13 Umwe unhu wakabeli mukati mwebunga lyabanhu wakati kuna Iye, "Ndayiji, ibujani unkulu wangu kuti endikobele bo ifuma."
14 Asi iye wakati kwaali, "Awe, ndiyani wandibiga kuti ndibe untongi kana unkobanisi wechuma chenu?" 15 Wakati kwabali, "Chenjelani musibe noluchiba nechuma, nokuti bupenyu bwonhu abutobakwa nokuwanda kwefuma."
16 Wakababuja unkwejaniso akati, "Unda wondimi wakafuma wakoompa igoloka igulwana, 17 akayeya mumwoyo uwe eti, ‘Ini zwandichata, nokuti andina pokubigila zwilyo zwangu zwose?’ 18 Akati, ‘Ndichata yezwi’ akababuja kuti, ‘Ndichakolomola ose makombana angu kova ndibaka amwe makulwana, yomo ndimo mwandichabiga zwilyo nezwibiya zwangu zwose. 19 akale ndichati kumpepo wangu, Mpepo wangu, unazwolya zwinji mubupenyu bubo kwamakole manji akumutobela, nokudalo teja mwoyo, ilya, unwe, akale ushante.’ 20 Asi Mwali wakati kwaali: ‘Awe, lema! Busiku bwanasi umpepo uwo unoshobwa, Ani biya ichaba yani ifuma iyo yose yeyi yaulozwilondotela?’
21 "Ndizwo zwichaba kunhu wose unobunganisa ifuma iye ega koga esilofuma mbeli kwaMwali."
Bimbani naMwali
(Mateo 6:25-34)
22 Wakati kubalayijwa babe, "Nokudalo ndinomubuja, musizwinyaje nezwobupenyu bwenu kuti, molyani, kana nezwombili wenu kuti mombalani. 23 Nokuti bupenyu bukulwana kupinda kulya, nombili kupinda zwimbalo. 24 Lingani makungubo, aatobyala akale aatovuna, aana zwilondotelo kana makombana, koga Mwali unowapa zwokulya. modikana chini imwi kupinda inyuni iraveni! 25 Ndiyani pakati penu angapamhija bulefu bwobupenyu bubwe pezhulu pokuzwinyaja? 26 Kana musinotubula kuta zwinhu zwitukutuku, mozwinyajilani nezwimwe? 27 Lingani maluba, kuti anokubuka chini, aatoshinga kana kuluka, asi ndomubuja kojoba Solomoni akambala zwimbalo zwizwe zwibuya zwinaluyebo aajakambala selimwe lyamaluba.
28 Kana Mwali embajika alo buhwa bweshango bunoti nasi bumomuminda, mangwana bunopiswa mumoto, ani imwi unoomumbajika zwili chini, Imwi banhu muna kudimbwa kutukutuku! 29 Nokudalo musibige mwoyo nezwamuchalya, kana zwamuchanwa, musizwinyaje nazwo. 30 Nokuti benyika jose banozwishaka yezwi, asi ibo Tate benu banoziba kuti yezwi zwinhu munozwishaka. 31 Asi shakani bushe bubwe, mukadalo yezwi zwinhu zwinooba zwenu neebo.
Bufumi kuDenga
(Mateo 6:19-21)
32 "Musibe nokutya imwi gapo idukutuku, nokuti Tate benu banoshantila kumupa bushe. 33 Tengesani zwaamunanazwo, mupe zwipo kubasheti, ishakani zwikwama zwisinoshakala, nefuma isinopela kudenga, kusina imbava ichabuswikila kana igube lichabupalaja. 34 Nokuti panefuma yiyo, ndipo mwoyo uwo pauchaba bo.