Apocalipse 15

Atrawaya nə̂ Ndjapä də bale aərə əyo nə

1 Mandânə, mə wû ə̈bə̈ ata ərə ə̈lü nə mâ lafɔ je, ə̂në ə sə̂ tə âgbɔ̂ nə â ə rô pâ kumu əzü. Mə wû atrawaya nə̂ Ndjapä mindû amanə bishi ə̂në əndje têgbɔ aəmbrʉ aərə mindû amanə bishi gâ lə kəna əndje, ə̂në ə sə tə bale aəmbrʉ aərə nə kɔ, mbrə ə̂në tə̂ äwä nə də̂ əkɔ nə̂ Ndjapä nə sə kə nglɔ nə.

2 Mə wû ə̈bə̈ ərə mata ə̈bə̈ ə̂ngû əngbrʉ ə̂në ə sə̂ ngewle ngewle, ə̂në ə ngbô də əwo kɔ. Â azü nə ə̂në əndje rô agia nə də foto ye nə də atshɔ əɨrɨ ye nə də awlra gâ ye kɔ, əndje kâ gâ lafɔ pâ ala ə̂ngû əngbrʉ nə ə̂në ə sə̂ ngewle ngewle kɔ ə kô kundi nə̂ Ndjapä gâ lə kəna əndje. 3 Əndje sə̂ kə vi ətshi nə̂ Mayïzə, əyïkosəra nə̂ Ndjapä, də ətshi nə̂ Aya Ndalimi nə ə pa:

«Əyïlingû Ndjapä, Âgbɔ̂ Əyïworɔgbɔ,

aərə ə̂në bə mbrə kɔ, ə sə tə aâgbɔ̂ aərə â ə ro pâ kumu azü!

Əyïngerə aəgɔ nɔ̂, äwä aərə ə̂në bə mbrə kɔ,

ə sə də äwänə â ə sə tə djatra äwä aərə!

4 Əyïlingû, əde kə sə sə kə kpe kəmə rawa zə â mbe əɨrɨ zə ne?

Əbə tshî kə sə kpî.

Ngâ, azü aəgɔ nɔ̂ ə na ə ko kumu əndje su ashɔ ətshi zə je,

mbrə ə̂në azü nɔ̂ wûsə̂ nə gâ ye ə pa kə mbrə ərə nə̂ zə sə də äwänə.»

5 Mandânə, mə lîshi ə wû Anda Ndjapä nə ə̂në ə sə mâ lafɔ kɔ, ə krɔ̂. Mə wû gbafa ə̂në Ndjapä də azü nə̂ ye ə te əndje lə nə kɔ ə sə̂ lə Anda Ndjapä nə. 6 Atrawaya nə mindû amanə bishi nə ə̂në əndje têgbɔ aəmbrʉ aərə əyo nə mindû amanə bishi nə gâ lə kəna əndje nə kɔ, əndje tô lə Anda Ndjapä nə ə wûtu gashu. Əndje yî aləba ə̂në əndje mbrə̂ kʉ də lanə kɔ, ə̂në ə tshe ə tshe kɔ gâ tə̂ əndje, ə yî ə̂wû tshepa ləba lɔrə gâ lə əkro əndje. 7 Ə̈bə̈ sorô nə bale lə takpa tə̂ əndje vəna nə kɔ kô akopo lɔrə mindû amanə bishi kə atrawaya nə mindû amanə bishi nə, akopo ə̂në ə sû trɔ̂ də âgbɔ̂ əkɔ nə̂ Ndjapä nə ə̂në tshə sə tə sorô də ə̂ngû də ə̂ngû piii kɔ. 8 Ngâwo zâ tshelə Anda Ndjapä nə nɔ̂ gâ ye mbrə ə̂yî Ndjapä nə də awlra nə̂ ye nə, â ə̈bə̈ əzü bale lï lï kəmə ndə kə pa tshə li gâ lə Anda Ndjapä nə ne, ʉrrr aəmbrʉ aərə əyo nə mindû amanə bishi nə nə̂ atrawaya nə mindû amanə bishi nə nglɔ gâ ye kane.