1 Mə lîshi kwatə̂mə ə wû Aya Ndalimi nə, tshə kâ gâ lafɔ pâ kaga Siɔ, də azü sake ngbangbo bale də zazü bishi amanə vəna (144 000), ə̂në əndje tâ əɨrɨ ye də əɨrɨ Abä nə gâ tə̂ matshi əndje gâ ye kɔ. 2 Mə djî ə̈bə̈ tshema ə̂në ə tô mâ lafɔ, ə̂në ə kɨ̂ mata əsərɨ âgbɔ̂ ədjuru ə̂ngû, mata kə lea yavrɨ tə âgbɔ̂ kɔ; â əkɨ ərə nə ə̂në mə djî kɔ, ə sə̂ mata kundi ə̂në aawonɔ nə sə kə nɔ nə kɔ. 3 Azü səkɔ sə̂ kə vi ə̈bə̈ tafa ətshi, gâ ətshi mbata ngerə nə, ndje gâ ətshi asorô nə vəna nə də aâgbɔ̂ azü nə. Ə̈bə̈ əzü bale lï lï ndə kə pa tshə manda ətshi səkɔ ne, kʉtə̂ azü nə sake ngbangbo bale də zazü bishi amanə vəna (144 000) nə, ə̂në əndje yɔ̂ əndje pâ ashɔ kɔ kə lï ndə kə vi nə.

4 Azü ə̂në əndje djâ djâ tə̂ əndje də ayashe bale ne, ə̂në əndje wusə̂ ayashe wu ne kɔ kə sə̂. Əndje sə kə za äwä Aya Ndalimi nə na na ye tə̂ ətshe nɔ̂ ə̂në tshə sə kə na tə̂ nə kɔ. Əndje yɔ̂ əndje lə takpa tə̂ azü mata angbʉlî kumu ərə mbrə Ndjapä gâ ndə Aya Ndalimi nə gâ ye. 5 Â əndje sɔ̂tə̂ ə̈bə̈ əpʉ əterə bale sɔ̂ lə ama əndje ne. Ə̈bə̈ əpʉ bale sə sə lə kumu əndje ne.

6 Mandânə, mə wû ə̈bə̈ ata trawaya nə̂ Ndjapä nə ə̂në tshə sə̂ kə rɨ mâ ngâ lafɔ kɔ. Tshə sə̂ də ə̈bə̈ ə̂rɔ̂ əpʉ ə̂në ə sə piii kɔ ndə kə pa tshə mʉ kə azü tshepashɔ, kə aəgɔ nɔ̂, kə amarä nɔ̂, kə azü aama aəgɔ nɔ̂, ndje kə azü aəgɔ nɔ̂. 7 Tshə sə̂ kə pa əpʉ tə âgbɔ̂ ə pa: «E kpë rawa Ndjapä ə mbë ətshə! Mbrə ə̂në alɔ ndə kə pa tshə wa ngbanga azü tshepashɔ tɔ̂ gâ ye. E vrɔ̈ ətshə nə ə̂në tshə mbrə̂ tshelafɔ də ashɔ də ə̂ngû əngbrʉ gâ ndə akumungû kɔ!»

8 Ə̈bə̈ bishi trawaya nə̂ Ndjapä nə nâ mandâ ye ə pâ: «Ə tê gâ ye, ə tê gâ ye, âgbɔ̂ gala Babilɔnə nə*. Ə tə nə ə̂në ə zâ duva nə̂ ye kə azü aəgɔ nɔ̂ ndə kə pa əndje ndju ka ə mbrə ə̂trû mata ənə̂ ye nə kɔ.»

9 Ə̈bə̈ ata trawaya nə, vəta nə, nâ mandâ əndje ə pâ əpʉ tə âgbɔ̂ ə pa: «Kədə ə̈bə̈ əzü kə vrɔ agia nə də foto ye nə â əndje ke ətshə tə̂ matshi ye wala pâ kəna ye, 10 tshə sə kə ndju, ətshə ndje, duva âgbɔ̂ əkɔ nə̂ Ndjapä nə, ə̂në əndje sɨ̂ kʉtə̂ nə tshî gâ lə kopo əkɔ nə̂ ye nə gâ ye kɔ. Tshə sə kə wu əyo ngbatshe lə əwo də abadja ə̂në ə sho ətshe ə sho kɔ, ətshi atrawaya nə̂ Ndjapä nə, ndje ətshi Aya Ndalimi nə. 11 Ngâwo əwo nə ə̂në azü nə ə wu əyo nə lə nə kɔ, ə sə kə da o nə gâ lafɔ piii, â azü nə ə̂në əndje vrɔ agia nə də foto ye nə kɔ də azü nɔ̂ ə̂në əndje tâ əɨrɨ agia nə gâ tə̂ əndje nə kɔ, əndje sə sə kə sɔtə̂ äwä kə wu tə̂ əndje bale ne, sɔ də tsheləbu sɔ də alɔ.»

12 Alɔ ndə kə pa azü nə̂ Ndjapä nə ru ə ru lə aərə nɔ̂ kɔ kə sə̂, əndje ə̂në əndje sə kə bata aəpʉ ama Ndjapä nə də äwä lɔsu əndje ə̂në əndje zâ kə Jezu kɔ. 13 Mə djî ə̈bə̈ tshema ə̂në ə tô mâ lafɔ ə pâ əpʉ ə pa: «Tä əpʉ səye gâ lə fraka: "Ənə̂ əndje tə ə̂rɔ̂nə, azü ə̂në əndje daka pə tə̂ äwä kosəra nə̂ Âgbɔ̂ Əyïngerə â tshu kɔ, ə̂në a ləye kɔ!" Âgbɔ̂ Yîrə̂ pa: "Ayî, əndje wü tə̂ əndje tə̂ akosəra nə̂ əndje, mbrə ə̂në aərə ə̂në əndje mbrə̂ gâ ye kɔ, ə sə kə za äwä əndje."»

14 Mə lîshi kwatə̂mə ə wû ə̈bə̈ ə̂mbî andra, â ətshə ə̂në tshə sə̂ gâ tʉ gâ pâ andra nə kɔ, tshə kô əzü. Tshə sə̂ də kpɔtɔ ngerə lɔrə tə̂ akrɔ ye â sə̂ də kamba kə wa də angwa rəgo, ə̂në ama nə kɨ̂ tə bandanə kɔ, lə kəna ye. 15 Ə̈bə̈ ata trawaya nə̂ Ndjapä nə wûtu lə Anda Ndjapä nə ə sə̂ kə ta râwâ tə âgbɔ̂ tə̂ ətshə nə ə̂në tshə sə̂ gâ tʉ gâ pâ andra nə kɔ ə pa: «Zä kamba nə̂ zə nə ə wä angwa rəgo nə! Alɔ kə wa angwa rəgo nə tɔ̂ gâ ye, mbrə ə̂në angwa rəgo tshepashɔ nə nê gâ ye.» 16 Bale, ətshə nə ə̂në tshə sə̂ gâ tʉ gâ pâ andra nə kɔ, tshə zâ kamba kə wa də rəgo nə̂ ye nə ə wlî gâ pâ ashɔ nə â əndje wâ angwa rəgo tshepashɔ nə.

17 Ə̈bə̈ ata trawaya nə̂ Ndjapä nə wûtu lə Anda Ndjapä nə ə̂në ə sə mâ lafɔ kɔ. Ətshə ndje, tshə sə̂ də ə̈bə̈ kamba kə wa də angwa rəgo nə, ə̂në ama nə kɨ̂ tə bandanə kɔ.

18 Mandânə, ə̈bə̈ ata trawaya nə̂ Ndjapä nə, ətshə ə̂në tshə sə̂ də awlra gâ pâ əwo kɔ, tshə tô lə gblaka nə ə wûtu ə tâ râwâ tə âgbɔ̂ tə̂ ətshə nə ə̂në tshə sə̂ də kamba kə wa də angwa rəgo nə, ə̂në ama nə kɨ̂ tə bandanə kɔ ə pa: «Zä kamba kə wa də angwa rəgo nə̂ zə nə, ə̂në ama nə kɨ̂ tə bandanə kɔ ə grä akumu aə̂lê vinyə tshepashɔ nə, mbrə ə̂në aə̂lê nə drô gâ ye!» 19 Trawaya nə̂ Ndjapä nə zâ kamba kə wa də angwa rəgo nə̂ ye nə ə wlî gâ pâ ashɔ nə. Tshə grâ aə̂lê vinyə pâ ashɔ nə ə vɔ̂ gâ lə əgerə tshelə əkpʉ kə pʉ tshelə aə̂lê vinyə âgbɔ̂ əkɔ nə̂ Ndjapä tə̂ nə kɔ. 20 Əndje dɔ̂ tshelə aə̂lê vinyə nə lə əgerə tshelə əkpʉ kə pʉ duva lə nə kɔ gashu tə̂ tshelə gala nə. Ə̈ndjï wûtu lə ərə kə pʉ duva nə lə nə kɔ ə zâ ətshe ə sû ʉrrr ndjɔ gâ tə̂ ama ambrata gâ lafɔ ə nâ ngrʉ̂ mata kelɔmatrə ngbangbo vəta (300).