1 Jesu elizhele noMpepo uNchena wakezha eva kuJolodani akatungamililwa noMpepo 2 kwamazhuba makumi mana, wakakwejwa naGuluzhanje. Apana zwaakalya mumazhuba yayo, paakapela mazhuba wakaba nenzhala.

3 Guluzhanje wakati kwaali, "Kana uli mwananhulumyana waMwali, ibuja ibwe yeli lishanduke libe chinkwa."

4 Asi Jesu wakashandula eti, "Zwilokwalwa kuwhi, ‘unhu aatolalama nechinkwa chete.’"

5 Guluzhanje wakonsenga pezhulu, akontondeja bushe bwedenga nonshanji umfupi. 6 Guluzhanje wakati, "Ndokupa masimba ose yaya nefuma yose yeyi. Zwose zwilopiwa kwandili ndingapa kana aani wandinoshala. 7 Zwose yezwi zwinoba zwizwo kana ukandinamata imi."

8 Jesu wakashandula eti kwaali, "Zwilokwalwa kuti namata She Mwali uwo akale shingila iye chete."

9 Wakonsenga kuJelusalema, akomisika pechilungwani cheTempeli, akati kwaali, "Kana uli Mwananhulumyana waMwali, zwiwigile pasi uvila yopano, 10 nokuti kulokwalwa kuti, ‘Unobuja ingilozi jije Mwali jikulinde.’ 11 Akale, jinokunyamula namaboko ajo kutila kuti usigubhulwe nebwe."

12 Jesu wakonshandula eti, "Kunowhi, usikweje She Mwali uwo."

13 Guluzhanje paakapeja jose inzila jokunkweja, wakonsiya kuti oonzhila muna umwe unshaji.

14 Jesu wakabwilila kuGalili, nesimba lyoMpepo, impuwo yiye yakaswika kubugalo bose. 15 Wakalayija mumasinagogo abo akakujwa naibo bose.

16 Wakaswika kuNazaleti, kwaakakubukila, nezhuba lyeSabata wakangwina muSinagogi, sezwaakabegala eta. Wakanyamuka kuti ebale, 17 wakatambikwa iwhalo yeNdebo joMpolofeti Izaya. Wakaizhula iwhalo akawana palokwalwa kuwhi,

18 "UMpepo waShe upo pezhulu pangu,

nokuti wakandiguba kuti ndibuze iNdebo iMbuya kubasheti.

Wakandituma kwosuma lusungunuko kubatapwa,

nokubhwazulisa mesho amapofu,

nokoomunula balosindamijwa,

19 nokuzibisa pachena igole lyobubuya bwaShe."

20 Jesu wakaivala iwhalo, akaibwiliza kumbhanchi, akagala pasi; mesho abo bose bakabeli muSinagogi akontokoloja. 21 Wakatanga nokuti kwabali, "Nasi unkwalo yoyu ukumuzhajikijwa munzebe jenu."

22 Bose bakapupula zwanana naiye, bakashamiswa namawhi eshe akava mundomo mumwe, bakati, "Atoba iye na yoyu mwananhulumyana waJosefa?"

23 Wakati kwabali, "Chokomende muchandilungululila chichimbe chinoti, ‘Ndapi zwilape’ zwatakawha kuti wakazwita kuKapenaume, zwite bo yomuno munyika yokunamwi." 24 Wakati akale, "Chokomende ndinomubuja, apana undebambeli waMwali unotambulwa zwibuyanana munyika yokunaibo. 25 Koga ndinomubuja isimiso kuti, kwakabeli nenchilikaji inji kuIzilayeli mumazhuba aElija, pakwakakonywa idenga kwamakole matatu nemyeji mishanu ina umwempela, kukaba nenzhala munyika yose, 26 koga Elija aajakatumwa kuna imwe yajo, koga kunchilikaji yokuZalefati munyika yeSidoni. 27 Kwakabeli nabanji balulwala mapelembuji kuIzilayeli nonshaji nompolofeti Elisha, koga apana nomwempela wakashampulujwa kuzhe kwaNamani uNsiliya."

28 Pabakawha yezwi, bose bakabeli muSinagogi bakanyema kasa. 29 Bakamilika bakonsusuma kuvila kuguta yelyo, bakonsenga pebhilipili lyedunhu kulobakiwa iguta lyabo, beda kuumposela yopo. 30 Koga iye wakapinda pakati pabo akenda.

31 Wakenda kuguta lyeKapenaume muGalili, nezhuba lyeSabata wakabelayija banhu. 32 Bakachenamiswa nokulayija kukwe nokuti wakabelayija newhi linesimba. 33 MuSinagogi kwakaba kuli nonhu waluba nompepo weshambwa wedimoni, wakakwiila newhi lipopezhulu, 34 "Aa! uneni nasu, Jesu wokuNazaleti? Wezha kotipalaja na? Ndoziba kuti uli ani, uNchena waMwali."

35 Jesu wakakalalila umpepo akati, "Whilijila ubhude mwaali!" Palyakongwigila pasi pakati pabanhu, idimoni lyakabhuda mwaali lisonkubaja.

36 Zwakabashamisa bose bakabhuzana beti, "Iwhini yeli? Linokalalila mipepo yeshambwa namasimba ikabhuda." 37 Impuwo yiye yakaswika mushango lyose lyokwakale.

38 Wakabhuda muSinagogi, akanongwina mungumba yaSimoni. Amezwale baSimoni bakabelwala umbili wabo upisa kasa, bakonzibisa nozwamalwaji. 39 Wakanoma pelyo nopabulo akabuja ilwaji lyokupisa kwombili kuti libhude mwabali, lyakabhuda, bakamuka nokunyamuka pakale yopo bakatanga kubashingila.

40 Palyakati lyamila izhuba, bose bakabeli nabanhu banolwala malwaji alosiyanasiyana bakabuzwa kunaiye; wakabiga maboko awe panoumwe noumwe wabo akabachilisa bose. 41 Banhu banji bakabhuda madimoni manji, ekwiila, eti, "Iwi ndiwi mwananhulumyana waMwali!"

Asi wakaakalalila, akale aajakawavumija kuti elebeleke nokuti akabeziba kuti ndiKristo.

42 Palyakeja, wakabhuda akenda kubugalo busakabeli nabanhu. Banhu bakompyanga bakongwana kwaakabeli bakonkoneja kuti ebasiye; 43 asi wakati kunaibo, "Ndokwelela kunobhaunula iNdebo iMbuya pezhulu pobushe bwaMwali munaamwe makuta neebo, nokuti ndizwo zwindakatumwa."

44 Nokudalo wakendila mbeli ebhaunula mumasinagogo omuJudiya.