Mateus 11

Ya pagsalaꞌ ni Jisus sa manga utaw na walaꞌ pagselsel

20 Aw pagkatigkas yan, pigpalekat ni Jisus ya pagsalaꞌ sa manga eped na manga utaw na nyeyaꞌ dun ni manga lunsud na kya-imo-an nan sa madég na milagru, kay walaꞌ silan pagselsel. 21 Yanagaw miglong si Jisus kanilan, "Kadég mayu na taga lunsud na Korazin aw Bétsayda, malatay ya un mayu datengan! Kay kyinitaꞌ da mayu ya manga milagru na pig-imoꞌ ku, manang tabay kamayu ya migselsel. Kun pig-imoꞌ pa ku yeiy adti manga syudad na Tiro aw Sidon, madugay da galu silan magselsel aw sumut sa kayab na saku aw magsabug sa abu adti kanilan ulu na yan ya pangilala sa kanilan pagselsel. 22 Manang paglongun ta kamu: To-o pa baling mabegat ya pa-emel-emel kamayu na Tyumanem dun ni allaw na pag-ukum kay sa manga utaw na nyeyaꞌ dun ni Tiro aw Sidon. 23 Aw kamu na nyeyaꞌ dun ni Kapirna-um, unu, iman mayu aw ya pagkadengganen mayu dyumateng adti tas na langit? Padalemen kamu saba, aw dala͡en kamu adti banwa na Kaludukan. Kay kun pigpan-imoꞌ pa ku dun ni Sodoma ya manga milagru kasiling na pig-imoꞌ ku dun ni kamayu, kenneꞌ pa galu na syudad yan adun. 24 Manang paglongun ta kamu: Pagdateng da na allaw na pag-ukum, to-o pa baling dun mabegat ya pa-emel-emel na Tyumanem kamayu kay sa manga utaw na nyeyaꞌ dun ni Sodoma!"*11:24 Mabasa adti Génésis 19:24.