1 Nezhuba lyokutanga lyeviki, kumijelo, bakanyamula bunde bwabakabalonganya bakenda kugumbu. 2 Bakawana ibwe lyakungulijwa lyabhiswa pegumbu, 3 asi pabakangwina, bakawana untumbu waShe Jesu usimo mukati. 4 Bechinochenamiswa nezwi, kwakaboneka banhulume babili bekambala ingubo jinopenya, pelyo nabo; 5 bechakazhala nolutyo, banhukaji bakatibhama, kova banhulume beti kwabali, "Munoshakilani umpenyu mukati munabakafa na? 6 Yeyani zwaakaleba kunamwi paakamuka, eli muGalili, 7 eti, Mwananhulumyana woNhu unokwelela kupilwa mumaboko abachinyi, ekahamilwe, nezhuba lyatatu, emuke mukufa."

8 Bakava bakumbulukwa mawhi awe, 9 bakabwilila beva kugumbu bakanoleba zwose kubalayijwa bali igumi nomwempela, nokuna bamwe bose. 10 Kwakakuli Mariya Magadalena, Johana, Mariya amai baJemusi nabamwe mamai bakaba beli nabo, pabakaba bebuja bapositoli, 11 koga mawhi yaya akaba sofana mayabwe, nokudalo abajakadimbwa nayo. 12 Koga Pita wakanyamuka akalabuka enda kugumbu, wakaswika akashozhela akabona zwimbalo zwomugumbo koga pesina zwimwe akale, kova ebwilila kusha akachenamiswa nezwakabatikana.

13 Nelyo izhuba bamwe babili bakaba benda kunoumwe unzi unowhi Emausi, unshizho ungaba mamaili mashanu ana mabili kuva kuJelusalema, 14 bakabeli mukuzuwa pezhulu pezwakabatikana. 15 Bechinolebeleka nokuzuwa, Jesu wakezha kunaibo akakwendesana nabo. 16 Koga mesho abo akakonwa kuti boonzibe. 17 Wakati kwabali, "Mukumunda mukwejisa nenyaya yeni?"

Bakama pakalepo, bakadongomala. 18 Umwe wabo waluwhi Kilopasi wakashandula kwaali akati, "Ndiwi woga mwezi muJelusalema usinoziba zwinhu zwakatikana mukati mwamazhuba mashoma apinda?"

19 Wakati kunaibo, "Zwinhu ni?" Ibo bakati,

"Zwili mawililana naJesu wokuNazaleta, wakabeli umpolofeti unesimba muzwito nomuwhi mbeli kwaMwali nabanhu bose, 20 kuti bakulwana babatebuji nabatongi bakompila kuti etongelwe lufu nokunkahamila. 21 Isu takabeli nolubimbo lwokuti ndiye uchasungunula iIzilayeli. Eya, pezhulu pezwi kwapinda mazhuba matatu yezwi zwinhu zwatikana. 22 Akale bamwe mamai egapo lyedu batichenamisa. Benda kugumbu zhingwanangwana, 23 bawana untumbu uwe usipo, babuya kwotibuja kuti babona ingilozi yakababuja kuti umpenyu. 24 Bamwe bakabeli nasu benda kugumbu, bakawana sezwalebwa namamai, asi iye nokukwe abajombona."

25 Wakati kwabali, "Imwi malema, ini mujilwa kudimbwa zwose zwinolebwa nabapolofeti! 26 Azwijakabakakwelela na kuti Kristo eyabule ali kutila kuti engwine mulukujo lulwe?" 27 Wakabalungululila zwakabakakwalwa mumakwalo pezhulu pape kuva kunaMozesi newhalo jabapolofeti.

28 Bakabaswendela pelyo nonzi ubakaba benda kwauli. Iye wakata sofana uchinonda mbeli, 29 koga bakombweta kuti egale nabo beti, "Igalani nasu nokuti izhuba lyalebomila masikati apela, kwaboloswibha." Nokudalo wakangwina akagala nabo.

30 Paakaba eligele nabo pakulya, wakatola chinkwa akaboka, akachimedula ebapa. 31 Mesho abo akazhulika bakonziba, asi iye wakava abwandila kwabali. 32 Bakabhuzana chabochabo beti," Myoyo yedu aijabepisa na mukati mwedu, paabelebeleka nasu munzila etipandululila makwalo?"

33 Bakava banyamuka nonshaji yoyo bakabwilila kuJelusalema; bakanowana bali igumi nomwempela, nabamwe bakabelipo, 34 bakati kwabali, "Chokomende She wamuka, akale wabonwa naSimoni!"

35 Babili yaba bakava babalungululila bamwe zwakatikana kunaibo munzila, akale kuti bakonziba chini paakamedula chinkwa.

36 Bechinolebeleka zwose yezwi, Jesu nokukwe wakama pakati pabo. 37 Bakakatamuka, bakatya beyeya kuti posa babweni ishaku. 38 Wakati kwabali, "Ini munyajikana akale ini muli nokukahajika mumyoyo yenu? 39 Lingani maboko angu namakumbo angu, ndimi iye nokukwe; ndigumeni mubone, ishaku alina inyama kana mafupa sozwamubweni kuti ndinanazwo." 40 Akale paakaleba yezwi wakabatondeja maboko nama kumbo awe. 41 Bakashanta kasa zwikabata kuti besibe nokuvumila bakama besinolebeleka, wakati kwabali, "Munanazwo zwokulya yopano na?" 42 Bakompa chibabi chehobe ilogochwa, 43 wakatola akalya mbeli kwabo.

44 Wakati kunaibo, "Yaya mawhi angu andakabemubuja ndichinamwi, kuti zwose zwakakwalwa nezwangu mumulawo waMozesi nomubapolofeti nomuJimbo zwilokwelela kuzhajikijwa."

45 Wakazhula indangalilo jabo kuti bewhisise makwalo, 46 akati kwabali, "Nokudalo kwakakwalwa kuwhi Kristo ulokwelela kusheteswa akale emuke munabakafa nezhuba lyatatu, 47 akale kuti muzina lilye luchingunuko lwokulekejelwa luchinyo lubhaunulwe kunduji jose zwitangisila kuJelusalema. 48 Ndimwi basumikiji bezwi. 49 Lingani ndikumutumila kwamuli zwibakabimbisa Tate, koga galani muguta mujine mupiwe masimba anova pezhulu."

50 Wakabatola akenda nabo bakanoswika kuBhetani akanyamula maboko awe, akaba kombolela. 51 Elimukubakombolela wakabasiya akatanhiswa kudenga. 52 Bakabwilila kuJelusalema, beli nolushanto lukulwana, 53 bakalamba beli muTempeli bekuja Mwali.