ମୂଲୁ 8

6 ଏଚେଟିଏ ନ଼ହଁ ଦୁଇ କ଼ଡ଼ି ଦିନା ଡା଼ୟୁ ତା଼ନୁ କେ଼ପିତି ଜା଼ଜାତି କା଼ନ୍ତା*8:6 କିଡ଼୍‌କି ଦେଚାହାଁ ର଼ କାଃୱା ପାଙ୍ଗାତା ଊପ୍‌ହେସି। 7 ଏଚେଟିଏ ଦାର୍‌ତିତି ଏ଼ୟୁ ସୀକିନି ପାତେକା କାଃୱା ଇତାଲା ଆତାଲା ଆ଼ହିଁ ଊମ୍ବିହିଁ ରେ଼ଚେ। 8 ଅ଼ଡ଼େ ୱେଣ୍ତେ, ନ଼ହଁ ବୂମିତା ଏ଼ୟୁ ସୀକିତୁ କି ଆ଼ଏ ଇଞ୍ଜିଁ ପୁଞ୍ଜାଲି ର଼ କୁଗୁରି ପଟାଇଁ ଊପ୍‌ହେସି, 9 ଏଚିବେ଼ଲା ଦାର୍‌ତିତା ଏ଼ୟୁ ମାଚାକି କୁଗୁରି କୁଗାଲି ଟା଼ୟୁ ବେଟାଆ଼ଆଲିଏ, ଏ଼ଦି ନ଼ହଁ ତା଼ଣା ଜା଼ଜାତା ୱେଣ୍ତେ ୱା଼ତେ; ଇଞ୍ଜାଁ ନ଼ହଁ କେୟୁ ଦା଼ସାହାଁ ଜା଼ଜା ବିତ୍ରା ୱେଣ୍ତେ ଅ଼ତେସି। 10 ଅ଼ଡ଼େ ସା଼ତା ଦିନା ଡା଼ୟୁ ଏ଼ୱାସି ଏ଼ କୁଗୁରି ପଟାଇଁ ଜା଼ଜାଟି ୱେଣ୍ତେ ଊପ୍‌ହେସି। 11 ଏଚେଟିଏ କୁଗୁରି ମିଡ଼୍‌ଅଲା ଆୟାଲିଏ ଏ଼ୱାଣି ତା଼ଣା ୱେଣ୍ତା ୱା଼ତେ, ଅ଼ଡ଼େ ମେହ୍‌ଦୁ ଏ଼ଦାନି ଗ଼ରୁତା ଜୀତ ମା଼ର୍‌ନୁତି ପୁଃନି ଗୱେଡ଼ି ମାଚେ; ଏମ୍ବାଟିଏ ନ଼ହଁ ଦାର୍‌ତିତି ଏ଼ୟୁ ସୀକିତୁ ଇଞ୍ଜିଁ ପୁଚେସି। 12 ଅ଼ଡ଼େ ସା଼ତା ଦିନା ଡା଼ୟୁ ଏ଼ କୁଗୁରିଇଁ ୱେଣ୍ତେ ଊପ୍‌ହା ପାଣ୍ତିତେସି, ସାମା ଏ଼ଦି ଅ଼ଡ଼େ ୱେଣ୍ତେ ତାନି ତା଼ଣା ୱେଣ୍ତା ୱା଼ଆତେ଼।