Matiyo 11

11 Matinaw ya un ku paglongun kamayu: Ya kadég na utaw na nya͡utaw asini tas na lupaꞌ taman adun, walaꞌ ya pangkay sambuk na matas pa kan Juan na Magba͡utismuway. Manang ya to-o madalem na utaw na nyaka-akup adti Kasakupan na Pighari-an na Tyumanem, matas pa sakanan kan Juan. 12 Na, lekat na allaw na migpalekat mig-ubat-ubat si Juan na Magba͡utismuway, mendaꞌ adun, ya Kasakupan yan to-o pa baling migkadakulaꞌ pangkay awun manga migbalabag sa pag-ubat-ubat aw nyamulayam sa manga nyaka-akup da. Aw awun uman mangkabulut na utaw na kaliman nilan sulungun aw agawun galu ya Kasakupan yan.