Gênesis 6

Wihi wa Munhu

1 Wanhu viwanduse kongezeka muna iisi yose, wana wa chike welekigwa kumwawo, 2 wasenga wa Mulungu*6:2 Kwa Chiebulaniya cholongwa, "Wana wa Mulungu," lusita mwingi ina fambulo da viumbe wa chimuhe siyo wanhu. wawawona wandele wa wanhu kuwa lumondo, na wawasola kuwa wake zawo fana viwalondile. 3 Maabaho Mndewa Mulungu kalonga, "Muhe wangu hawizakala kwa wanhu siku zose, kwaviya wawo ni lukuli. Kwandusila sambi na kugendelela, hawezakala miyaka kufosa miyaka gana na malongo maidi." 4 Lusita ulo na kugendelela, kukala na Wanefili *6:4 "Wanefili" fambulo jake "mizinhu mitali inenehe." mwiisi, wawo wakala welesi wa wana wa Mulungu na wandele wa wanhu. Wawo niiyo wanhu wakalile magalu, wamanyike ng’hani baho umwaka. 5 Mndewa Mulungu kawona wihi mkulu wa wanhu muna iisi na magesa yawo yehile chila siku, 6 Ivo Mndewa Mulungu kengilwa na usungu ng’hani kwa kumulumba munhu na kumwika muna iisi, kawona usungu ng’hani muna umoyo wake. 7 Mndewa Mulungu kalonga, "Nizamsegeza munhu yonimulumbile muna iisi, iviya nizawasegeza wang’onyo, waja wotambala na ndege wa kuulanga. Nojuta kwaviya niwalumba." 8 Mbali Mndewa Mulungu kanogelwa na Nuhu.

Nuhu

9 Zino niizo mbuli za ugima wa Nuhu yakalile yotenda mbuli zinogile haulongozi wa Mulungu, mkamilifu muna uwelesi wake. Nuhu kakala kwa kumnogeza Mulungu.