1 Tə̂ alɔ nə səkɔ, âgbɔ̂ əyïngerə əgɔ Rɔmə ə̂në əɨrɨ ye kə də̂ Ɔgustə kɔ zâ ama ndə kə pa əndje dɨ azü tshelə əgɔ nə̂ ye nɔ̂. 2 Angbʉlî kə dɨ azü səkɔ sə̂ tə̂ alɔ ə̂në Kirinusə sə̂ tə komandâ əgɔ Siri. 3 Azü nɔ̂ nâ na ye ndə kə pa əzü bale bale ta əɨrɨ ye gâ lə fraka lə gala nə̂ ye də ə̂tə̂ ye. 4 Jozafu ndje âfɔ lə gala Nazaratə mâ Galile ndə kə na mâ lə ashɔ Jude, mâ Beteləyamə, lə gala nə̂ âgbɔ̂ əyïngerə Davidə; mbrə ə̂në Davidə nə sə̂ tə ätä Jozafu nə. 5 Jozafu nə gâ ndə əwɔ nə də Marə̂ ə̂në tshə sə̂ də əndu əgblə koshe kɔ, nâ na ye ndə kə pa əndje ta əɨrɨ əndje gâ lə fraka.

6 Ə̂në əndje sə̂ mâ Beteləyamə nə kɔ, alɔ kə zu Marə̂ lî. 7 Tshə zû angbʉlî əgblə nə̂ ye tə koshe. Tshə wôle ətshə də ləba ə zâ ətshə sho gâ tʉ gâ lə gbarə kə zɨ rəgo nə̂ aagia. Mbrə ə̂në ə̈bə̈ ətshe mbrə əndje lə anda əlo alayïana gûta gû ne.

8 Trö də Beteləyamə nə, aawobata andalimi sə̂ mâ lə güsü ə sə̂ kə bata andalimi nə̂ əndje də tsheləbu. 9 Ə̈bə̈ trawaya nə̂ Əyïlingû wûtu gâ tə̂ əndje, ə̂yî Əyïlingû tshê dji əndje, awa mâ əndje tə bandanə. 10 Bale, trawaya nə̂ Ndjapä nə pâ kə əndje ə pa: «E kätə̂ awa gâ ye; mbrə ə̂në mə sə də ə̂rɔ̂ əpʉ ndə kə pa kə e, ə̂në tshelə azü nɔ̂ ə sə də âgbɔ̂ ə̂rû tə̂ nə je kɔ. 11 Kpəsəye, əndje zû Awoshe azü kə e, lə gala nə̂ Davidə, ətshə ə̂në tshə sə tə Kristə, Âgbɔ̂ Əyïngerə kɔ. 12 Rəkɔ, ərə ə̂në e sə kə wusə̂ ye tə̂ äwä nə kə də̂: e sə kə sɔtə̂ ə̈bə̈ ə̂ngê əgblə ə̂në əndje wôle ətshə də ləba ə zâ ətshə sho gâ tʉ gâ lə gbarə kə zɨ rəgo nə̂ aagia.»

13 Â bə pa bə dji, ə̂kpû atrawaya nə̂ Ndjapä jêrə gâ ndə ətshə ənə̂ səkɔ, əndje sə̂ kə tɔlɔ Əyïlingû ə pâ: 14 «A mbë Ndjapä ə̂në tshə sə mâ ngâ lafɔ kɔ, â blatshe sə̈ pâ ashɔ lə ə̂grû tə̂ azü ə̂në Ndjapä yində əndje kɔ.»

15 Alɔ ə̂në atrawaya nə̂ Ndjapä nə kâtə̂ əndje tʉ â ô na ye gâ lafɔ gâ ye kɔ, aawobata andalimi nə pâ lə ə̂grû tə̂ əndje ə pa: «A äfɔ ə nä na ye mâ Beteləyamə ə wü ərə sə̂ ə̂në Əyïlingû mʉ̂ əpʉ nə kə əzə̂ kɔ.» 16 Əndje âfɔ ə nâ katshä katshä ə sɔ̂tə̂ Marə̂ nə də Jozafu nə gâ ndə ə̂ngê əgblə nə ə̂në əndje zâ ətshə sho gâ tʉ gâ lə gbarə kə zɨ rəgo nə̂ aagia nə kɔ. 17 Ə̂në əndje wû ətshə gâ ye kɔ, əndje yîsə̂ əpʉ ə̂në trawaya nə̂ Ndjapä nə pâ kə əndje gâ pâ əpʉ nə aya əgblə səkɔ. 18 Azü nɔ̂ ə̂në əndje djî əpʉ nə lə ama aawobata andalimi səkɔ, kumu əndje kpê pâ əndu əndje. 19 Marə̂ nə, ənə̂ ye, bâta əpʉ sə̂ nɔ̂ gâ tə̂ lɔsu ye ə sə̂ kə li tshelə ye gâ tə̂ nə. 20 Aawobata andalimi nə dô tə̂ əndje ə gû na ye. Əndje mbê Ndjapä ə tɔ̂lɔ ətshə mbrə əpʉ ə̂në əndje djî də ərə ə̂në əndje wû ə lï də əpʉ nə ə̂në trawaya nə̂ Ndjapä nə pâ kə əndje kɔ.

21 Ə̂në əgblə nə sə̂ də əlo mindû amanə vəta gâ ye kɔ, alɔ kə wa ətshə də gandja lî. Əndje djî əɨrɨ ye ə pa Jezu. Əɨrɨ nə ə̂në trawaya nə̂ Ndjapä nə zâ kə Marə̂ nə angbʉlînə ndə kə pa tshə za əndu ye kɔ kə sə̂.

22 Alɔ kə ma sandaga ndə kə sə mvo lə ala Ndjapä Lïndə̂ âgbɔ̂ əpʉ nə̂ Mayïzə lî gâ ye, mandâ kə zû nə. Jozafu nə də Marə̂ nə nâ də əgblə nə mâ Jeruzalamə ndə kə za ətshə kə Əyïlingû. 23 Âgbɔ̂ əpʉ nə̂ Əyïlingû pâ: «Angbʉlî əgblə koshe nə̂ tshelə bəngʉ lï ndə kə pa əndje za ətshə kə Əyïlingû.»*2.23 Wu Wutu 13.2,12. 24 Marə̂ nə də Jozafu nə tô ndje əkrɔ ə̂në âgbɔ̂ əpʉ nə̂ Əyïlingû yû tshuku nə kɔ: agbakuduba bishi wala amɔdɔ aplejɔ bishi.*2.24 Wu Əkrɔ 12.8.

25 Ə̈bə̈ koshe sə̂ je mâ Jeruzalamə nə, ə̂në əndje ê ətshə ə pa Shemeyɔ kɔ. Koshe səkɔ sə̂ tə ə̂rɔ̂ əzü ə kpê rawa Ndjapä. Tshə sə̂ kə ka mbrə ətshə ə̂në Əyïlingû ə wla ətshə ndə kə pa tshə djɔ azü əgɔ Isərayalə lə kanga kɔ. Âgbɔ̂ Yîrə̂ sə̂ gâ pâ Shemeyɔ nə, 26 ə pâ kə ətshə angbʉlînə ə pa: «Bə sə sə kə tshu nə ne ʉrrr bə wu Kristə nə ə̂në Əyïlingû ə wla ətshə je kɔ gâ ye kane.» 27 Mandânə, Âgbɔ̂ Yîrə̂ zâ gâ tə̂ lɔsu Shemeyɔ nə ndə kə na gâ lə Anda Ndjapä. Tə̂ alɔ nə səkɔ, abä Jezu də əyï nə nâ də ətshə ndə kə mbrə ərə ə̂në âgbɔ̂ əpʉ nə̂ Əyïlingû yû tshuku nə kɔ. 28 Bale, Shemeyɔ nə zâ əgblə nə gâ lə kəna ye ə zâ mərshe kə Ndjapä ə pâ:

29 «Əyïlingû, kpəsəye, mə wû ərə nə mata ə̂në bə pâ ndə nə kɔ gâ ye.

Kätə̂ əmə, kanga nə̂ zə, mə tshu lə blatshe.

30 Ala əmə wû ngâ Awoshe azü ə̂në bə wlâ ətshə kɔ gâ ye.

31 Ətshə ə̂në bə gâmba ətshə ndə kə pa azü nɔ̂ wu ətshə kɔ.

32 Tshə sə tə ə̂yîəwo ə̂në amarä nɔ̂ ə wusə̂ zə mbrə nə kɔ,

tshə sə tə ərə ə̂në amarä ə lʉ azü nə̂ zə Isərayalə mbrə nə kɔ.»

33 Kumu abä əgblə nə gâ ndə əyï nə kpê pâ əndu əndje mbrə əpʉ ə̂në Shemeyɔ nə sə̂ kə pa nə mbrə ətshə kɔ. 34 Shemeyɔ nə ê ə̂rɔ̂ əpʉ gâ pâ əndje ə pâ kə Marə̂, əyï Jezu nə ə pa: «Lə kumu əgblə səye ə̂kpû azü Isərayalə sə kə te nə, ə̂kpû alabə̈ əndje sə kə afɔ gâ lafɔ. Tshə sə kə sə tə ərə nə̂ Ndjapä ə̂në azü ə wəra tə̂ əndje tə̂ nə. 35 Tshə sə kə mbrə ndə kə pa əpʉ ə̂në ə sə tə̂ lɔsu azü kɔ ə wutu gashu. Kâ ə də̂ ənə̂ zə Marə̂, bə sə kə wu əyo mata kamba ə̂në ə sû lɔsu zə.»

36 Ə̈bə̈ yashe awopandəma Ndjapä sə̂ ndje je ə̂në əndje ê ətshə ə pa Aana kɔ. Tshə sə̂ tə ɨrɨ Fanuyalə, marä Azarə. Mandânə ə̂në tshə mâ ə̂ngû mindû amanə bishi də äkɔ̈ nə leme-e lə amvera tə̂ ye kɔ, 37 tshə sə̂ tə koya. Tshə sə̂ də ə̂ngû zazü vəna amanə vəna (84). Tshə kâtə̂ tshelə Anda Ndjapä kâ ne, tshə vrɔ̂ Ndjapä alɔnɔ̂ tə̂ äwä kə ru tshelə ye tə̂ rəgo də kə yu Ndjapä. 38 Tshə wûtu ndje tə̂ alɔ nə səkɔ ə vɔ̂tə̂ kə za mərshe kə Ndjapä. Tshə sə̂ kə pa əpʉ gâ pâ əgblə nə kə azü nɔ̂ ə̂në əndje kâ ndə kə pa Jeruzalamə wutu tshekudu azü ə̂në əndje sə̂ kə mbrə ətshə də kanga kɔ.

39 Mandânə ə̂në abä Jezu nə də əyï nə mbrə̂ aərə nɔ̂ ə̂në âgbɔ̂ əpʉ nə̂ Əyïlingû pâ ndə nə kɔ gâ ye kɔ, əndje dô tə̂ əndje gu na ye mâ Galile, lə Nazaratə, gala nə̂ əndje. 40 Əgblə nə gêrə ə sə̂ kə gbɔgbɔ tə̂ ye. Kə wusə̂ ərə nə̂ ye ô na ye gâ lafɔ əlo bale bale, â ə̂rɔ̂tə̂ Ndjapä sə̂ gâ pâ ye.

41 Lə ə̂ngû bale bale, abä Jezu nə də əyï nə nâ mâ Jeruzalamə mbrə sandaga Pakə. 42 Ə̂në Jezu sə̂ də ə̂ngû morofo amanə bishi gâ ye kɔ, əndje nâ də ətshə ndə sandaga nə mbrə ə̂në ə sə tə mandʉ ərə. 43 Mandâ sandaga nə, əgblə nə, Jezu nə dâka pə mâ Jeruzalamə mâ je, abä nə də əyï nə dô tə̂ əndje ə gû na ye ə wûsə̂ nə wû ə pa tshə sə̂ pə mâ je ne. 44 Əndje pâ ənə̂ əndje ə pa Jezu nə sə̂ lə ə̈bə̈ ə̂kpû angâ əndje də̂ alayïana nə. Əndje gû ʉrrr ngbi ə vɔ̂tə̂ kə pra ətshə lə takpa tə̂ alayɔ əndje də agbɔbəngâ əndje. 45 Bale, əndje wû ətshə wû ne â dô tə̂ əndje mâ Jeruzalamə nə ndə kə pra ətshə. 46 Tə̂ vəta əlo nə, əndje sɔ̂tə̂ ye lə Anda Ndjapä. Tshə sə̂ gâ tʉ lə takpa tə̂ aawoyisə̂ âgbɔ̂ əpʉ. Tshə sə̂ kə dji əpʉ nə̂ əndje ə sə̂ kə yu əndje də əpʉ. 47 Azü nɔ̂ ə̂në əndje djî əpʉ nə̂ ye kɔ, kumu əndje kpê pâ əndu əndje mbrə kə wusə̂ ərə nə̂ ye də kə kirə əpʉ nə̂ ye kə aawoyisə̂ ərə nə. 48 Ə̂në abä Jezu nə də əyï nə wû ətshə kɔ, kumu əndje kpê pâ əndu əndje tə bandanə, â əyï nə pâ kə ətshə ə pa: «Əgblə nə̂ əmə, mbrə yekɔ â bə mbrə̂ marä tə̂ ərə səye kə ä kɔ? Əmə gâ ndə abä zə, ä lî tshelə ä tə bandanə ndə kə pra əbə.» 49 Tshə pâ kə əndje ə pa: «E pra əmə mbrə yekɔ? E wusə̂ nə wu ə pa mə sə mbrə tshelə anda nə̂ abä əmə ne a?» 50 Əndje djî tshelə âdâ əpʉ nə ə̂në tshə pâ kɔ djî ne. 51 Mandânə, Jezu nə dô tə̂ ye də aəndje ə gû mâ Nazaratə je. Tshə djî əpʉ ama əndje. Əyï nə bâta əpʉ aərə sə̂ nɔ̂ gâ tə̂ lɔsu ye. 52 Jezu gêrə ə sə̂ kə gbɔgbɔ tə̂ ye, kə wusə̂ ərə nə̂ ye ô na ye gâ lafɔ əlo bale bale, tshə fʉ̂ lə ala Ndjapä ə fʉ̂ ndje lə ala azü.