1 Jesu wakati elimile kumbali kwegungwa lyeGenesaleti, igapo lyabanhu lyakezha kwaali beda kuwha iwhi lyaMwali, 2 Wakabona bwato bubili bulimumbali mwegungwa; bavubi bakaba babhuluka, bekusha mazamba abo, 3 Jesu wakangwina munabumwe bwato, bwakabeli bwaSimoni, wakonkumbila kuti esundile zwishoma bwato muvula, akagala pasi akatanga kulayija igapo eligele mubwato.

4 Paakapeja kulebeleka, wakati kunaSimoni, "Bigani bwato kulomila mupose mazamba mubhate ihobe."

5 Simoni wakashandula akati, "She tashinga busiku bose asi apana chatabhata, asi nokuti ndimwi mwaleba towaposa mazamba." 6 Bakaposa mazamba abo muvula bakabhata ihobe inji kasa, mane mazamba akatanga kujeluka, 7 bakashoba bakwaina babo bakabeli munobumwe bwato, bebakobola noluboko, kuti bezhe boobabhancha. Bakezha, bakazhaja bwato bwabo bubili mane bukajondyondyomela. 8 Paakabona yezwi, Simoni Pita wakazwiwigila munhambo jaJesu eti, "Bhudani pandili She, nokuti imi ndunchinyi."

9 Iye, naibo bose baluba naye, bakachenama, pezhulu pokubhata ihobe inji jakadai, 10 naJemusi naJoni bana baZebhedi bakabeli bakwaina baSimoni bakachenama. Jesu wakati kunaSimoni, "Usitye, kuvila nasi unoba umvubi wabanhu."

11 Pabakasenga bwato bwabo penyika kumbali kwegungwa, bakasiya zwose, bakontobela.

12 Wakati eli munelimwe iguta, kwakaswika umwe unhulume wakabelizhele mapelembuji, paakabona Jesu, wakazwiwigila pasi akatibhama onkumbila eti, "She, kana muda motubula kundichenesa."

13 Wakatambunuja luboko lulwe, akonguma eti, "Eya ndinoda, shambijika." Mapelembuji akonsiya pakalepo. 14 Wakondaya kuti esibuje banhu, asi "Inda unozwitondeja kuntebuji akale upile umpilo wokushampulujwa kukwo, sechitondejelo kunaibo, sezwakalebwa naMozesi."

15 Asi impuwo yaJesu yakazhala inyika yose, kukabungana igapo igulwana, lizha kowhilila nokuchiliswa mumalwaji abo. 16 Koga iye wakenda kubugalo busina banhu akanamata.

17 Nelimwe lyamazhuba yayo, elimukulayija, kwakaba kuli baFalisi nabalayiji bomulawo beligele pasi beva mumisha yose yomuGalili neJudiya nomuJelusalema, isimba lyaShe lyokuchilisa lyakaba mwaali. 18 Bamwe banhulume bakaswika bekanyamula pabushasha, unhulume wakabeli igosha, bakabekweja kuungwinisa mungumba kuti bontule pambeli paJesu, 19 koga nokuzhala kwabanhu, bakashayiwa kuti balungwinisa chini, ndipo pabakonyamula bonsenga pezhulu pedenga lyengumba, bakazhula ibanga kova bongwinisa ekalajikwa pabushasha akabhulujwa pakati pabanhu mbeli kwaJesu. 20 Paakabona kudimbwa kwabo wakati, "Awe nhulume, luchinyo lulwo lwalekejelwa."

21 Bakwali bomulawo nabaFalisi bakatanga kuzwibhuza beti, "Ani ndiyani yoyu unolebeleka ali efizha? Ndiyani angalekejela luchinyo kuzhe kwaMwali!"

22 Jesu paakaziba mibhuzo yabo wakabashandula eti, "Ini muyeya yezwi mumyoyo yenu? 23 Zwilelu ngezwipi, kuti, walekejelwa luchinyo lulwo, kana kuti, Milika ukwende? 24 Kuti muzibe kuti Mwananhulumyana woNhu unesimba lyokulekejela luchinyo penyika, wakati kunhulume unabukosha, ndinoti kwauli, Nyamuka tola bushasha bubo unde kungumba kuko."

25 Pakale yopo wakanyamuka pambeli pabo bose, akanyamula bushasha paakabelilele akenda kusha kukwe ekuja Mwali. 26 Bose bakachenama, bakaba nolutyo akale bakakuja Mwali, beti, "Nasi tabona zwinhu zwinochenamisa."

27 Kuva yopo wakabhuda akenda, akabona untelesi waluwhi ndiLevi, eligele pengumba yokutelesa wakati kwaali, "Nditobele." 28 Wakasiya zwose, akanyamuka akontobela.

29 Levi wakontila mabhiko makulwana mungumba yiye, kwakabeli nabatelesi banji nabamwe banhu pamwempela nabo belimukulya. 30 BaFalisi nabakwali bakabelipo bakanyunyuta kubalayijwa babe beti, "Ini mulya nokunwa pamwempela nabatelesi akale nabachinyi?"

31 Jesu wakabashandula eti, "Yabo banabuchilo abatoda undapi, asi yabo banolwala, 32 andijakezhila kwoshoba banhu babuya koga, bachinyi kuti beshanduke."

33 Bakati kuna iye, "Balayijwa baJoni banozwiminya kulya mishaji minji, akale banonamata, akale balayijwa babaFalisi banota alo neebo, koga balayijwa babo banolya benwa."

34 Jesu wakati kwabali, "Mungata kuti balokokwa kumabhiko okulobola bezwiminye kulya ibo beli bose nondoboli na? 35 Anooswika mazhuba undoboli paachootolwa pakati pabo ndipo pabachoozwiminya kulya mumazhuba yayo."

36 Wakababuja akale unkwejaniso, "Apana unhu unocheka chibabi chechimbalo chipya kova ebiga pechimbalo chantolo, angodalo chipya chinoojeluka nokuti chipya achitookwendelana nechantolo. 37 Akale apana unhu unodila iwaini impya mumikabo yantolo, angodalo iwaini impya ingakwamula mikabo yebhapata kova ikutuka nemikabo inova yapwachuka. 38 Koga iwaini impya ilokwelela kubigwa mumikabo mipya. 39 Akale apana unoda iwaini impya iye ava mukunwa iwaini yantolo, nokuti unoti, ‘Yantolo imbuya.’"