1 Zwakatikana neSabata, ekwenda muminda mwakabeli nezwilyo, balayijwa babe bakatanga kupulula misholo yezwilyo bebukusha mumaboko abo, belya. 2 Bamwe babaFalisi bakati, "Ini muta zwisinovumijwa kutiwa nezhuba lyeSabata?"

3 Jesu wakashandula eti, "Amujakabala na zwakatiwa naDavidi paakabeli nenzhala iye nabamwe bakabeli naye, 4 kuti wakangwina mungumba yaMwali, akatola zwinkwa zwilopilwa kunaMwali, zwisinovumilwa kulyiwa nonhukoga, kuzhe kwabatebuji chete. Wakalya, akapa yabo baakabeli nabo?"

5 Wakati kwabali, "Mwananhulumyana woNhu ndiShe weSabata."

6 Limwe izhuba lyeSabata, paakangwina musinagogi elayija, kwakabeli nonhulume wakabeli noluboko lwokululyi lulokokonyala. 7 Bakwali nabaFalisi bakaba bekalingilila kuti unochilisa na nezhuba lyeSabata kutila kuti bompe undandu. 8 Koga iye wakaziba kuyeya kwabo, akati kunoyo nhulume unaluboko lulokokonyala, "Milika izha ume yopano." Wakanyamuka, akama. 9 Jesu wakati kwabali, "Ndomubhuza, zwimo mumulawo wezhuba lyeSabata na, kuta zwibuya kana kukubaja, kuchija bupenyu kana kubupalaja?" 10 Wakalinga kunaibo bose, akati kwaali, " Tambunuja luboko lulwo." Wakata alo, luboko lulwe lukava lwakololoka.

11 Ibo bakazhalilwa nobukali, bakatanga kulangana kuti bangontani Jesu.

12 Munaya mazhuba wakenda pezhulu pedunhu kunonamata, wakanamata kunaMwali busiku bose. 13 Palyakeja wakashoba balayijwa babe kwaali, akashala igumi linababili, akabashoba kuti "BaPositoli", 14 Simoni, wakonshoba kuti ndiPita, nonuna uwe Endulu, naJemusi naJoni, naFilipu, naBhatilomeyo 15 naMateo, naTomasi, naJemusi mwananhulumyana waAlufiyasi, naSimoni unowhi uNsungwaji, 16 naJudasi mwananhulumyana waJemusi, naJudasi Isikaliyoti, wakooncheta.

17 Wakabhuluka nabo, akama penyika ilotandabala eli negapo lyabalayijwa babe, negapo igulwana lyabanhu bakabeva munyika yose yeJudiya neJelusalema nokunyika yeTaya neSidoni jipo pelyo negungwa kuti bonwhilila nokulapwa mumalwaji abo. 18 nayabo bakabeyangatiswa namalwaji nemipepo mibi bakezha bakachijwa neebo. 19 Ibunga lyabanhu lyakakweja kuti liungume, nokuti kwakabhuda kwaali isimba lichilisa bose.

20 Jesu wakatokoloja balayijwa babe akati, Mulokombolelwa imwi basheti, nokuti bushe bwaMwali ngobwenu! 21 Mulokombolelwa imwi munenzhala ngweno, nokuti moogunchwa! Mulokombolelwa imwi munolila feno, nokuti mooseka!

22 "Mulokombolelwa imwi kana banhu bemubenga, bemufizha, bemutuka, kana beti mubabi, pezhulu poMwananhulumyana woNhu! 23 Shantani nelyo izhuba, shotokani nolushanto, nokuti indipo yenu ihulwana iko kudenga, nokuti yezwi ndizwo zwakatiwa namatategulu enu kubapolofeti."

24 Mayee! kunamwi mulofuma, nokuti mwakatambula kale kubokwa kwenu.

25 Mayee! kunamwi muloguta feno, nokuti munoofa nenzhala.

Mayee! kunamwi munoseka ngweno, nokuti moolila nokufwikula.

26 Mayee! kunamwi kana banhu bose beleba zwibuya namwi, nokuti matategulu abo bakata alo kubalebambeli bamaniepwa.

27 Koga ndinoti kunamwi mulowhilila: Idani babengi benu, itani zwibuya kunayabo banomubenga, 28 kombolelani yabo banomufhizha, munamatile yabo banomuyabisa. 29 Kunoyo unokuloba pedama, umpe limwe akale, kunoyo unokutolela ijazi lilyo, umpe nechimbalo chicho. 30 Ipa aani kanaani unokumbila chimwe chinhu kwauli; akale yoyo unotola chinhu chicho, usichitole kwaali akale. 31 Zwamunoda kuti banhu bemutile, muzwitebo kwabali. 32 Kana muda chete yabo banomuda, mobokelwani? Nokuti bachinyi banoda yabo banobada bo. 33 Kana muta zwibuya kunabanomutila zwibuya, mungabokelwani? Nokuti nabachinyi banota alo. 34 Kana mucheneka yabo bamunoziba kuti banomubwilizila, mungabokelwani biya? Bachinyi neebo banocheneka bachinyikwaina kuti bebabwilizile zwose. 35 Koga! Idani babengi benu, batileni zwibuya, muchenekese musinolingilila kubwilizilwa akale, indipo yenu inooba ihulwana, akale mooba bana boyo Upezhuluzhulu, nokuti iye uneshe kunabo basinoboka bana bundimindimi. 36 Ibani neshe saTate benu baneshe.

37 Bamwe, namwibo amutootongwa, musipe undandu bamwe, namwibo amutoopiwa undandu, lekejelani, namwibo munoolekejelwa, 38 ipani, namwibo munoopiwa bo, akale zwilozhala, nonkwelo umbuyanana, zwilosindiilwa, zwifwashuka, zwasindwa kasa zwinoodilwa mumaboko enu. Chikweleso chamunoshingisa, ndichochichookweleswa kwamuli. 39 Wakababuja unkwejaniso wokuti: "Ibhofu lingatungamila limwe ibhofu na? Mububili bwabo abangawile mudizwa na?" 40 Undayijwa aatokubukila undayiji uwe, asi wose undayijwa kana apeja zwilayijo zwizwe, unoba sondayiji uwe. 41 "Ini ubona kababi muzhisho lyomwanakwaina uwo, koga usinobona idanda muzhisho lilyo? 42 Unolebelani kumwanakwaina uwo uti, ‘Mwanakwaina, ima ndikubhise kababi kaimo muzhisho lilyo’ iwi usinobona idanda limo muzhisho lilyo? Iwi unchengeji! Bhisa tangwa idanda limo muzhisho lilyo, ndipo pauchabona zwanana kuti ubhise kababi muzhisho lyomwanakwaina uwo.

43 Apana unti umbhodo unozwala unchelo umbi, kana kuti unti umbi uzwale unchelo umbuya, 44 unti nonti unozibikana nonchelo wawo. Ihuyu ajitochelwa munti womiwha, kana kuchela unchelo wonzhambi mumiwha. 45 Unhu umbuya unobhisa zwibhodo zwinova mukati momwoyo uwe, koga unhu umbi unobhisa zwibi zwiva mugombana lyomwoyo uwe umbi, nokuti mawhi onhu anova munazwizhele mumwoyo uwe.

46 "Ini mundishoba muti, ‘Tezi, Tezi’ koga musinota zwandinomubuja? 47 Unhu wose unozha kwandili ewhilila mawhi angu, akale ewashingisa, ndomutondeja kuti unanga sani, 48 unanga sonhu wakabaka ingumba yiye, wakacha, akamija akale akabakila pamwala, pakwakaswika makukazhame nevula inji yolwizi, yakaloba ingumba yeyo, koga aijakatubula kuyiteketesa ingumba nokuti yakabakabakwa zwibuya. 49 Asi yoyo unowha esinota, unanga sonhu wakabaka ingumba yiye pasina chimisikilo, lwizi lwakailoba, lukaisusumila pasi, yakakolomoka nokukambija ikapalajika zwikulwana."