1 Mə sə̂ kə lishi alɔ ə̂në Aya Ndalimi nə djɔ̂ ə̈bə̈ tapɔ nə mindû amanə bishi nə kɔ, â mə djî tshema ə̈bə̈ sorô nə bale lə takpa tə̂ əndje nə vəna kɔ, tshə pâ əpʉ a pa də yavrɨ kə sə̂ â sɔ kɔ ə pa: «Nä gâ əmə!» 2 Bale, mə lîshi, ə wû ə̈bə̈ ə̂mbî mbrata. Ətshə ə̂në tshə ô gâ pâ mbrata nə kɔ, tshə têgbɔ ndjepre gâ lə kəna ye; əndje zâ ə̈bə̈ kpɔtɔ ngerə kə ətshə â tshə rô tə əzü kə sɔ lagbanga ndə kə pa tshə sɔ lagbanga nə.

3 Alɔ ə̂në Aya Ndalimi nə djɔ̂ bishi tapɔ nə kɔ, mə djî bishi sorô nə ə̂në tshə pâ: «Nä gâ əmə!» 4 Â ə̈bə̈ ata mbrata nə, ngirə mata əwo, wûtu gashu. Ətshə ə̂në tshə ô gâ pâ mbrata nə kɔ, əndje za äwä kə ətshə ndə kə pa tshə djɔ blatshe pâ ashɔ, ndə kə pa azü wo tə̂ əndje lə takpa tə̂ əndje. Â əndje zâ ə̈bə̈ əgerə ə̈ngrʉ̈ kamba kə ətshə.

5 Alɔ ə̂në Aya Ndalimi nə djɔ̂ vəta tapɔ nə, mə djî vəta sorô nə tshə pâ: «Nä gâ əmə!» Bale, mə wû ə̈bə̈ əbu mbrata. Ətshə ə̂në tshə ô gâ pâ mbrata nə kɔ, tshə zâ ə̈bə̈ kelɔ gâ lə kəna ye. 6 Â mə djî ə̈bə̈ ərə mata tshema lə takpa tə̂ asorô nə vəna kɔ ə pâ: «Kelɔ ble bale lï də ngendja kosəra lə əlo bale, â kelɔ ɔrjə vəta lï də ngendja kosəra lə əlo bale. Ə də̂ ənə̂ kâdâ də duva, mbrə̈ ə̈bə̈ ərə mbrə̈ bale tə̂ nə ne!»

7 Alɔ ə̂në Aya Ndalimi nə djɔ̂ vəna tapɔ nə, mə djî tshema vəna sorô nə, tshə pâ: «Nä gâ əmə!» 8 Bale, mə wû ə̈bə̈ mbrata dəkoshokpɔ dəkoshokpɔ. Ətshə ə̂në tshə ô gâ pâ mbrata nə kɔ, əɨrɨ ye kə də̂ «Kuzu», â ə̂sə̂ akuzu sə kə za äwä ye. Əndje zâ əpʉ ngerə kə əndje gâ pâ ashɔ aəgɔ tshepashɔ nɔ̂ ndə kə pa əndje wo azü də ə̈ngrʉ̈ kamba, tə̂ äwä əgo, tə̂ äwä əmbrʉ rəka, ndje tə̂ äwä aagia tshelə güsü, â kədə azü kə sə vəna, əndje sə kə wo bale.

9 Alɔ ə̂në tshə djɔ̂ mindû tapɔ nə, mə wû tshekudu gblaka nə, ayirə̂ azü ə̂në əndje wô əndje mbrə Əpʉ Ndjapä də əpʉ ə̂në əndje pâ də əɨrɨ Ndjapä nə kɔ gâ ye kɔ. 10 Əndje sə̂ kə ta râwâ ə pa: «Əyïlingû, ə̂në bə sə kpî ə sə tə djatra əyïngerə nə kɔ, bə daka pə kə ka ə ka ʉrrr ndjɔ gorɔ də̂ bə sə kə wa ngbanga gâ lə kumu azü tshepashɔ ə piyi tshemandâ ə̈ndjï ä ə̂në ə tû kɔ?» 11 Bale, əndje kô ə̈bə̈ ə̂mbî ə̈ngrʉ̈ ləba kə əzü bale bale lə takpa tə̂ əndje, â əndje pâ kə əndje ə pa əndje sə pə kə wu tə̂ əndje teashe kwatəndje, ʉrrr ə̂dû kumu angâ əndje də̂ alayïkosəra nə də alaye əndje ə̂në azü ə wo kəmə əndje je, mata əndje kɔ, lï nɔ̂ gâ ye kane.

12 Mə lîshi alɔ ə̂në Aya Ndalimi nə djɔ̂ ama mindû amanə bale tapɔ nə kɔ, mə wû ashɔ ə même tə âgbɔ̂. Alɔ dô tə̂ ye tə əbu nə mata ləba mbadja, â yipʉ dô tə ye nɔ̂ tə ə̂drô nə mata ə̈ndjï, 13 aambrepe mâ lafɔ yɔ̂ gâ tə̂ ashɔ, a pa də aəkpi aleyɔ figə kə yɔ gâ tʉ alɔ ə̂në ə̈bə̈ âgbɔ̂ əyi meme nə kɔ. 14 Tshelafɔ djɔ̂ gashe a pa də kondja kə sə̂ â əzü ə wuru gâ tə̂ nə, â əndje djɔ̂ akaga nɔ̂ də adala ə̂ngû nɔ̂ tə̂ ə̂sə̂ əndje gâ ye. 15 Alayïngerə tshepashɔ də əgbro azü də akapita nə̂ atrugu də alayïrishi də alayïworɔgbɔ də akanga də aamba azü, əndje nɔ̂, əndje nâ ə kô tə̂ əndje wû gâ lə agrokpɔ ndje lə aəkpʉ akaga. 16 Əndje pâ kə akaga nə də aəkpʉ nə ə pa: «E yɔ̈ gâ pâ ä, e kö ä wû tə̂ ətshə nə ə̂në tshə sə gâ tʉ gâ pâ mbata ngerə nə kɔ, ndje tə̂ əkɔ nə̂ Aya Ndalimi nə. 17 Mbrə ə̂në âgbɔ̂ əlo əkɔ nə̂ əndje nə lî gâ ye, â əde kə lï ndə kə pa tshə ka pə lafɔ?»