ସୁଣ୍ତିତେସି।

17 ଏଚେଟିଏ ଦୁଇ କ଼ଡ଼ି ଦିନା ପାତେକା ଦାର୍‌ତିତା ପିୟୁ ରିତେ, ଏ଼ୟୁ ଗାଡି ଆ଼ହିଁ ଆ଼ହିଁ ଜା଼ଜା ବୂମି ପିସାହାଁ ଏ଼ୟୁ ଲାକ ପ଼ର୍‌ହେ। 18 ଅ଼ଡ଼େ ଦାର୍‌ତିତା ଦୀରେ ଦୀରେ ଏ଼ୟୁ ଗାଡି ଆ଼ହାଁ ଜା଼ଜା ଏ଼ୟୁ ଲାକ ପ଼ର୍‌ହେ। 19 ଦାର୍‌ତିତା ଏ଼ୟୁ ଗାଡି ନିଚାଲିଏ ପାଡାଆ଼ତି ହ଼ର୍‌କା ବାରେ ମୁଞ୍ଜିତୁ। 20 ହ଼ର୍‌କା ମୁଞ୍ଜାଲିଏ ପନ୍ଦର କିଉବିଟ୍‌* ହ଼ରୁ ଲାକ ଏ଼ୟୁ ନିତୁ; ଏଚେଟିଏ ହ଼ର୍‌କା ବାରେ ମୁଞ୍ଜିତୁ। 21 ଏ଼ଦାଆଁତାକି ଦାର୍‌ତିତା ମାଚି ବାରେ ଜୀୱୁଗାଟି ଜ଼ନ୍ତୟାଁ ବାରେ ପଟା କା଼ଟି, ନା଼ୟୁଁତି ଜ଼ନ୍ତ, ଜା଼ଡ଼ାତି ଜ଼ନ୍ତ, ଦାର୍‌ତିତା ବାଣ୍ତି ତଲେ ତା଼କିନି ବାରେ ଜ଼ନ୍ତ ଅ଼ଡ଼େ ବାରେ ମାଣ୍‌ସିୟାଁ ହା଼ତେରି। 22 ୱା଼ୟା ବୂମିତି ଏଚେକା ଜ଼ନ୍ତୟାଁକି ମୁଙ୍ଗେଲିତା ନେ଼ଞ୍ଜିନି ଜୀୱୁ ମାଚେ, ବାରେ ହା଼ତୁ। 23 ଇଲେକିଁ ବୂମି ଲାକତି ବାରେ ଜ଼ନ୍ତ ମେଣ୍‌ଙ୍ଗାହାଚୁ, ଇଚିହିଁ ମାଣ୍‌ସିୟାଁ, ଜ଼ନ୍ତ ଜୀୱେଡ଼ି, ବାଣ୍ତିତଲେ ତା଼କିନି ଜ଼ନ୍ତ, ପଟାୟାଁ ବାରେ ଦାର୍‌ତିଟି ମେଣ୍‌ଙ୍ଗାହାଚୁ; ୱାର୍‌ଇ ନ଼ହଁ ଇଞ୍ଜାଁ ତାମି ତଲେ ଜା଼ଜାତା ହ଼ଟି ଲ଼କୁ ନୀଡିତୁ। 24 ଇଲେକିଁ ଦାର୍‌ତି ସା଼ତା କ଼ଡ଼ି ଦସ ଦିନା ପାତେକା ଏ଼ୟୁଣା ମୁଞ୍ଜାହାଁ ଡ଼ୟିତେ।