1 Wakababuja unkwejaniso, kuti banokwelela kunamata benangatila, besinonyala. 2 Wakati, "Kwakaba kuli nontongi, mune limwe iguta, wakaba esinotya Mwali akale esinolemekeja banhu, 3 muguta lyakalelyo kwakaba kuli nenchilikaji yakabezha kwaali iti, ‘Ndibhanche kumbengi wangu.’ 4 Wakatola unshaji undefu esinovuma, koga kumapejelejo wakayeya akati, ‘Kojoba ndisinotya Mwali kana kulemekeja banhu, 5 koga nokuti inchilikaji yeyi ikumunangatila, ndoyipa chilulamiso chailokwelela kutila kuti isibendinyaja nokugala izha."’

6 She wakandilambeli eti, "Iwhani zwinolebwa nontongi usilolulama. 7 Feno Mwali aatobapa na indulamilo jabo bose baloshalwa babe banolila kwaali masikati nobusiku ? Uchajilwa na kubashandula? 8 Ndinomubuja, uchabapa indulamo jabo nokukambija. Koga Mwananhulumyana woNhu paachezha, unoowana balodimbwa na penyika?"

9 Jesu wakababuja unkwejaniso yoyu, kunaaboyabo bakabeyeya kuti ndibo balolulama akale belingila bamwe pasi, akati: 10 "Pakabelipo banhu babili bakenda mutempeli kunonamata, umwe wakabeli umFalisi, umwe eli untelesi. 11 UmFalisi wakama, akanamata eti, ‘Mwali, ndinomuboka, nokuti anditokwelana nabamwe banhu, mapazwi, basilolulama, nabapomboli, kana kuba soyu untelesi. 12 Ndinozwiminya kulya kabili neviki, ndinopila chegumi chezwose zwandinowana.’ 13 Koga untelesi wakamila kule, esinoda kulinga zhezhulu kudenga, wakaloba chifuba chiche eti, ‘Mwali ibani neshe kwandili imi unchinyi!’ 14 Ndinomubuja, yoyu unhu wakenda kungumba kukwe alulamiswa, asi yondiya umwe pe, nokuti yoyo unozwifufumula unootonhobajwa, noyo unozwininipisa, unonyamulwa"

15 Feno bakabuza bana kuti ebakombolele, koga balayijwa pabakabona yezwi, bakabakabula. 16 Koga Jesu wakabashoba kwaali akati," Lekejani bana bezhe kwandili musibajibise, nokuti bushe bwaMwali ngobwaba bakadai. 17 Chokomende, ndinoti kunamwi, wose usinotambula bushe bwaMwali somwana untukutuku, aatobungwina."

18 Umwe untungamili wakombhuza eti," Ndayiji umbuya, ndinokwelela kutani kuti ndiwane bupenyu businopela?"

19 Jesu wakati kwaali, "Unondishobelani kuti ndimbuya? Apana umbuya kuzhe kwaMwali ega. 20 Unoyiziba milawo inoti: Usipombole, usibulaye, usikwibe, usisumikijile manyepwa, lemesa tate babo namai babo."

21 Iye wakashandula akati,

22 Paakawha yezwi, Jesu wakati kwaali: "Kuna chinhu chimwempela chilosalilila. Tengesa zwose zwaunanazwo ukobele basheti, ndipo pauchaba nefuma kudenga utukozha unditobele." 23 Paakawha yezwi, wakawushubala, nokuti wakaba ekafuma kasakasa.

24 Jesu wakondinga, akati, "Zwikukutu chini kuti yabo bakafuma bengwine mubushe bwaMwali! 25 Nokuti zwilelu kuti ikamela lipinde pakati pakabanga keneleti, kuna kuti umfumi engwine mubushe bwaMwali."

26 Bakabe kawhilila yezwi bakati, "Ndiyani biya angachijwa?"

27 Koga iye wakati, "Zwibasinotubula banhu, Mwali unozwitubula."

28 Pita wakati, "Isu takasiya mizi yedu tikakutobela."

29 Wakati kwabali, "Chokomende ndinomubuja, apana unhu wakasiya unzi kana unkaji kana banakwaina kana bazwali kana bana pezhulu pobushe bwaMwali, 30 usinoolipwa kanji mumisi yobupenyu bwopasi nomumisi yobupenyu businopela bunozha."

31 Wakatola bali igumi nababili akati kwabali, "Iwhani, timunda kuJelusalema akale zwose zwakakwalwa nabalebambeli baMwali pezhulu poMwananhulumyana woNhu, zwinozhajikijwa. 32 Nokuti unoopilwa kuna bokuzhe, akale unoosekwa, unootukwa akale nokufhilwa namate, 33 pabachoopeja kuunyangatisa, banoombulaya, koga nezhuba lyatatu unoomuka kubafi akale."

34 Asi abajakazwiwhisisa yezwi, zwakaba zwikasisika kwabali bakakonwa kuwhisisa zwaakabeleba.

35 Paakati abapelyo neJeliko, kwakaba kulinonhu ibhofu wakabeligele kumbali kwenzila ekumbila, 36 paakawha idupwa lyabanhu lipinda, wakabhuza kuti ini yezwo.

37 Bakombuja kuti, "Jesu wokuNazaleti ukumupinda."

38 Wakashomeja eti, "Jesu Mwananhulumyana waDavidi, ndiwhile ishe!"

39 Banhu bakabelimbeli bakonkalalila kuti ewhilijile koga iye wakanyanya kushomeja kasa eti, "Mwananhulumyana waDavidi ndiwhile ishe!" 40 Jesu wakama akabalaya kuti bombuze kwaali, paakaswika pelyo, wakombhuza eti, 41 "Unoda kuti ndikutileni?"

Wakashandula eti, "Tezi ndite kuti ndibone."

42 Jesu wakati kwaali, "Bhwazula, kudimbwa kukwo kwakuchilisa."

43 Pakalepo, mesho awe akazhulika, akontobela Jesu, ekuja Mwali, nabanhu bose pabakabona yezwi, bakatunhumwija Mwali.