1 Mushule mwezwi Tezi wakashala banhu banoswika makumi mashanu anamakumi mabili nababili, akabatuma kuti bekwende beli babili babili, bende mbeli kukwe kumakuta nokumapazu ose aalushanyila. 2 Wakati kwabali, "Igoloka igulwana, koga bashingi bashoma, nokudalo namatani kunaShe wegoloka kuti etumile bashingi mukuvuna kukwe. 3 Indani ndomutuma, semhwizana pakati pamashambo. 4 Musinyamule chikwama chemali, kana ihomo, kana ishangu, musimuse unhu munzila, 5 Yose ingumba yamunongwina, mutange nokuti, ‘Lunyalalo ngalube muna yeyi ingumba.’ 6 Kana mwananhulumyana wolunyalalo elipo, lunyalalo lwenu lunosala paali, asi kana zwisili alo, lunyalalo lwenu lunobuya kwamuli. 7 Mugale mwakalemo mungumba, mulye kulya nokunwa zwose zwibanomupa, nokuti unshingi ulokwelela kuwana indipo yiye, Musiti muneyi ingumba mwagala, nomunendiya mwanogala. 8 Muguta lyose lyamunogwina bemutambula, ilyani zwabanomupa, 9 mulape banolwala banobelipo, mulebe kwabali muti, ‘Bushe bwaMwali bwaba pelyo namwi.’ 10 Asi kana mwangwina muguta kova beleka kumutambula, kwendani pakati pejinzila muti, 11 "Nehuluba yeguta lyenu ilobhatilila kumakumbo edu, toyikuhumula tiyisiya namwi, asi zibani kuti bushe bwaMwali bupo pelyo. 12 Ndinomubuja muzhuba lyokutongwa, Mwali unooba neshe neSodoma kupinda yelyo iguta.

13 "Mayee Korazini! Mayee Bhetisaida! Ngana zwishamiso zwakatilwa imwi, zwatiwa akale kuTaya neSidoni ngana bagali bamo bakashanduka kale, bakambala masaka nokuzwiguba ilota. 14 Kojoba zwakadalo kutongwa kweTaya neSidoni akutoba kulemu kupinda kwenu. 15 Nawi Kapenaume, unoonyamulilwa kudenga na? Unooposelwa pasi kuhadesi."

16 "Aani wose unomuwhilila imwi, unondiwhilila imi neebo, yoyo unomulamba imwi, unondilamba bo imi, Akale yoyo unondilamba imi, unobelamba bo iye yoyo wakandituma."

17 Bakabuya belinolushanto, yabaya makumi mashanu anamakumi mabili nababili beti, "Tezi, namadimoni anotiwhilila kana tishingisa izina Lilyo!"

18 Wakati kwabali, "Ndakabona Satani embwela solupenyo eva kudenga. 19 Iwhani! Ndamupa isimba lyokutoba inyoka nemhami, nokuzunda ose masimba ombengi, akale apana chichoomulwajisa. 20 Koga musishante nokuti mipepo inomuwhilila, koga shantani nokuti mazina enu alokwalwa kudenga."

21 Nonshaji wakaleyo wakashanta muMpepo uNchena akati, "Ndinomuboka, Tate, She wedenga nenyika, nokuti mwakasisa yezwi kuna banamaano nabachenjevu, koga mwakazwitondeja kubanabacheche. Eya, Tate, mwakatondeja ishe nechido chenu.

22 "Tate bangu bakandipa zwose, apana unoziba kuti Mwananhulumyana ndiyani, kuzhe kwaibo Tate, kana kuti Tate ndiyani, kuzhe kwoMwananhulumyana akale noMwananhulumyana unotondeja Tate kunaabo baanoda."

23 Wakalinga kubalayijwa babe akalebeleka nabo musiswa akati, "Alokombolelwa mesho anobona zwamubweni imwi! 24 Nokuti ndinoleba nditi kwamuli, Banji bapolofeti baMwali namashe bakabeda kubona zwamubweni, asi abajakazwibona, nokuwha zwamuwhile asi abajakazwiwha."

25 Undayiji woMulawo wakanyamuka eda kukweja Jesu akati," Ndayiji, biya ndilokwelela kutani kuti ndiwane ifuma yobupenyu businopela?"

26 Jesu wakonshandula eti, "Mulokwalwa kuwhini mumulawo? Mwakabalani"

27 Wakashandula eti, "Ida She Mwali uwo, nomwoyo uwo wose, nompepo uwo wose, nesimba lilyo lyose, nendangalilo jijo jose, akale ida umbakijani uwo sobwaunozwida iwi nokuko."

28 Wakati kwaali "Washandula zwibuyanana, ita yezwi uchalalama." 29 Koga iye eda kuzwilulamisa, wakati kunaJesu, "Umbakijani wangu ndiyani?"

30 Jesu wakashandula, eti, "Umwe unhu wakabekwenda ekunuka eva kuJelusalema enda kuJeliko, wakapambwa nembava jikombula zwimbalo, jikondoba, jikonsiya ekazilika. 31 Kwakaswika untebuji epinda ekwenda nenzila yakaleyo, asi paakabona unhu yoyo wakanyenduluka akapinda kumbali. 32 Nenzila yakaleyo kwakaswika unLevi akombona, akanyenduluka bo akapinda kumbali. 33 Koga unSamariya wakabekwenda muneyo inzila wakaswika paali, paakombona wakonwhila ishe, 34 wakenda kwaali, akondila mafuta newaini akapomba uncheka pezwilonda zwizwe kova onyamula nemhuka yiye, akoonsenga kungumba inoswikila bakwendi akanondinda. 35 Muchimuka wakabhisa madinari mabili akapa unolinga bugalo yobo, akati, ‘Ndilingileni unhu yoyu, mungoshingisa imwe imali inopinda yeyi, ndinoomubwilizila imali yenu pandichanobuya."’

36 Jesu wakajibija ebhuza eti, "Pakati paba batatu, unoyeya kuti ndiyani wakabeli umbakijani woyo unhu, wakabhatwa nembava?"

37 Wakati, "Ndiyoyo wakonwhila ishe."

Jesu wakati kwaali, "Inda neebo unota alo."

38 Pabakaba bekwenda, Jesu nabalayijwa babe bakaswika panomwe unzi, umwe unhukaji unowhi Malita wakontambula mungumba yiye. 39 Waluba nonkazwaji wechinhukaji unowhi Mariya, iye wakagala pasi pelyo namakumbo aTezi ewhilila indayijo. 40 Koga Malita wakaba nokunyajikana pezhulu pemishingo yaakabekwelela kuta, ndipo paakezha kwaali, akati, "Tezi, amunani nokuti nkazwaji wangu wechinhukaji ,wandilekelela ndita ndoga yose mishingo? Umbujeni endibhanche neebo."

41 Koga Tezi wakonshandula eti, "Malita, Malita, umunyajwa ushungulujika nezwinhu zwinji, 42 Chimwempela chete chinodikana. Mariya washala chibuya nokuti aatochitolelwa."